27/04/2026
غزالی ایجوکیشن ٹرسٹ کی ماہانہ ڈائریکٹ ڈیبٹ مہم اور ڈونیشن باکس مہم کے سلسلے میں برطانیہ بھر میں روابط کا سلسلہ بھرپور انداز میں جاری ہے۔ الحمدللہ، جمعہ 24 اپریل 2025 کو قافلۂ غزالی لندن سے روانہ ہو کر اپنے پہلے پڑاؤ کے طور پر لیسٹر پہنچا، جہاں الفلاح مسجد میں نمازِ جمعہ کی ادائیگی کے بعد ایک نہایت بامقصد ملاقات کا اہتمام ہوا۔
مسجد کے معزز چیئرمین اور غزالی کے دیرینہ محسن، جناب عبدالکریم گھی والا صاحب اور ان کی معزز کمیٹی کے ساتھ ملاقات انتہائی خوشگوار ماحول میں ہوئی۔ غزالی ایجوکیشن ٹرسٹ کی جانب سے ان کی مستقل سرپرستی اور تعاون پر دلی شکریہ ادا کیا گیا۔ اس موقع پر غزالی ٹیم نے اپنی جاری مہمات، خصوصاً ڈائریکٹ ڈیبٹ اور ڈونیشن باکس مہم کے اغراض و مقاصد پر تفصیلی روشنی ڈالی۔ جناب عبدالکریم گھی والا صاحب اور ان کی ٹیم نے نہ صرف ان مہمات کو سراہا بلکہ بھرپور تعاون کی یقین دہانی بھی کروائی، جو یقیناً غزالی کے مشن کے لیے ایک حوصلہ افزا پیش رفت ہے۔ اس تقریب کی بھرپور میزبانی نمائندہ غزالی لیسٹر برادر سید طارق زیدی بھائی نے خوب احسن طریقے سے نبھائی ۔
اس کے بعد قافلۂ غزالی نے مانچسٹر کا رخ کیا، جہاں مانچسٹر اسلامک ایجوکیشن ٹرسٹ کے چیئرمین جناب فاروق ظہیر صاحب کی خصوصی دعوت پر ایک عظیم الشان اور تاریخی ادارے، مانچسٹر اسلامک گرامر اسکول، میں شرکت کا موقع ملا۔ اس روز وہاں سالانہ اجتماع کا انعقاد تھا، جس میں ممتاز تعلیمی و سماجی شخصیات نے شرکت کی اور اپنے خیالات کا اظہار کیا۔
تقریب میں برطانیہ کے نامور ماہر تعلیم سر مفتی عبدالحامد پٹیل، معروف سماجی رہنما الینور چوہان ایم بی ای، اور سابق رکن پارلیمنٹ افضل خان سی بی ای نے اپنے بصیرت افروز خطابات سے سامعین کو مستفید کیا۔ اس موقع پر غزالی ٹیم کو ان معزز شخصیات سے ملاقات کا شرف بھی حاصل ہوا۔
اسی محفل میں معروف سماجی شخصیت اشفاق چوہدری صاحب سے بھی نہایت مفید گفتگو ہوئی، جنہوں نے خانیوال میں ایک تعلیمی ادارے کی بنیاد رکھ کر اسے آج ایک وسیع و عریض اور مثالی تعلیمی مرکز میں تبدیل کر دیا ہے۔ ان کے تجربات اور غزالی ایجوکیشن ٹرسٹ کے ساتھ ممکنہ تعاون پر تبادلۂ خیال نہایت مثبت اور حوصلہ افزا رہا۔
اس بابرکت اجتماع میں دیگر معزز احباب بھی شریک تھے، جن میں فائقہ صاحبزادہ، ہمایوں صاحبزادہ، ڈاکٹر ریحان قریشی، اور غزالی کے معزز ٹرسٹی محبوب قمر صاحب نمایاں تھے۔ ان سب کی موجودگی نے محفل کو مزید وقار اور معنویت بخشی۔
مزید برآں، مانچسٹر میں مختلف احباب کی درخواست پر غزالی ٹیم نے ڈونیشن باکسز بھی تقسیم کیے، جو اس بات کا واضح ثبوت ہے کہ مخیر حضرات نہ صرف اس مشن سے جڑے ہوئے ہیں بلکہ عملی طور پر اس کا حصہ بننے کے لیے بھی پُرجوش ہیں۔
یہ تمام سرگرمیاں اس امر کی غمازی کرتی ہیں کہ غزالی ایجوکیشن ٹرسٹ کا پیغام تعلیم، خدمت اور خیر کے جذبے کے ساتھ دلوں تک پہنچ رہا ہے۔ اللہ تعالیٰ سے دعا ہے کہ وہ اس مشن کو مزید وسعت عطا فرمائے اور اسے انسانیت کے لیے مزید فائدہ مند بنائے۔ آمین
سہیل ضرار خلش
