03/06/2026
Als geléierten Historiker konnt ech mer zwar schonn eppes ënnert der Aarbecht an den Archive virstellen. An trotzdem hätt ech nët geduecht, wéi villfälteg an och kreativ dës ka sinn.
Engersäits schaffen ech als Archivist vum Radio 100,7 vill am digitale Beräich. An eisem internen DMS (Data Management System) gi Radiosemissioune vun de Journalist-inne produzéiert, diffuséiert a schliisslech och archivéiert. Hei huelen ech als Archivist eng Kontrollfunktioun an a kucken, op déi passend Metadonnéeë richteg a komplett ausgefëllt goufen.
Ee weideren Aarbechtsberäich betrëfft d’ Erhalen an d’ Opschaffe vun eisem audiovisuelle Patrimoine. Nieft dem ideale Stockage, gehéiert déi progressiv Erfaassung an Digitaliséierung vun eisen analoge Supporten zu engem vun eisen Défien. Dat betrëfft net nëmmen Audioträger wéi Tounbänner, Kassetten oder CDen, mais och visuell Supporten, wéi Fotoen oder Affichen.
Nieft dem Archivage vun eiser Audio-a Bildproduktioun sinn ech awer och fir déi lafend, intern Archive vum Radio 100,7 zoustänneg. Nieft dem ideale Stockage, organiséieren ech, mat der Hëllef vun eisem “Tableau de Tri”, souwuel eis Pabeierarchiven, wéi och eis digital Dokumenter.
E leschte Fokus vu menger Aarbecht ass schliisslech d’ Valoriséierung vum audiovisuelle Patrimoine vum Radio 100,7. Dofir hu mer mam “Bléck zeréck” ee spezifeschen Onlinecontenu kreéiert, an deem a gewësser Reegelméissegkeet, Momenter aus der Lëtzebuerger Geschicht mat der Hëllef vun Archivopnamen nei beliicht ginn.
