25/08/2026
🌿 বালিগাঁও জগন্নাথ বৰুৱা আৰ্য বিদ্যালয়ত আন্তঃবিদ্যালয় কুইজ প্ৰতিযোগিতা সম্পন্ন 🏆
বিদ্যালয়খনৰ শতবৰ্ষ উদযাপনৰ সৈতে সংগতি ৰাখি যোৱা ১৮ আগষ্ট, ২০২৬ তাৰিখে আমাৰ বিদ্যালয়ৰ প্ৰেক্ষাগৃহত এখন আন্তঃবিদ্যালয় কুইজ প্ৰতিযোগিতা সফলতাৰে অনুষ্ঠিত হয়। যোৰহাটৰ আগশাৰীৰ ১৮খন বিদ্যালয়ে অংশগ্ৰহণ কৰা এই জ্ঞানভিত্তিক প্ৰতিযোগিতাখনে ছাত্ৰ-ছাত্ৰীসকলৰ মাজত জ্ঞানচৰ্চা, সুস্থ প্ৰতিযোগিতাৰ মনোভাৱ আৰু আত্মবিশ্বাস বৃদ্ধিৰ এক সুন্দৰ পৰিৱেশ সৃষ্টি কৰে।
🏆 প্ৰতিযোগিতাৰ ফলাফল—
🥇 প্ৰথম স্থান:
যোৰহাট কাৰ্মেল স্কুল
• শ্ৰী অগ্ৰত এন. বৰা
• শ্ৰী উদিতা ফুকন
🥈 দ্বিতীয় স্থান:
প্ৰজ্ঞা একাডেমী
• শ্ৰী অম্বৰীষ বৰপূজাৰী
• শ্ৰী মানস প্ৰতিম দাস
🥉 তৃতীয় স্থান:
এক্সিলিয়েৰ ছিনিয়ৰ ছেকেণ্ডাৰী বিদ্যালয়
• শ্ৰী হিৰক জ্যোতি বৰা
• শ্ৰী স্বপ্নম শিৱম শইকীয়া
চতুৰ্থ স্থান: কৰঙা গাৰ্লছ হায়াৰ ছেকেণ্ডাৰী স্কুল
পঞ্চম স্থান: জ্ঞানজ্যোতি বিদ্যাপীঠ
প্ৰথম, দ্বিতীয় আৰু তৃতীয় স্থানপ্ৰাপ্ত দলক ক্ৰমে প্ৰাক্তন প্ৰধান শিক্ষক যোগেন্দ্ৰ নাথ শইকীয়া সোঁৱৰণী বঁটা, প্ৰাক্তন শিক্ষক যোগেন্দ্ৰ নাথ ভট্টাচাৰ্য সোঁৱৰণী বঁটা আৰু প্ৰাক্তন শিক্ষক গোলোক চন্দ্ৰ বৰা সোঁৱৰণী বঁটাৰ লগতে নগদ ধনৰ পুৰস্কাৰেৰে সন্মানিত কৰা হয়। চতুৰ্থ আৰু পঞ্চম স্থানপ্ৰাপ্ত বিদ্যালয়ক মানপত্ৰ প্ৰদান কৰা হয়।
অনুষ্ঠানৰ আৰম্ভণিতে বিদ্যালয়খনৰ প্ৰয়াত শিক্ষকসকলৰ প্ৰতিচ্ছবিত বন্তি প্ৰজ্বলন কৰি শ্ৰদ্ধাঞ্জলি জ্ঞাপন কৰে দাতা পৰিয়ালৰ হৈ শ্ৰী জ্যোতি ৰঞ্জন শইকীয়া, শ্ৰী জয়া শইকীয়া আৰু শ্ৰী নিৰেণ ভট্টাচাৰ্য দেৱে।
প্ৰয়াত প্ৰাক্তন প্ৰধান শিক্ষক যোগেন্দ্ৰ নাথ শইকীয়াৰ সুযোগ্য সন্তান তথা NEEPCO(অৰুণাচল প্ৰদেশ)ৰ জেনেৰেল মেনেজাৰ শ্ৰী জ্যোতি ৰঞ্জন শইকীয়াই শুভেচ্ছামূলক বক্তব্য প্ৰদান কৰি বিদ্যালয়খনত এনে ধৰণৰ জ্ঞানভিত্তিক প্ৰতিযোগিতা আয়োজন কৰাৰ বাবে সন্তোষ প্ৰকাশ কৰাৰ লগতে উদ্যোক্তাসকলৰ প্ৰচেষ্টাৰ শলাগ লয়।
কুইজ প্ৰতিযোগিতাখন সুচাৰুৰূপে পৰিচালনা কৰে চিনামৰা মহাবিদ্যালয়ৰ ইংৰাজী বিভাগৰ অধ্যাপক শ্ৰী আগা ছৈয়দ ইছলাম আৰু অৰ্থনীতি বিভাগৰ ড° ৰঞ্জু ভৰালীয়ে।
বিদ্যালয়খনৰ শিক্ষক-শিক্ষয়িত্ৰী, ছাত্ৰ-ছাত্ৰী, প্ৰাক্তন শিক্ষক-শিক্ষয়িত্ৰী, প্ৰাক্তন ছাত্ৰ-ছাত্ৰী, শুভাকাংক্ষী, বিভিন্ন বিদ্যালয়ৰ শিক্ষক-অভিভাৱক আৰু ছাত্ৰ-ছাত্ৰীৰ উপস্থিতিয়ে অনুষ্ঠানটি অধিক সজীৱ কৰি তোলে।
এই কুইজ প্ৰতিযোগিতাখন কেৱল এক প্ৰতিযোগিতা নহয়—ই আছিল জ্ঞান, প্ৰতিভা, স্মৃতি আৰু শতবৰ্ষৰ গৌৰৱময় যাত্ৰাক উদযাপন কৰাৰ এক সুন্দৰ প্ৰয়াস।
শতবৰ্ষৰ এই গৌৰৱময় যাত্ৰাত সহযোগিতা আগবঢ়োৱা প্ৰতিগৰাকী ব্যক্তি, বিদ্যালয়, শিক্ষক, অভিভাৱক, প্ৰতিযোগী আৰু শুভাকাংক্ষীলৈ বালিগাঁও জগন্নাথ বৰুৱা আৰ্য বিদ্যালয় পৰিয়ালৰ আন্তৰিক কৃতজ্ঞতা জনালোঁ। 🙏
শতবৰ্ষৰ গৌৰৱ | জ্ঞানৰ পোহৰ | আগন্তুক প্ৰজন্মৰ সপোন ✨
