13/05/2026
കേരള എൻ.ജി.ഒ. യൂണിയൻ സംസ്ഥാന വൈസ് പ്രസിഡൻറായിരുന്ന സ: സി.കുഞ്ഞമ്മദ് (90) അന്തരിച്ചു.
1962 ൽ സർക്കാർ സർവീസിൽ പ്രവേശിച്ച സഖാവ്. 1971 മുതൽ കണ്ണൂർ ജില്ലയിൽ സംഘടനാ നേതൃത്വത്തിൽ പ്രവർത്തിച്ചു.
1987 മുതൽ 1991 വരെ സംസ്ഥാന വൈസ് പ്രസിഡൻ്റ് ആയി പ്രവർത്തിച്ചു. 1973 ലെ 54 ദിവസം നീണ്ടു നിന്ന എൻ.ജി.ഒ. അധ്യാപക അനിശ്ചിതകാല പണിമുടക്കിന് നേതൃത്വം നൽകുകയും ജയിൽവാസം അനുഭവിക്കുകയും സസ്പെൻഷനിലാവുകയും ചെയ്തു.
കൊയിലാണ്ടി താലൂക്ക് ഓഫീസിൽ ഡെപ്യൂട്ടി തഹസിൽദാർ തസ്തികയിൽ ജോലി ചെയ്ത് വരവെയാണ് വി.ആർ.എസ്. എടുത്ത് 1991 ലെ നിയമസഭാ തെരഞ്ഞെടുപ്പിൽ കൊയിലാണ്ടി അസംബ്ലി മണ്ഡലത്തിൽ മത്സരിക്കുന്നത്. പിന്നീട് മൂന്നര പതിറ്റാണ്ട് കൊയിലാണ്ടിയിലും പയ്യോളിയിലും പൊതു ജനാധിപത്യ പ്രസ്ഥാനത്തിൻ്റെയും കർഷക സംഘത്തിൻ്റെയും സി.ഐ.ടി.യു. വിൻ്റെയും സഹകരണ, ഗ്രന്ഥശാല പ്രസ്ഥാനത്തിൻ്റെയും നേതൃത്വത്തിൽ പ്രവർത്തിച്ചു.
