https://www.facebook.com/114946853234636/

Iraqi Clinical Embryologists, حي الجامعة, شارع ٦٦, مجمع الكندي الطبي, السبت و الثلاثاء و الخميس فقط, يرجى الحجز قبل ٤ ايام من الحظور, Baghdad (2026)

05/12/2024

تكملة المنشور السابق
احنا حصلنا جنينين
جان واحد درجة ثانية واللي هو عاليسار
والجنين الثاني درجة رابعة واللي جان على جهة اليمين

جنين درجه الثانية الحمد لله كمل انقسامه وتم ارجاعه للزوجة ويارب بلكي نحصل حمل به.

الجنين الثاني واللي هو جان درجة رابعة
اليوم فحصته ومامتخيل ابدا الكي اي تحسن به بس لكيته ماشاء الله مكمل وصاير عمره ٥ ايام والحمد لله بلغت المريضة والطبيبة وجمدناه اليوم 🥰🥰🥰🥰🥰🥰 صورة الجنين ايضا موجود بالمنشور.
بحيث كمية الفرحة اللي حسيتها اليوم ماتنوصف 🥰🥰🥰🥰

يعني فضل رب العالمين الجنينين استفادينا منهم لانه كملوا
واني جنت مستحيل اتخيل هاي النتائج احصلها ولا ممكن جانت تخطر على بالي هيج انجاز عظيم ممكن اوصله بس جان توفيق رب العالمين حليفي كلش.
كلتلكم مراح اتراجع وراح استمر وان شاءالله استمر بعد وبعد.
للعلم للي مافهم المنشور زين راح اوضح بشكل اكثر
بالعادة باطفال الانابيب لازم نختار حيمن كامل (يعني يتكون من راس وعنق وذيل) يله نكدر نستخدمه.
هاي التقنية سمحت النا انه ممكن في حالة انه الزوج مايمتلك حيامن كاملة واللي يسموه نسبته صفر وبعد اجراء عملية الخزعة من الخصية وهم مانلكي حياكن كامله. كدرنا والحمد لله نسوي اجنة باستخدام خلايا من الخصية للزوج نفسه. والحمد لله الاول بالعراق وهذا فضل رب العالمين عليه.
وان شاء الله راح انشره كبحث علمي في المجلات العالمية لاول حالة بالعراق.🥰🥰🥰🥰🥰🥰🥰
الي اطلبه منكم ان تدعولهم بالحمل يارب.

02/12/2024

اول عملية أطفال انابيب بالعراق
بدون استخدام حيمن ناضج ( الحيمن الناضج هو الحيمن الذي يتكون من راس وعنق وذيل) ومن خلال عملية ROSI
تكون اول جنينين من اصل ٥ بيوض كانت مجمدة وبعد اذابتها تم حقنها بخلايا منوية والتي تسمى ROUND SPERMATID والتي تستخلص من خصية الزوج حصرا.
واليوم هو ثاني يوم انقسام
تكون جنينين (جنين درجة ثانية وجنين درجة رابعة)
هذه التقنية هي للازواج الذين يعانون من انعدام وجود الحيامن الناضجة في الخصية بعد اجراء عملية خزعة للخصية
تم تحفيز الاخصاب بواسطة الجهاز الذي تم اعلان عن وصوله سابقا.
هذا يعد انجاز للعراقيين. وبوابة امل وان كانت بسيطه للازواج الذين يعانون من عدم وجود حيامن.
فابدا لا تيأسون رب العالمين دائما يوجد حلول لكل مشكلة.
الحمد لله الي خلاني اكون السبب لهذا الانجاز.
صورة رقم ١ هي البيوض بعدما تم اذابتها
صورة رقم ٢ هي الاجنة
سيتم دراسة الجنين الثاني وراثية للتاكد من سلامتة قبل عملية الارجاع.
ادعولنا يكمل الجنين نموه بشكل افضل باجر ان شاء الله.
حتى نفرح العائلة بارجاع للاجنة الهم يارب.
اول من قرر يدخل هذه التقينة للعراق واول من حصل نتائج بيها.
مع تحيات جدو المختفي🫣🫣🫣🫣🫣

04/09/2024

اليوم جدو يشرحلكم شنو الفرق بين ارجاع جنين فريش (بنفس شهر سحب البيوض) و بين جنين مجمد
ليش نسوي هيج وشنو الفائدة من هالشي.

🥸 اولا فكرة تجميد الاجنة صارت بسبب عدد الاجنة اللي دنحصلها من نسوي اطفال الانابيب.
المشكلة انه مايصير نرجع للمراجعة اكثر من جنينين او ممكن ٣ اجنة.

🥸بما انه الاجنة ماتتحمل تعيش اكثر من ٦ ايام بداخل المختبر.
واذا عندنا عدد من الاجنة هواي وين نوديهم؟ خوما نتلفهم؟ طبعا لا. فهنا تم اختراع فكرة انه العدد الزايد من الاجنة نكدر نحتفظ به بتقنية التجميد.

🥸 لهنا الامور واضحة وتمام؟

زين ياجدو شنو الاسباب اللي تخليكم تختارون تجميد الاجنة؟

🥸 عندنا هواي اسباب خل نسولف عنهن:

- نجمد الاجنة حتى نزيد من عدد محاولات الحمل. لان كل عملية ارجاع هي فرصة للحمل.

- في حال صار عندنا عدد من الاجنة اكثر من اللي نحتاجة. فنكدر نضم الباقي للمستقبل.

- اذا جان بطانة رحم المراجعة مو مناسبة لارجاع الاجنة.

- في حال المراجعة صار عندها فرط اباضة ( فرط تنشيط) لانه ممكن يكون اذا رجعنا خطر عليها وممكن يكون اكو تجمع سوائل بداخل الرحم فتمنع الارجاع والحمل.

- في حال جان عدد البيوض المسحوبة قليل ونريد نرجع اجنة بعمر ٥ ايام فلازم يكون عندنا عدد مناسب حتى نشوف ممكن نكدر تكمل الاجنة لعمر ٥ ايام؟ فنحتاج نجمع اجنة ولهذا نجمد.

- في حال جان عند الازواج امراض وراثية فلازم نجمد الاجنة حتى نكدر ندرسها لان دراسة الامراض الوراثية تاخذ وقت لحدما تطلع النتيجة.

زين ياجدو ياهو الافضل انه نرجع جنين فريش لو مجمد؟

🥸 نسبة الحمل بارجاع الاجنة المجمدة اعلى من نسب الحمل بارجاع الجنين بنفس شهر سحب البيوض.
بس ضروري يكون اخصائي الاجنة شاطر بحيث مايتلف الاجنة خلال عملية التجميد.🫣🫣

زين ليش ياجدو نسبة الحمل اعلى؟ شنو السبب؟

🥸 هنا شوية ركزوا ويه جدو .
احنا من ننطي منشطات للزوجة من ثاني يوم دورة. شنو هدفنا؟

اكيد نريد نحصل اكبر عدد من البيوض صح؟

🥸 صح.
اذن هاي المنشطات هي خاصة للبيوض فمعناتها دنحاول نخلي المبيض يتنشط ونحصل بيوض هواي منه.
يعني جان هدفنا هو المبايض.

🥸 بس بعدما سحبنا البيوض وخلصنا وصار عندنا اجنة هسه هنا احنا نحتاج الرحم صح؟ حتى نرجع الجنين للرحم. يعني بعد مايهمنا المبيض. لان خلص دوره بعد. صحيح؟

صحيح ياجدو. لهنا فاهمين احنا. بس كمللنا.

🥸 زين من نريد نرجع الجنين وين نزرعة احنا؟

اكيد نزرعه بالرحم.

🥸 فيعني لازم نغذي الرحم بشكل جيد جدا.🤗🤗🤗

🥸 بما انه هرمونات التنشيط للمبايض تغذي المبايض اكثر مما تغذي الرحم. هنا كالوا الاطباء انه لهنا بعدما سحبنا البيوض. نكول للزوجة تروح لبيتها وترتاح.
وترجعلنا ورة كم شهر يكون هرمونات التنشيط طلعت من جسمها بعد ومابيها اي تاثير عالرحم.

🥸 من تجي المراجعة حتى نرجعلها الاجنة. ننطيها تنشيط جيد للرحم حتى من نرجع الاجنة يكون مكانها بالرحم متغذي كلش زين.

(فهنا شافوا انه تجميد الاجنة نسبة نجاحها اعلى من ارجاع الاجنة بنفس شهر سحب البيوض.)

زين هسه معناتها انه كلنا من نسوي اطفال انابيب مانرجع راسا ونجمد؟

🥸 ياجدو هالشي يعتمد على نوع ابر التنشيط. وطريقة استجابة جسمج لهاي الهرمونات. وهل هي تاثر بشكل كلش جبير على نسب الحمل لو لا؟

وهذا قرار الطبيبة ياجدو.🥰

المهم ياجدو انه حاولوا شكد ماتكدرون تسوون كلشي ممكن يزيد من فرصة انكم تصيرون ماما🥰🥰🥰

ربي يحفظكم ويفرح قلوبكم وتحصلون كلشي تتمنونه🤗

03/09/2024

من احلى لحظات حياتي اللي بيها اكون من صدك سعيد صار اليوم وياي
زوجين واصلين لمرحلة التعب
الزوج يعاني من صفر حيامن بالعينة وبشهر واحد علاج احصله تقريبا ٢٥ حيمن تتحرك وصالحة لاطفال الانابيب.
اتخيلوا كمية الفرح
لا اني ولا هم مصدكين اللي صار
الفرحة شي ولا اروع.
ابد لا تفقدون الامل.
🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰🥰

29/08/2024

🥸 خل نفصخ اليوم الشي اللي هالايام مسويه بعبع ومدوخين الناس به واللي هو اسمه تكسر المادة الوراثية للحيمن.

🥸 اول شي خل نفهم ليش سميته بعبع؟ 👻👻👻
شايفين من جنه صغار ويحجولنا عالسعلوة؟
هو مجرد تخويف على شي غالبا ماموجود. صح؟
نفس الشي هنا. وهسه حسولفلكم شنو هو وشنو الغلط والصح منه. حتى تستفادون وتعرفون كلشي عنه.😉😉

🥸 مثلما تتذكرون انه الحيوان المنوي (الحيمن او النطفة) هو عبارة عن راس ورقبة ( منطقة وسط بين الراس والذيل) والذيل.
صورة رقم ١

🥸 احنا اتفقنا بالمنشور السابق انه اكثر شي يهمنى هو راس الحيمن.

ليش ياجدو؟

🥸 لان يحتوي على المادة الوراثية للحيمن واللي تحتاجه البيضة حتى تسويلنا طفل احلى من اهله🤪🤪🤪

زين ياجدو شتسوي البيضة بهاي المادة الوراثية؟

🥸 ياجدو البيضة عندها نص المادة الوراثية فتريد النص الثاني الموجود براس الحيمن حتى تدمجهم سوة وتصير هاي المادة الوراثية كاملة فيصير عندنا جنين واللي بعدين يكبر برحم امه ويصير طفل. ( احلى من اهله على عنادكم 🫣🫣🫣)

🥸 شوفوا صورة رقم ٢ واني سبق ونزلتها بمنشور بس للتذكير حطيتها هنا مرة ثانيه.
لهنا الموضوع بعده بسيط؟ ومفهوم؟

🥸 غالبا المادة الوراثية للبيضة حاميها رب العالمين. بس الحيمن ممكن يتعرض لخلل واللي يسمونه تكسر المادة الوراثية. ( الموضوع طويل كلش مو مال اسولفه هسه).🤫🤫🤫

🥸 زين من يصير تكسر المادة الوراثية بالحيمن شيصير عندنا؟

- تاخر الحمل رغم ماكو تفسير منطقي.
- اسقاطات متكررة مايعبر الحمل الشهور الثلاثة الاولى وماكو تفسير منطقي للي ديصير.
- فشل متكرر بالتلقيح الصناعي رغم كلشي زين.
- فشل بمراحل معينة في اطفال الانابيب.

جدو اكو فحص نكدر نعرف به اكو تكسر لو لا؟

🥸 اكو تحليل نكدر به نعرف اكو تكسر ؟ وشكد نسبة التكسر
واسم التحليل بالانكليزي (S***m DFI )

زين ياجدو هو يرهم اي زوج ممكن يسوي التحليل؟ لو هو حيصير مجرد صرف فلوس بدون نفع حقيقي؟

🥸 ياجدو مو ياهو اللي يراجع لازم يسوي هذا التحليل.
التحليل هذا يتقسم الى ٣ مجموعات كل مجموعة الها عوامل تخلينا نفحصة لو لا:

مجموعة رقم واحد:
مراجعين يردون حمل بالبيت.🥰🥰🥰

هنا نسوي تحليل التكسر في حالة؛
الزوجة تكون بيضتها دتكبر طبيعي ودنشوفها انطلقت بالسونار.
انبوبها مفتوح ومابه اي مشاكل ومتاكدين منه بالاشعة الملونة.
رحمها مابه اي خلل من كل النواحي.
وزوجها يكون ضروري تحليل السائل المنوي سليم وضمن المعايير العالمية لسنة ٢٠٢١ واللي تمكنه ان يحصل حمل باول سنة من محاولة الزوجين على الانجاب.
مع كل هذا الزوجين ديتاخر الحمل عندهم🥹🥹🥹🥹🥹
هنا نسويله ضروري تحليل تكسر المادة الوراثية.

🥸 اي مشكلة موجودة المفروض نحلها يله بالاخير نسوي الفحص.

زين ليش؟

🥸 لانه الطب دائما ينصح بالاول نحل كل المشاكل اللي دتمنع الحمل واللي هي سهلة وماتكلف المريض فلوس زايدة. يله وراها نتجه للفحوصات المتقدمة.

يعني اذا جان الزوج عنده مشكلة اعداد الحيامن قليلة كلش اكو فايده من التحليل؟
🥸 الجواب طبعا لا. حيصير بس صرف فلوس.

اذا الزوجةعنده حركة الحيامن اللي تكدر توصل للبيضة قليلة كلش اكو داعي نسوي تحليل التكسر؟

🥸 الجواب طبعا لا.

اذا الزوج عنده زيادة بنسبة الحيامن المشوهة بشكل جبير اكو اي نفع من هذا التحليل؟

🥸 الجواب طبعا لا.

🥸 لهنا اوك الامور وضحت؟

المجموعة الثانية:
اللي يردون يحصلون حمل بالتلقيح الصناعي (IUI)🥰🥰

🥸 كلنا اتعلمنا انه بالتلقيح الصناعي. الزوجة لازم كلشي عندها تمام. مثل الحمل الطبيعي.
يعني نرتب البيضة والانبوب والرحم كلهم. ومتاكدين منهم تمام.
يبقى الزوج لو هو ماعنده مشكلة بس مديحصلون حمل بالبيت فنسويلهم تلقيح.
لو الزوج عنده مشاكل بسيطة بالعينة ممكن تاخر الحمل بالبيت فنسويلهم تلقيح.

لهنا صح؟ 🤔🤔🤔🤔

🥸 اذا جان عندهم محاولات بالتلقيح وجانت العينة بعدما تحضرت من اخصائي الاجنة او المختبر وطلعت كلش مناسبة للتلقيح ومصار حمل بيها، او صار الحمل بس ماطول كم شهر وخسرنا الحمل. وهسه قرروا يعيدون التلقيح.؟

هنا ممكن نسوي فحص تكسر المادة الوراثية؟
اي هنا ممكن وكلش مفيد وفلوسنا حطيناها بالمكان الصح.🥰

المجموعة الثالثة:
اللي مقررين يحصلون حمل باطفال الانابيب.🥹🥹🥹🥹

🥸 جدو يكول هنا شوية ركزوا وياي🧐🧐🧐🧐
اني عندي مشكلة ويه اللي يطلب مني نفحص تكسر المادة الوراثية لهيج حالات.

زين ياجدو ليش ؟

🥸 الغالب الاعظم من الرجال عندهم نسبة معينة من الحيامن بيهن تكسر المادة الوراثية رغم انه الزوج ماعنده اي خلل بتحليل السائل المنوي ويكدر يحصل حمل طبيعي بالبيت. وهالشي مو بسبب مرض معين. لا طبيعي كلش. ولهذا اعداد الحيامن كلش هواي ويكونن بالملايين حتى يبقى الرجل قادر على الانجاب.

يعني من نفحص رجل سليم نلكي اكو نسبة من الحيامن بيها تكسر؟

🥸 اي نلكي. وممكن توصل نسبة التكسر لحد ٢٠ بالمية والزوج بعده يكدر يحصل حمل طبيعي وبالبيت هم. شنو رايكم؟🥰🥰🥰

هسه نرجع نكمل

من نريد نسوي فحص التكسر. شنسوي؟🤔🤔
🥸 ناخذ الحيامن ونموتها ونطلع المادة الوراثية ووراها نسوي الفحص. ونشوف شكد النسبة؟
يفضل ماتزيد عن ٢٠ بالمية

زين يصير اني اسوي جنين باطفال الانابيب من حيمن موته اني بايدي؟
🥸الجواب طبعا واكيدا ولازما ومستحيلا وممنوعا لا.🤣🤣🤣🤣🤣🤣🤣🤣🤣🤣

اذن اني باطفال الانابيب لازم اخذ حيمن عايش حتى اسوي به جنين.

يعني انه من اريد اسوي اطفال انابيب حختار حيامن مااعرف اذا جان به تكسر او لا. صح لو لا؟

🥸جواب السؤال. هو ماراح استفاد شي من اسوي هذا التحليل.

السؤال اللي يطرح نفسه هنا. اذا اي رجال عنده حيامن بيها تكسر مادة وراثية ومااكدر اعرف ياحيمن سليم او به خلل من اريد احقن هذا الحيمن بالبيضة. بشنو حيفيدني التحليل هنا؟

🥸 الفكرة المنطقية الوحيدة هي؛ بحالة اذا جان عنده نسبة التكسر كلش عالية حيكون غالبا اني ححقن حيمن به خلل. مو🤔

اذن الجواب يكون اني اذا اريد اسوي التحليل بهذه الحالة هو علمود اعرف الاحتمالية وبس مو اكثر ولا راح يفيدنا بشي بمحاولة اطفال الانابيب.
يعني نتيجة التحليل حتكوله لجدو انه انت ياجدو ياحبيبي غالبا حتحقن حيمن به مشكلة.
هنا معناتها جدو لازم يلكي غير حل حتى يحقن حيمن سليم.😉😉😉😉😉😉

جدو شكلك بهاي 😉 عندك سالفة تفيد لهاي الحالات غير موضوع فحص تكسر المادة الوراثية.
🥸 ممممممم😁😁😁😁😁😁😁
الشاطر يفهم قصد جدو

26/08/2024

اليوم نغير شوية
ونريد منكم
تقييم للصفحة؟
مدى رضاكم عن المحتوى؟

بما انه يوميا نستفاد معلومة
فحبيت تشوفون ادواتنا تحت المجهر بقوة تكبير ٢٠٠ مرة
نستخدمها لغرض اخذ خزعة من الجنين وبعدين نكدر ندرس الاجنة لغرض الامور الوراثية ومنها تحديد الجنس.🥰🥰🥰

26/08/2024

صباح الخير جدو.
احنا بنات ثنين تلاقينا بمركز عقم وصرنا صديقات لان جنا دنسوي عملية اطفال انابيب بنفس اليوم. البنية جانت علمود تحديد جنس لان تريد ولد واني اريد احصل طفل لان صار هواية ماعندي طفل. بس للاسف فشلت😭😭 😭😭😭ونفسيتنا اندمرت لان جان حلمنا نحصل اللي نريده وثنيناتنا قررنا بعد مستحيل نعيد العملية. لان كلش يأسنا🥹🥹🥹🥹🥹.

🥸 انتوا مثل بناتي فياباباتي اسمعوا مني هالكلام.
الله يعينكم عالحزن اللي انتوا هسه به واحنا هنا عائلة وكلنا حاسين بيكم وفاهمين مشاعركم. وكلنا ندعيلكم ربنا حتى يفرح قلوبكم ويهدي بالكم يا جدو.

🥸 اول شي المشكلة انه اغلب اللي يشتغلون بهالمجال يحجون بانه هي عملية اطفال انابيب وياجدو هذا مو صحيح. هي اسمها محاولة وحتى اسمها بالانكليزي هو محاولة بس غلط لفظي يكولون عملية.

زين ياجدو ليش هو شنو الفرق؟🤔🤔🤔

🥸 الفرق انه من نكول عملية فغالبا النجاح اعلى من الفشل. يعني مثلا اني مااشوف زين واريد اصحح بصري فمن اروح اسوي عملية تصحيح البصر واطلع من العملية ماترهم اطلع مااشوف. صح؟ لان الغالب الاعظم من العمليات يكون النجاح مضمون.

🥸 اطفال الانابيب هي محاولة. لان الفشل اكبر من النجاح. فيعني انه احنا وانتوا نحاول نحصللكم حمل. لان كلنا كبشر مانكدر نظمن انه الحمل حيصير. بس المشكلة انه من يوصلولكم فكرة انه النجاح مضمون وراح ندخلج انابيب وحتصيرين حامل هالشي يسمونه امل مزيف. واذا ياستار مصار الحمل حيكون الصدمة كلش جبيرة. واني كلش اكره هالشي.

🥸 بينما لو من البداية وقبل كلشي يفهموكم ترة احنا وانتوا حنحاول ونذب كل جهودنا وخبراتنا حتى نحصل حمل ويكون المراجع مطلع على كل جوانب الفشل اللي ممكن نواجهها ثنيناتنا. هنا التوقعات الزايدة حتكون ماموجودة. و راح يكون ياستار الفشل مو مؤذي لدرجة اليأس.🥹🥹🥹

زين ياجدو هي شكد نسب نجاح طفل الانبوب؟

🥸 بحال رجعنا عمر الجنين من ٢ الى ٤ ايام مايتجاوز ٣٨%
واذا رجعنا عمر الجنين ٥ ايام يكون نسبة الحمل ما تتجاوز ٦٠%.

زين ليش عمر الجنين يزيد من نسبة الحمل؟ وليش مو دائما ترجعون على عمر ٥ ايام؟

🥸 بالحمل الطبيعي. البيضة من تتخصب تبدي رحلة تهاجر بيها بانبوب فالوب. من يم المبيض الى ان توصل لبيت الرحم حتى تنغرز بالرحم وتصير طفل. هاي الرحلة تحتاج تقريبا ٥ ايام ونص.
فاذن ربنا خلق عمر الجنين ٥ ونص يله تصير عنده قدرة الانغراز.
لهذا ياجدو الجنين بهذا العمر نسبة الحمل به اعلى.

🥸 اما سؤالج ياجدو انه ليش مو دائما نرجع بعمر ٥ ايام؟
اسبابه هواية ومنها:
اكو ناس تكول انه بيت الرحم اللي ربنا خلقه اكيد افضل من الحواظن اللي البشر صنعها فنرجعها للرحم من البداية حتى نضمنها تكون بمكان افضل.

ممكن يكون خلل بالحواظن داخل المختبر فيخافون انه الاجنة ماتكمل فيرجعون الاجنة من وقت للزوجة.

في حال انه عدد الاجنة يكون قليل فيستعجلون بارجاع الاجنة.

ممكن عمر الزوجة نوعا ما جبير فيخافون ويرجعون الاجنة قبل عمر ٥ ايام.

🥸 ياجدو اريد احجيلكم شي ونكون كلنا صريحين ومانزعل من بعضنا.
عندنا مشكلة بالمجتمع سواء الطبيبة او المراجعة. واللي هي ماتتقبل فكرة الاجنة اذا ماكملت لعمر ٥ ايام. وهالشي ديخلي المراكز ترجع من وقت حتى لا تنحط كدام مشكلة ليش ماكملت الاجنة والعملية فشلت وممكن وراها تطور المشكلة وانتوا تعرفون هذا الزمن صار الانسان يتجنب المشاكل. يحفظ رب العالمين الجميع ويستركم من المشاكل.

فالمفروض تصير توعية بهالجانب ويكون المراجع هو احرص على انه يتاكد من الجنين يكدر يوصل لعمر ٥ ايام لو لا.
لان ياجدو لاتنسين انه اذا رجعنا والبنوتة انتظرت ١٤ يوم حتى تعرف انه هي حامل لو لا. الصدمة هنا تكون اكثر مؤذيه مما لو تنتظر كم يوم حتى تعرف الجنين كمل لو لا. صح كلامي؟

🥸 فاتمنى انه الناس هي تكون حريصة على فكرة ننتظر الجنين لحدما يكون جاهز للارجاع افضل كلش هواي.

زين عندي سوال. انت كلت قبل شوية انه الجنين من يوصل عمر ٥ ايام يله يكدر ينغرز بالرحم. صح؟

🥸 اي صحيح هذا كلامي.

يعني اني من ارجع الاجنة مثلا بعمر ٣ ايام شحيصير بداخل الرحم؟

🥸 الجنين راح يبقى يكبر وينمو لحد ما يوصل عمر ٥ ايام ونص وراها يبدي ينغرز. فمعناتها انت صرتي حاظنة للجنين بدل الحواظن اللي بمختبر الاجنة. ولهذا يكلولج ظلي نايمة ولا تتحركين ومن هالسوالف ياجدو.

جدو هسه اني وصديقتي اقتنعنا بكلامك بس تكدر تنصحنا شنسوي ؟ يعني تنصحنا نعيد مرة ثانية محاولة اطفال انابيب؟
وشنو ممكن نسويه حتى نزيد من فرصة الحمل؟

🥸 ياجدو الله يخليكم لا تيأسون ابدا ابدا. وظلوا حاولوا وان شاء الله ربكم الرحيم مايضيع تعب احد. حاشاه هو الرحيم علينا كلنا ويفرح على فرحنا. فاتوكلوا وعيدوا المحاولة.
بس من تردون تعيدون سووا هاي الامور حتى تزيدون من فرصة الحمل:

اولا لاتمشون ورة مجرد اسم المركز هالشي مو شرط يكون اساس النجاح. صحيح انه كلما اشتهر اسم المركز ممكن يكون بسبب النجاحات بس بهالزمن الشهرة صارت تجي من غير اساليب.

ثاني شي. استفسروا من طبيبتكم الطرق الحديثة واخذوا وانطوا واتناقشوا ويه الطبيبة حتى توصلون لافضل نتيجة.

ثالث شي افهموا انه اغلب اسباب النجاح هو الجنين فمعناتها اتعرفوا على اخصائي الاجنة وشوفوا وياه شنو الحلول والطرق اللي ممكن تفيد حالتكم. لان كل مراجعة وحالتها تختلف وكل محاولة هم وضعها يختلف. فضروري يكون اخصائي الاجنة فاهم مو حافظ. ويكدر يلكي حلول.

رابع شي وهو كلش مهم. ابدا ابدا لاتعيدون الاخطاء القديمة اللي صارت بالمحاولة السابقة.

خامسا خليكم على تواصل مستمر وافهموا كلشي هنا من الصفحة من ناحية البيوض والاجنة وكل الامور اللي دتصير باطفال الانابيب حتى انتوا تكدرون تشخصون اسباب الفشل ياستار.

🥰🥰جدو رجعلتلنا الامل وراح نسعى ونذب مجهود ونعيد المحاولة وان شاء الله نفرحك بنتيجة الحمل.🥰🥰

25/08/2024

اليوم عندنا سؤال من متابعة للصفحة واللي هو:

زين هاي البيضة محاطة بقشر والي ادري بي انتوا بالمختبر تشيلوا منها وتتحضر للحقن المجهري لكن بالطبيعه وبداخل الجسم من تنطلق من كيسها هم تكون مقشره لو بطريقها تتقشر لو ورى ٣٧ ساعه؟؟؟ اتمنى ترد
وشكرا للمعلومات القيمة 🌹🌹

جدو ممكن تجاوبها؟

🥸 السؤال كلش حلو وان شاء الله اكو بالجواب شغلات من خلالها حتشوفون عظمة الخالق عز وجل🥰

🥸 اذا تتذكرون شوفتكم شلون شكل البيضة الحقيقية اللي نسحبها من الكيس مالتها (اللي انتوا تشوفه بالسونار).
سبحان الله هاي البيضة محاطة بعدد كلش جبير من خلايا وظيفتها تغذي هاي البيضة. يعني توكلها وتشربها😁😁

وهالشي يدل على شكد مهمة هاي البيضة وشكد غالية وثمينة
صورة رقم ١ هي البيضة الحقيقية.

🥸 بس باطفال الانابيب احنا نحتاج البيضة نفسها حتى نحقنها بحيمن ونسويلكم طفل. فهنا لازم نتخلص من كل هذه الخلايا لان تعيق شغلنا ونطلع البيضة لوحدها وراها تطلعلنا مثلما موضحة
بالصورة رقم ٢.

هو هذا الموضوع اللي تسموه تقشير البيوض؟

🥸 اي ياجدو هذا تقشير البيوض ( اللي هو ازالة وتنظيف البيضة من اغلب الخلايا اللي تحيطها)

زين شنو الفايدة من هاي القشرة؟

🥸 ياجدو كل البيوض حتى لو مجانت بالبشر فاكيد بيها قشرها. حتى تحميها وتساعد الجنين اللي بداخلها ينمو لحد ما يوصل مرحلة بعد ما يحتاجها فيطلع منها ويسموه (يفقس الجنين).

🥸 اذن جواب اول سؤال هو احنا مانزيل قشرة البيضة وانما نزيل الخلايا اللي تحيط بالبيضة.

زين ياجدو انت كلت انه البيضة تحيطها خلايا هواي حواليها حتى تغذيها وكلت البيضة بيها قشرة. زين شلون هاي الخلايا تغذي البيضة؟

🥸 ياجدو اكيد قارية انت الاية القرأنية اللي تكول

بسم الله الرحمن الرحيم
(هذا خلق الله فأروني ماذا خلق الذين من دونه)
هاي الخلايا تدخل ابر ناعمة كلش كلش كلش كلش بداخل هاي القشرة ومن خلال هاي الابر تكدر توصل الاكل للبيضة حتى تتغذى. شفتي ياجدو خلق رب العالمين شكد عظيم؟

زين ياجدو تكدر تضربلنا مثل عن هاي القشرة اشو مافهمت زين. هي تشبه شنو شي احنا كلنا نشوفة يوميا؟

🥸 ميخالف هسه اضربلج مثل. بس ياجدو ترة الامثال تضرب ولا تقاس. فلا تاخذين كلامي وتزعلين اكيد ياجدو انتوا اعلى وارفع من هالشي وكلكم اهلنا وناسنا وتاج راسنا.

شايفه من تسلكين بيضة حتى تاكليها؟
هاي القشرة اللي نكسرها ونذبها هي نفسها اللي تحيط بالبيضة اللي حجينه عنها.

هسه فهمنا انتوا بمختبر الاجنة شلون تنظفون البيوض وتقشروها. بس بالحمل الطبيعي هاي البيوض منو يقشرها؟ 🤔🤔🤔

🥸 تتذكرين من كلت البارحة انه اعداد الحيامن عند الزوج بيها فائدة؟

اي صحيح البارحة حجيت هالشي بالمنشور مال دور الزوج بالحمل. بس شنو دخل اعداد الحيامن بموضوع تقشير البيوض؟😟😟😟

🥸 ربنا العظيم خلق براس الحيمن كيس به مادة كيميائية ( انزيم) هاي المادة هي المسئولة عن تقشير هذي الخلايا. فهنا اعداد الحيامن اللي توصل البيضة كلها تشارك حتى تنظف هذي الخلايا وبعدين بالاخير يكدر حيمن واحد يلقح البيضة. شفتي ياجدو شلون ربج يخلق؟🥰
لعد اني ليش اكول كلما زادت اعداد الحيامن عند الزوج كلما صار الحمل اسهل واسرع😉😉

زين ياجدو تكدر تشوفنا صورة للحيمن وتدلينا على هذا الكيس اللي حجيت عنه؟

🥸 جدو. شوفي صورة رقم ٣ وانتبهي على مقدمة راس الحيمن حتشوفين منطقة لونها فاتح هاي المنطقة هي بالاصل كيس وياجدو احنا نسميه ( الاكروسوم).
وهاي وحدة من انواع التشوهات بالحيمن من يكون بيها خلل لان بالعادة ياجدو المفروض هي ثلثين راس الحيمن والثلث الباقي هي المادة الوراثية للحيمن.🥰🥰🥰
واسمعوا كلام جدو🥸 من تدزولي تحليل واكللكم غلط. لان هاي وحده من الامور مو كل المختبرات تعرفها وتنتبه عليها فينطوكم نسب تشوهات قليلة. عرفتوا هسه ليش مرات اكللكم التحليل غلط؟

24/08/2024

جدو هواي سولفتلنا عن جانب الزوجة بالحمل بس ماسولفتلنا عن الزوج شنو رايك تحجيلنا شوية؟

🥸 صار ياجدو
رب العالمين خلق من كلشي تقريبا ذكر وانثى. ثنينهم لازم يشاركون سوة حتى يكدرون يتكاثرون ويجي بيبي👼 صغيروني للدنيا.
بشكل عام الزوج يشارك بالحمل بشي نسميه الحيوان المنوي ( الحيمن او النطفة)
الشي الحلو بالانسان انه الزوج ينتج ملايين من الحيامن وهذا الانتاج يومي وعلى مدى حياته. بحيث تقريبا من ٤ ونص الى حدود ٧ مليون حيمن بالساعة.

زين ياجدو شنو الفايدة من هذا العدد من الحيامن وبالمقابل احنا نحتاج بس حيمن واحد حتى يلقح البيضة؟

🥸 الحيامن عندها رحلة طويلة بالنسبة الهم من مكان خروجهم لحد ما يوصلون لهدفهم واللي هو بيضة الزوجة.

فيا جدو هذا العدد من الحيامن به حكمة الهية. واللي هي:

اولا انه هذا العدد الجبير راح يزيد فرصة انه يوصل عدد كافي من الحيامن للبيضة لانه بالنسبة للزوجة هذا جسم غريب فيحاربه. لهذا نحتاج عدد جبير.

ثانيا ياجدو هذا العدد الجبير يخيلنا نطلع مختلفين عن بعضنا فالاخ مايشبه ١٠٠% اخوه صح؟ هذا كله بسبب خلط المادة الوراثية حتى يصير الاختلاف بيناتنا من كل نواحي مثل الشكل والتصرفات وغيرها من امور هواية.

ثالثا بيضة الزوجة من تنطلق تكون بنص خلايا واني شوفتها الكم بمنشورات سابقة. فتصير مثل الحاجز للحيامن حتى تقلل من فرصة يدخل اكثر من حيمن للبيضة ويصير عندنا طفل مشوه. وهالشي راح اشرحه الكم بمنشور لوحده.

رابعا ياجدو كلما زادت اعداد الحيامن زادت وياها فرصة انه الزوجة تصير حامل بسهولة وبدون ماتحتاجون لجدو تراجعوه علمود الحمل.🤪🤪🤪

زين ياجدو هم اكو ازواج ماعندهم حيامن بالعينة؟ يعني صفر ولا حيمن؟

🥸اي ياجدو اكو شباب خطية ماعندهم حيامن.🥺🥺

زين هذولة الشباب خطية شلون نكدر نساعدهم؟

🥸 اول شي ياجدو لازم نفحصهم حتى نعرف حالتهم ليش ماعندهم حيامن.

وهم يكونون مجموعتين:
المجموعة الاولى؛
عندهم انتاج بالخصية بس خطية القنوات اللي تنقل الحيامن تكون مزدودة فمنلكي بعينتهم حيامن.
وحلهم كلش بسيط. انه ندخل بنيدل مال سرنجة ونسحب هاي الحيامن ونسويلهم طفل يفرحهم.🤗🤗🤗🤗

اما المجموعة الثانية؛
فهم على نوعين ياجدو
النوع الاول هم اللي عندهم اعداد حيامن كلش قليلة فمنكدر نلكيهم بالعينة😟

🥸 وياجدو هذا النوع نكدر نسويلهم تفتيش مجهري للخصية ونلكي هاي الحيامن القليلة الخاتلة وماتقبل تطلع بالعينة ونسويلهم طفل نفرحهم به.🤗🤗

النوع الثاني يكون ماعندهم حيامن ابد خطية ياجدو🥺 بس الطب اتطور وهسه كدرنا نسويلهم طفل.🥰🥰

ياجدو شلون تسوون طفل وانتوا ماعندكم حيمن؟

🥸 ياجدو هاي تقنية حديثة نستخدم بيها بذرة الحيمن وتكون بديل للحيمن ونسوي منها طفل والحمد لله العملية هذي ناجحة ودتتطور بعد اكثر.

والله ياجدو انتوا دتتفننون. بس عندي هم سوال؟
اذا مالكيتوا هاي البذرة شتسوون؟

🥸 هذولي الشباب خطية لحد هسه مالكينا الهم حل بس ان شاء الله يجي هذا اليوم ونحللهم مشكلتهم مثلما حلينا هواي مشاكل. فلاييأسون وان شاء الله هم يجي يوم نكدر نفرحهم بطفل.🤲🤲

زين جدو اكو شباب عندهم سكر او خلل بغدة البروستات وسامع انه هم ماعندهم حيامن بالعينة. هذوله شلون؟ شتسوولهم؟

🥸 هذولي الناس نكدر نلكيلهم الحيامن بالادرار ويسموهم قذف رجعي وشغلتهم سهلة وصارت عندنا هواي حالات وحصلوا حمل حتى بالتلقيح الصناعي🥰

ميخالف ياجدو اسئلك اخر سؤال؟

🥸 شنو السؤال؟

الشباب اللي ماتلكولهم حيامن بعد التفتيش المجهري. تكدرون تنطون علاج معين لو ماكو حل الهم بعد؟

🥸ياجدو اكو هواي هواي شغلات ممكن نسويها قبل لا نسوي خزعة او تفتيش مجهري
مثل نسوي حقن بلازما للخصية، او حقن خلايا جذعية للخصية، او حقن مادة الاكسوسوم. واكو شي جديد وهو علاج. هذا العلاج جديد كلش واكو ناس حصلوا حيامن بعد ما جانوا ماعندهم وبالرغم انه هم خطيه سووا تفتيش مجهري قبل وماحصلوا حيامن.

🥸هذا العلاج فكرته انه التلفون من يكوم مايشتغل. احنا شنسوي؟ نطفيه ونرجع نشغله. صح؟ فيرجع يشتغل من جديد.
هذا العلاج هيج فكرته.
🥸 العلاج هذا ينزل هرمون الذكورة عندج الزوج. وبعدين ورة فترة يرجع يصعد الهرمون من جديد. ووراها ممكن نلكي عدد بسيط من الحيامن تفيدنا باطفال الانابيب.🥰🥰🥰🥰

سؤال اليوم؟🤪🤪🤪🤪🤪
احزروا شنو اللي بالصورة؟ ماشر عليه بالاحمر؟😉😉

24/08/2024

🥸 اليوم احجيلكم عن موضوع البيوض باطفال الانابيب:
سئلتني متابعة للصفحة سؤال.
ليش مو كل البيوض اللي تحقنوها بمحاولة اطفال الانابيب تتلقح وتصير جنين؟
وشنو اللي يخلي الجنين يطلع درجة ثانية وثالثة؟

🥸 جواب السؤال الاول:
عملية الاخصاب (تلقيح البيضة) عملية جدا جدا جدا معقدة.
بس حنحجي بشكل مبسط:

ربنا العظيم خلق الحيمن هو اللي يحفز البيضة عالتلقيح (الاخصاب).
شلون يعني؟

الحيمن يمتلك ٣ امور جدا مهمة حتى يكدر يلقح البيضة. واللي هن:
اولا : بمقدمة راسه اكو جزء يستخدمه حتى يكدر يلتصق بالبيضة.

ثانيا : المادة الوراثية اللي يحقنها بداخل البيضة حتى تلتحم مع المادة الوراثية الموجودة بالبيضة. مع عضو صغير حتى يكدر يخلي البيضة تنقسم.

ثالثا واخيرا: هي مجموعة مواد محفزة تجبر البيضة بان تتلقح وتبدي عملية تحولها الى جنين.

فبالحمل الطبيعي الحيمن من يوصل للبيضة يلتصق بيها. ويحقن المادة الوراثية اللي هو شايلها براسه بداخل البيضة. فمعناتها الحيمن يبدي بعملية تحفيز البيضة للاخصاب من البداية من اول ما التصق بيها.
بينما بطفل الانبوب. احنا ندخل الحيمن كله بواسطة نيدل كلش صغير بداخل البيضة.
نسب الاخصاب تكون بين ٧٠ الى ٩٠ بالمية اذا اقل فهذا غالبا يكون خلل بالمختبر.

🥸 جواب السؤال الثاني: ليش الاجنة تطلع درجة ثانية او ثالثة؟

ماتتخيلون شكد الجنين حساس🥹🥹🥹 وانتوا شفتوا شكد صغير وماينشاف بسهولة بالعين.
يعني مثلا اذا اخصائي الاجنة حاط عطر يسبب تكوّن جنين درجة ثانية. واتخيلوا انتوا😱😱😱😱
كومه امور تأثر على جودة الجنين. وهاي الامور تخلي الجنين انقسامه يكون بشكل غير منتظم. فيصير درجة ثانية او ثالثة او غيرها.
جودة الحيمن
جودة البيضة
وضع المختبر
كفاءة اخصائي الاجنة
وغيرها هواي امور تسبب هالشي.

24/08/2024

تكملة المنشور السابق
اليوم ٢٤-٨-٢٠٢٤
تم ارجاع ذكر وانثى واهمال جنين انثى مصابة بمتلازمة داون
صورة رقم ١ ذكر
صورة رقم ٢ انثى

23/08/2024

🥸 جدو يريد منكم شغلة شوية انتبهولها زين عفية

الموضوع يخص كل بنية سوت تلقيح صناعي او حتسوي تلقيح صناعي.
اولا الفشل به بنسبة ٨٥% فلا تنقهرون اذا مانجح وعيدوه لو حتى ٦ مرات مو الا ٣ مرات. بس اهم شي مايخلي العمر يمشي عليكم.

ثانيا مو سويتوا يم ناس ومانجح معناتها وكفت الدنيا.
زين ليش شنو السبب الي خلاك تحجي هيج؟

🥸 لانه بهالزمن الكل جاية تشتغل تلقيح صناعي سواء يعرف شلون يتعامل ويه عينة الزوج او مايعرف.

شغلة ثانية. ضروري تاخذون تقرير التلقيح الصناعي. واللي هو عبارة عن تحليل سائل منوي مع نتيجة الحيامن من ناحية الاعداد والحركة والتشوهات اللي حصلوها بعد فرز عينة السائل المنوي.

ليش شنو نستفاد من هالشي؟
هالشي يخلي اي طبيب يعرف شنو جان نتيجة التلقيح السابق حتى يعرف من يريد يسوي تلقيح مرة ثانية يكون عنده فكرة عن التلقيح القديم.
لا يظل الطبيب دايخ شنو اللي صار ومانجح التلقيح.

🥸 اكو كم شغلة كلش مهمة بالنسبة لفحص السائل المنوي:
اول شي انه اكثر من ٩٦ بالميه من تحليل المختبرات غلط.
سواء زعلوا من هالحجي او مازعلوا مايهمني لان عوائل دتعاني بسبب تحليل سائل منوي غلط.

الله يحفظكم روحوا لناس مختصة عوفوا المختبرات لان قليل من المختبرات تعرف شلون تشتغل تحليل سائل منوي.

من تسوون فحص سائل منوي اذا شفتوا نسبة الحيامن السليمة ( المامشوهة) كاتبين بيها فوك ٤٠ شيلوا للتحليل وذبوه بالزبل ولا تباوعون عليه لان غلط. بالاخص اذا اعداد الحيامن هواية. بس بحالة انه اعداد الحيامن قليلة كلش فممكن يكون صحيح.

🥸 اهم شي بالتلقيح:
بيضة انطلقت حتى نتاكد انه اكو بيضة بالانبوب.
لازم متاكدين من الانبوب انه مفتوووووووح.
والصحيح يفضل يكون الرحم مابه خلل وسمك بطانة الرحم كافية حتى ينغرز بيها الجنين.
الله يحفظكم كلكم ويرزقكم كل اللي تتمنوه يارب🥰
اسف هيج حجيت. بس دااشوف اخطاء محد ديدفع ثمنها غير الزوجة والزوج.

Iraqi Clinical Embryologists

05/12/2024

02/12/2024

04/09/2024

03/09/2024

29/08/2024

26/08/2024

26/08/2024

25/08/2024

24/08/2024

24/08/2024

24/08/2024

23/08/2024

Address

Telephone

Website

Alerts

Contact The Organization

Shortcuts

Share

Category