08/08/2026
მმართველი პარტია ,,ქართული ოცნების“ პოლიტიკური თანამდებობის პირების პასუხად, აგვისტოს ომის მე-18 წლისთავზე, სამწუხაროდ კიდევ ერთხელ გახდა საჭირო ომთან დაკავშირებული ფაქტების შესახებ დამაზუსტებელი განცხადების გავრცელება;
ვისთვისაც კითხვის ნიშნები ჯერ კიდევ არსებობს, შევახსენებთ, რომ ჩვენი ქვეყანა გახდა ვერაგული, მიზანმიმართული აგრესიის მსხვერპლი, რომელიც, 2008 წლის აგვისტომდე თვეებით ადრე მზადდებოდა. ამის ამსახველი არაერთი მტკიცებულება - რუსული ჯარის გადაადგილება, ოკუპირებული რეგიონების შეიარაღების დაწყება, საქართველოს მოქალაქეებით დასახლებული სოფლების მიმართულებით არაერთგზის გახსნილი ცეცხლი,რუსეთის ფედერაციის პრეზიდენტის ინტერვიუ, მანამდე განხორციელებული “პასპორტიზაცია” და სხვა ფაქტები ამის ცალსახა მაგალითებია.
საერთაშორისო სამართლის მიხედვით, ვინაიდან სამხედრო მოქმედებები ხორციელდებოდა საქართველოს ტერიტორიაზე, რუსეთ-საქართველოს საერთაშორისო შეიარაღებული კონფლიქტის დაწყებაში პასუხისმგებელი შეიძლება იყოს მხოლოდ და მხოლოდ რუსეთის ფედერაცია, რომელმაც განახორციელა სამხედრო აგრესია საქართველოს სუვერენიტეტის წინააღმდეგ. საერთაშორისო სამართლის ყველა პრინციპის მიხედვით, საქართველოს შეუძლებელია თავის ტერიტორიაზე გამოეხატა აგრესია და დაეწყო ომი. ქართული ჯარი, თავისი კონსტიტუციური უფლებამოსილებების ფარგლებში და საერთაშორისოდ აღიარებულ საზღვრებში იცავდა მართლწესრიგს, რუსეთის ფედერაციისგან წაქეზებული და მის ეფექტურ კონტროლს დაქვემდებარებული სეპარატისტების პროვოკაციების საპასუხოდ.
საუბედუროდ, მიმდინარე წლის აგვისტო კიდევ ერთხელ იქცა მმართველი პარტიის წარმომადგენელთა ტრიბუნად ქართული ჯარის გმირული თავდადების აგრესიად წარმოჩენისათვის. ჩამოთვლილი ორგანიზაციები შევახსენებთ მათ, რომ მსგავსი განცხადებები შეიცავს უმძიმეს საფრთხეებს, სამომავლოდ, საქართველოს ტერიტორიული მთლიანობის აღდგენის მიზნისათვის.
მოვუწოდებთ საზოგადოების ყველა წევრს, განსაკუთრებით სახელისუფლებო უწყებების წარმომადგენლებს, თავი შეიკავონ ყოვლად დამაზიანებელი რიტორიკისგან, რომლებშიც არაფერი იკითხება სხვა, გარდა მტრის სასარგებლო მოქმედებისა. ასეთი განცხადებები შეიცავს წინაპირობას, რომელიც ნებისმიერ დროს, ჩვენ საწინააღმდეგოდ შეიძლება იყოს გამოყენებული როგორც საუკოპაციო რეჟიმისგან, ისე რუსეთის ფედერაციის შესაბამისი უწყებებისგან.
ამასთან, მოვუწოდებთ შესაბამის პოლიტიკური თანამდებობის პირებს, შეწყვიტონ საკუთარი სახელმწიფოსა და ჯარის პირდაპირ და ირიბად დადანაშაულება ომთან და ტერიტორიულ მთლიანობასთან დაკავშირებულ უმძიმეს საკითხებში. ღიად და სათანადოდ დააკისრონ ყოველგვარი პოლიტიკური და სამართლებრივი პასუხისმგებლობა საქართველოს წინააღმდეგ დაწყებული აგრესიისა და საქართველოს ტერიტორიების ოკუპაციისთვის მხოლოდ და მხოლოდ რუსეთის ფედერაციას, რომელიც დღესაც აგრძელებს ჩვენი სამშობლოს სუვერენიტეტის რღვევას, ხოლო ოკუპირებულ ტერიტორიებზე დარჩენილ ეთნიკურად ქართველ მოსახლეობას გაუსაძლის აპართეიდულ პირობებში აცხოვრებს.
გავუფრთხილდეთ ჩვენს სამშობლოს და მის მომავალს!
ქართულ-ამერიკული თავისუფლების ალიანსი
ქართული რესპუბლიკა
