22/03/2026
පුංචි මිනිසුන්ගෙ මහා පණිවිඩය
අප ජීවත් වෙන මේ සුන්දර ලෝකය අපේම මිනිසුන් කොටසක් විසින් විනාශ කරමින් තම ආශාවන් පසු පස ලුහුබැඳ යන්නේ බොහෝ දෙනාට විනාශය කැඳවමිනි. තවත් කොටසක් තම ආශාවන් පාලනය කරගනිමින් මිහිකත වෙත තම ආදරය පරිත්යාග කර සුවපත් කරන්නේ බොහෝ දෙනාට ජීවත් විය හැකි යහපත් පරිසරයක් සකස් කරමිනි. හැමදාම මෙම කණ්ඩායම් දෙක ලෝකයේ විනාශය හා ආරක්ෂාව වෙනුවෙන් පෙනී සිටියි.
මනුෂ්යයන්ගෙ සිතුවිලි හා ආශාවන් සියළු දෙනාගෙ යහපත උදෙසාම යෙදවිය හැකි නම් බොහෝ සතුන්ටත් මනුෂ්ය සත්වයාටත් බොහෝ යහපත පිණිසම හේතු වනු ඇත. මහ පොළොව, මහ සාගරය, මහ ගංඟා සියල්ලටම පණ තිබේ. ඔවුන් උපත ලබා ස්වභාවිකව තරුණ වෙමින් වයසට යමින් ස්වභාවික මරණයක් කරා ගමන් කරයි. එකී පරිණාමයේදී මේ දැවැන්තයින්(මිනිසුන්,සතුන්,ගහකොළ ) සියල්ලන්ගේ ජීවය පිණිස බොහෝ උපකාර කරයි.
මහ පොළොව ද මිනිසා ද නිර්මාණය වී ඇත්තෙ ඝන ස්වභාවය, ද්රව ස්වභාවය, වායු ස්වභාවය සහ උණුසුම් සීතල ස්වභාවය යන කොටස් හතරක එකතුවකිනි. මහ පොළව සහ මිනිසා අතර ඇති සමානාත්මතාවය මේ මත ගොඩනැගේ. මිනිස් භෞතික ශරීරයේ පැවැත්ම සඳහා ඉහත කී කොටස් හතර පෝෂණය කරන්නේ ආහාර මගිනි. ඒ ආහාර සැදෙන්නේ ද ඉහත ස්වභාවයන් තුළින්ම ගොඩනැගී පවතින මහ පොළොව, ජලය, වාතය සහ උෂ්ණත්වය මගින්ම නොවේද? ඔබ දන්නවාද?
භෞතිකව මේවායේ උපකාරයෙන් සකස් වූ මේ ශරීරය හා බැඳුණු මනස තුළ නිර්මාණය වූ අන්ධකාරය නිසා (නොදැනුවත්කම, මුලාව) තමන් යැයි ඇති කරගත් වැරදි හැඟීම 'මම' ප්රධාන කරගනිමින් අපේ ජීවිත තුළ 'මම' පිනවන්න ගන්නා වූ ආශාවන්හි පොදු ගුණාකාරය මේ මහ පොළොව, මහා සාගරය, වාතය සහ උෂ්ණත්වය ස්වභාවිකව මියදෙන්න පෙර ඝාතනය කරමින් සිටින බව?.
සාගර විද්යාඥයෙක්ගෙන් අහන්න, මිනිස් ක්රියාකාරකම් නිසා සාගරය මිනිසුන් විසින් ඝාතනය කරමින් සිටින විදිය ඔවුන් පවසාව්. පොළොව පිළිබඳව විද්යාඥයෙක් ක්ගෙන් අහන්න, මිනිසා විසින් පොළොවට කළ විනාශය හා එකී විනාශය නිසා මිනිසා හා අනිකුත් සතුන් විඳින්නා වූ දුක් විපාක මොනවද කියලා. වායුගෝලය පිළිබඳව දන්නා කෙනෙකුගෙන් අහන්න මේ වායුගෝලය විනාශ කිරීම නිසා දැනටමත් මිනිසුන් හා සතුන් බොහෝ දුක් විපාක විඳවන ස්වභාවය.
ඒ නිසා මිනිසුන් කුඩා ප්රමාණයකගේ අනවබෝධය හා ආශාව බොහෝ සතුන්ට අයහපත, අවසානය ඉතා ඉක්මනින් ළඟා කරමින් සිටියි. මිහිකත මාතාව මහා විශාලය. ඊට වඩා අනවබෝධයෙන් පිරුණු මිනිසුන්ගෙ ආශාවන් විශාලය.
තුන්වන මිහිකත සමුළුව මහ පොළොව සුවපත් කිරීම සඳහා අප විසින් සංවිධානය කරනු ලැබුවේ අපගේ දරුවන්, වැඩිහිටියන්, සතුන් සහ ස්වභාව දහමේ යහපත වෙනුවෙනි. මිනිස් මනසේ නොදන්නාකම පහකර, මිනිස් ආශාවන් මේ සමස්ථ පරිසර පද්ධතියට ආදරය කිරීම සඳහා යොමු කරවීම වෙනුවෙනි.
මිනිසාගේ ආශාවන් පරිසරයේ ආරක්ෂාව බවට පරිවර්තනය කිරීම වෙනුවෙනි. අප සැම කුඩා මිනිසුන් වෙමු. එනමුදු අපගේ පණිවිඩය ඉතා විශාලය. එය සමස්ථ සත්ව ප්රජාව පමණක් නොව අප ඇවිද යන්නා වූ, ජීවත් කරවන්නා වූ දරා සිටින්නා වූ මිහිකත් මව සුවපත් කිරීම උදෙසාමය.
