Kerala NGO Union Ernakulam District

18/10/2026

കേരള എൻജിഒ യൂണിയന്റെ സംസ്ഥാന കൗൺസിൽ യോഗം എറണാകുളം ടൗൺഹാളിൽ ആരംഭിച്ചു. എൻജിഒ യൂണിയൻ സംസ്ഥാന പ്രസിഡൻ്റ് എം.എ അജിത് കുമാറിന്റെ അധ്യക്ഷതയിൽ രാവിലെ 10 മണിക്ക് ആരംഭിച്ച സംസ്ഥാന കൗൺസിൽ യോഗത്തിൽ ജനറൽ സെക്രട്ടറി എം.വി ശശിധരൻ റിപ്പോർട്ട് അവതരിപ്പിക്കുന്നു.

17/10/2026

ക്ഷാമബത്ത പ്രഖ്യാപനത്തിലും വഞ്ചനാ വിസ്മയം
എഫ് എസ് ഇ ടി ഒ

രണ്ട് ശതമാനം ക്ഷാമബത്ത അനുവദിച്ചതിലും യുഡിഎഫ് സർക്കാർ തങ്ങളുടെ സഹജമായ വഞ്ചന വിസ്മയമാണ് കാട്ടിയതെന്ന് എഫ് എസ് ഇ ടി ഒ .
ഓണത്തിന് മുമ്പ് അനുവദിക്കുമെന്ന് വാഗ്ദാനം ചെയ്തിരുന്ന രണ്ട് ശതമാനം ക്ഷാമബത്തയാണ് ഇപ്പോൾ അനുവദിച്ചത്. ഒക്ടോബർ മാസത്തെ ശമ്പളത്തോടൊപ്പം രണ്ട് ശതമാനം വർദ്ധനവ് ഉണ്ടാകുമെങ്കിലും 1/01/ 2026 മുതൽ 30/ 09/ 2026 വരെയുള്ള ഒൻപതു മാസത്തെ കുടിശ്ശിക അനുവദിച്ചിട്ടില്ല. ജീവനക്കാരുടെയും അധ്യാപകരുടെയും സാമ്പത്തിക ആനുകൂല്യങ്ങൾ സംബന്ധിച്ച് ഇതുവരെ പറഞ്ഞു വന്നതും പ്രചരിപ്പിച്ചിരുന്നതുമായ വാദഗതികൾ ആകെ വിഴുങ്ങി കൊണ്ടാണ് ഇപ്രകാരം ഒരു വഞ്ചനാപരമായ സമീപനം യുഡിഎഫ് സർക്കാർ സ്വീകരിച്ചിരിക്കുന്നത്. കേന്ദ്രസർക്കാർ കേരളത്തിനെതിരെ സമാനതകളില്ലാത്ത സാമ്പത്തിക ഉപരോധം ഏർപ്പെടുത്തിയിട്ടും ജീവനക്കാരുടെ ക്ഷാമബത്ത കുടിശ്ശിക തീർത്ത് അനുവദിച്ചിട്ടാണ് എൽഡിഎഫ് സർക്കാർ അധികാരമൊഴിഞ്ഞത്. സംസ്ഥാനത്തിന്റെ പ്രതിവർഷ വായ്പാ പരിധിയിൽ ഉൾപ്പെടുത്തുമെന്നതിനാൽ ക്ഷാമബത്തയ്ക്കൊപ്പം അനുവദിക്കാതിരുന്ന പ്രാബല്യത്തിയതിമുതലുള്ള കുടിശ്ശിക സർക്കാർ ഉത്തരവ് നമ്പർ 44/2026 തീയതി 6/ 03 / 2026 പ്രകാരം 8 തുല്യ തവണകളായി നൽകാനും ഉത്തരവാക്കിയിരുന്നു. അതിൽ ആദ്യ ഗഡു നടപ്പ് സാമ്പത്തിക വർഷം തന്നെ അനുവദിക്കാനുള്ള തുകയും ബജറ്റിൽ വകയിരുത്തി. എന്നാൽ ശമ്പള പരിഷ്കരണത്തിനും ക്ഷാമബത്ത കുടിശ്ശികയ്ക്കും വകയിരുത്തിയിരുന്ന അധിക തുക വെട്ടിക്കുറച്ചാണ് യുഡിഎഫ് സർക്കാർ പുതുക്കിയ ബജറ്റ് അവതരിപ്പിച്ചത്. സർക്കാരും ജീവനക്കാരും തുടർച്ചയാണെന്നുള്ള യാഥാർത്ഥ്യം വിസ്മരിച്ച് മുൻ സർക്കാർ ഉത്തരവാക്കിയ ക്ഷാമബത്ത കുടിശിക പോലും അനുവദിക്കാൻ തങ്ങൾക്ക് ബാധ്യതയില്ലെന്ന ധിക്കാരപരമായ നിലപാട് സ്വീകരിക്കുന്ന യുഡിഎഫ് സർക്കാർ നാളിതുവരെ ഉന്നയിച്ച വിമർശനങ്ങളും നൽകിയ വാഗ്ദാനങ്ങളും അപ്പാടെ കാറ്റിൽ പറത്തിക്കൊണ്ടാണ് ഇപ്പോൾ അനുവദിച്ച രണ്ടു ശതമാനം ക്ഷാമബത്തയുടെ കുടിശ്ശികയും നിഷേധിച്ചിരിക്കുന്നത്. വഞ്ചനാപരമായ നിലപാട് തിരുത്തി മുൻ സർക്കാർ ഉത്തരവാക്കിയ ക്ഷാമബത്തയുടെയും ഇപ്പോൾ അനുവദിച്ച രണ്ടു ശതമാനത്തിനും കുടിശ്ശിക ലഭ്യമാക്കാൻ തയ്യാറാകണമെന്ന് എഫ് എസ് ഇ ടി ഒ പ്രസിഡൻ്റ് ടി കെ എ ഷാഫിയും ജനറൽ സെക്രട്ടറി എം വി ശശിധരനും ആവശ്യപ്പെട്ടു.

16/10/2026

15/10/2026

ജീവനെടുക്കുന്ന സ്ഥലംമാറ്റങ്ങൾ അവസാനിപ്പിക്കുക! കേരള എൻ ജി ഒ യൂണിയൻ

പൊതുമരാമത്ത് വകുപ്പ് ജീവനക്കാരിയും കേരള എൻജിഒ യൂണിയൻ ജില്ലാ കൗൺസിൽ അംഗവുമായ റാണി.വിയുടെ ഭർത്താവ് വി. മോഹൻകുമാറിന്റെ മരണത്തിന് കാരണമായ മാനദണ്ഡവിരുദ്ധ സ്ഥലംമാറ്റ നടപടികൾക്കെതിരെ കേരള എൻജിഒ യൂണിയന്റെ നേതൃത്വത്തിൽ ചീഫ് എൻജിനീയർ ഓഫീസിനു മുന്നിൽ പ്രതിഷേധം സംഘടിപ്പിച്ചു.

ചീഫ് എൻജിനീയർ ഓഫീസിലെ സെലക്ഷൻ ഗ്രേഡ് ടൈപ്പിസ്റ്റായ റാണിയെ വിരമിക്കാൻ എട്ടുമാസം മാത്രം ശേഷിക്കെ, പാപ്പനംകോടുള്ള വീട്ടിൽനിന്ന് 35 കിലോമീറ്റർ അകലെയുള്ള നെടുമങ്ങാട്ടേക്ക് സ്ഥലംമാറ്റിയിരുന്നു. ഓക്സിജൻ കോൺസെൻട്രേറ്ററിന്റെ സഹായത്തോടെ ജീവൻ നിലനിർത്തിയിരുന്ന ഭർത്താവിനെ പരിചരിക്കേണ്ട സാഹചര്യം അറിയിച്ചിട്ടും സ്ഥലംമാറ്റ ഉത്തരവ് പുറപ്പെടുവിക്കുകയായിരുന്നു. സ്ഥലംമാറ്റം പുനഃപരിശോധിക്കാമെന്ന ഉറപ്പ് പാലിക്കപ്പെട്ടില്ല റാണിക്കും ഭർത്താവിനുമെതിരെ സമൂഹമാധ്യമങ്ങളിൽ വ്യക്തിഹത്യയും അപവാദപ്രചാരണവും നടന്നു. ആരോഗ്യനില വഷളായ മോഹൻകുമാർ ഒക്ടോബർ 14ന് മരണപ്പെട്ടു.

ജീവനെടുക്കുന്ന സ്ഥലംമാറ്റ ഭീകരത അവസാനിപ്പിക്കുകയും ജീവനക്കാരുടെ കുടുംബസാഹചര്യങ്ങൾ പരിഗണിക്കുകയും വേണം.

പ്രതിഷേധപ്രകടനം യൂണിയൻ സംസ്ഥാന സെക്രട്ടറി പി. പി. സന്തോഷ് ഉദ്ഘാടനം ചെയ്തു.

15/10/2026

നവംബർ 21 സെക്രട്ടറിയേറ്റ് വളയൽ വിജയിപ്പിക്കുക - ആക്ഷൻ കൗൺസിൽ ജില്ലാ കൺവൻഷൻ

ശമ്പള പരിഷ്ക്കരണം ഉടൻ നടപ്പിലാക്കുക; ഇടക്കാലാശ്വാസം അനുവദിക്കുക, എൻപിഎസ് പിൻവലിച്ച് ഒ.പി.എസ് പുന:സ്ഥാപിക്കുക, പിഎഫ്ആർഡിഎ നിയമം പിൻവലിക്കുക, ക്ഷാമബത്ത കുടിശ്ശിക അനുവദിച്ച ഉത്തരവ് ഉടൻ നടപ്പിലാക്കുക, ഏൺഡ് ലീവ് സറണ്ടർ പുന:സ്ഥാപിക്കുക, അന്യായമായ സ്ഥലം മാറ്റങ്ങൾ റദ്ദ് ചെയ്യുക, പൊതു സ്ഥലംമാറ്റം മാനദണ്ഡ പ്രകാരം നടത്തുക, മെഡിസെപ്പ് അപാകതകൾ പരിഹരിക്കുക, വിദ്യാഭ്യാസ സർവ്വീസ് മേഖലകൾ തകർക്കുന്ന നീക്കങ്ങൾ ഉപേക്ഷിക്കുക എന്നീ മുദ്രാവാക്യങ്ങൾ ഉയർത്തി നവംബർ 21 ന് നടക്കുന്ന സെക്രട്ടറിയേറ്റ് വളയൽ വിജയിപ്പിക്കുന്നതിന് ആക്ഷൻ കൗൺസിൽ ഓഫ് സ്റ്റേറ്റ് എംപ്ലോയീസ് ആൻഡ് ടീച്ചേഴ്സ് എറണാകുളം ജില്ലാ കൺവൻഷൻ തീരുമാനിച്ചു.

കളമശ്ശേരി ഗവൺമെൻ്റ് പോളിടെക്നിക് കോളേജ് ആഡിറ്റോറിയത്തിൽ ചേർന്ന ജില്ലാ കൺവൻഷൻ ആക്ഷൻ കൗൺസിൽ ജനറൽ കൺവീനറും, എഫ്.എസ്.ഇ.ടി.ഒ ജനറൽ സെക്രട്ടറിയുമായ എം.വി ശശിധരൻ ഉദ്ഘാടനം ചെയ്തു. പി.എസ്.സി.ഇ.യു സംസ്ഥാന കമ്മിറ്റി അംഗം എസ്. ബോബിനാഥ് അഭിവാദ്യം ചെയ്തു സംസാരിച്ചു. കെഎസ്ടിഎ ജില്ലാ സെക്രട്ടറി നിയാസ് എം. അധ്യക്ഷത വഹിച്ച യോഗത്തിൽ എഫ്എസ്ഇടിഒ ജില്ലാ സെക്രട്ടറി കെ.എ. അൻവർ സ്വാഗതവും, ജില്ലാ ട്രഷറർ വി.എസ് രാജേഷ് നന്ദിയും പറഞ്ഞു.

സി.യു.ഇ.ഒ ജനറൽ സെക്രട്ടറി ഹരിലാൽ,
കെ.എസ്.ടി.എ സംസ്ഥാന എക്സിക്യൂട്ടീവ് അംഗം ഡോ. ഏലിയാസ് മാത്യു,
കെ.ജി.എൻ.എ സംസ്ഥാന വൈസ് പ്രസിഡൻ്റ് സ്മിത ബക്കർ, കെ.ജി.ഒ.എ സംസ്ഥാന സെക്രട്ടറിയേറ്റ് അംഗം ഡോ. ബോബി പോൾ എന്നിവർ പങ്കെടുത്തു.

കേന്ദ്ര സംസ്ഥാന സർക്കാരുകളുടെ ജനദ്രോഹ നയങ്ങൾ കാരണം ജനജീവിതം ദുസ്സഹമായികൊണ്ടിരിക്കുകയാണ്. ഒരു ദശകത്തിലേറെയായി രാജ്യ ഭരണം കയ്യാളുന്ന നരേന്ദ്രമോദി സർക്കാർ ഹിന്ദുത്വ അജണ്ട, അക്രമാത്മകമായ നവലിബറൽ നയങ്ങൾ, സ്വേച്ഛാധിപത്യം എന്നിവയെല്ലാം ശക്തിപ്പെടുത്തുന്ന നയങ്ങൾ തുടരുകയാണ്. പുതിയ മേഖലകളെ സ്വകാര്യവൽക്കരിക്കാനും, കോർപ്പറേറ്റുകൾക്ക് ലാഭം പരമാവധിയാക്കുന്നതിനും കഴിയുന്ന നയങ്ങളാണ് കേന്ദ്ര സർക്കാർ പിന്തുടരുന്നത്. ജനങ്ങളുടെ ജീവിത സുരക്ഷ തകർക്കുന്ന നയങ്ങൾ തുടർച്ചയായി നടപ്പാക്കുന്നു. ദാരിദ്ര്യവും തൊഴിലില്ലായ്മയും വർധിച്ചിരിക്കുന്നു. അസമത്വം പെരുകുന്നു. തൊഴിൽ കോർപ്പറേറ്റുകളുടെ നഗ്നമായ ചൂഷണത്തിന് തുറന്ന് കൊടുക്കുകയാണ്. പി.എഫ്.ആർ.ഡി.എ നിയമത്തിലൂടെ രാജ്യത്തെ സർക്കാർ ജീവനക്കാരുടെ ഏറ്റവും മികച്ച വാർദ്ധക്യകാല സാമൂഹ്യ സുരക്ഷാ പദ്ധതി ഇല്ലാതാക്കി, എൻ.പി.എസും, ഇപ്പോൾ യു.പി.എസ്സും നടപ്പിലാക്കി കേന്ദ്ര സർക്കാർ മുന്നോട്ട് പോകുന്നു.

കഴിഞ്ഞ പത്ത് വർഷം കൊണ്ട് ഇടതുപക്ഷ ബദൽ നടപ്പാക്കികൊണ്ട് രാജ്യത്തിന് മാതൃക സൃഷ്ടിച്ച ഇടതുപക്ഷ ഭരണത്തിൽ നിന്നും വിഭിന്നമായി നൂറ് ദിവസം കൊണ്ട് യു.ഡി.എഫ് സർക്കാർ ജനജീവിതം ദുസഹമാക്കിയിരിക്കുകയാണ്. സംസ്ഥാനത്തെ ആരോഗ്യ, വൈദ്യുതി, വിദ്യാഭ്യാസ മേഖലകൾ തകർച്ചയെ അഭിമുഖീകരിക്കുകയാണ്. കേരളം വീണ്ടും ഇരുണ്ട യുഗത്തിലേക്ക് പോവുകയാണ്. ഈ സാഹചര്യത്തിലാണ് ജീവനക്കാരും അധ്യാപകരും നിലവിലുള്ള ആനുകൂല്യങ്ങൾ സംരക്ഷിക്കാനും സിവിൽ സർവീസിനെ സംരക്ഷിക്കാനുമായി പ്രക്ഷോഭം ശക്തിപ്പെടുത്താൻ തീരുമാനിച്ചത്. ഇതിന്റെ ഭാഗമായാണ് നവംബർ 21ന് സെക്രട്ടറിയേറ്റ് വളയൽ സമരം സംഘടിപ്പിക്കുന്നത്. ജില്ലാ കൺവെൻഷന്റെ തുടർച്ചയായി താലൂക്ക് കൺവെൻഷനുകൾ ചേരും.