06/06/2026
सामसिङ्ग–कुमाई क्षेत्रका जनसमस्याबारे विधायक भरत क्षेत्रीलाई ज्ञापनपत्र बुझाइयो
कुमाई, ६ जुन : सामसिङ्ग–कुमाई मण्डल–१४ का प्रतिनिधिहरूले नव निर्वाचित विधायक भरत क्षेत्रीसँग शिष्टाचार भेटघाट गर्दै क्षेत्रका विभिन्न जनसरोकारका समस्याहरू समाधान गर्न माग गर्दै ज्ञापनपत्र बुझाएका छन्।
ज्ञापनपत्रमा सामसिङ्ग–कुमाई क्षेत्रको समग्र विकास तथा आधारभूत सेवा विस्तारसँग सम्बन्धित महत्वपूर्ण मागहरू समावेश गरिएको छ। प्रमुख मागहरूमध्ये सामसिङ्ग–कुमाई मण्डल–१४ मा प्राथमिक स्वास्थ्य केन्द्र (PHC) स्थापना, सामसिङ्ग खास जुनियर बेसिक स्कूल–सामसिङ्गफारीलाई कक्षा १० सम्म स्तरोन्नति, तथा कुमाई क्षेत्रमा प्रहरी थाना स्थापना रहेका छन्।
त्यसैगरी, कुमाईका लागि छुट्टै पिन कोड र हुलाक कार्यालयको व्यवस्था, चिया श्रमिकहरूको न्यूनतम ज्याला सुनिश्चित गर्ने, तथा वन अधिकार ऐन–२००६ अन्तर्गत भूमि स्वामित्व अधिकारसम्बन्धी विषयलाई पश्चिम बंगाल विधानसभामा उठान गर्नुपर्ने मागसमेत ज्ञापनपत्रमा उल्लेख गरिएको छ।
स्थानीयवासीहरूको आवागमनलाई सहज बनाउन कुमाईदेखि सिलिगुडीसम्म सरकारी बस सेवा सञ्चालन गर्नुपर्ने माग पनि राखिएको छ।
ज्ञापनपत्र बुझाउने पक्षले विधायक भरत क्षेत्रीले जनहितसँग जोडिएका यी विषयहरूलाई प्राथमिकताका साथ सम्बन्धित निकायसमक्ष पुर्याई आवश्यक पहल गर्ने विश्वास व्यक्त गरेका छन्। साथै, सामसिङ्ग–कुमाई क्षेत्रको विकास, आधारभूत सेवा विस्तार र जनअधिकार सुनिश्चित गर्न आफ्नो प्रयास निरन्तर रहने बताएका छन्।
