06/08/2026
മുഖ്യമന്ത്രിയുടെ പ്രസ്താവന അപലപനീയം
എഫ് എസ് ഇ ടി ഒ....
ജീവനക്കാരുടെ അവകാശങ്ങൾക്കായി പ്രക്ഷോഭ രംഗത്ത് നിൽക്കുന്ന സർവീസ് സംഘടനകളെ അപമാനിക്കുകയും മാനദണ്ഡ വിരുദ്ധമായ സ്ഥലം മാറ്റങ്ങളെ ന്യായീകരിക്കുകയും ചെയ്യുന്ന മുഖ്യമന്ത്രിയുടെ പ്രസ്താവന വഹിക്കുന്ന പദവിയുടെ അന്തസ്സിന് യോജിക്കാത്ത വിധം തരം താഴ്ന്നതും അപലപനീയവുമാണെന്ന് എഫ് എസ് ഇ ടി ഒ.
സെക്രട്ടറിയേറ്റിലെ ഭരണാനുകൂല സംഘടനയുടെ സമ്മേളനത്തിൽ സംസാരിക്കുമ്പോഴാണ് മുഖ്യമന്ത്രി തരംതാണ പ്രസ്താവന നടത്തിയത്. കഴിഞ്ഞ 10 വർഷക്കാലം ഇടതുപക്ഷ സർക്കാർ ജീവനക്കാരുടെ ആനുകൂല്യങ്ങൾ നിഷേധിക്കുകയായിരുന്നെന്നും അപ്പോൾ സംഘടനകൾ മൗനം പാലിച്ചുവെന്നുമാണ് അദ്ദേഹം പറഞ്ഞത്.
വാസ്തവ വിരുദ്ധമായ കാര്യങ്ങൾ പറയുന്നതിലുള്ള അദ്ദേഹത്തിൻ്റെ സ്വതസിദ്ധമായ കഴിവാണ് ഈ അഭിപ്രായപ്രകടനത്തിലും നിഴലിച്ചത്. കഴിഞ്ഞ 10 വർഷക്കാലം ജീവനക്കാരുടെ അവകാശാനുകൂല്യങ്ങൾ സമയബന്ധിതമായി അനുവദിക്കുന്നതിൽ മാതൃകപരമായ സമീപനമാണ് LDF സർക്കാർ സ്വീകരിച്ചത്. കേന്ദ്ര സർക്കാർ അടിച്ചേല്പിച്ച സാമ്പത്തിക ഉപരോധം ഉൾപ്പെടെയുള്ള പ്രതികൂല സാഹചര്യങ്ങളുടെ പശ്ചാത്തലത്തിലും ആനുകൂല്യങ്ങൾ അനുവദിക്കാൻ തയ്യാറായി. ഏറ്റവുമൊടുവിൽ 12ാം ശമ്പള പരിഷ്കരണ കമ്മിഷനെ നിയമിച്ച് 3 മാസത്തിനുള്ളിൽ റിപ്പോർട്ട് വാങ്ങി നടപ്പാക്കാനിരുന്ന സന്ദർഭത്തിലാണ് ഭരണ മാറ്റം സംഭവിച്ചത്. എന്നാൽ പുതുതായി അധികാരത്തിൽ വന്ന UDF സർക്കാരാകട്ടെ ശമ്പള പരിഷ്കരണം 10 വർഷത്തിലൊരിക്കൽ മതിയെന്ന നിലപാടാണ് സ്വീകരിക്കുന്നതെന്ന് വിവിധ പ്രതികരണങ്ങളിലൂടെ വ്യക്തമാക്കിയിരിക്കുന്നു.
ഉത്തരവാക്കിയ ക്ഷാമബത്ത കുടിശ്ശിക , ഏൺഡ് ലീവ് സറണ്ടർ, അഷ്വേർഡ് പെൻഷൻ എന്നിവയുടെ കാര്യങ്ങളിലും നിഷേധ നിലപാടാണ് UDF സർക്കാരിനുള്ളത്. സർക്കാരുകളും ജീവനക്കാരും തുടർച്ചയാണെന്നും മുൻകാല UDF സർക്കാരുകൾ കുടിശ്ശിക വരുത്തിയ എണ്ണമറ്റ ആനുകൂല്യങ്ങൾ തുടർന്നു വന്ന LDF സർക്കാരുകളാണ് നൽകിയിരുന്നതെന്നുമുള്ള വസ്തുതകളെ മറച്ചു വച്ചാണ് മുഖ്യമന്ത്രി പ്രതികരിച്ചിരിക്കുന്നത്.
രാജ്യത്താകെയുള്ള കോൺഗ്രസ് ബിജെപി സർക്കാരുകൾ സിവിൽ സർവീസിനെ തകർത്തെറിഞ്ഞപ്പോൾ കഴിഞ്ഞ 10 വർഷത്തിനുള്ളിൽ നാല്പതിനായിരത്തിലധികം പുതിയ തസ്തികകൾ സൃഷ്ടിച്ചും 3,15,523 പേർക്ക് PSC വഴിനിയമനം നൽകിയും സിവിൽ സർവീസിനെ ചേർത്തുപിടിക്കുകയായിരുന്നു കേരളം. പകൽ പോലെ വ്യക്തമായ വസ്തുതകൾക്കു മേൽ നുണയുടെ കരിമ്പടം പുതക്കാനാണ് മുഖ്യമന്ത്രി ശ്രമിക്കുന്നത്.
ഭരണമാറ്റത്തിൻ്റെ മറവിൽ പ്രത്യേക പരിഗണന അർഹിക്കുന്ന ജീവനക്കാരെപ്പോലും അന്യായമായും മനുഷ്യത്വ വിരുദ്ധമായും സ്ഥലം മാറ്റി അഴിമതി നടത്തുന്ന സിവിൽ സർവീസിലെ സ്വന്തം അണികളുടെ നിയമവിരുദ്ധ നടപടികൾക്ക് സംസ്ഥാന മുഖ്യമന്ത്രി തന്നെ പച്ചക്കൊടി കാണിക്കുന്നത് കേട്ടുകേൾവിയില്ലാത്തതാണ്. മാനദണ്ഡ വിരുദ്ധമായ സ്ഥലം മാറ്റങ്ങൾ ദുരിതാശ്വാസ പ്രവർത്തനങ്ങളെപ്പോലും താളം തെറ്റിച്ചിരിക്കുന്ന സാഹചര്യത്തിലും നിരുത്തരവാദപരമായ ഇത്തരം പ്രസ്താവനകൾ നടത്തുന്നത് അങ്ങേയറ്റം അപലപനീയമാണ്. ജീവനക്കാരുടെ അവകാശങ്ങൾ സംബന്ധിച്ചും സംഘടനകളുടെ പ്രതിബദ്ധത സംബന്ധിച്ചും വിലകുറഞ്ഞ പ്രസ്താവന നടത്തിയ മുഖ്യമന്ത്രി തിരുത്താൻ തയ്യാറാകണമെന്നും അല്ലാത്ത പക്ഷം ജീവനക്കാരെ അണിനിരത്തി ശക്തമായ പ്രക്ഷോഭങ്ങൾ സംഘടിപ്പിക്കുമെന്നും പ്രസിഡൻ്റ് ടി കെ എ ഷാഫിയും ജനറൽ സെക്രട്ടറി എം വി ശശിധരനും പ്രസ്താവനയിൽ പറഞ്ഞു.
