22/10/2026
*പ്രഖ്യാപിച്ച ക്ഷാമബത്തയുടെ കുടിശ്ശിക നിഷേധിച്ചതിൽ പ്രതിഷേധിച്ചു*
സർക്കാർ ജീവനക്കാർക്കും അധ്യാപകർക്കും രണ്ട് ശതമാനം ക്ഷാമബത്ത അനുവദിച്ച ഉത്തരവിൽ കുടിശ്ശിക നൽകാൻ സർക്കാർ തയ്യാറായിട്ടില്ല.
ഓണത്തിന് മുമ്പ് അനുവദിക്കുമെന്ന് വാഗ്ദാനം ചെയ്തിരുന്ന രണ്ട് ശതമാനം ക്ഷാമബത്തയാണ് ഇപ്പോൾ അനുവദിച്ചത്. ഒക്ടോബർ മാസത്തെ ശമ്പളത്തോടൊപ്പം രണ്ട് ശതമാനം വർദ്ധനവ് ഉണ്ടാകുമെങ്കിലും 1/01/ 2026 മുതൽ 30/ 09/ 2026 വരെയുള്ള ഒൻപതു മാസത്തെ കുടിശ്ശിക അനുവദിച്ചിട്ടില്ല.
ജീവനക്കാരുടെയും അധ്യാപകരുടെയും സാമ്പത്തിക ആനുകൂല്യങ്ങൾ സംബന്ധിച്ച് ഇതുവരെ പറഞ്ഞു വന്നതും പ്രചരിപ്പിച്ചിരുന്നതുമായ വാദഗതികൾ എല്ലാം വിസ്മരിച്ചു കൊണ്ടാണ് ഈ വഞ്ചനാപരമായ സമീപനം സ്വീകരിച്ചിരിക്കുന്നത്.
കേന്ദ്രസർക്കാർ കേരളത്തിനെതിരെ സമാനതകളില്ലാത്ത സാമ്പത്തിക ഉപരോധം ഏർപ്പെടുത്തിയിട്ടും ജീവനക്കാരുടെ ക്ഷാമബത്ത കുടിശ്ശിക തീർത്ത് അനുവദിച്ചിട്ടാണ് എൽഡിഎഫ് സർക്കാർ അധികാരമൊഴിഞ്ഞത്.
പ്രാബല്യത്തിയതി മുതലുള്ള കുടിശ്ശിക സർക്കാർ ഉത്തരവ് നമ്പർ 44/2026/ധന തീയതി 6/ 03 / 2026 പ്രകാരം 8 തുല്യ തവണകളായി നൽകാനും ഉത്തരവാക്കിയിരുന്നു. അതിൽ ആദ്യ ഗഡു നടപ്പ് സാമ്പത്തിക വർഷം തന്നെ അനുവദിക്കാനുള്ള തുകയും ബജറ്റിൽ വകയിരുത്തി. എന്നാൽ ശമ്പള പരിഷ്കരണത്തിനും ക്ഷാമബത്ത കുടിശ്ശികയ്ക്കും വകയിരുത്തിയിരുന്ന അധിക തുക വെട്ടിക്കുറച്ചാണ് യുഡിഎഫ് സർക്കാർ പുതുക്കിയ ബജറ്റ് അവതരിപ്പിച്ചത്.
സർക്കാരും ജീവനക്കാരും തുടർച്ചയാണെന്നുള്ള യാഥാർത്ഥ്യം വിസ്മരിച്ച് മുൻ സർക്കാർ ഉത്തരവാക്കിയ ക്ഷാമബത്ത കുടിശിക പോലും അനുവദിക്കാൻ തങ്ങൾക്ക് ബാധ്യതയില്ലെന്ന ധിക്കാരപരവും അവസരവാദപരവുമായ നിലപാട് സ്വീകരിക്കുന്ന യുഡിഎഫ് സർക്കാർ നാളിതുവരെ ഉന്നയിച്ച വിമർശനങ്ങളും നൽകിയ വാഗ്ദാനങ്ങളും അപ്പാടെ കാറ്റിൽ പറത്തിക്കൊണ്ടാണ് ഇപ്പോൾ അനുവദിച്ച രണ്ടു ശതമാനം ക്ഷാമബത്തയുടെ കുടിശ്ശികയും നിഷേധിച്ചിരിക്കുന്നത്. വഞ്ചനാപരമായ നിലപാട് തിരുത്തി മുൻ സർക്കാർ ഉത്തരവാക്കിയ ക്ഷാമബത്തയുടെയും ഇപ്പോൾ അനുവദിച്ച രണ്ടു ശതമാനത്തിന്റെയും കുടിശ്ശിക ലഭ്യമാക്കാൻ തയ്യാറാകണമെന്ന് എഫ്എസ്ഇടിഒ ആവശ്യപ്പെട്ടു.
വഞ്ചനാപരമായ ക്ഷാമബത്താ പ്രഖ്യാപനത്തിൽ പ്രതിഷേധിച്ച് ജില്ലാ താലൂക്ക് കേന്ദ്രങ്ങളിൽ പ്രതിഷേധ പ്രകടനം നടത്തി.
തൃശൂർ കളക്ടറേറ്റിനു മുന്നിൽ നടന്ന പ്രതിഷേധ പ്രകടനം എഫ്എസ്ഇടിഒ ജില്ലാ സെക്രട്ടറി ഇ നന്ദകുമാർ ഉദ്ഘാടനം ചെയ്തു.
എഫ്എസ്ഇടിഒ തൃശൂർ താലൂക്ക് സെക്രട്ടറി പി ജി കൃഷ്ണകുമാർ സ്വാഗതം പറഞ്ഞ പ്രതിഷേധ യോഗത്തിൽ കെജിഒഎ ജില്ലാ സെക്രട്ടറി ഡോ കെ. ആർ. രാജീവ് അദ്ധ്യക്ഷത വഹിച്ചു. എൻജിഒ യൂണിയൻ ജില്ലാ സെക്രട്ടറിയേറ്റ് അംഗം കെ കെ റസിയ, കെജിഎൻഎ സംസ്ഥാന കമ്മിറ്റി അംഗം അബിൻരാജ് എന്നിവർ സംസാരിച്ചു.
കൊടുങ്ങല്ലൂരിൽ എൻജിഒ യൂണിയൻ ജില്ലാ സെക്രട്ടറി പി ബി ഹരിലാൽ, ചാലക്കുടിയിൽ എൻജിഒ യൂണിയൻ ജില്ലാ സെക്രട്ടറിയേറ്റ് അംഗം മഞ്ചേഷ് കെ. എം , വടക്കാഞ്ചേരിയിൽ കെഎസ്ടിഎ ജില്ലാ പ്രസിഡണ്ട് കെ പ്രമോദ്, ഇരിങ്ങാലകുടയിൽ കെജിഒ എ ജില്ലാ പ്രസിഡണ്ട് രഹന പി ആനന്ദ്, കുന്നംകുളത്ത് കെഎസ്ടിഎ ജില്ലാ വൈസ് പ്രസിഡണ്ട് അനീഷ് ലോറൻസ്, ചാവക്കാട് എൻജിഒ യൂണിയൻ ജില്ലാ വൈസ് പ്രസിഡണ്ട് വി വിമോദ് എന്നിവർ പ്രകടനം ഉദ്ഘാടനം ചെയ്ത് സംസാരിച്ചു.
