02/05/2026
आळंदी येथे दिनांक १ मे २०२६ रोजी “विश्वमंगल मराठी फाउंडेशन”चा दिमाखदार शुभारंभ सोहळा उत्साहपूर्ण वातावरणात संपन्न झाला. फ्रुटवाले धर्मशाळा सभागृहात पार पडलेल्या या कार्यक्रमाला महाराष्ट्रातील विविध भागांबरोबरच देश-विदेशातून उद्योजक व प्रतिष्ठित नागरिकांची मोठ्या संख्येने उपस्थिती लाभली. आमदार सुभाष बापू देशमुख यांच्या नेतृत्वाखाली हा भव्य सोहळा आयोजित करण्यात आला होता.
कार्यक्रमाची सुरुवात संत ज्ञानेश्वर महाराजांच्या समाधीचे महापूजन करून झाली. मंदिर समितीच्या वतीने मान्यवरांचा सन्मान करण्यात आला. त्यानंतर वारकऱ्यांच्या सहभागातून मंदिरापासून सभागृहापर्यंत दिंडी काढण्यात आली, ज्यामुळे वातावरण भक्तिमय झाले.
सभागृहातील मुख्य कार्यक्रमात दीपप्रज्वलन करून “विश्वमंगल मराठी फाउंडेशन”च्या लोगो व वेबसाईटचे अनावरण करण्यात आले. आमदार सुभाष बापू देशमुख यांनी प्रास्ताविकात फाउंडेशन स्थापनेमागील उद्दिष्टे स्पष्ट करत मराठी भाषा, संस्कृती, शाळा आणि उद्योगांना जागतिक स्तरावर नेण्यासाठी ही संस्था कार्य करणार असल्याचे सांगितले. “लोकल टू ग्लोबल” आणि “ग्लोबल टू लोकल” या संकल्पनांद्वारे समाजाच्या सर्व घटकांना जोडण्याचा संकल्प त्यांनी मांडला.
प्रख्यात वक्ते विवेकजी घळसासी यांनी आपल्या मार्गदर्शनपर भाषणात देशमुख यांच्या २८ वर्षांच्या कार्याचा गौरव करत मराठी संस्कार, कुटुंबव्यवस्था आणि परस्पर सहकार्याच्या मूल्यांचे जतन करण्याचे आवाहन केले. कार्यक्रमात जागतिक स्तरावरील उद्योजकांच्या उपस्थितीत परिसंवादही झाला, ज्यामध्ये नवउद्योजकांना आंतरराष्ट्रीय संधी व उद्योगवाढीचे मार्ग याबाबत मार्गदर्शन करण्यात आले.
पंढरपूर ते आळंदी सायकलवारी करणाऱ्या सायकलवीरांचा सत्कार करण्यात आला. तसेच युवा भारूडकार कृष्णाई उळेकर यांच्या “बुरगुंड” या समाजप्रबोधनात्मक सादरीकरणाने कार्यक्रमाला विशेष रंगत आणली. विविध गावांतील जिल्हा परिषद शाळा दत्तक घेणाऱ्या उद्योजकांचाही गौरव करण्यात आला.
या वेळी फाउंडेशनची आळंदी येथील पहिली स्थानिक समिती स्थापन करण्यात आली. कार्यक्रमाचा समारोप पसायदानाने झाला. मराठी भाषा, संस्कृती आणि सामाजिक विकासासाठी ही संस्था व्यापक कार्य करेल, असा विश्वास उपस्थितांनी व्यक्त केला.
#विश्वमंगलमराठीफाउंडेशन #मराठी #मराठीभाषा #मराठीसंस्कृती #मराठीउद्योजक #उद्योजकता #मराठीव्यवसाय #महाराष्ट्र #मराठीमाणूस #मराठीगौरव #मराठीअभिमान #ग्रामीणविकास #समृद्धगाव #रोजगारनिर्मिती #शिक्षणविकास #मराठीशाळा #लोकसहभाग
