10/06/2026
📌 საქართველოს წარმატებული ადამიანების დაჯილდოების ცერემონია „პერსონა“ წარმოგიდგენთ „პერსონა 2026“ წლის ტიტულზე ემიგრაციაში მოღვაწე ხელოვან ქალბატონს — ბელა მოდებაძეს.
🔶 ბელა მოდებაძე დაიბადა 1981 წლის 3 ივნისს, ახალციხის მუნიციპალიტეტის ულამაზეს სოფელ ურაველში — კუთხეში, რომელიც გამოირჩევა უნიკალური ბუნებით, სუფთა ჰაერით, მწვანე ტყეებით, მოჩუხჩუხე წყაროებით, მთის კალმახებითა და სულიერი სიმშვიდის მომნიჭებელი წმინდა სალოცავებით. სწორედ ამ გარემომ ჩამოუყალიბა მას სამშობლოსა და მშობლიური კუთხის განსაკუთრებული სიყვარული, რომელიც დღემდე მისი შემოქმედების მთავარი შთაგონების წყაროა.
განათლება მიიღო სოფელ ურაველის საჯარო სკოლაში, შემდეგ კი სწავლა განაგრძო სამცხე-ჯავახეთის სახელმწიფო უნივერსიტეტში, ფილოლოგიის ფაკულტეტზე, ქართული ენისა და ლიტერატურის სპეციალობით. პარალელურად, წარმატებით დაასრულა ახალციხის სამუსიკო სკოლის შვიდწლედი და საგუნდო-სადირიჟორო მიმართულების ოთხწლიანი სასწავლებელი.
შრომითი საქმიანობა უნივერსიტეტის დასრულებისთანავე დაიწყო. მუშაობდა ეროვნული გამოცდების ცენტრში, სამცხე-ჯავახეთის რეგიონში, ხოლო 14 წლის განმავლობაში იყო ქალაქ ახალციხის №5 საჯარო სკოლის მუსიკის პედაგოგი, სადაც მრავალი თაობის აღზრდასა და კულტურული ღირებულებების დამკვიდრებას ემსახურებოდა. ასევე მნიშვნელოვანი კვალი დატოვა, როგორც ქალაქ ახალციხის მუნიციპალიტეტის კულტურის დაწესებულებათა გაერთიანების დირექტორმა. ეს პერიოდი მის ცხოვრებაში განსაკუთრებული პასუხისმგებლობით, შემოქმედებითი ენერგიითა და მრავალფეროვანი გამოცდილებით გამოირჩეოდა.
ქალბატონი ბელა არის ორი ქალიშვილის დედა, რომლისთვისაც ოჯახი და შვილები ცხოვრების მთავარი ძალა და მოტივაციაა.
2016 წლიდან მის ცხოვრებაში დაიწყო რთული, მაგრამ ღირსეულად გასავლელი გზა — ემიგრაცია. სამშობლოსთან განშორებამ, მონატრებამ და ემიგრანტული ყოფის სიმძიმემ მის გულში განსაკუთრებული ემოციები გააღვიძა. სწორედ ამ განცდებმა უბიძგა პოეზიისკენ. ტკივილი სიტყვად აქცია, მონატრება — ლექსად, ხოლო ემიგრანტის სევდა — შემოქმედებად.
2024 წლის 1 თებერვალს, ქალბატონი ლიანა ჯანეზაშვილის რეკომენდაციით, ბელა მოდებაძე გახდა ჯუმბერ ლეჟავას სახელობის საერთაშორისო სამეცნიერო აკადემიის ნამდვილი წევრი. აკადემიაში მოღვაწეობის პერიოდში შექმნა ორი პოემა, რომლებიც წიგნებად გამოიცა, ასევე გამოსცა ლექსების კრებული სახელწოდებით
"სულის ფორიაქი".
მისი შემოქმედებითი და საზოგადოებრივი საქმიანობა არაერთი მნიშვნელოვანი ჯილდოთი არის აღიარებული. მიღებული აქვს „საქართველოს წარმატებული ქალბატონის“ ტიტული,„გვირგვინი“„დედოფლის გულსაბნევი“, „ამაგდარი დედის“ ტიტული, ოქროს მედალი, ოქროს ვარსკვლავი და მრავალი მადლობის სიგელი.
2026 წელი ბელა მოდებაძისთვის განსაკუთრებული წარმატებებისა და აღიარების წელი აღმოჩნდა. საქართველოში დროებით დაბრუნებისას მას შესაძლებლობა მიეცა შეხვედროდა ადამიანებს, რომლებსაც წლების განმავლობაში მხოლოდ სოციალური ქსელების საშუალებით იცნობდა. ამ შეხვედრებმა მის ცხოვრებაში უამრავი სითბო, სიყვარული და დაუვიწყარი ემოცია შემოიტანა.
2026 წლის 21 მაისს, ჯუმბერ ლეჟავას სახელობის საერთაშორისო სამეცნიერო აკადემიამ და მისმა პრეზიდენტმა, გულნაზ ხარაიშვილმა, თბილისის მირზა გელოვანის სახელობის ბიბლიოთეკაში ბელა მოდებაძის პოეზიის საღამო გამართეს. ღონისძიებამ დიდი მოწონება დაიმსახურა და ავტორის შემოქმედების მიმართ განსაკუთრებული ინტერესი გამოიწვია.
24 მაისს, ქალაქ ქუთაისში, ხელოვნების სახლში „ლუის პარნასი“, გაიმართა მისი კიდევ ერთი შთამბეჭდავი პოეზიის საღამო. ღონისძიების ფარგლებში ბელა მოდებაძეს გადაეცა „ლუის პარნასის“ საპატიო წევრის მოწმობა და მადლობის სიგელი, რაც მისი შემოქმედებითი საქმიანობის კიდევ ერთი მნიშვნელოვანი აღიარება გახდა.
31 მაისს იგი მიწვეული იყო აფხაზეთის დღეებისადმი მიძღვნილ ღონისძიებაზე, სადაც დაჯილდოვდა ოქროს მედლით, მადლობის სიგელითა და აფხაზეთის ასოციაციის საპატიო წევრის მოწმობით.
განსაკუთრებული სიამაყით აღსანიშნავია, რომ 2026 წლის 9 ივნისს, მშობლიურ ახალციხეში, ფოლკლორული ანსამბლის „ხმა მესხეთიდან“ კონცერტზე შედგა სიმღერის „ვუმღერ სამშობლოს“ პრემიერა, რომლის ტექსტისა და იდეის ავტორი თავად ბელა მოდებაძეა. ეს ნამუშევარი სამშობლოს სიყვარულისა და ემიგრანტული მონატრების ემოციური გამოხატულებაა.
ბელა მოდებაძე არის ქალბატონი, რომელმაც ცხოვრების სირთულეები შემოქმედებით გამარჯვებად აქცია. იგი ღირსეულად ატარებს ქართველი ემიგრანტის სახელს, თავისი პოეზიით, მუსიკითა და საზოგადოებრივი საქმიანობით ამდიდრებს ქართულ კულტურულ სივრცეს და უამრავი ადამიანისთვის იმედის, სიყვარულისა და სამშობლოს ერთგულების მაგალითს წარმოადგენს.
🏆 სწორედ ამ მრავალწლიანი, ნაყოფიერი, საზოგადოებრივად მნიშვნელოვანი და შემოქმედებითი მოღვაწეობისთვის, ემიგრაციაში ქართული სიტყვის, კულტურისა და ეროვნული ღირებულებების პოპულარიზაციისთვის, საქართველოს წარმატებული ადამიანების დაჯილდოების ცერემონია „პერსონა“ ბელა მოდებაძეს ანიჭებს „პერსონა 2026“-ის საპატიო ტიტულს.
