08/09/2026
விளையாட்டுப் பொருட்கள் தயாரிப்பில் முன்னணி நிறுவனமான அடிடாஸ் (Adidas), ஒரு காலை இழந்தவர்கள் அல்லது ஒற்றைச் செருப்பு மட்டும் தேவைப்படுபவர்களுக்காக, அரை விலையில் ஒற்றைச் ஷூவை வாங்கும் ‘சிங்கிள் ஷூ சர்வீஸ்’ (Single Shoe Service) என்ற திட்டத்தை அறிமுகப்படுத்தியது. இந்தத் திட்டம் மனிதநேயக் கண்ணோட்டத்தில் பலரது வரவேற்பைப் பெற்றாலும், இஸ்ரேலில் இத்திட்டத்திற்கான விளம்பர தூதராக அந்நாட்டு முன்னாள் ராணுவ வீரரைத் தேர்வு செய்திருப்பது உலகளவில் கடும் கொந்தளிப்பை ஏற்படுத்தியுள்ளது.
இஸ்ரேலில் இத்திட்டத்தின் விளம்பர முகம் மற்றும் கூட்டுப் பங்கேற்பாளராக ஷாலெவ் பிட்டன் (Shalev Biton) என்பவர் தேர்வு செய்யப்பட்டுள்ளார். இவர் நஹால் படைப்பிரிவின் (Nahal Brigade) 931-வது பட்டாலியனில் பணியாற்றிய முன்னாள் இஸ்ரேலிய ராணுவ வீரர் ஆவார். 2021-ஆம் ஆண்டு காசா எல்லையில் நடைபெற்றத் தாக்குதலின் போது இவர் தனது இடது காலை இழந்தார்.
ஆயிரக்கணக்கான சிறுவர்கள் உட்பட பல்லாயிரக்கணக்கான மக்களின் கால்கள் இழப்புக்கும், நிரந்தர ஊனத்திற்கும் காரணமான அதே இஸ்ரேலிய ராணுவத்தைச் சேர்ந்த ஒரு வீரரையே, மாற்றுத்திறனாளிகளுக்கான மனிதநேயப் பிரச்சாரத்தின் முகமாக அடிடாஸ் நிறுவனம் தேர்வு செய்திருப்பது மிகப்பெரிய முரண்நகையாகப் பார்க்கப்படுகிறது. காசாவில் கால்களை இழந்து தவிக்கும் ஆயிரக்கணக்கான பாலஸ்தீனக் குழந்தைகளையும், பாதிக்கப்பட்ட மக்களையும் புறக்கணித்துவிட்டு, தாக்குதலில் பங்கேற்ற ராணுவ வீரரின் கதையை மட்டும் அனுதாபத்திற்குரியதாக முன்னிறுத்துவது ஏன் என்று மனித உரிமை ஆர்வலர்களும் சமூக ஆர்வலர்களும் கேள்வி எழுப்பி வருகின்றனர்.
"ஒரு விளம்பரப் பிரச்சாரத்திற்கு யாரைத் தேர்ந்தெடுக்கிறோம் என்பதே ஒரு செய்தியை உலகிற்குத் தெரிவிப்பதாகும்" என்று விமர்சனம் செய்துள்ள பயனர்கள், காசா குழந்தைகளின் வேதனையை முற்றிலுமாக மறைத்துவிட்டு, ஒரு தரப்பிற்கு மட்டும் பக்கச்சார்பாகச் செயல்படும் அடிடாஸ் நிறுவனத்தின் போக்குக் கண்டித்தக்கது எனக் கூறியுள்ளனர்.
இதன் விளைவாக, அடிடாஸ் நிறுவனத்தின் தயாரிப்புகளை முற்றிலுமாகப் புறக்கணிக்க வேண்டும் ( ) என்ற பிரசாரம் சமூக வலைதளங்களில் தீவிரமடைந்து வருகிறது. பெருநிறுவனங்கள் தங்களின் பக்கச்சார்பான நிலையை உணர்ந்து பகிரங்க மன்னிப்பு கேட்க வைப்பதற்குப் புறக்கணிப்பு மட்டுமே சிறந்த வழி என்று பலரும் குரல் கொடுத்து வருகின்றனர்.
