09/12/2025
რა გამოცდილება მივიღე ფორუმზე: „ეკონომიკური თავისუფლება დიდებული საქართველოსთვის“ - ნინო ნოზაძე, ფორუმის ორგანიზატორი 💛
არსებობს პროცესები, რომლებიც თითქოს ნელა იწყება უბრალო იდეებით, სპონტანური ზარებით, გაუთავებელი შეხვედრებით, მაგრამ თანდათან გადაიქცევიან იმ ერთ დიდ საქმედ, სადაც უკვე სული, ენერგია და მთელი შენი პრაქტიკული გამოცდილება ჩადებული გაქვს. სწორედ ასე დაიწყო ჩემი მონაწილეობა ფორუმში: არა იქ, სადაც უკვე მზა სცენარია და ყველა პოზიციები გადანაწილებულია, არამედ გაცილებით ადრე, მაშინ, როცა ჯერ კიდევ ვადგენიდით საწყისი პროექტის სახეს და განვიხილავდით რატომ იყო მისი გაკეთება საერთოდ ღირებული.
თივიდანვე ვიყავი ჩართული ყველაფერში: სტრუქტურის დაგეგმვა, კონცეფციის ჩამოყალიბება, სარეგისტრაციო ფორმები, პროგრამის შედგენა, პარტნიორებთან კომუნიკაცია მოკლედ, ყველა იმ დეტალში, რომელიც გარედან “ზედაპირულ” საქმეს ჰგავს, მაგრამ რეალურად სწორედ მათზე დგას მთელი პროექტი.
საინტერესო იყო ლექტორებთან, პროფესორებთან, მკვლევარებთან ბიზნესმენებთან, და სხვა პროფესიონალებთან თანამშრომლობა. ეს სრულიად სხვა დინამიკაა. შენს სიტყვას სერიოზულად იღებენ, შენს აზრს ითვალისწინებენ და შენგან ელიან რეალურ პასუხისმგებლობას. და ზუსტად ასეთ გარემოში ხვდები, რომელ უნარებს ფლობ უკვე, რა გამოცდილება გაქვს დაგროვილი და კიდევ რა კუთხით უნდა განვითარდე, რომ რეალურად განსხვავება შექმნა.
მიუხედავად იმისა, რომ პროექტებთან მუშაობის დიდი გამოცდილება მაქვს, ფორუმმა მაინც თავისი წილი ახალი გამოწვევები და გამოცდილება მოიტანა. ზოგი უნარი უკვე მქონდა, ზოგიც აქ განვავითარე, ხოლო რაღაცები პირველად პრაქტიკაში გამოვცადე. საბოლოოდ ეს გამოცდილება ერთ დიდ საერთო ჩარჩოდ მექცა. თითქოს ყველა წინა ნაბიჯი სწორედ აქამდე მოდიოდა. მაგრამ არა იმიტომ, რომ “დასასრული” ყოფილიყო, პირიქით, ეს უბრალოდ კიდევ ერთი საფეხური გახდა.
ყველაფერი, რასაც წლების განმავლობაში ნელ-ნელა ვაგროვებდი, ცოდნა, გამოცდილება, უნარები, უნდა გადამეცა ჩემი თანატოლებისთვის, თითოეულ სტაჟიორისთვის, რომლებიც ფორუმის ორგანიზების პერიოდში უნდა გამოეყენებინათ. სწორედ ეს გახდა პროცესი, რომელმაც სრული პასუხისმგებლობის განცდა მომანიჭა. სტაჟიორებთან მუშაობა ერთ-ერთი ყველაზე მნიშვნელოვანი და ემოციურად დატვირთული გამოცდილება იყო ჩემთვის. გავიცანი პასუხისმგებლიანი, მოტივირებული და მიზანდასახული ახალგაზრდები, რომლებიც არა მხოლოდ კარგი სტაჟიორები, არამედ ნამდვილი გუნდის წევრები და მეგობრები იყვნენ. საორგანიზაციო პროცესის დასრულებისას სასიამოვნო იყო მათთან ერთად მუშაობა, მათი პროგრესის დანახვა და დარწმუნება, რომ გზაზე შეხვედრილი დაბრკოლებები მათ ვერ შეაჩერებდა. ერთად განვიხილავდით გამოწვევებს, ვეძებდით გამოსავალს, ვეხმარებოდი საჭირო მომენტებში და ვაძლევდი სტიმულს, რომ ნაბიჯ-ნაბიჯ მიეღწიათ მიზნისთვის. მათი ენერგია, პასუხისმგებლობა და ინიციატივა ფორუმის წარმატების მთავარი ელემენტები იყო და შედეგი აშკარად თვალსაჩინო გახდა.
შემიძლია ვთქვა რომ, როდესაც დადგა ფორუმის დღეები მოლოდინებმა გაამართლეს. იმ წამიდან, როცა ფორუმის დღე დაიწყო, ვიგრძენი, რომ ეს ყველაფერი ნამდვილად ღირდა და შედგა. აქ ყველას ერთი მიზანი ჰქონდა და ეს მიზანი აშკარად ქმნიდა იმ ძალას, რომელიც დარბაზში იგრძნობოდა.
ჩემი კომიტეტი, ბიზნეს საქმიანობის რეგულირება, ერთ-ერთი ყველაზე ძლიერი გუნდი აღმოჩნდა, რომელთანაც მიმუშავია. თითოეულ მონაწილეს თავისი უნიკალური ხედვა, პასუხისმგებლობა და საოცარი სამუშაო ეთიკა ჰქონდა. ორი დღის განმავლობაში ინტენსიურად და უწყინარად იმუშავეს, და სრულიად დამსახურებულად მოიპოვეს საუკეთესო კომიტეტის ტიტული. მე კი ვიზრუნე იმაზე, რომ მათი მუშაობა შეუფერხებლად წასულიყო ტექნიკური საკითხების პროცესის მართვით. ფინალურ პრეზენტაციამდე, როდესაც ყველა ოდნავ ნერვიულობდა, გადავწყვიტე პატარა ჟესტი გამეკეთებინა პერსონალური სტიკერები მოვამზადე და სცენაზე ასვლამდე გადავეცი კომიტეტის მონაწილეებს. უბრალო დეტალია, მაგრამ მგონია, რომ ის წუთი მათთვისაც და ჩემთვისაც დამამახსოვრებელი იყო.
ამ სამ დღეში სხვა პასუხისმგებლობებთან ერთად კიდევ ერთი როლი ავიღე, ფოტოგრაფია და “სკა”-ს სოციალური მედიის მართვა. ვცდილობდი, თითოეული მნიშვნელოვანი მომენტი დამეჭირა, რომ ის დღეები რეალურად დარჩენილიყო.
გარდა პრაქტიკული ცოდნისა და გამოცდილებისა, რაც ფორუმმა მომცა, იყო კიდევ ერთი რამ, ახალი კონტაქტები და ადამიანები. აბსოლუტურად განსხვავებული ინტერესებით, მიზნებით, ხედვებით. და მაინც, ყველას რაღაც საერთო მიზანი გვქონდა: სურვილი, გვემუშავა, გვესწავლა და შეგვექმნა.
ახალგაზრდული ინიციატივების ფორუმი არის ადგილი, სადაც რეალური განვითარება ხდება. არა მხოლოდ პროფესიული, არამედ ადამიანური. თუ ადგილი არსებობს, სადაც შეგიძლია ერთდროულად იმუშაო, ისწავლო, შექმნა და გაიზარდო, ეს სწორედ აქაა.
