11/12/2025
സമൂഹത്തിൽ പരിഭ്രാന്തി പടർന്ന കാലമായിരുന്നെങ്കിലും, മാനവിക മൂല്യങ്ങളിലൂന്നി സാമൂഹിക പ്രതിബദ്ധതയോടെ പ്രവർത്തിച്ച മൈത്രി സെന്ററിന് അതിന്റെ നിയോഗലക്ഷ്യം സാർത്ഥകമായ ദിനങ്ങളായിരുന്നു 'SIR' കാലം.
SIR ന്റെ ആദ്യ വാരം മുതൽ ആരംഭിച്ച് കങ്ങഴയിലെ അവസാന വ്യക്തിക്കും സമ്മതിദാനാവകാശം നഷ്ടപ്പെടരുതെന്ന ജാഗ്രതയോടെ ഇതുവരെയും പ്രവർത്തിച്ചതിന്റെ ചാരിതാർത്ഥ്യവുമായാണ് ഈ വലിയ സാമൂഹിക ദൗത്യത്തിന് മൈത്രി സെന്റർ തത്കാലികമായി വിരാമമിടുന്നത്.
നാനാജാതി മതസ്ഥരായ എഴുന്നൂറിൽപ്പരം ആളുകളാണ്, SIR ലൂടെ ഭരണകൂടം ജനതക്ക് മേൽ അടിച്ചേല്പിച്ച ആകുലതകളാൽ ഉഴറി 'മൈത്രി'യിലേക്ക് എത്തിയത്.
എല്ലാ വിവരങ്ങളുമായി വന്നവർക്ക് അത് ഫോമിലേക്ക് പകർത്തി നൽകുക എന്ന കേവല സഹായമായിരുന്നില്ല, എന്യൂമറേഷൻ ഫോം തന്നെ ലഭിക്കാതെ വ്യാകുലപ്പെട്ടെത്തിയ നിരവധി ആളുകൾക്ക് പഴയ ഇലക്ഷൻ ID നമ്പറിൽ നിന്ന് പുതിയത് കണ്ടെത്തി അതിൽ നിന്നും 2025 ലെ ലിസ്റ്റ് പരിശോധിച്ച് പേര് ഉറപ്പുവരുത്തി സ്വന്തം സ്ഥലത്തെയല്ലാത്ത BLO മാരെ ബന്ധപ്പെട്ട് ഫോം ലഭ്യമാക്കിയത് മുതൽ മറ്റു ജില്ലകളിലുള്ള ബൂത്തുകളിലെ ലിസ്റ്റുകൾ പരതി 2002 ലെ വിവരങ്ങൾ തേടിപ്പിടിച്ച് പൂരിപ്പിച്ചു നൽകിയത് വരെയുള്ള പ്രവർത്തനങ്ങളാണ് ഹെല്പ് ഡെസ്ക്ക് നിർവ്വഹിച്ചത്. 'സഫൽ ഇ സേവ'യുടെ സഹകരണത്തോടെ രണ്ടു ഫോമിലും പിഴവ് വരുത്തിയവർക്ക് സ്കാൻ ചെയ്ത് പുതിയതായി പ്രിന്റെടുത്ത് നൽകുന്ന സംവിധാനം ഏറെപ്പേർക്ക് ഉപകാരമായി. കങ്ങഴയിൽ നിന്ന് മാത്രമല്ല, മറ്റു പ്രദേശങ്ങളിൽ നിന്ന് വരെ ഈ സൗകര്യം പ്രയാജനപ്പെടുത്താൻ ആളുകൾ എത്തുകയുണ്ടായി. കങ്ങഴയിൽ വിജയകരമായി ആദ്യമായി ഓൺലൈനിൽ എന്യൂമറേഷൻ ഫോം സബ്മിറ്റ് ചെയ്തതും ശ്രദ്ധേയമായി. പ്രവാസികളായ നിരവധി സഹോദരങ്ങൾക്കും ഹെൽപ്പ് ഡെസ്ക്ക് മാർഗ്ഗനിർദ്ദേശങ്ങൾ നൽകി.
പഞ്ചായത്തിലെ മുഴുവൻ BLO മാരെയും പങ്കെടുപ്പിച്ചു കൊണ്ട് 'മൈത്രി'യിൽ സംഘടിപ്പിക്കപ്പെട്ട എന്യൂമറേഷൻ ഫോം കളക്ഷൻ സെന്ററും കങ്ങഴയിൽ ഇദംപ്രഥമമായിരുന്നു.
ഹെൽപ്പ് ഡെസ്കിൽ മൈത്രി സെന്ററുമായി സഹകരിക്കാനാകുമോ എന്ന് അന്വേഷിച്ചപ്പോൾ തന്നെ തന്റെ സംരംഭം വളർച്ചയുടെ പ്രാരംഭഘട്ടത്തിൽ മാത്രമായിട്ടും 'ഇപ്പോൾ സമൂഹത്തിന് അത്യാവശ്യമായി ചെയ്യേണ്ട സേവനമാണ്' എന്ന് പറഞ്ഞ് അതിന് സന്നദ്ധത അറിയിക്കുകയും, എന്ന് മാത്രമല്ല ഈ ദൗത്യത്തിലേക്ക് അഡീഷണൽ സ്റ്റാഫിനെ കൂടി സ്വന്തം ചെലവിൽ നിയമിക്കുകയും ചെയ്ത് ഈ സദുദ്യമത്തിന് മൈത്രി സെന്ററിനോട് കൈകോർത്ത 'സഫലിനെയും' അതിന്റെ ഉടമ സഹോദരൻ സനീഷ് കരീമിനെയും ഇപ്പോളെങ്കിലും ഇവിടെ പരാമർശിച്ചേ മതിയാവുകയുള്ളു. ആവശ്യപ്പെടുന്നവർക്കൊക്ക സൗജന്യമായാണ് 'സഫലി'ൽ നിന്നും ഫോം ഫോട്ടോസ്റ്റാറ്റ് എടുത്തു നൽകിക്കൊണ്ടിരുന്നത് എന്നതും മറക്കാവതല്ല. അതേ, നാമറിയാത്ത നന്മകൾ നിറഞ്ഞവരുടേത് കൂടിയാണ് സമൂഹം.
വെൽഫയർ പാർട്ടി SIR ഹെല്പ് ഡെസ്ക്ക് സ്റ്റേറ്റ് കൺവീനർ സജീദ് ഖാലിദ്, BLO യും വയനാട് ജില്ലയിലെ SIR ഹെൽപ്പ് ഡെസ്ക് കോർഡിനേറ്ററുമായ മമ്മൂട്ടി അഞ്ചുകുന്ന്, ഷൈജു ഹസൻ, നാട്ടിലെ വിവിധ BLO മാർ തുടങ്ങിയവർ നൽകിയ സഹകരണത്തെയും നന്ദിയോടെ സ്മരിക്കുന്നു.
പി.എച്ച് ജമാലുദ്ദീൻ, നവാസ് ലത്തീഫ്, ഷാജിൽ, സൗമ്യ മാത്യു, അനീഷ് സലിം, ബിജു, നൗഫിയ, അശ്വതി പി.എ, സഫ്ന, ജാസ്മിൻ, സാജിദ അനീഷ്, സജീന ബിജു, അശ്വതി തുടങ്ങിയവരുടെ ആത്മാർത്ഥവും ഉത്തരവാദിത്തപൂർണ്ണവുമായ പ്രവർത്തനമാണ് ഹെല്പ് ഡെസ്ക്കിനെ മികച്ച സേവനം നൽകാൻ പര്യാപ്തമാക്കിയത്.
ദൗത്യം അവസാനിക്കുന്നില്ല! സ്വയവും സ്വന്തക്കാരും മാത്രം സുരക്ഷിതമാവുകയല്ല, വിദ്വേഷ പ്രഘോഷകരുടെ വിഭജനഅജണ്ടകൾക്ക് ഒരാളും ഇരയാക്കപ്പെടാതിരിക്കാനുള്ള ജാഗ്രതയും പ്രതിരോധങ്ങളും തുടരുക തന്നെ വേണ്ടതുണ്ട്.
ഏതൊരു ഇരുണ്ടകാലത്തെയും നാമൊരുമയോടെ അതിജീവിക്കും, തീർച്ച..!
