04/01/2024
భారత ప్రజలు ౼ కళ్ళుతెరిపించే వాస్తవాలు
"భారత ప్రజలు" పేరుతో ఆంత్రోపొలాజికల్ సర్వే ఆఫ్ ఇండియా పరిశోధించి ప్రచురించిన పత్రం భారతదేశం, భారత సమాజం, సంస్కృతిల మీద బి.జె.పి. చేస్తున్న వాదనలను త్రిప్పికొడుతోంది. ఈ సర్వేను అత్యంత జాగ్రత్తతో, సునిశితంగా నిర్వహించారు. మొత్తం 500 మంది శిక్షణ పొందిన పరిశోధకులు ఈ సర్వేలో పాల్గొన్నారు. వీరిలో 284మంది ఆంత్రోపాలజికల్ సర్వే ఆఫ్ ఇండియాలో పనిచేస్తున్నవారు కాగా మరో 216మంది దేశవ్యాప్తంగా విస్తరించిన వివిధ పరిశోధనా సంస్థలు, యూనివర్శిటీలకు చెందినవారు. ప్రముఖ పరిశోధనా వేత్తగా ఆంత్రోపాలజికల్ సర్వే ఆఫ్ ఇండియాకు డైరెక్టర్గా ఉన్న శ్రీ కె.ఎన్. సింగ్ సర్వేకు అధిపతిగాను, సమన్వయకర్తగాను వ్యవహరించారు.
ఈ సర్వేను ప్రధానంగా మానవ సంబంధాల అధ్యయన శాస్త్రజ్ఞులు, సాంఘిక పరిశోధకులు నిర్వహించారు. వీరితోపాటు భాషా శాస్త్రాలు, మానసిక శాస్త్రం, పరిసరాల పరిశోధనాశాస్త్రం, జీవరసాయన శాస్త్రాలకు సంబంధించిన అనేకమంది పరిశోధకులు పాల్గొన్నారు. వీరు సర్వే చేసి అందించిన సమాచారాన్ని ఆంత్రోపొలాజికల్ సర్వే ఆఫ్ ఇండియాలో పనిచేస్తున్న చరిత్రకారులు సాంఘిక శాస్త్రవేత్తలు, రాజనీతి శాస్త్రవేత్తలు పరిశీలించి, విస్తృతంగా అధ్యయనం చేసి చర్చించారు. వివిధ జాతులకు చెందిన సమాచారాన్ని ఈ శాస్త్రజ్ఞులు ఆమూలాగ్రం పరిశీలించారు.
ఈ ప్రాజెక్టు 1985లో ప్రారంభమై దాదాపు దశాబ్దకాలం పాటు కొనసాగింది. తమ ప్రాథమిక పరిచయ పరిశోధనను 1992లో ప్రచురించారు. లోతైన, సుదీర్ఘ అధ్యయనం ద్వారా మనదేశంలో 91 సాంస్కృతిక జోన్లు ఉన్నాయని గుర్తించారు. ఒక సాంస్కృతిక జోన్ 4258 కమ్యూనిటీలు ఉన్నాయని కనుగొన్నారు. 331 సాంస్కృతిక జోన్లలో 45 సముదాయాల్ని అధ్యయనం చేశారు. ఈ మొత్తం సమాచారాన్ని 421 జిల్లాల నుండి సేకరించారు. ఈ అధ్యయనంలో ఒక జిల్లాలో 3972 సముదాయాలు, రెండు జిల్లాల్లో 512, రెండుకు మించిన జిల్లాల్లో 151 కమ్యూనిటీలు విస్తరించి ఉన్నట్లు గుర్తించారు. కొన్ని సందర్భాలలో 1807 కమ్యూనిటీలు ఒకే గ్రామంలోను, 783 రెండు గ్రామాల్లోను, రెండుకు మించిన గ్రామాల్లో 475 సముదాయాలు ఉన్నట్లు తెలుసుకున్నారు. మొత్తంగా పరిశీలిస్తే ఒక పట్టణం లేదా నగరంలో 1794 కమ్యూనిటీలు, రెండు పట్టణాలు లేదా నగరాల్లో 393, రెండుకు మించిన పట్టణాలు లేదా నగరాల్లో 182 విస్తరించినట్లు తేల్చారు. వివిధ కమ్యూనిటీలు దేశవ్యాప్తంగా విస్తరించి ఉన్నాయని, మొత్తంగా దేశంలో 4635 సముదాయాలు ఉన్నాయని నిర్ధారించారు. ప్రతి కమ్యూనిటీకి ఉన్న ప్రత్యేకతలు, అది అలా మారడానికి గల కారణాలు, ఇతర సముదాయాలతో సంబంధాలు, అంతర్గతంగా వస్తున్న మార్పులు అన్నింటిని క్షుణ్ణంగా పరిశీలించి ప్రస్తావించారు.
మనం మాట్లాడుకుంటున్న భిన్నత్వంలో ఏకత్వాన్ని ఈ ప్రాజెక్టు నిరూపించింది. సంఘ్ పరివార్ చాలాకాలంగా చేస్తున్న అసంబద్ధ వాదల్ని, వక్రీకరణలను ఇది ఎండగట్టింది. ఈ సర్వే అసలు సారాంశం క్రింది విధంగా ఉంది.
మొత్తం ప్రజలంతా ఒకే సమూహానికి చెందిన వారని నిర్ధారించలేం. ప్రపంచ వ్యాప్తంగా విస్తరించి ఉన్న వివిధ రకాల మనుషుల్లో మనమూ భాగమే. దేశవ్యాప్తంగా భిన్నమైన ఆకృతి, వస్త్రధారణ, భాష, వృత్తి, ఆహారపు అలవాట్లు, ఆచారాలు కలిగిన 4635 కమ్యూనిటీలు ఉన్నాయి. వాళ్ళందరి విభిన్నమైన జీవన విధానమే మన జాతీయ జీవన విధానంగా రూపొందింది.
ప్రతి ఒక్కరూ భారతదేశాన్ని తమ మాతృభూమిగానే నమ్ముతున్నారు. ఇక్కడ ఎవరూ స్వచ్ఛమైన ఆర్యులుకాని విదేశీయులు కాని లేరు. అనేక సముదాయాలు ఒక దానితో ఒకటి. కలిసి మిశ్రమ సంస్కృతిని రూపొందించాయి. వాటి మూలాలని తిరిగి విభజించడం అసాధ్యమైన పని, ప్రొటో-ఆస్ట్రలాయిడ్, పాలియో-మెడిటిరేనియన్, కాకసియన్, నీగ్రోయిడ్, మంగోలాయిడ్ లాంటి అనేక జాతులు కలిసి పోయాయి. ఆర్యులు, గ్రీకులు, హూణులు, అరబ్బులు, తురుష్కులు,ఆఫ్రికన్లు, మంగోలియన్లు, యూరోపియన్లు తదితర జాతులన్ని కలిసిపోయాయి. ఈ రోజున ఎవరినీ ఫలానా జాతికి చెందిన స్వచ్ఛమైన వారిగా నిర్ధారించలేం..
ఈ సముదాయాలలో అనేకం జన్యుపరంగాను, రక్తసంబంధాల పరంగాను కలిసిపోయాయి. ప్రాంతీయతను బట్టి ఐక్యత ఏర్పడిందికాని కులాన్ని బట్టి, మతాన్ని బట్టి కాదు. తక్కువ కులాల వాళ్ళు భిన్నమైన జాతులవారనే వాదన కూడా సరికాదని శాస్త్రీయంగా నిర్ధారణ అయింది. ఉదాహరణకు తమిళ బ్రాహ్మణులకు ఉత్తర భారతంలోని ముఖ్యంగా కాశ్మీర్ పండితులకు గల జాతి సంబంధాలు పరిశీలిస్తే పోలికలు చాలా స్వల్పంగా మాత్రమే ఉన్నాయి. అనేక ప్రాంతాలలో నిమ్నకులాలు, బ్రాహ్మణులు ఒకేరకంగా ఉన్నారు. అనేక ప్రాంతాలలోని ముస్లింలు వలసవచ్చినవారు కాదు. స్థానికంగా ఉన్న ప్రజలే ముస్లింలుగా మారారు.
భారతదేశంలో ఉన్న కొన్ని సముదాయాలు తాము వలసవచ్చినదవిగానో లేదా పరాయిదేశాలకు చెందినవిగానో ఒప్పుకోవు. కానీ, ప్రతి సముదాయం జానపద గీతాలు, చరిత్రల్లో మాత్రం తాము వలస వచ్చినవారమని చెప్పుకుంటున్నది. ప్రతి ఒక్కరు తాము నివసిస్తున్న ప్రాంత ఆచారాల్ని సాంప్రదాయాల్ని తమవిగా చేసుకున్నారు. దురాక్రమణదారులు సైతం వలసదారులుగా మారిపోయారు. వలసవచ్చిన వారినుండి భారత సంస్కృతి అనేక అంశాలను గ్రహించింది. తాము నివశిస్తున్న ప్రాంత సంస్కృతిని మరింత సుసంపన్నం చేశారు. గ్రీకులు నుండి, ముస్లింల నుండి, ఆంగ్లేయుల నుండి అనేక సాంస్కృతిక సామాజిక రాజకీయా విషయా లను, భాష ను, శిల్పకళ ను ఇలా రకరకాల అంశాలను భారతదేశం సంస్కృతి లో ఇమిడిపోయాయి.
భిన్నత్వానికి, ఐక్యతకు భాష ప్రధానంగా దోహదపడుతుంది. దేశంలో 325 మాట్లాడే భాషలు ఉండగా 25 భాషలకు లిపి ఉంది. ఇవన్నీ విభిన్న భాషా కుటుంబాలనుండి ఉద్భవించాయి. ఇండో-ఆర్యన్, టిబెట్ జర్మన్, ద్రవిడియన్ ఆస్ట్రో-ఏషియాటిక్, అండమానీస్, సెమిటిక్, ఇండో-ఇరానియన్, సినో-టిబెటన్, ఇండో యూరోపియన్ భాషా కుటుంబాల నుండి ఇంకా అనేక వేల భాషల నుండి మన భాషలు ఉద్భవించాయి. 655మ్యూనిటీలు రెండు భాషలు మాట్లాడతాయి. అనేక ఆటవిక సముదాయాలు 3 భాషలు మాట్లాడతాయి.భావనల్ని వ్యక్తం చేయడానికి, తమ తమ మాతృభాషలు చాలా దోహదపడ్డాయి.
85% సముదాయాలు తమ వనరుల ఆధారంగా ఏర్పడ్డాయి. జీవనవిధానం. వారి వృత్తి, వస్త్రధారణ, ఇళ్ళ నిర్మాణం మొదలైనవన్నీ వారు నివసిస్తున్న భూమి స్వభావం, వాతావరణ పరిస్థితి. ఇతర వనరులను బట్టి రూపొందాయి. నిపుణులు చెప్పేదేమంటే🌄 "సముదాయాలు" పరిసరాలు సంస్కృతిని బట్టి రూపొందాయి తప్ప మతాన్ని బట్టి కాదు" అని వివరికి వలస వచ్చి స్థిరపడిన వారు కూడా స్థానిక అలవాట్లకు అనుగుణంగానే జీవిస్తున్నారు. ఇళ్లలో వారు మాట్లాడే భాషను బట్టి తప్ప సముదాయాల మధ్య తేడా గుర్తించలేము. 71.77% మంది ప్రజలు ఒకే ప్రాంతం లేదా భాషా ప్రాంతంలో నివసిస్తుండగా వారిలో కేవలం 3% సముదాయాల పేర్లు మాత్రమే మత సంబంధంగా ఉన్నాయి. కేరళ, లక్షద్వీపాలకు చెందిన ప్రజల ఆచార వ్యవహారాలు ఒకేరకంగా ఉన్నాయి. కేరళ, పంజాబ్ ప్రజల ఆచార వ్యవహారాలు భిన్నంగా ఉన్నాయి. 55% శాతం సముదాయాలకు సాంప్రదాయంగా కొనసాగిస్తున్న వృత్తిపేర్లే ఉన్నాయి. కంసాలి, వడ్రంగి, కమ్మరి, కుమ్మరి, మేదర, సాలె, వైశ్య, చాకలి, మంగలి మొదలైనవన్నీ వారు చేస్తున్న వృత్తిని బట్టి వచ్చిన పేర్లే, 14 శాతం సముదాయాలకు పరిసరాలు, కొండలు, నదులను బట్టి పేర్లు ఉన్నాయి. మరో 14శాతానికి ప్రాంతాన్ని బట్టి పేర్లు ఉన్నాయి. గోండులు, అల్వాలియా, కాన్పూరియా, ఛమోరి, షిమోగ మొదలైనవన్నీ ఇందుకు ఉదాహరణలు.
మతంతో నిమిత్తం లేకుండా కులాలను బట్టి వృత్తులు ఉన్నాయి. అనేక ఇంటిపేర్లు వారు చేస్తున్న వృత్తి, ఆచారంగా వస్తున్న పదవులు, స్వంత గ్రామం, ప్రాంతం తదితర అంశాలననుసరించి పెట్టబడ్డాయి. సింగ్, ఆచార్య, పటేల్, నాయక్, గుప్తా, శర్మ, ఖాన్ ఇలాంటివి ఉదాహరణలు.
సాంస్కృతిక అలవాట్లు మతాన్ని అధిగమించి ఏర్పడ్డాయి. మొత్తం 775రకాల అలవాట్లను గుర్తించగా అవన్నీ తమ పరిసరాలు, నివాసం, ఆచారాలు వ్యక్తిత్వం ఆహారం, వైవాహిక సంబంధాలు, సాంఘిక కట్టుబాట్లు, ఆర్థికాంశాలు, వృత్తి, ప్రాంత అభివృద్ధి, మతాల ప్రభావాలని బట్టి ఏర్పడ్డాయని తేలింది. హిందువుల ఆచారాలు అలవాట్లను 96.77 శాతం ముస్లింలు, 91,19శాతం బౌద్ధులు, 88.99శాతం సిక్కులు, 77.46శాతం జైనులు అనుసరిస్తున్నారు. ముస్లింల ఆచారాలు, అలవాట్లను 91.18శాతం బౌద్ధులు, 89.95శాతం సిక్కులు అనుసరిస్తున్నారు. 81.34శాతం జైనులు బౌద్ధుల ఆచారాలు, అలవాట్లను అనుసరిస్తున్నారు. షెడ్యూల్డ్ తెగలవారు 96.61శాతం వెనుకబడిన కులాలు 91.29శాతం, షెడ్యూల్డ్ కులాలు 95.82శాతం, ముస్లింలు 91.69శాతం, బౌద్ధులు 88.20శాతం సిక్కుల ఆచారవ్యవహారాలని అనుసరిస్తున్నారు.
వివిధ సముదాయాల గుర్తింపు మతంతో నిమిత్తంలేకుండానే జరిగింది. 3059 సముదాయాల ప్రజలు మృతదేహాలను ఖననం చేస్తుండగా, 2386 కమ్యూనిటీలు దహనం చేస్తున్నాయి. అనేక సముదాయాలు పై రెండు ఆచారాలనీ పాటిస్తున్నాయి. పెళ్ళి వ్యవహారాలు, ఆహారపు అలవాట్లు, వస్త్రధారణ, నృత్యం, సంగీత రూపాలు అనేక సముదాయాలలో ఒకేరకంగా జంతువులు, మొక్కలకు ఇతర వస్తువుల పేర్లు కూడా మతాలు, ప్రాంతాల, భాషలకతీతంగా ఉన్నాయి. భారతదేశంలోని కమ్యూనిటీలు దేనికది విడివిడి ఒంటరిగా లేవు. అవి ఒకదానికొకటి భౌతికంగాను, సాంఘికంగాను కలిసే ఉన్నాయి. అనేక శతాబ్దాల నుంచి ఐక్యంగా జీవనపోరాటం చేస్తున్నాయి. ఇదే మన దేశ సాంస్కృతిక 'భిన్నత్వంలో ఏకత్వం'. ఇదే మన ప్రత్యేకత.
౼౼నళినీ తనేజా(విద్యారంగం పై మతోన్మాదుల దాడి)(జనవరి,2000)నుండి.
