Bhangima

12/10/2026

धन्यवाद पत्रकार बंधु... 💐

12/10/2026

“मासिक नाट्य शृंखला” मे भेल काव्य कोलाज “केन्द्र मे स्त्री” केर प्रस्तुति

विशेष रूप सँ नव पीढ़ीक मैथिली कवि लोकनिक कविता सबमे व्यक्त स्त्री विमर्श विषयक चिन्ता आ अभिव्यक्तिक शैली रवि दिन (11 अक्टूबर) विद्यापति भवन मे शहरी दर्शक लोकनि केँ बेर-बेर झकझोरलक। किशोर केशवक कल्पनाशील निर्देशन मे भेल एहि प्रस्तुति मे प्रियंका झा, रितु राजपूत, प्रीति कुमारी, बैजू झा, शिवम कुमार झा, अनिमेष सिंह आ अमित कुमार मिश्र आदि कलाकार भाग लेलनि। ई प्रस्तुति मैथिली नाट्य संस्था भंगिमाक छल।

स्त्री विमर्शक एहि काव्य-कोलाज मे आठटा कवि लोकनिक तेरहटा कविता सम्मिलित कयल गेल छल। कविगण मे हरे कृष्ण झा, विनोद कुमार झा, दिलीप कुमार झा, ज्योत्स्ना चन्द्रम, डॉ. बिभा कुमारी, दीपा मिश्र, शारदा झा आ प्रियंका मिश्र छलीह। हिनक चयनित कविता सब मे भूमंडलीकरणक बाद स्त्री विमर्शक आयाम मे आयल परिवर्त्तन सब केँ अकानबाक गम्भीर प्रयास छल।

प्रस्तुति उपरान्त एहि शृंखलाक एखन धरिक तीनू (जन्मदिन आ त्रिशंकु, डैडीगाम तथा घसल अठन्नी) प्रस्तुतिक वीडियो चेतना समितिक अध्यक्ष विवेकानंद झा भंगिमाक यूट्यूब चैनल ( https://youtube.com/?si=qYOPWfLBMOVzTS-9 ) पर लोकार्पित कयलनि। पछाति कवि वैद्यनाथ मिश्र रचित शृंखला-काव्य पुस्तक “से कहलनि सीता” सेहो लोकार्पित भेल। लोकार्पण कयलनि विवेकानंद झा, प्रेमलता मिश्र प्रेम, विनोदानन्द मिश्र, धीरेन्द्र कुमार झा, कमल मोहन चुन्नू आदि।

एहि अवसरक किछु फोटो सब देखल जाए। एकरा संगहि, जनतब हो जे नवम्बर मासक दोसर रवि (8 नवम्बर) केँ दीयाबाती होयबाक कारण सँ प्रस्तुति स्थगित रहत। आब 13 दिसम्बर, 2026 केँ अगिला प्रस्तुति होयत। चेतना समिति आ भंगिमाक संयुक्त तत्वावधान मे एहि शृंखलाक अन्तर्गत अगस्त 2026 सँ अगस्त 2027 धरि सब मासक दोसर रवि केँ मैथिली कथा, कविता, उपन्यास, व्यंग्य आ ललित निबन्ध केन्द्रित प्रस्तुति सब होइत अछि।

#मासिक_नाट्य_शृंखला_सब_मास_दोसर_रवि

11/10/2026

10/10/2026

#मासिक_नाट्य_शृंखला_सब_मास_दोसर_रवि

11 अक्टूबर : केन्द्र मे स्त्री : 15 मिनटक अतिरिक्त समय दी

एहि मासक दोसर रवि (11 अक्टूबर) शारदीय नवरात्रक पहिल पूजा अर्थात् कलश स्थापनक दिन थिक। मुदा तेँ की? ठानल काज थोड़बे नहि करब! संकल्प डगमगा गेल तखन कोन संकल्प? केहन रंगकर्म? कथीक संस्कृतिकर्मी?

से हमरालोकनि “मासिक नाट्य शृंखला”क अंतर्गत स्त्री विमर्श पर केन्द्रित काव्य-कोलाज “केन्द्र मे स्त्री” अपन निर्धारित समय पर प्रस्तुत करबे करब; अपन सब घोषित स्व-अनुशासनक संग। एकर विवरण लेल कृपया संलग्न पोस्टर देखल जाए।

सब गोटे नि:संकोच आउ...जे साहित्य-कला-संस्कृति-प्रेमी पटना रहैत छी, अवश्ये आउ...जे पटनासँ बाहर रहैत छी, मुदा पटना कोनो कार्यवश आयल छी, ओहो विद्यापति भवन आउ...

मुदा विनम्र आग्रह जे 15 मिनटक समय बेसी ल’ क’ आयब...प्रस्तुति एके घंटाक होयत मुदा तकरा बाद दूटा महत्त्वपूर्ण कार्यक्रम आओर जुड़ि गेल अछि। ताहिमे प्राय: 15 मिनटक समय लागत। एकर विवरण एना अछि :-

1. एहि शृंखलाक एखन धरिक तीनू (जन्मदिन आ त्रिशंकु, डैडीगाम तथा घसल अठन्नी) प्रस्तुतिक वीडियो एडिट भ’ गेल अछि, से तकरा प्रस्तुतिक उपरान्त भंगिमाक यूट्यूब चैनल ( https://youtube.com/?si=qYOPWfLBMOVzTS-9 ) पर लोकार्पित करब।
2. कवि-मित्र श्री वैद्यनाथ मिश्र रचित शृंखला-काव्य पुस्तक “से कहलनि सीता” सेहो लोकार्पित करब। सीताकेँ केन्द्रमे राखि एके शीर्षकक अन्तर्गत लिखल गेल 24टा कविताक ई संग्रह थिक। एकर रचना-यात्रा हमरहि निर्देशनमे भेल नाटक “सुनू जानकी”सँ जुड़ल अछि, से अतिरिक्त प्रसन्नताक विषय...

एकर अतिरिक्त, सम्मानित प्रेक्षकलोकनिसँ विशेष आग्रह...

कृपया एहि प्रस्तुति सभक अपने वीडियो नहि बनाउ। हमरा लोकनिक वीडियोग्राफर एकरा शूट करैत छथि आ हमरालोकनि अपन योजनाक अनुरूप ओकरा यथा-समय सार्वजनिक करब। कृपया हमरालोकनिक योजना क्रियान्वयनमे सहयोग करी, से करबद्ध प्रार्थना...


सादर
किशोर केशव
सचिव, भंगिमा, पटना
मो.: 94310 20170

05/10/2026

#मासिक_नाट्य_शृंखला_सब_मास_दोसर_रवि

11 अक्टूबरक हकार : केन्द्र मे स्त्री

मैथिली साहित्यक केन्द्रीय विमर्शक बिन्दु सबमे “स्त्री विमर्श” अदौसँ सर्वाधिक चर्चित आ रुचिकर विषय रहल अछि। एकैसम शताब्दीमे एकर अभिव्यक्ति आ आयाम भने बदलल हो; किन्तु एखनहु ई केन्द्रीय स्थान पर अछिए। एहि एकैसम शताब्दीक चतुर्थांश बीति गेल, मुदा ई विषय एखनहु “हॉटकेक” बनले अछि। एहि अवधिमे कमसँ कम संख्यात्मक रूपसँ महिला लेखिकालोकनिक आह्लादकारी आगमनसँ एकर त्वरा आ तेवर सेहो बदलल अछि।

हमरालोकनि “स्त्री विमर्श”केँ समकालीन मैथिली कविताक माध्यमे चिन्हबा-गुनबाक प्रयत्न कयल अछि अपन “मासिक नाट्य शृंखला”क अग्रिम कड़ीमे। “केन्द्र मे स्त्री” शीर्षकसँ कुल 13 टा छोट-पैघ कविताक ई प्रस्तुति 11 अक्टूबरकेँ विद्यापति भवन, पटनामे होयत। ओहि दिन शारदीय नवरात्रक पहिल पूजा अर्थात् कलश-स्थापन रहतैक। से एहि विषय पर विमर्श लेल एहिसँ नीक दिन आ अवसर दोसर कोन होइत...!

एहि प्रस्तुति लेल कविताक चयनमे एहि बातक विशेष सावधानी रखबाक प्रयास कयल गेल अछि जे ओकर प्रकाशन एकैसम शताब्दीमे भेल हो जाहिसँ “भूमंडलीकरण”क आभा-मंडलक बीच “स्त्री विमर्श”क विस्तारकेँ सेहो अकानल जा सकए। एहि लेल तीन कवि क्रमश: हरे कृष्ण झा (दिवंगत), विनोद कुमार झा (मुम्बइ) आ दिलीप कुमार झा (मधुबनी) केर कुल पाँच कविता आ पाँच कवियित्री क्रमश: ज्योत्स्ना चन्द्रम (दिवंगत), डॉ. बिभा कुमारी (राजनगर), दीपा मिश्र (मैसूर), शारदा झा (हैदराबाद) आ प्रियंका मिश्र (पटना) केर कुल आठ कविताक चयन कयल गेल अछि। प्रियंका मिश्र मैथिलीक नव्यतम पीढ़ीक कवियित्री छथि।

उल्लेखनीय अछि जे अगस्त, 2026 सँ शुरू भेल “मासिक नाट्य शृंखला” प्रत्येक मासक दोसर रविकेँ होइत अछि जाहिमे मैथिली कथा, कविता, उपन्यास, व्यंग्य आ ललित निबन्ध आदिक हू-ब-हू प्रस्तुति होइत अछि। एखन धरि एकर तीनटा आयोजन भेल अछि। प्रथम आयोजन 9 अगस्त 2026 केँ भेल छल जाहिमे “ओ डियर ग्लोबल विलेज” सीरीजक अन्तर्गत दूटा कथा (विद्यानन्द झाक “जन्मदिन” आ सुकांत सोमक “त्रिशंकु”) केर प्रस्तुति भेल। दोसर आयोजन 13 सितम्बर, 2026 केँ भेल जाहिमे एही कथा सीरीजमे कथाकार अशोकक कथा “डैडीगाम”क प्रस्तुति कयल गेल। तेसर आयोजन 2 अक्टूबरकेँ “विशेष प्रस्तुति”क (निर्धारित तिथिसँ फुट) छल जाहिमे काशीकान्त मिश्र 'मधुप'क कालजयी कथा-काव्य “घसल अठन्नी” प्रस्तुत कयल गेल। आब चारिम आयोजन 11 अक्टूबरकेँ अछि। “मासिक नाट्य शृंखला” “चेतना समिति”, पटना आ नाट्य संस्था “भंगिमा”क संयुक्त आयोजन थिक जे अगस्त, 2027 धरि चलबाक अछि। “मासिक नाट्य शृंखला”मे प्रस्तुति करबाक लेल भारत आ नेपालक लगभग डेढ़ दर्जन नाट्य-संस्था/व्यक्तिकेँ सेहो आमंत्रित कयल गेल छनि।

आग्रह जे, जे साहित्य-कला-संस्कृति-प्रेमी पटनामे रहैत छी, एहि नव प्रयोगक साक्षी अवश्य बनी...जे पटनासँ बाहर रहैत छी, मुदा 11 अक्टूबरकेँ पटनामे कोनो निजी कार्यवश रहब अथवा रहबाक योजना अछि, अवश्य एक घंटाक समय निकाली आ विद्यापति भवन आबी...

विस्तृत विवरण लेल कृपया संलग्न पोस्टरक अवलोकन कयल जाए आ एहि सूचना/आमन्त्रणकेँ बेसीसँ बेसी प्रसारित करबामे सहयोग कयल जाए...

सादर
किशोर केशव
सचिव, भंगिमा, पटना
मो.: 94310 20170
दिनांक : 05 अक्टूबर 2026

03/10/2026

धन्यवाद प्रभात खबर...

02/10/2026

#मासिक_नाट्य_शृंखला_सब_मास_दोसर_रवि

“घसल अठन्नी”क भेल विशेष प्रस्तुति

13 सितम्बर 2026 केँ “मासिक नाट्य शृंखला”क अन्तर्गत कथाकार अशोकक कथा “डैडीगाम”क प्रस्तुति भेल छल। प्रस्तुतिक बाद जखन मंच सँ अगिला कार्यक्रमक सूचना देल जा रहल छल जे अक्टूबरक कार्यक्रम “कविता-केन्द्रित” होयत; सभागार मे उपस्थित एकटा अत्यन्त सम्मानित दर्शक “घसल अठन्नी”क प्रस्तुति देखबाक जोर-शोर सँ माँग करए लागल छलाह।

हुनक ई आग्रह वस्तुत: हमरा लोकनिक लेल एकटा संवेदनशील प्रेक्षकक आदेश छल; आदेश नहि, अध्यादेश छल। तकरा शीघ्र कार्यान्वित करबाक छल। से खुशी अछि जे आइ 2 अक्टूबर 2026 केँ “मधुप जयन्ती”क अवसर पर कार्यान्वित भेल। चेतना समितिक एहि कार्यक्रम मे “घसल अठन्नी”क “विशेष प्रस्तुति” भेल। एहि मे बैजू झा, शिवम कुमार झा, प्रीति कुमारी, अमित कुमार मिश्र, अनिमेष कुमार सिंह आदि भाग लेलनि। प्रस्तुति आलेख, परिकल्पना आ निर्देशन किशोर केशवक छल। आजुक प्रस्तुतिक प्रथम दर्शक बिहार प्रशासनिक सेवाक अधिकारी आ कवि श्री गोपेश कुमार चौधरी आ दोसर दर्शक आकाशवाणी, पटना (विज्ञापन प्रसारण सेवा) केर कार्यक्रम प्रमुख श्री अंशुमान झा रहथि।

लगभग 20 मिनटक एहि प्रस्तुति मे सभागार मे अजीब सन्नाटा पसरल रहल। सबटा आँखि मंच दिस, कान पार्श्व ध्वनि आ संगीत दिस...एक-एकटा शब्द आ ध्वनि जेना पीबि जयबाक लेल उद्यत दर्शक-समूह। ई रंगमंचक जादुई प्रभाव छल कि कालजयी कविताक इंद्रजाल आकि दुनू! जे हो, मुदा दरभंगा सँ आयल प्रो. इंदिरा झा टिपलनि, “ई प्रस्तुति पहिने देखने रहितहुँ तँ अठमा क्लास मे सप्रसंग व्याख्या तीन घंटा धरि लिखैत रहि जइतहुँ।” तहिया ओ डेढ़ घंटा धरि लिखने रहथि, से अपन सम्बोधनक क्रम मे पहिने कहि चुकल रहथि।

उल्लेखनीय अछि जे अगस्त, 2026 सँ शुरू भेल “मासिक नाट्य शृंखला” प्रत्येक मासक दोसर रवि केँ होइत अछि जाहि मे मैथिली कथा, कविता, उपन्यास, व्यंग्य आ ललित निबन्ध आदिक हू-ब-हू प्रस्तुति होइत अछि। एखन धरि दूटा आयोजन भेल छल, आजुक विशेष प्रस्तुति मिला तीन आयोजन भेल। अगिला आयोजन 11 अक्टूबर केँ होयत। एहि मे स्त्री विमर्श विषयक मैथिली कविता सभक प्रस्तुति कयल जायत। ई “मासिक नाट्य शृंखला” “चेतना समिति”, पटना आ नाट्य संस्था “भंगिमा”क संयुक्त आयोजन थिक जे अगस्त, 2027 धरि चलबाक अछि। एहि “मासिक नाट्य शृंखला” मे प्रस्तुति करबाक लेल भारत आ नेपालक लगभग डेढ़ दर्जन नाट्य-संस्था/व्यक्ति केँ सेहो आमंत्रित कयल गेल छनि।

सादर
किशोर केशव
भंगिमा, सचिव, पटना
94310 20170
दिनांक : 02 अक्टूबर 2026

30/09/2026

#मासिक_नाट्य_शृंखला_सब_मास_दोसर_रवि

विशेष प्रस्तुति: 2 अक्टूबरक हकार

ओना तँ अगस्त, 2026 सँ शुरू भेल “मासिक नाट्य शृंखला” प्रत्येक मासक दोसर रवि केँ होइतहि अछि जाहि मे मैथिली कथा, कविता, उपन्यास, व्यंग्य आ ललित निबन्ध आदिक हू-ब-हू प्रस्तुति होइत अछि। से एखन धरि दूटा आयोजन भेल अछि आ तेसर अक्टूबरमे प्रस्तावित अछि; तकर सूचना फराकसँ जल्दी देब। ई “मासिक नाट्य शृंखला” “चेतना समिति”, पटना आ नाट्य संस्था “भंगिमा”क संयुक्त आयोजन थिक जे अगस्त, 2027 धरि चलत।

मुदा एखन सूचना ई अछि जे अपन एकटा अत्यन्त सम्मानित दर्शक महोदयक इच्छा आ सार्वजनिक माँगक प्रतिपूर्ति मे एकटा “विशेष प्रस्तुति” एखन 2 अक्टूबर केँ होयत। ओहि दिन मधुप जीक जन्म-जयंती होइत छनि।

भेल एना रहैक जे सितम्बरक आयोजन मे जखन अगिला कार्यक्रम सम्बन्धी सूचना दैत ई कहल जाइत रहैक जे अक्टूबरक कार्यक्रम “कविता-केन्द्रित” होयत; सभागार मे उपस्थित एकटा अत्यन्त सम्मानित दर्शक “घसल अठन्नी”क प्रस्तुति देखबाक जोर-शोर सँ माँग करए लगलाह। मंच सँ तकरा शीघ्र करबाक आ योजना मे शामिल होयबाक बात तखन कहल गेल रहनि। तकर पाछाँ विचार आ लक्ष्य इएह छलैक; 2 अक्टूबर केँ “मधुप जयन्ती” पर होइ वला चेतना समितिक कार्यक्रम। से एहि अवसर पर “घसल अठन्नी”क ई “विशेष प्रस्तुति” होयत।

आग्रह जे सब गोटे एहि प्रस्तुतिक साक्षी बनी...विस्तृत विवरण लेल कृपया संलग्न पोस्टरक अवलोकन करी...

सादर
किशोर केशव
भंगिमा, सचिव, पटना
94310 20170

15/09/2026

आदरणीय महानुभाव
जँ अपने मैथिली नाटक-रंगमंच आ कला-संस्कृति सँ सिनेह करैत छी...
जँ अपने मैथिली साहित्य आ समाज सँ आपकताक अनुभव करैत छी...
जँ अपने मैथिली भाषा आ मिथिलाक उन्नतिक लेल चिन्तन करैत छी...

तँ आग्रह जे
प्रसिद्ध मैथिली नाट्य-संस्था “भंगिमा”क सूचना-सम्प्रेषणक एहि व्हाट्सएप चैनल सँ जुड़ि जाइ...
आमंत्रण लिंक केँ पहिने स्वयं स्वीकार करी; तखन लग-पासक लोक केँ एहि लेल प्रेरित करियनि...
तकनीक जँ उपलब्ध छैक तँ पछुआयल किएक रही, एकर सकारात्मक उपयोगक सहभागी बनी...

आओर किछु नहि तँ
उक्त विषय सब पर व्यक्तिगत स्तर पर जरूरी अपडेट अपने केँ घर बैसल समय-समय भेटैत रहत...
एहि संग “भंगिमा”क जनबा लायक जरूरी सूचना, अपडेट तथा आमंत्रण सब सेहो पहुँचल करत...
ई नि:शुल्क तकनीकी सेवा अछि...सूचना भेटला पर जे उचित लागत से निर्णय अपने स्वयं करब...

एकर बेगरता किएक भेल?
सब बेर नव सूचना देबा काल हमरा लोकनिक बहुत समय आ श्रम अनेरे जियान भ’ जाइत अछि...
व्हाट्सएप चैनलक मार्फत एके बेर पोस्ट कयला पर सब गोटे लग वाँछित सूचना पहुँचि गेल करत...
एहि तरहेँ हमरा लोकनिक जे समय आ श्रम बचत, तकर उपयोग जरूरी रचनात्मक काज मे करब...

निश्चिन्त रही जे
एहि पर कोनो अलर-बलर पोस्ट नहि जायत...
गुड मॉर्निंग गुड इवनिंगक उठौना नहि जायत...
गतिविधि होयत तँ सूचना बनत आ सैह जायत...

सूचना पर शंका भेल तँ
अपने व्यक्तिगत मैसेज करी, शंकाक समाधान होयत...
आधिकारिक सेंट्रलाइज मैसेज सेंटर सँ सूचना जायत...
अतएव, एकरा गलत होयबाक सम्भावना नहिएँ रहत...

https://whatsapp.com/channel/0029Vb8vRzzJJhzcTd8mmC2N

Follow भंगिमा's WhatsApp Channel. Established in 1984, Bhangima is a reputed group of talented stage artists of Bihar which performs regular shows in Maithili language at Patna and in different places in India and Nepal.. Join 216 followers for the latest updates.