Kasyapa Veda Research Foundation Wayanad

03/09/2026

ഓം.
പ്രിയപ്പെട്ടവരെ, സാദരം നമസ്കാരം.
നമ്മുടെ ജീവിതത്തെക്കുറിച്ച് വളരെ പ്രധാനപ്പെട്ട ഒരു ചിന്ത നിങ്ങളുമായി പങ്കുവെക്കട്ടെ.
സാഹചര്യങ്ങൾ അനുകൂലമാണെങ്കിൽ പണവും പുതിയ വാഹനങ്ങളും വലിയ വീടുകളുമൊക്കെ സ്വന്തമാക്കി ബാഹ്യമായി (horizontal) വളരുക എന്നത് വളരെ എളുപ്പമാണ്. എന്നാൽ യഥാർത്ഥ വളർച്ച എന്നത് ലംബമായ (vertical), അതായത് ഉള്ളിലേക്കുള്ള വളർച്ചയാണ്. ഉള്ള അതേ സാഹചര്യങ്ങളിൽ നിന്നുകൊണ്ടുതന്നെ സ്വന്തം അന്തരംഗത്തിലേക്ക് കൂടുതൽ ആഴത്തിൽ വേരൂന്നാൻ കഴിയുന്ന അവസ്ഥയാണത്. "അഞ്ചു വർഷം മുമ്പ് എന്നെ അസ്വസ്ഥനാക്കിയിരുന്ന കാര്യങ്ങൾ ഇന്ന് എന്റെ ശാന്തതയെ ഒട്ടും ബാധിക്കുന്നില്ല" എന്ന് തിരിച്ചറിയുന്നിടത്താണ് ആ വളർച്ച പ്രകടമാകുന്നത്. ഇത്തരം ആന്തരിക പരിവർത്തനം അപൂർവ്വമാണ്, എന്നാൽ ഏറ്റവും ശക്തവും ശാശ്വതവുമായ മാറ്റവും അതുതന്നെയാണ്.
നിർഭാഗ്യവശാൽ, നമ്മിൽ പലരും ജീവിതത്തിൽ എവിടെയോ തളയ്ക്കപ്പെട്ടുപോയതുപോലെ അനുഭവപ്പെടാറില്ലേ? കാരണം, നാം ഉൾക്കരുത്തോടെ വളരുന്നതിനേക്കാൾ വേഗത്തിലാണ് നമുക്ക് പ്രായമേറുന്നത്. ബാഹ്യമായ നേട്ടങ്ങളിൽ മാത്രം നമ്മുടെ ശ്രദ്ധ ഒതുങ്ങിപ്പോകുന്നു. വിവാഹം, വീട്, ജോലിയിലെ സ്ഥാനക്കയറ്റം തുടങ്ങി സമൂഹം നിശ്ചയിച്ചിട്ടുള്ള പക്വതയുടെ ലക്ഷണങ്ങളിലൂടെ കടന്നുപോകാൻ ജീവിതത്തിന്റെ സിംഹഭാഗവും നാം മാറ്റിവെക്കുന്നു. ഫലമോ, സ്വന്തം മനസ്സിനെയും ആത്മാവിനെയും പരിപോഷിപ്പിക്കാൻ നമുക്ക് സമയം ലഭിക്കാതെ പോകുന്നു. ഉണർവോടെയും വൈദികമായ ഉൾക്കാഴ്ചയോടെയും ജീവിക്കാൻ നാം പലപ്പോഴും തുനിയുന്നതേയില്ല.
പ്രിയ ശിഷ്യരേ, വേദചിന്തകളെ ഒരു ദൈനംദിന സാധനയായി ജീവിതത്തിൽ പകർത്തുക എന്നതാണ് ഏറ്റവും വലിയ വെല്ലുവിളിയും സാധനയും. അതൊരു കേവല ആചാരമല്ല; ഒരു ജീവിതശൈലിയാണ്, ലോകത്തെ നോക്കിക്കാണാനുള്ള ഒരു ഉന്നത ദർശനമാണ്, ഒപ്പം നിങ്ങളുടെ മനുഷ്യജന്മത്തിന്റെ പൂർണ്ണതയെ തൊട്ടറിയാനുള്ള ഏക വഴിയുമാണ്.
ഈ യാഥാർത്ഥ്യം ഹൃദയത്തിൽ തൊട്ടുണർത്തട്ടെ. ആന്തരികമായ ഉണർവ്വിനായി ഓരോ നിമിഷവും സ്വയം സമർപ്പിക്കുക.
സ്നേഹത്തോടെ,
ആചാര്യശ്രീ രാജേഷ്

02/09/2026

02/09/2026

നവരാത്രി ആഘോഷം സ്വാഗത സംഘം രൂപീകരിച്ചു.

ആചാര്യശ്രീയുടെ നേതൃത്വത്തില്‍ കാശ്യപ വേദ റിസര്‍ച്ച് ഫൗണ്ടേഷന്റെ കല്പ്പറ്റയിലെ മഹര്‍ഷി ദയാനന്ദ സരസ്വതി വേദ വിദ്യ ഗുരുകുലത്തില്‍ 2026 ഒക്ടോബര്‍ 11 മുതല്‍ 21 വരെ നീണ്ടുനില്‍ക്കുന്ന നവരാത്രി ആഘോഷത്തിന്റെ സ്വാഗത സംഘം രൂപീകരിച്ചു. ഫൗണ്ടേഷന്‍ ട്രസ്റ്റി ശ്രീ. പി.ടി. വിപിന്‍ ആര്യ സ്വാഗതസംഘ രൂപീകരണ യോഗം ഭദ്രദീപം തെളിയിച്ച് ഉദ്ഘാടനം ചെയ്തു. മഹാസരസ്വതിയജ്ഞം, മന്ത്രവേദ പാരായണം, വിദ്യാരംഭം, കലാപരിപാടികള്‍, പ്രഭാഷണം, പ്രസാദ ഊട്ട് തുടങ്ങിയവ നവരാത്രി ആഘോഷത്തിന്റെ ഭാഗമായി നടക്കും. ഋഗ്വേദീയ സാരസ്വത മന്ത്രങ്ങളും യജുര്‍വേദീയ മേധാസൂക്ത മന്ത്രങ്ങളും, ഗണപതി മന്ത്രവും, ഗായത്രീമന്ത്രവും വിനിയോഗിക്കുകയും ആയൂര്‍വേദ വിധിപ്രകാരമുള്ള അപൂര്‍വ്വ ഔഷധകൂട്ടുകള്‍ ഹോമദ്രവ്യമായി അഗ്നിയില്‍ അര്‍പ്പിക്കുകയും ചെയ്യുന്ന അതിവിശിഷ്ടമായ യജ്ഞമാണ് സരസ്വതീയജ്ഞം. ബുദ്ധിശക്തി, ഏകാഗ്രത, ഓര്‍മശക്തി, വിജ്ഞാനം എന്നിവയുടെ വര്‍ദ്ധനവാണ് സരസ്വതീയജ്ഞത്തിന്റെ ഫലമെന്ന് സ്മൃതികള്‍ പറയുന്നു.

ശ്രീ. എം. സുന്ദരന്‍ വൈദിക് ജനറല്‍ കണ്‍വീനറും, ശ്രീമതി എ. സൂഭാഷിണി, ശ്രീ. ബിജു എം.ജി., ശ്രീ. രാജേഷ് കെ, ശ്രീ. കെ. രാധാകൃഷ്ണന്‍, ശ്രീ. രമേശന്‍ കെ.സി. എന്നിവര്‍ കണ്‍വീനരുമായി 51 അംഗ സ്വാഗതസംഘം രൂപീകരിച്ചു. യജ്ഞ സമിതി, സാമ്പത്തിക സമിതി, പ്രചരണ സമിതി, അലങ്കരണ സമിതി, പ്രസാദ വിതരണ സമിതി, പ്രോഗ്രാം സമിതി, വളണ്ടിയര്‍ സമിതി, മീഡിയ സമിതി തുടങ്ങി വിവിധ സബ്കമ്മിറ്റികളും രൂപീകരിച്ചു. ശ്രീ. എം. സുന്ദരന്‍ വൈദിക് അദ്ധ്യക്ഷത വഹിച്ച പ്രസ്തുത ചടങ്ങില്‍ ശ്രീ. വി. പുഷ്പരാജന്‍ സ്വാഗതവും, ശ്രീമതി എ. സതി നമസ്‌കാരവും പറഞ്ഞു.

28/08/2026

സാധനയുടെ ചിഹ്നവും
ഗുരുകൃപയുടെ വഴികളും.

ആചാര്യശ്രീ രാജേഷ്

​പൂണുനൂൽ എന്നത് ഏതെങ്കിലും ഒരു പ്രത്യേക ജാതിയുടെ അടയാളമല്ല, മറിച്ച് ആത്മീയ സാധനയുടെയും ഈശ്വരസമർപ്പണത്തിന്റെയും ബാഹ്യ ചിഹ്നമാണ്. ജീവിതാവസാനം വരെ തുടരേണ്ട ഒരു നൈരന്തര്യമാണ് സാധന. സാധനയുടെ വഴിയിൽ മുന്നോട്ടുപോകുമ്പോൾ അനേകം ചതിക്കുഴികളും പരീക്ഷണങ്ങളും ഉണ്ടാകാം. അതിൽ വീണുപോകാതിരിക്കാൻ സ്ഥൂലം, സൂക്ഷ്മം, കാരണം എന്നീ മൂന്ന് ശരീരങ്ങളെയും പൂർണ്ണമായി ഭഗവാനിൽ സമർപ്പിക്കണം. ഈ പൂർണ്ണ സമർപ്പണത്തിന്റെയും അച്ചടക്കത്തിന്റെയും ബാഹ്യരൂപമാണ് പൂണുനൂലിലെ മൂന്നിഴകൾ പ്രതിനിധീകരിക്കുന്നത്.
​ജീവിതത്തിലെ ഏറ്റവും പ്രധാനപ്പെട്ട ഒന്നാണ് ഉപനയനം ( പൂണൂൽ ) എന്നാൽ 'അതിപരിചയം കൊണ്ട് നിന്ദയുണ്ടാകുന്നു' എന്നതുപോലെ, പലപ്പോഴും ഇതിന്റെ ആഴമേറിയ പ്രാധാന്യത്തെ തിരിച്ചറിയാതെ നമ്മൾ വിസ്മരിച്ചുപോകുന്നു.
​മനസ്സിന്റെ ചഞ്ചലതയും പ്രകൃതിയുടെ പരീക്ഷണങ്ങളും
​"ബഹുശാഖാ ഹ്യനന്താശ്ച" എന്ന പ്രമാണം സൂചിപ്പിക്കുന്നത് പോലെ, മനുഷ്യ മനസ്സ് എപ്പോഴും പല ശാഖകളായി ചിതറി നിൽക്കുന്ന ഒന്നാണ്. ആധുനിക സമൂഹം ബാഹ്യമായ ദൃശ്യപരതയിലും പ്രകടനാത്മകതയിലും മുഴുകിയിരിക്കുമ്പോൾ, ഒരു സാധകന് തന്റെ ഉപാസനയുമായി മുന്നോട്ടുപോകാൻ ഏറെ പ്രയാസമാണ്.
​മാത്രമല്ല, പ്രകൃതി എന്നത് അതീവ പ്രബലയായ ഒരു ശക്തിയാണ്. അത് തന്റേതായ രഹസ്യങ്ങൾ കാത്തുസൂക്ഷിക്കുകയും പല ജാലങ്ങൾ സൃഷ്ടിക്കുകയും ചെയ്യും. സാധകൻ ആത്മീയ വഴിയിൽ 'നന്നായി ബാറ്റ് ചെയ്യുമ്പോൾ' പോലും അവനെ 'റൺ ഔട്ട്' ആക്കാൻ പ്രകൃതി അത്തരം തടസ്സങ്ങൾ മുന്നിൽ കൊണ്ടുവെക്കും. എന്നാൽ ഗുരുവിന്റെ അനുഗ്രഹവും തണലും ഉണ്ടെങ്കിൽ മാത്രം സാധകന് ഈ പരീക്ഷണങ്ങളിൽ നിന്ന് രക്ഷപ്പെടാൻ സാധിക്കും.
​
​ഉപാസനയിൽ അർദ്ധമനസ്സോടെയുള്ള നിലപാട് അപകടകരമാണ്. 'ത്രിശങ്കു സ്വർഗ്ഗത്തിൽ' എന്നപോലെ അവിടെയുമില്ല ഇവിടെയുമില്ലാത്ത അവസ്ഥ ഉണ്ടാകരുത്. ഗുരു ആത്മാർത്ഥമായി ഉപദേശിക്കുന്നത് ശിഷ്യൻ അത്രതന്നെ ആത്മാർത്ഥതയോടെ ജീവിതത്തിൽ പകർത്തുമ്പോൾ മാത്രമാണ് അവനിൽ പരിപക്വത ഉണ്ടാകുന്നത്.
​നമുക്ക് അമൂല്യമായ ഉപാസനാമാർഗ്ഗം സമ്മാനിച്ച ഗുരുവും മഹത്തായ ഗുരുപരമ്പരയും എപ്പോഴും നമ്മോടൊപ്പമുണ്ട്. ഈ മാർഗ്ഗത്തിൽ സഞ്ചരിക്കുന്ന സാധകന്റെ മുഖമുദ്ര ചിരിക്കാൻ മടിയുള്ള ഗൗരവമല്ല; മറിച്ച് ആത്മാർത്ഥത, സ്നേഹം, സൗശീല്യം എന്നിവയായിരിക്കണം. ഗുരുവിനോടുള്ള പൂർണ്ണമായ ശരണാഗതിയും സദാ ജാഗരൂകമായ സാധനയും ഉണ്ടെങ്കിൽ പ്രകൃതിയുടെ ഏത് മായാജാലത്തെയും അതിജീവിച്ച് ലക്ഷ്യത്തിലെത്താൻ സാധിക്കും.

25/08/2026

*കാശ്യപാശ്രമത്തിന്റെ ഓണസന്ദേശം*
*ആചാര്യശ്രീ രാജേഷ്*

പൂക്കൾ പുഞ്ചിരിക്കുന്ന ചിങ്ങമാസത്തിലെ പൊന്നോണം ഓരോ മലയാളിയുടെയും ആത്മബോധമാണ്. സമൃദ്ധിയുടെ സന്ദേശം വിളിച്ചോതുന്ന, കാർഷിക സംസ്കൃതിയുടെ നന്മ നിറഞ്ഞ, വേദങ്ങളോട് ചേർന്നുനിൽക്കുന്ന ആഘോഷമാണ് ഓണം.

മഹാബലിയും വാമനനും കള്ളമില്ലാത്ത സുവർണ്ണകാലത്തിന്റെ ഓർമ്മയാണ്. വർഷത്തിലൊരിക്കൽ മാവേലി നമ്മെ കാണാൻ വരുമെന്ന വിശ്വാസം മലയാളിയുടെ തകർക്കാനാവാത്ത നിഷ്കളങ്കതയാണ്. ആ നിഷ്കളങ്കതയിൽ നിന്നാണ് നല്ല നാട് ഭരിച്ച നല്ല തമ്പുരാനെക്കുറിച്ചുള്ള സങ്കൽപ്പം ഉണ്ടാകുന്നത്.

വേദതത്വത്തിന്റെ കഥാരൂപമാണ് വാമന-ബലി ചരിത്രം. ആദിദൈവികമായി വിഷ്ണു സൂര്യനാണ്. 'ബാലിശാന' എന്ന പദം ഇരുട്ടിനെ സൂചിപ്പിക്കുന്നു. ബലിയുടെ ഭരണം ശാന്തിയും സമൃദ്ധിയും നൽകി, അവിടെ കള്ളവും ചതിയുമില്ല. ഇരുട്ടിൽ എല്ലാവരും ഉറക്കമാണ്, അവിടെ രാജാവും പ്രജയും വലിയവനും ചെറിയവനുമില്ല.

എന്നാൽ ഇരുട്ട് മാത്രം മതിയോ? നാം വെളിച്ചത്തിന്റെ സമൃദ്ധിയിലേക്ക് വരണം. വമനം ചെയ്യുന്നവനാണ് വാമനൻ. സൂര്യൻ വമിക്കുന്നത് പ്രകാശത്തെയാണ്.

സർവ്വവ്യാപിയായ വിഷ്ണു മൂന്ന് ലോകങ്ങളിലും വ്യാപിച്ചിരിക്കുന്നു - ഭൂലോകത്തും അന്തരീക്ഷലോകത്തും ദ്യുലോകത്തും. മൂന്ന് പാദങ്ങൾ കൊണ്ടാണ് അവൻ ലോകത്തെ അളക്കുന്നത്. എന്നാൽ ഭൗതികതയുടെ പൊടിപടലം കണ്ണിൽ മൂടിയ സാധാരണ മനുഷ്യന് ആ പാദങ്ങൾ എങ്ങനെ കാണാനാകും?

ആ മൂന്ന് ലോകങ്ങൾ നമ്മിൽ തന്നെയുണ്ട് - *മസ്തിഷ്കമാകുന്ന ദ്യുലോകം, ഹൃദയമാകുന്ന അന്തരീക്ഷലോകം, ശരീരമാകുന്ന പൃഥ്വീലോകം.* ഈ മൂന്നിലും വാമനന്റെ, വിഷ്ണുവിന്റെ പ്രകാശം സദാ ഉണ്ടാകണം. ആ പ്രകാശസമൃദ്ധിയിൽ നാം ആറാടണം. കോടി സൂര്യപ്രഭയുള്ള മസ്തിഷ്കമാണ് നമുക്ക് വേണ്ടത്. "ദിവി സൂര്യ സഹസ്രസ്യ" എന്ന് ആചാര്യന്മാർ പറയുന്നത് അതാണ്.

ഓണവും വാമനനും മാവേലിയും ഈ ആധ്യാത്മിക പ്രസരിപ്പ് വർഷംതോറും നമ്മെ ഓർമ്മിപ്പിക്കുന്നു.

ഹൃദയപുഷ്പം വിടരുന്നതിന്റെ പ്രതീകമാണ് പൂക്കളം. വിടർന്ന ആ ഹൃദയപുഷ്പത്തിൽ മാതേവരെ പ്രതിഷ്ഠിക്കാം. ഹൃദയം തന്നെയാണല്ലോ മഹാദേവന്റെ ഇരിപ്പിടം. മാതേവർ ഹൃദയത്തിലുണ്ടെങ്കിൽ പിന്നെ സമൃദ്ധിയായി. പൂർണ്ണകലയായ ഷോഡശത്തിന്റെ പ്രതീകമായി പതിനാറു കൂട്ടം വിഭവങ്ങളോടെ സദ്യയുണ്ണാം. വാമനന്റെ പൂർണ്ണതയിലാണ് നമ്മുടെ ഓണ ആറാട്ട്. അത് കാണാൻ ബലിയും വരും, കാരണം ബലിയുണ്ടെങ്കിലേ വാമനനെ തിരിച്ചറിയൂ.

*മൂന്ന് ലോകങ്ങളിലും ആധ്യാത്മികതയുടെ സമൃദ്ധി നിറയട്ടെ. അതാകട്ടെ ഇത്തവണത്തെ നമ്മുടെ ഓണം.*

23/08/2026

കാശ്യപ വേദ റിസർച്ച് ഫൗണ്ടേഷൻ്റെ വയനാട് മഹർഷി ദയാനന്ദ സരസ്വതി വേദവിദ്യ ഗുരുകുലത്തിൽ ആചാര്യശ്രീയുടെ ശിഷ്യർ ഒത്ത് ചേർന്ന് ഓണം ആഘോഷിച്ചു. പൂക്കളമൊരുക്കി, ഓണ പാട്ടുകൾ പാടി , ഓണസദ്യ ഒരുക്കി കൊണ്ടാണ് ഈ വർഷത്തെ ഓണത്തെ വരവേറ്റിയത് .....

21/08/2026

വേദങ്ങളില്‍ 'ഘൃതം' എന്ന പദത്തിന് നെയ്യ് എന്നാണർത്ഥം. 'സംസ്കരിക്കുകയും പ്രകാശിപ്പിക്കുകയും ചെയ്യുന്ന ശക്തി' എന്നാണതിന്റെ അത്യന്തീകമായ അർത്ഥവും. ശരീരത്തെ ഔഷധഘൃതം ശുദ്ധീകരിക്കുന്നതിന് സമാനമായി, ഗുരു നല്‍കുന്ന മന്ത്രം ശിഷ്യന്റെ മനസ്സിനെയും ബുദ്ധിയെയും സംസ്കരിക്കുന്നു. ഈ സംസ്കാരത്തിലൂടെയാണ് ശിഷ്യന്റെയുള്ളില്‍ ജ്ഞാനദീപമുദിക്കുക. അതിനാൽ ഗുരുശിഷ്യബന്ധം ശിഷ്യന്റെ ഉള്ളിലെ അശുദ്ധികളെ നീക്കി ശ്രേഷ്ഠതയെ ഉണര്‍ത്തുന്ന പരിവര്‍ത്തനപ്രക്രിയയാകുന്നു. നിയന്ത്രണവും അച്ചടക്കവുമാണ്, ഈ പരിവര്‍ത്തനത്തിന് അനിവാര്യമാകുന്നത്. ചിലത് ചെയ്യണമെന്നും ചിലതൊഴിവാക്കണമെന്നും ഗുരു നിര്‍ദേശിക്കുന്നത് ശിഷ്യന്റെ അന്തർലോകത്തെ ശുദ്ധീകരിക്കാനത്രെ.
​ഉപാസനയെ പലരും മന്ത്രജപത്തില്‍ മാത്രമൊതുക്കാറുണ്ട്. എന്നാല്‍ യഥാര്‍ത്ഥ ഉപാസന അതിനേക്കാള്‍ വിശാലമായതാകുന്നു. മനുഷ്യന്റെ ശരീരവും മനസ്സും പ്രാണനും ബുദ്ധിയും ഒരുപോലെ ശുദ്ധീകരിക്കപ്പെടേണ്ട ഒരു സമഗ്രസാധനയാണത്.

​ആചാര്യശ്രീ രാജേഷ്

17/08/2026

"മാ നിന്ദത"

1. വേദങ്ങളുടെ ഉപദേശം

ഋഗ്വേദം 4.5.2: "മാ നിന്ദത" - ആരെയും നിന്ദിക്കരുത്.
ഉപനിഷത്തുകളും ഇതിനെ ഒരു വ്രതമായിട്ടാണ് കാണുന്നത്.

2. ദുർജന സ്വഭാവം

ന വിനാ പരിവാദേന രമതേ ദുർജ്ജനോ ജനഃ
എച്ചിൽ കിട്ടാതെ കാക്കയ്ക്ക് തൃപ്തിയാകാത്തത് പോലെ,
ദുർജനങ്ങൾ നിന്ദിക്കാതെ സന്തോഷിക്കുന്നില്ല.

3. ഓർക്കേണ്ടത്
നിന്ദിക്കുന്നവർ ഗുരുവിനെയും ഈശ്വരനേയും ആധ്യാത്മിക സാധനയേയും വരെ നിന്ദിച്ചു എന്ന് വരും. ഓരോരുത്തരിലും പരമാത്മാവ് വസിക്കുന്നു. നിന്ദിക്കുന്നതിലൂടെ ആ പരമാത്മാവിനെയാണ് നിന്ദിക്കുന്നത് .

ചുരുക്കം: നാവിനെ നിയന്ത്രിക്കൂ. സത്സംഗം സ്വീകരിക്കൂ.

- ആചാര്യശ്രീ രാജേഷ്

13/08/2026

ശ്രീകൃഷ്ണനും ശ്രീരാമനുമെല്ലാം പ്രതിദിനം അനുഷ്ഠിച്ച ആചരണങ്ങളായ സന്ധ്യാവന്ദനവും (ബ്രഹ്‌മയജ്ഞം) അഗ്നിഹോത്രവും ഓണ്‍ലൈനായി പഠിക്കാന്‍ ഒരു സുവര്‍ണാവസരം ഒരുക്കുകയാണ് പ്രമുഖ വേദാചാര്യനായ ആചാര്യശ്രീ രാജേഷ് നേതൃത്വം നല്‍കുന്ന കാശ്യപ സെന്റര്‍ ഫോര്‍ വേദിക് സ്റ്റഡീസ്. സെപ്റ്റംബര്‍ 6ന് ഞായറാഴ്ച രാവിലെ 7.30 ന് ആചാര്യശ്രീ രാജേഷ് കോഴ്സ് ഉദ്ഘാടനം ചെയ്യും. ഞായറാഴ്ചകളില്‍ രാവിലെ 7.30 ന് സൂം കോണ്‍ഫറന്‍സ് വഴിയാണ് ക്ലാസ്സുകള്‍ ഉണ്ടാകുക. കോഴ്‌സിന്റെ ദക്ഷിണ പ്രതിമാസം 500 രൂപയാണ്. കോഴ്‌സില്‍ രജിസ്റ്റര്‍ ചെയ്യുന്നതിനായി, ആദ്യ മാസത്തെ ദക്ഷിണയോ (500 രൂപ) ഒന്നിലധികം മാസങ്ങളിലെ ദക്ഷിണയോ സമര്‍പ്പിച്ച ശേഷം, ട്രാന്‍സാക്ഷന്‍ വിവരങ്ങള്‍ നല്‍കിക്കൊണ്ട് താഴെ കാണുന്ന ഫോം പൂരിപ്പിച്ചു നല്‍കുക. രജിസ്റ്റര്‍ ചെയ്ത ശേഷം 77360 37063 എന്ന നമ്പറും മൊബൈലില്‍ സേവ് ചെയ്തുവെക്കുക. എങ്കില്‍ മാത്രമേ ഉദ്ഘാടനദിവസത്തിന്റെയും തുടര്‍ന്നുള്ള ക്ലാസ്സുകളുടെയും സൂം ലിങ്കുകള്‍ വാട്‌സാപ്പ് ബ്രോഡ്കാസ്റ്റ് വഴി അയച്ചുതരുമ്പോള്‍ താങ്കള്‍ക്ക് ലഭിക്കുകയുള്ളൂ.

ദക്ഷിണ സമര്‍പ്പിക്കാനുള്ള അക്കൗണ്ട് വിവരങ്ങള്‍:
Kasyapa Centre for Vedic Studies
A/c: 510101007308505
IFSC Code: UBIN0533980
Union Bank of India, Cherooty Road branch, Calicut

ഗൂഗിള്‍ ഫോം ലിങ്ക്: https://forms.gle/RRbqMPvfsutSk9BD7

കൂടുതല്‍ വിവരങ്ങള്‍ക്ക് ബന്ധപ്പെടുക: 9446404933, 7736037063.

11/08/2026

വേദമന്ത്രങ്ങളുടെ സവിശേഷത
ആചാര്യശ്രീ രാജേഷ്

അപാരമായ ശക്തിവിശേഷങ്ങള്‍ കുടികൊള്ളുന്നതാണ് വേദമന്ത്രങ്ങള്‍ അഥവാ സംഹിതാപാഠമെന്ന് പരക്കെ നമ്മുടെ ശാസ്ത്രങ്ങളില്‍ പറഞ്ഞതുകാണാം. ഛന്ദോബദ്ധമായി അടുക്കിയ വേദമന്ത്രങ്ങള്‍ ചൊല്ലുമ്പോള്‍ നമ്മില്‍ അനേകം മാറ്റങ്ങള്‍ സംഭവിക്കുന്നുണ്ടത്രേ. അതിന്റെ താളവും ലയവും മാത്രമല്ല, മറിച്ച് അവയില്‍നിന്ന് പ്രസരിക്കുന്ന ഊര്‍ജപ്രവാഹം കേള്‍വിക്കാരനില്‍ അനിതരസാധാരണമായ പരിവര്‍ത്തനം ഉണ്ടാക്കുന്നതായി നിരവധി ശാസ്ത്രഗവേഷണങ്ങളില്‍ തെളിഞ്ഞിട്ടുണ്ട്. സാധാരണ ഗതിയില്‍ പറഞ്ഞുവരുന്ന വേദമന്ത്രശ്രവണത്തിന്റെ ഫലങ്ങളില്‍ ചിലത് താഴെ പറയുന്നു:

സ്മൃതിശക്തി വര്‍ധിക്കുന്നതോടൊപ്പം, നമ്മുടെ പ്രതിരോധശക്തിയെപ്പോലും വേദമന്ത്രജപം വര്‍ധിപ്പിക്കുന്നതായി കണ്ടെത്തിയിട്ടുണ്ട്.

വേദമന്ത്രങ്ങള്‍ ശ്രവിക്കുമ്പോള്‍ അവ നമ്മുടെ മനസ്സിനെ ശാന്തമാക്കുന്നു. ഉല്‍കണ്ഠ ശമിച്ചു തുടങ്ങുന്നു. ഭയമെന്ന അവസ്ഥ പതുക്കെ മാഞ്ഞുപോകുന്നു.

മാനസിക സമ്മര്‍ദം കുറഞ്ഞുവരികയും പ്രതിസന്ധികളെ തരണം ചെയ്യാനുള്ള ധാര്‍മികശക്തി പതുക്കെ രൂപപ്പെട്ടുവരികയും ചെയ്യുന്നു.