13/08/2026
ਪ੍ਰੈਸ ਨੋਟ
ਮਿਤੀ: 13 ਅਗਸਤ 2026
ਜਾਰੀ ਕਰਤਾ: ਕਿਸਾਨ ਮਜ਼ਦੂਰ ਸੰਘਰਸ਼ ਕਮੇਟੀ ਪੰਜਾਬ (ਜੋਨ ਬਾਬਾ ਬੰਦਾ ਸਿੰਘ ਬਹਾਦਰ)
*ਵਿਸ਼ਾ: ਟਰੈਕਟਰ ਏਜੰਸੀ ਵੱਲੋਂ ਆਰ.ਸੀ. ਦੇਣ ਦੇ ਭਰੋਸੇ ਤੋਂ ਬਾਅਦ 13 ਅਗਸਤ ਦਾ ਧਰਨਾ ਮੁਲਤਵੀ; ਮੰਗ ਪੂਰੀ ਨਾ ਹੋਣ 'ਤੇ 15 ਸਤੰਬਰ ਨੂੰ ਲੱਗੇਗਾ ਦੁਬਾਰਾ*
ਧਰਨਾ ਗੁਰਦਾਸਪੁਰ/ਕਲਾਨੌਰ:ਕਿਸਾਨ ਮਜ਼ਦੂਰ ਸੰਘਰਸ਼ ਕਮੇਟੀ ਪੰਜਾਬ ਦੇ ਜੋਨ ਬਾਬਾ ਬੰਦਾ ਸਿੰਘ ਬਹਾਦਰ ਵੱਲੋਂ ਕਲਾਨੌਰ ਰੋਡ ਗੁਰਦਾਸਪੁਰ ਵਿਖੇ ਸਥਿਤ ਕਿਸਾਨ ਟਰੈਕਟਰ ਏਜੰਸੀ ਸਾਹਮਣੇ 13 ਅਗਸਤ 2026 ਨੂੰ ਲਗਾਇਆ ਜਾਣ ਵਾਲਾ ਧਰਨਾ ਅਗਲੇ ਇੱਕ ਮਹੀਨੇ ਲਈ ਮੁਲਤਵੀ ਕਰ ਦਿੱਤਾ ਗਿਆ ਹੈ। ਇਹ ਫੈਸਲਾ ਟਰੈਕਟਰ ਏਜੰਸੀ ਦੇ ਪ੍ਰਬੰਧਕਾਂ ਵੱਲੋਂ ਕਿਸਾਨਾਂ ਦੇ ਮਸਲਿਆਂ ਨੂੰ ਹੱਲ ਕਰਨ ਦੇ ਲਿਖਤੀ/ਪੁਖਤਾ ਭਰੋਸੇ ਤੋਂ ਬਾਅਦ ਲਿਆ ਗਿਆ ਹੈ।ਦੱਸਣਯੋਗ ਹੈ ਕਿ ਪਿੰਡ ਚੌੜਾ ਕਲਾਂ ਦੇ ਕਿਸਾਨ ਸਾਹਿਬ ਸਿੰਘ ਪੁੱਤਰ ਗੁਰਜੀਤ ਸਿੰਘ ਨੇ ਕਰੀਬ ਪੰਜ ਸਾਲ ਪਹਿਲਾਂ ਉਕਤ ਏਜੰਸੀ ਤੋਂ ਇੱਕ ਟਰੈਕਟਰ ਖਰੀਦਿਆ ਸੀ, ਜਿਸਦੀ ਆਰ.ਸੀ. (RC) ਏਜੰਸੀ ਵੱਲੋਂ ਲੰਮੇ ਸਮੇਂ ਤੋਂ ਨਹੀਂ ਦਿੱਤੀ ਜਾ ਰਹੀ ਸੀ। ਇਸੇ ਤਰ੍ਹਾਂ ਪਿੰਡ ਰੁਡਿਆਣਾ ਦੇ ਕਿਸਾਨ ਬਰਜਿੰਦਰ ਸਿੰਘ ਪੁੱਤਰ ਗੁਰਨਾਮ ਸਿੰਘ ਦਾ ਵੀ ਆਰ.ਸੀ. ਨਾ ਮਿਲਣ ਦਾ ਅਜਿਹਾ ਹੀ ਮਸਲਾ ਸਾਹਮਣੇ ਆਇਆ ਸੀ। ਇਨ੍ਹਾਂ ਮਸਲਿਆਂ ਦੇ ਹੱਲ ਲਈ ਜਥੇਬੰਦੀ ਨੇ 13 ਅਗਸਤ ਨੂੰ ਏਜੰਸੀ ਸਾਹਮਣੇ ਪੱਕਾ ਮੋਰਚਾ ਲਾਉਣ ਦਾ ਐਲਾਨ ਕੀਤਾ ਸੀ।ਕਿਸਾਨਾਂ ਦੇ ਭਾਰੀ ਉਤਸ਼ਾਹ ਅਤੇ ਸੰਘਰਸ਼ ਦੇ ਦਬਾਅ ਨੂੰ ਵੇਖਦਿਆਂ ਹੋਇਆਂ ਟਰੈਕਟਰ ਏਜੰਸੀ ਦੇ ਮਾਲਕਾਂ ਨੇ 12 ਅਗਸਤ 2026 ਨੂੰ ਸ਼ਾਮ ਕਰੀਬ 4 ਵਜੇ ਜਥੇਬੰਦੀ ਦੀ ਜੋਨ ਆਗੂ ਟੀਮ ਨੂੰ ਮੀਟਿੰਗ ਲਈ ਬੁਲਾਇਆ। ਮੀਟਿੰਗ ਦੌਰਾਨ ਏਜੰਸੀ ਨੇ ਦੋਵਾਂ ਪੀੜਤ ਕਿਸਾਨਾਂ ਦੀਆਂ ਆਰ.ਸੀ. ਆਉਣ ਵਾਲੇ ਇੱਕ ਮਹੀਨੇ ਦੇ ਅੰਦਰ-ਅੰਦਰ ਦੇਣ ਦਾ ਪੂਰਾ ਭਰੋਸਾ ਦਿੱਤਾ।ਏਜੰਸੀ ਦੇ ਇਸ ਫੈਸਲੇ ਤੋਂ ਬਾਅਦ ਜੋਨ ਆਗੂਆਂ ਨੇ ਸਾਂਝੇ ਤੌਰ 'ਤੇ ਫੈਸਲਾ ਕੀਤਾ ਹੈ ਕਿ ਫਿਲਹਾਲ ਧਰਨੇ ਨੂੰ 15 ਸਤੰਬਰ 2026 ਤੱਕ ਮੁਲਤਵੀ ਕੀਤਾ ਜਾਂਦਾ ਹੈ। ਜੇਕਰ ਵਾਅਦੇ ਮੁਤਾਬਕ ਤੈਅ ਸਮੇਂ ਦੇ ਅੰਦਰ ਕਿਸਾਨਾਂ ਨੂੰ ਆਰ.ਸੀ. ਨਾ ਮਿਲੀ, ਤਾਂ 15 ਸਤੰਬਰ 2026 ਨੂੰ ਏਜੰਸੀ ਦੇ ਬਾਹਰ ਦੁਬਾਰਾ ਵਿਸ਼ਾਲ ਧਰਨਾ ਪ੍ਰਦਰਸ਼ਨ ਸ਼ੁਰੂ ਕੀਤਾ ਜਾਵੇਗਾ, ਜਿਸਦੀ ਪੂਰੀ ਜ਼ਿੰਮੇਵਾਰੀ ਏਜੰਸੀ ਪ੍ਰਬੰਧਕਾਂ ਦੀ ਹੋਵੇਗੀ।ਇਸ ਮੌਕੇ ਜ਼ਿਲ੍ਹਾ ਪ੍ਰਧਾਨ ਹਰਭਜਨ ਸਿੰਘ ਵੈਰੋਨੰਗਲ, ਜੋਨ ਪ੍ਰਧਾਨ ਦੇਸਾ ਸਿੰਘ ਰੁਡਿਆਣਾ, ਜੋਨ ਇੰਚਾਰਜ ਜਤਿੰਦਰ ਸਿੰਘ ਚੀਮਾ, ਸੀਨੀਅਰ ਮੀਤ ਸਕੱਤਰ ਸੁਖਜਿੰਦਰ ਸਿੰਘ ਡੇਹਰੀਵਾਲ, ਜੋਨ ਸਕੱਤਰ ਮਨਜੀਤ ਸਿੰਘ ਚੌੜਾ, ਖਜ਼ਾਨਚੀ ਦਲੇਰ ਸਿੰਘ, ਗੁਰਜੀਤ ਸਿੰਘ ਦੋਸਤਪੁਰ, ਗੁਰਪ੍ਰੀਤ ਸਿੰਘ ਦੋਸਤਪੁਰ, ਕੁਲਵੰਤ ਸਿੰਘ ਚੌੜਾ, ਹਰਭਜਨ ਸਿੰਘ ਚੌੜਾ ਅਤੇ ਨਿਸ਼ਾਨ ਸਿੰਘ ਸ਼ਹੂਰ ਸਮੇਤ ਵੱਡੀ ਗਿਣਤੀ ਵਿੱਚ ਕਿਸਾਨ ਆਗੂ ਅਤੇ ਵਰਕਰ ਹਾਜ਼ਰ ਸਨ।
