Kultur a Patrimoine Konsdref - KuPa

28/03/2026

Et gëtt esou lues Eescht am Duerfkär, de Schäfferot schaaft Fakten a stellt d'Weichen fir d'Zukunft. D'Haus lénks nieft der Kierch (politesch neutrale Begrëff 😉) gëtt geschwënn ofgerappt. D'Konsdrëffer "Petite Marquise" geet elo an déi zweet Phase: vum éiweg laange “Leerstand” zur dauerhafter Ruin a Baubrooch, oder gëtt et mëttlerweil konkret Pläng, déi een sech trauen kann der Ëffentlechkeet ze weisen?
An der Fënster liese mir op engem ale Schëld, dat d'Präisser an der Zäit emol korrekt waren. Wéi ass et haut, op d'Rechnung fir de Steierzueler si mir gespaant, fir d'Resultat um Terrain an den Ëmgang mat de Bierger gëtt et op alle Fall eng déck Datz.

26/03/2026

D'KuPa stellt sech an der neier Sauerzeitung (Editioun 04/2026) vir:
Grousse MERCI

10/03/2026

https://inpa.public.lu/dam-assets/fr/cosimo/janvier2026/14-rue-du-village-breidweiler.pdf
Positiv Entécklungen zu Präitler:
Dësen Haff aus der Mëtt vum 18. Jh., war virun kuerzem ze verkafen an huet en neien Proprietaire fonnt. Och eng Demande de protection gouf gemaach fir den Haff als Monument national de schützen. Den Avis 📄vun der Denkmalschutzkommissioun leit elo vir. Kukt Iech en roueg un, wann Dir alles iwwer d'Geschicht an d'Architektur vum Haff wëllt gewuer ginn.
E Bravo 👏 un déi nei Proprietairen, déi dëse wichtegen Del vum Patrimoine an eiser Gemeng erhalen, renovéieren an fir zukünfteg Generatiounen versuergen. Wichteg ass och de Wee vum nationalen Klassement ze goen fir sech beschtens beroden ze loossen an och vun enger finanzieller Ënnerstëtzung ze profitéieren.
Well: Sou e Projet mecht en net just fir sech, me fir d'Allgemenheet, fir d'Attraktivitéit vun eisen Dierfer fir all d'Awunner an d'Touristen.

01/03/2026

Den 26. Februar 2026 huet de Veräin Kultur a Patrimoine Konsdref (KuPa), gegrënnt am Mee 2025, seng éischt Generalversammlung am Centre Culturel „Kuerzwénkel“ ofgehalen.
De Programm huet mat engem interessante Virtrag vum Dr. Claude Petit vum Natur- a Geopark Mëllerdall zum Thema „D’Regioun Mëllerdall an hire Patrimoine“ ugefaangen. Hien huet d’geologesch, natierlech, kulturell an immateriell Besonneschkeete vun der Regioun ervirgehuewen.
No enger klenger Stäerkung huet d’Generalversammlung ugefaangen. De President huet d’Gäscht begréisst, dorënner Vertrieder aus dem Schäffen- a Gemengerot an d’Deputéiert Octavie Modert. Hien ass op d’Entstoe vum Veräin agaangen, dat am Kontext vum geplangten Ofrëss vun der Maison Lauer am September 2024 steet. Aus enger Initiativ ass am Fréijoer 2025 d’Grënnung vum Veräin entstanen, mam Zil, de lokale Patrimoine ze schützen an opzewäerten.
D’Sekretärin huet den Aktivitéitsrapport presentéiert, d’Tresorière d’Finanzen. De Kommitee krut Entlaaschtung. Nei Memberen am Kommitee sinn d’Julie Meyer an de Max Weber. Fir 2026 sinn nees verschidden Aktivitéiten a Projete geplangt: kleng thematesch Virträg mat Visitte an Initiativen zur Sensibiliséierung fir de lokale Patrimoine. Am Kader vum geplangte „Retro-Owend“ 2027 rifft d’KuPa d’Bevëlkerung dozou op, Fotoen, Bildmaterial a Postkaarten ze deelen, déi weisen, wéi d’Dierfer an der Gemeng Konsdref virum Joer 2000 ausgesinn hunn. D’Material gëtt digitaliséiert a bleift am Besëtz vun de Proprietären. Interesséiert kënnen sech mellen ënnert: [email protected].
D’Versammlung huet och iwwert eng Memberschaft bei der Lëtzebuerger Denkmalschutzfederatioun ofgestëmmt, fir sech landeswäit besser ze vernetzen.
Den Här Buergermeeschter huet d’Wuert ergraff an der KuPa fir hiren Asaz am Déngscht vum lokale Patrimoine Merci gesot an hofft op eng gutt Zesummenaarbecht.
De Veräin seet alle Memberen an Ënnerstëtzer ee grousse Merci a kuckt motivéiert an d’Zukunft.

Natur- & Geopark Mëllerdall

26/02/2026

Haut den Owend: 26. Februar 2026
am Centre Culturel “Kuerzwénkel” zu Konsdref (rte de Berdorf)
18.30 Auer Exposé mam Dr. Claude Petit vum Natur- a Geopark Mëllerdall zum Thema: “D’Regioun Mëllerdall an hire Patrimoine”.
Uschléissend Generalversammlung vun der KuPa
Natur- & Geopark Mëllerdall

05/02/2026

Donneschdeg, de 26. Februar 2026 am Centre Culturel “Kuerzwénkel” zu Konsdref (rte de Berdorf)
18.30 Auer Exposé mam Dr. Claude Petit vum Natur- a Geopark Mëllerdall zum Thema: “D’Regioun Mëllerdall an hire Patrimoine”.
Uschléissend Generalversammlung vun der KuPa

Natur- & Geopark Mëllerdall

31/01/2026

An der Commission pour le patrimoine culturel (« COPAC ») vum 26.11.2025 goung iwwer d'Kierch zu Konsdref mat hirem Alentour riets - de Bericht ass ëffentlech a fir jiddereen via Link online zougänglech.

https://inpa.public.lu/dam-assets/fr/cosimo/novembre2025/eglise-saint-barthelemy-consdorf.pdf

29/01/2026

E flotte Projet an der Gemeng Hieffenech. Sou ähnlech hate mir eis och d'Zukunft vun der Maison Lauer virgestallt. Me leider wollt jo keen (kommunal Autoritéiten) eppes vun eisen Iddien wëssen. Et wier sëcherlech eng Plusvalue fir eisen Duerfkär gewierscht.

A Schulesch est bien plus qu'une épicerie de village, c'est un lieu de rencontre et de partage dans lequel une petite restauration fraiche et locale vous sera proposée.
Mardi-Samedi
9h-18h
Cuisine: 12h-14h
Réservation: +352 26 47 86 04

27/01/2026

📷🎞🎥🎬📽
Kontakt: [email protected]

23/01/2026

Virun 100 Jar gouf am Haus op 9, Lëtzebuergerstrooss de Jean Goedert gebuer.
No senger Schoul zu Konsdref an am Iechternacher Kolléisch huet, huet hien de Cours superieurs zu Lëtzebuerg gemaach an dono Medezin mat uschléissender Spezialisatioun an der Chirurgie an an der Urologie studéiert.
Als Urolog (wou hien besser als „Pissjengy“ bekannt war) a medezineschen Direkter war hie laang Jaren an der Elisabetherinne-Klinik aktiv – an huet och aktiv un der Realisatioun vun der „Klinik“ um Kierchbierg matgehollef.
Politesch war hie 35 Jar laang aktiv: als éischt am Gemengerot vun der Stad Lëtzebuerg an dono 21 Jar als Schäffe vun der Stad Lëtzebuerg an dobäi och Deputéierten an der Chamber.
Niewebäi war hie President vum Sang & Klang Pafendall, vum fréiere Stater SIT (elo „Luxembourg City Tourist Office"), Member a President vun der Ligue médico-sociale an iwwer 50 Jar President vun der Chorale „Le Madrigal de Luxembourg“.
Genee wéi seng Bridder (1 vu sengen 8 Bridder liewt nach) huet hien sech ëmmer staark mat Konsdref verbonne gefillt – esou hat hien nom Doud vu sengen Elteren d’Heemechtshaus „iwwerholl“ a mat Léift restauréiere gelooss fir selwer a senger Fräizäit hei Zäit ze verbréngen. Esou war et net verwonnerlech, wann een de „Pissjengy“ déi eng oder aner Stonn hei am Duerf gesinn huet an hien ech och Zäit geholl huet fir bei der enger oder aner Festivitéit mat dobäi ze sinn.
Konsdref louch him, trotz datt hien an der Stad gewunnt huet, ëmmer um Häerz an esou huet hien och seng läscht Rou no engem Doud am Abrëll 2019 um Konsdrëffer Kierfecht am Familljegraf Goedert-Lesch fonnt.
Iwwregens: am Jengy sengem Heemechtshaus wunnt aktuell eng vu senge Groussniecen mat hirer Famill dran.


Fotoen: Privatbesëtz