26/01/2026
"كل حاجة كتبدا من العقلية، ولكن العقلية بوحدها ما كتعيش. بلا تماسك كتبقى فكرة معلقة فالهواء، وبلا عقلية كيولي التماسك غير تجمع بلا معنى. بين العقلية والتماسك كيتخلق الوعي، ومن الوعي كيبدأ التغيير الحقيقي.
غروب ضارب فـ 19 عام، ولكن باقي كيعاني من نفس المشاكل كل عام. الحلول الترقيعية ديال ستة شهور هلكت الغروب .
الحقيقة المرة هي أن بريغاد وجدة ما عندهاش ساس صحيح اللي غادي تبقى واقفة عليه. خمس سنوات ما كانتش كافية باش تعطينا غروب مقود بساس صحيح.
(Quantité) بلا (Qualité)، ويمكن مع الوقت حتى Quantité ما تبقاش، والغروب غادي يزيد يتقزم أكثر وأكثر.
جيل بلا وعي، بلا عقلية، بلا معرفة بتاريخ اللوغو اللي لابس، جيل باغي غير ينشط ويفرغ داك الكبت اللي فيه، ويجر معاه تصويرة يحرك بها الإنستغرام ولا التيك توك. كل واحد وكيفاش داخل عليها وكل واحد وكيفاش فهم الحركية؛ شي داخل عليها تصاور وشي داخل عليها بيسطولي والقلة القليلة لي عارفة جابدة جنب الحيط ، الجروب باقي مع الأشياء السطحية ما كانش إيديولوجيا ولا فكرة واضحة مبني عليها ، غير غادي هكذاك، على الله، كيفما جات جات.
ما كاين لا رؤية، لا مشروع للمستقبل، حتى البروغرام ديال العام ما كاينش، وغروب بلا رؤية راه محكوم عليه يبقى يدور فحلقة مفرغة.
هاد الخمس سنوات الأخيرة، الغروب ما كانش عندو الشجاعة باش يوقف، ويريغل راسو من جديد. وكل عام الجرح كيكبر وكيزيد يتفاقم. ماشي حشومة توقف وتريغل روحك، راه الحشومة هي تكمل بنفس الغلاط وبنفس الأسلوب اللي خمس سنوات وهو كيغرق فينا. راه معرفة أصل المشكل جزء من الحل. تسيق الدروج كيبدأ من لفوق وأنت نازل
بهذ جهد مغاديش تمشي بعيد غادي تبقى دور في نفس الحلقة بلا جديد يذكر ، كيفما قلت الغروب ديالنا باقي مشاد شكون يطلع نواة شكون يضرب لابنظا شكون يطلع فوق لحديدة حاصل مع المشاكل ديال المناصب .مشكل البريغاد أكبر وأعمق من هاد الشي،وخا حتى هما جزء من المشاكل الكثيرة اللي كيعاني منها الغروب . كل عام غادي يبقا هاد الغروب يفقد دراري الواعرين لي يقدرو يعطيونا الإضافة وغادي يبقا فالغروب غير صحاب الهيت ولي داخلين عليه بيسطولي
