05/01/2026
بتتذكر النوت اللي عملناها المرة الماضية
أكيد هسة صارت سلطة عالآخر 🥗🤡
تعال أرتبلك عقلك الثاني بطريقة رفوف الصيدلية
عشان نخفف توتر دماغك كمان شوي 😉
عملتوا الواجب المرة الماضية؟
نزلنا Google Keep أو Notes وبلشنا نكتب كل شي بالصندوق الوارد = Inbox
شعور مريح صح؟ انك تفضي مخك أول بأول...
بس في مشكلة رح تواجهك اليوم أو بكرة بالكثير ..
لما تفتح النوت رح تلاقيها صارت زي جارور الكاش لما يكون معجوق
فاتورة كهربا على اسم دواء مقطوع على رقم مندوب على موعد تطعيم ابنك ..
كلّه فوق بعضه على رأي مرجان أحمد مرجان 😁
وهون بصير الخطر = عقلك رح يبطل يثق بالنظام ❌
رح يحكيلك = يا عمي هاي فوضى .. بلاها وخليني أحفظ بعقلي أضمن
وبنرجع لنفس الدوامة والتوتر من جديد يا حزين 🤡...
لذلك اليوم بدنا نحول الجارور المكركب إلى صيدلية منظمة ومتكتكة 🙆🏻♂️
زي ما أنت عارف بالضبط وين مكان الـ Panadol ووين مكان الـ Amoclan بالصيدلية
لأنه الهم سستم مسجلين عليه ومعروف وجودهم من عدمه
رح نعمل نفس الإشي بملاحظاتك وحياتك
🏛 رح أعلمك اليوم منهجية الـ P.A.R.A (بس بنكهة صيدلانية)
====
هاد يا سيدي في خبير إنتاجية عالمي اسمه Tiago Forte
اخترع نظام تنظيم ديجيتال عبقري وبسيط اسمه PARA
أنا أخدت النظام تبع بارا و"أردنتلك" اياه يعني Localized it 😁
ليناسب حياة الصيدلي الموظف وشغله
افتح تطبيق الملاحظات تبعك
واعمل حسب التطبيق اللي بتستخدمه 4 مجلدات Folders أو Labels رئيسية فقط
= لا تكثر وتضيع حالك.....
أي معلومة أو ملاحظة في حياتك لازم تنزل في واحد من هدول الأربعة 👇🏻
1️⃣ مجلد المشاريع (Projects) - (التركيز الحالي)
هاد للأشياء اللي الها بداية ونهاية ولازم تخلصها في الفترة القريبة
زي شو؟
تجديد ترخيص مزاولة المهنة
تخليص إجراءات قسط السيارة
دراسة كورس عن مضادات الفطريات
تجهيز تقرير الجرد الشهري للمدير
(بمجرد ما تخلص المهمة = بتشطب المشروع)..
2️⃣ مجلد المسؤوليات (Areas) - (المتابعة المستمرة)
هاد للأشياء اللي ما بتخلص = ومطلوب منك تديرها طول العمر
زي شو؟
"مالية البيت" = بتحط فيه ديونك وأقساطك ومصاريفك
"إدارة الصيدلية" = (لو كنت مسؤول عنها) ومتابعة دوام الموظفين مثلا
"صحة العائلة" = ملفات وتواريخ تطعيم أولادك وفحوصات الوالد مثلا
هون بتحط المعلومات اللي بتحتاجها بشكل دوري عشان "تمشي حياتك"...
3️⃣ مجلد الموارد (Resources) - (المكتبة والمرجع)
هاد أهم مجلد للصيدلي .. هاد هو الرف الأهم عندك
أي معلومة بدك ترجعلها بالمستقبل عشان شغلك أو اهتمامك
زي شو؟
قائمة "بدائل الأدوية المقطوعة في الأردن"
جدول "جرعات الأطفال" (صور)
أرقام هواتف مندوبين الشركات (مصنفة)
سكرين شوت لبوست عن "العناية بالبشرة" شفته ع الفيسبوك وعجبك
هاد المجلد بكون هو مرجعك "السحري" لما حد يسألك سؤال وبدك تجاوبه بسرعة..
4️⃣ مجلد الأرشيف (Archive) - (المستودع)
أي مشروع خلصته أو معلومة بطلت تلزمك بس ما بدك تكبها
ارميها هون عشان ما تكركب المنظر
وبنفس الوقت تلاقيها لو احتجتها بعد سنة
=====
⚙️ طيب كيف نطبق هاد الكلام عمليا بالشفت؟ (السيناريو اليومي)
👈🏻 زي ما تعودنا دايما الخطوة 1 هي الصيد (Capture)
وأنت بتشتغل اجاك مندوب أعطاك عرض
وتذكرت تشتري خبز والمدير طلب تقرير
اكتبهم كلهم بـ "Inbox" بسرعة وبدون ترتيب (زي ما تعلمنا بالبوست الماضي)...
👈🏻 الخطوة الثانية هي الفرز (Organize) - بدقيقتين بس
بآخر الشفت (أو وأنت راكب الباص/السيارة مروح)
افتح الـ Inbox ووزعهم:
شراء خبز = على مجلد المسؤوليات (البيت)
عرض المندوب = على مجلد المشاريع (طلبية الشهر)
التقرير = على مجلد المشاريع
وفضّي الـ Inbox...
🧠 وهون بييجي السحر مع هاي الحركة
لما تشوف الـ Inbox فاضي وكل شي راح مكانه
عقلك بيفرز "دوبامين" الشعور بالإنجاز والسيطرة
بتبطل تفكر "شو وراي؟" لأنك عارف وين رح تلاقي كل شي مكتوب ومصنف 😉
====
وبهيك صار معك السر الأعظم هون = وهو محرك البحث
ميزة العقل الثاني الرقمي إنك مش لازم تكون مرتب 100%
ولا لازم تكون متذكر كل حرف 100% طول الوقت
ليش؟ لأنه في زر بحث Search
بس تكتب كلمة "بونص" أو كلمة "تطعيم"
التطبيق رح يطلعلك النوت فورا وين ما كانت مخبية
يعني حتى لو كنت فوضوي = التكنولوجيا بتغطّي عشوائيتك وبتستر عليك 😁
=====
✅ الواجب العملي لليوم
ادخل ع التطبيق (Keep/Notes)
واعمل الـ 4 مجلدات (Projects, Areas, Resources, Archive)
امسك النوتات العشوائية اللي كتبتها مبارح وزتها جواتهم
وصورلي الشاشة (Screen shot) للمجلدات وهي فاضية وجاهزة تستقبل عقلك
وحطلنا اياها هون عشان تجبر نفسك تلتزم بهاي الخطوة 💁🏻♂️
في البوست الجاي .. رح نحكي عن القوة الخارقة 😉
كيف تخلي هاد التطبيق يشتغل "بدالك"؟
يعني يسجلك ملاحظات بصوتك وأنت بتسوق
ويقرأ الكلام من الصور (OCR) عشان ما تكتب بإيدك
الموضوع بلش يحلو .. رتب رفوف مخك يا عزيزي 😎
وانتظرنا في البوست القادم
