06/09/2026
*പിൻവാതിൽ നിയമനത്തിലൂടെ സംവരണം അട്ടിമറിക്കാൻ അനുവദിക്കില്ല: മുഖ്യമന്ത്രി*
ഭവനനിർമാണ സഹായം വർധിപ്പിക്കും; എയ്ഡഡ് മേഖലയിലെ അധ്യാപക നിയമനം പരിശോധിക്കും
പറവൂർ: പിൻവാതിൽ നിയമനങ്ങളിലൂടെ പട്ടികജാതി–പട്ടികവർഗ വിഭാഗങ്ങളുടെ സംവരണാവകാശം അട്ടിമറിക്കാൻ അനുവദിക്കില്ലെന്ന് മുഖ്യമന്ത്രി വി.ഡി. സതീശൻ. സംവരണം അട്ടിമറിക്കപ്പെടുന്നതിനുള്ള പ്രധാന കാരണങ്ങളിലൊന്ന് പിൻവാതിൽ നിയമനങ്ങളാണെന്നും അവ തടയാൻ നടപടി സ്വീകരിക്കുമെന്നും അദ്ദേഹം പറഞ്ഞു. എസ്.സി–എസ്.ടി ആനുപാതിക പ്രാതിനിധ്യ പ്രക്ഷോഭ സമിതി (APPS) നോർത്ത് പറവൂർ ടൗൺഹാളിൽ സംഘടിപ്പിച്ച അവകാശ സംരക്ഷണ സംഗമം ഉദ്ഘാടനം ചെയ്യുകയായിരുന്നു മുഖ്യമന്ത്രി.
പട്ടികജാതി വിഭാഗങ്ങൾക്ക് ഭവനനിർമാണത്തിന് നൽകുന്ന ധനസഹായം വർധിപ്പിക്കുമെന്നും എയ്ഡഡ് മേഖലയിലെ അധ്യാപക നിയമനവുമായി ബന്ധപ്പെട്ട വിഷയങ്ങൾ പരിശോധിക്കുമെന്നും മുഖ്യമന്ത്രി അറിയിച്ചു. APPS സമർപ്പിച്ച നിർദേശങ്ങൾ അനുഭാവപൂർവം പരിഗണിച്ച് ആവശ്യമായ നടപടികൾ സ്വീകരിക്കുമെന്നും അദ്ദേഹം പറഞ്ഞു.
റവന്യൂ മന്ത്രി എ.പി. അനിൽകുമാർ എയ്ഡഡ് മേഖലയിലെ അധ്യാപക നിയമനവുമായി ബന്ധപ്പെട്ട വിഷയങ്ങളെക്കുറിച്ച് വിശദമായി സംസാരിച്ചു.
APPS ചെയർമാനും റിട്ട. ഐ.എ.എസ് ഉദ്യോഗസ്ഥനുമായ ബി.എസ്. മാവോജി അധ്യക്ഷത വഹിച്ചു. പട്ടികജാതി–പട്ടികവർഗ സമൂഹം ഭൂമി, ഭവനം, വിദ്യാഭ്യാസം, തൊഴിൽ, സംവരണം, സർക്കാർ നിയമനം, എയ്ഡഡ് മേഖലയിലെ പ്രാതിനിധ്യം, വിദ്യാഭ്യാസ ആനുകൂല്യങ്ങൾ, വികസന ഫണ്ട് തുടങ്ങിയ മേഖലകളിൽ നേരിടുന്ന പ്രശ്നങ്ങൾ ചൂണ്ടിക്കാട്ടിയ അദ്ദേഹം പരിഹാരനിർദേശങ്ങളും മുന്നോട്ടുവച്ചു.
ജനസംഖ്യാനുപാതിക പ്രാതിനിധ്യം ഉറപ്പാക്കുക, സംവരണം സംരക്ഷിക്കുക, പിൻവാതിൽ നിയമനങ്ങൾ അവസാനിപ്പിക്കുക, എയ്ഡഡ് മേഖലയിലെ പ്രാതിനിധ്യം ഉറപ്പാക്കുക, ഭൂമി–ഭവന പ്രശ്നങ്ങൾക്ക് പരിഹാരം കാണുക തുടങ്ങിയ ആവശ്യങ്ങൾ ഉൾപ്പെടുത്തിയ അവകാശപത്രിക APPS സംസ്ഥാന വൈസ് പ്രസിഡന്റ് പി.ഡി. സുരേഷ് അവതരിപ്പിച്ചു.
APPS ജനറൽ സെക്രട്ടറി എ. ശശിധരൻ സ്വാഗതം പറഞ്ഞു. വിവിധ പട്ടികജാതി–പട്ടികവർഗ സംഘടനകളെ ഏകോപിപ്പിച്ച് സമൂഹത്തിന്റെ പൊതുവായ അവകാശപ്രശ്നങ്ങൾക്ക് ശക്തമായ പൊതുവേദി ഒരുക്കുക എന്ന ലക്ഷ്യത്തോടെയാണ് APPS പ്രവർത്തിക്കുന്നതെന്ന് അദ്ദേഹം പറഞ്ഞു. വിവിധ സംഘടനകൾ വേർതിരിഞ്ഞ് ഉന്നയിക്കുന്ന ആവശ്യങ്ങളെ പൊതുവായ അവകാശ അജണ്ടയുടെ അടിസ്ഥാനത്തിൽ ഏകോപിപ്പിക്കുകയും സർക്കാരിന്റെയും പൊതുസമൂഹത്തിന്റെയും ശ്രദ്ധയിൽ കൊണ്ടുവരികയും ചെയ്യേണ്ടത് കാലഘട്ടത്തിന്റെ ആവശ്യമാണെന്നും അദ്ദേഹം ചൂണ്ടിക്കാട്ടി.
ഭരതർ മഹാജന സഭ സംസ്ഥാന പ്രസിഡന്റ് എസ്. സജത്, ജനറൽ സെക്രട്ടറി എ. ആർ. വിജയകുമാർ, സ്വജന സമുദായ സഭ ജനറൽ സെക്രട്ടറി എ.എൻ. രാജൻ, കെ.പി.എം.എസ് ജനറൽ സെക്രട്ടറി കെ.എ. തങ്കപ്പൻ, ഓൾ കേരള വർണ്ണവ സൊസൈറ്റി പ്രസിഡന്റ് പി.ഇ. വേണുഗോപാൽ, സാംബവ മഹാസഭ ജനറൽ സെക്രട്ടറി രാമചന്ദ്രൻ മുല്ലശ്ശേരി, എ.കെ.പി.യു.എസ് ജനറൽ സെക്രട്ടറി യു.കെ. സദാനന്ദൻ, ഭാരതീയ വേലൻ സർവീസ് സൊസൈറ്റി പ്രസിഡന്റ് കെ.കെ. ശശി, അഖില കേരള വണ്ണാർ സംഘം സംസ്ഥാന പ്രസിഡന്റ് പൊന്നായി മോഹനൻ, അഖില വൈപ്പിൻ പുലയ വംശോദ്ധാരണ സഭ പ്രസിഡന്റ് എം.കെ. ഉദയൻ, കേരള മണ്ണാൻ സഭ മുൻ ജനറൽ സെക്രട്ടറി പ്രൊഫ. ഗോപിനാഥ്, കേരള വേലൻ മഹാസഭ പ്രസിഡന്റ് എ.ജി. സുഗതൻ, SCSTSM പാലക്കാട് ജനറൽ സെക്രട്ടറി കെ. മായാണ്ടി, AKCHMS പ്രസിഡന്റ് അഡ്വ. വി.ആർ. രാജു, AKPMS പ്രസിഡന്റ് എം.കെ. വാസുദേവൻ, കേരള സ്റ്റേറ്റ് എസ്.സി–എസ്.ടി സർവീസ് സൊസൈറ്റി പാലക്കാട് പ്രസിഡന്റ് രാജൻ തൃത്താല, DSS ചെയർമാൻ ബാബു കുന്നംകുളം, ഓൾ ഇന്ത്യ കോൺഫെഡറേഷൻ ഓഫ് എസ്.സി–എസ്.ടി ഓർഗനൈസേഷൻസ് കേരള സ്റ്റേറ്റ് പ്രസിഡന്റ് ബാബു കാസർഗോഡ്, കേരള സാംബവർ സർവീസ് സൊസൈറ്റി രക്ഷാധികാരി വെണ്ണിക്കുളം മാധവൻ, APPS രക്ഷാധികാരി പി.വി. കൃഷ്ണൻകുട്ടി, ഫെഡറേഷൻ ഓഫ് എസ്.സി–എസ്.ടി സംസ്ഥാന ജനറൽ സെക്രട്ടറി ടി. രവീന്ദ്രൻ, അംബേദ്കർ സാംസ്കാരിക സമിതിയിലെ ജി.എസ്. സുരേഷ് കുന്നപ്പള്ളി, ഫെഡറേഷൻ ഓഫ് എസ്.സി–എസ്.ടി മഹിളാ വിങ് സംസ്ഥാന സെക്രട്ടറി കെ.സി. ശോഭ, ഐ.ജെ.പി ജനറൽ സെക്രട്ടറി കെ.കെ. രാമകൃഷ്ണൻ എന്നിവർ ആശംസകൾ നേർന്നു.
കേരള ഹൈക്കോടതി അഭിഭാഷകൻ അഡ്വ. വിപിൻ കുമാർ കെ.പി. നന്ദി പറഞ്ഞു.
