Cfc Madagascar, 17 Rue Bayard, Paris (2026)

28/05/2026

TENY HO AN’NY HERINANDRO

Fitiavana manao fifonana

Sunil Poonen_24-5-2026

"Tafio avokoa ny fiadian'Andriamanitra, mba hahazoanareo hifahatra amin'ny fanangolen'ny devoly" Efesiana 6:11.

Efa nandre an'io andininy io avokoa ny ankamaroantsika ary efa samy namaky ny teny hoe "famonjena ho fiarovan-doha" sy "rariny ho fiarovan-tratra". Saingy mety tsy fantatrao hoe Jesosy mihitsy no olona voalohany nitafy izany fiadiana izany.

"Eny, hitany fa tsy nisy olona, sady talanjona Izy, satria tsy nisy mpanalalana (tsy nisy mpanao fifonana), ka dia ny sandriny ihany no nanao famonjena ho Azy… Niakanjo fahamarinana tahaka ny akanjo fiarovan-tratra Izy, ary fiarovan-doha famonjena no teo amin'ny lohany" (Isaia 59:16-17).

Teny faminaniana tao amin'ny Testamenta Taloha mikasika an'i Jesosy io resahin'i Paoly ao amin'ny Efesiana toko faha 6 io.

Fa ny tena mahazendana dia mampiseho an'i Jesosy mitafy ny fiadian'Andriamanitra mba hanaovany fifonana ho antsika io andininy io. Ary ankehitriny Izy dia miantso antsika hanaraka ny diany ka hanao fifonana.

Mpitondra ny fiadiana eo amin'ny fiainana andavanandro

Tao amin'ny Testamenta Taloha sy tamin'ny andro fahiny dia matetika ny olona mpiady no manana ny mpitondra ny fiadiany. Izany hoe misy olona miafinafina manampy azy, tsy fantatra anarana izay mitondra ny fiadiany, tsy mihataka raha misy loza ary manao izay hahampy tsara ny fiadiana ampiasain'ilay mpiady. Izany sary izany dia mifanaraka tsara amintsika olona mpanao fifonana ho an'ny vadintsika, ho an'ny zanatsika, ary ho an'ny fianakaviamben'ny fiangonana amin'ny fanekentsika an'i Jesosy ho modely tonga lafatra. Izy ilay mpitondra ny fiadiana sy velona manao fifonana ho antsika (Hebreo 7:25).

Mahita zavatra tahaka izao isika eo amin'ny fiainantsika andavanandro :

vehivavy vesarin'ny hakiviana na ny famoizam-po na ny tebiteby na ny asa sarotra na ny fahasahiranana ara-bola
ankizy mitolona amin'ny tsi-filaminana, amin'ny fahotana miafina na amin'ny toe-javatra sarotra any am-pianarana
Rahalahy na anabavy lavon'ny fahotana na indraindray tsy mahafantatra ny fahotana manapoizina ny fiainany

Tsy mahazo manome tsiny azy ireny avy ery lavitra ery isika fa tokony ho mpitondra ny fiadiana izay hiteny hoe "Ny adinao dia adiko. Ny fahalemanao dia fahalemeko. Hiara-mijoro aminao aho tahaka an'i Jesosy niara-nijoro tamiiko".

Marika voalohan'ny fitiavana manao fifonana : Hiaraka aminao zato isan-jato aho

Ao amin'ny 1 Samoela toko faha 14 dia nandeha nanafika ny miaramilan'ny Filistina i Jonatana. Izy irery niaraka tamin'ny mpitondra ny fiadiany. Nihanika harambato kitso loha izy nanao vy very ny ainy. Tamin'ny finoana no nitenenany hoe "Angamba homba antsika Jehovah, fa tsy misy mahasakana an'i Jehovah tsy hamonjy, na amin'ny maro na amin'ny vitsy" (1Samoela 14:6). Mahavariana tokoa ny navalin'ilay mpitondra ny fiadiany : "Ataovy izay rehetra ao am-ponao ; mandrosoa ihany ; indro, hanaraka anao aho araka ny sitraponao" (1Samoela 14:7).

Ry vehivavy : rehefa ao anaty ady ara-panahy ny vadinao, moa ve ny fihetsikao dia hoe "Miaraka tanteraka aminao aho" sa ianao mamafy fisalasalana sy tahotra ?
Ry lehilahy : raha sendra ady sarotra ny vadinao, moa ve ilaozanao mitsikera sy mihataka aminy sa miditra an-tsehatra ianao ka raisinao ho fahalemenao ny fahalemeny ?
Ry rahalahy sy anabavy : rehefa mandalo fitsapana ny loholona ary mandray fanapahan-kevitra sarotra amin'ny fahatokisana ny Tompo, moa ve ianao manohana azy ireny tahaka ny mpitondra ny fiadiany sa mitazana sy mitsikera ?

Efa nampitandrina antsika mikasika ny fanahin'ny fiampangàna i Jesosy : mahita ny sombin-kazo eo amin'ny mason'ny rahalahintsika isika nefa misy andrin'ny fanamelohana ao anaty masontsika. Ny tantara anefa dia tsy mifarana eo amin'ny fanesorana ny vatan-kazon'ny fanamelohana. Ny fiafaran'ny tantara dia fanesorana ny sombin-kazo eo amin'ny mason'ny rahalahinao REHEFA AVY nesorinao ny fanahin'ny fiampangàna tao anatinao. Tsy ho vitantsika izany raha tsy tsapantsika fa ohatran'ny eo amin'ny masontsika mihitsy ilay sombin-kazo eo amin'ny mason'ny rahalahintsika. "Dia aoka isika koa hanaisotra izay rehetra mitambesatra amintsika, mijery an'i Jesosy" (Hebreo 12:1). Ny entamavesatrao dia tsy anao irery intsony izao fa efa lasa mitambesatra amintsika.

Hoy ny Jakoba 5:20 "Fa izay mampibebaka ny mpanota hiala amin'ny làlan'ny fahadisoany dia hamonjy fanahy tsy ho faty sady hanarona heloka be". Izany no fomba ataon'ny fitiavana hanaronany fahotana maro (1Petera 4:8). Ny fitiavana dia tsy hoe mody tsy mahita ny fahotana. Ny fitiavana dia mitolona hisian'ny fibebahana sy amin'ny fanonerana ny tsy nety natao.

Hoy ny Joda 22:23 "Ary amindrao fo ny sasany izay miahanahana, ary ny sasany kosa sariho avy amin'ny afo no famonjy azy, ary ny sasany indray amindrao fo amin-tahotra, ka mankahalà na dia ny akanjo voapentipentin'ny nofo aza". Ny fitiavana manao fifonana dia mitandrina tsara mba tsy ho voaloton'ny fahotana, kanefa feno famindram-po ary tsy sasatra misarika ny olon-tiana hivoaka avy ao anaty fahotana izay mandoro azy.

Marika faharoan'ny fitiavana manao fifonana : Hahenako ny resaka fa ampitomboiko ny vavaka

Misy ny atao hoe "fitoriana filazantsara amin'ny fahanginana" izay asain'ny Soratra Masina ataontsika. Izao no voalaza ao amin'ny 1Petera 3:1-2 "Ary toy izany koa, hianareo vehivavy, maneke ny vadinareo, mba ho voataonan'ny fitondrantenan'ny vavy izy, na dia tsy amin'ny teny aza (raha tàhiny misy tsy manaiky ny teny), rehefa hitany ny fahadiovan'ny fitondrantenanareo amin'ny fahatahorana". Mba fantatrao ve fa azonao atao ny mamonjy fanahin'ny olona na dia tsy miteny akory aza ?

Rehefa milaza io andininy io hoe "Ary toy izany koa", dia hitantsika eo amin'ny andininy eo aloha kely ilay modely tokony arahina. Dia ao amin'ny 1Petera 2:23 izay milaza momba an'i Jesosy hoe "raha notevatevaina Izy, dia tsy mba nanevateva ; raha nijaly, dia tsy nandrahona, fa nanolotra ny adiny ho amin'ny Mpitsara marina".

Ny dikan'izany dia izao, ny modely tokony arahina eto dia Jesosy. Noho izany dia tsy ny vehivavy ihany no natao hanaraka azy fa isika rehetra. Ny manao fifonana amin'ny fitiavana dia izao miresaka kely amin'ny olona fa miresaka betsaka amin'Andriamanitra.

Mahaliana ny mahita ny zavatra nolazain'i Paoly rehefa avy nilazalaza momba ny fiadian'Andriamanitra izy. Manome fanazavana izy mikasika ny tanjona lehibe kokoa ho an'ireo fiadiana ireo. Vao tapitra mihitsy ny andininy mikasika ny fiadian'Andriamanitra dia hoy Paoly ao amin'ny Efesiana 6:18 "Ary mivavaha mandrakariva ao amin'ny Fanahy amin'ny fivavahana rehetra sy ny fangatahana, ka miambena amiin'izany amin'ny faharetana sy ny fangatahana rehetra ho an'ny olona masina rehetra". Tena fiovan-tsaina lehibe tamiko izany hoe mahita ny tenako mitafy ny fiadian'Andriamanitra, tsy hiarovako izay an'ny tenako fotsiny fa itolomako am-bavaka ho an'ny hafa koa, manomboka amin'ny ao an-tokantranoko ka hatrany amin'ny fiangonako sy ny mpiara-monina amiko.

Sary mahafinaritra toy izany koa no omen'i Isaia mikasika ity fitolomana amin'ny vavaka fifonana ity.

Isaia 62:1 "Tsy hangina Aho noho ny amin'i Ziona, ary tsy hitsaha-miteny Aho noho ny amin'i Jerosalema, mandra-piposaky ny fahamarinany tahaka ny famirapiratry ny mazava, ary ny famonjena azy tahaka ny fanilo mirehitra".

Ny "Ziona" sy "Jerosalema" dia soloy amin'ny anaran'ny vadinao, ny anaran'ny rahalahinao, ny anaran'ny zanakao ao amin'io andininy io hoe "Tsy hangina aho noho ny amin'ny vadiko …, noho ny amin'ny zanako …, noho ny amin'ny rahalahiko…".

Izany no asa fanompoan'ny fanaovana fifonana, tsy mety sasatra, matetika dia tsy misy mpahita, kanefa sarobidy eo imason'Andriamanitra. Tsapan'i Samoela loatra izany ka hoy izy "Ary ny amiko, sanatria raha hanota amin'i Jehovah aho ka hitsahatra tsy hangataka ho anareo" (1Samoela 12:23). Amin'i Samoela, ny mitsahatra tsy mivavaka ho an'ny olona dia fahotana amin'Andriamanitra. Na dia nivily lalana aza i Saoly ka niala taminy ny hosotra dia mbola nalahelo azy foana i Samoela na dia tsy nahita an'i Saoly intsony aza izy mandra-pahafatiny (1Samoela 15:35).

Ny fitiavana manao fifonana dia mety hidika koa hoe fanohizana mivavaka na dia fotoana elabe aty aorian'ny fahatapahan'ny fifandraisana na fifanalaviran-toerana aza.

Marika fahatelon'ny fitiavana manao fifonana : Hotononiko aminao ny fahamarinan'Andriamanitra

Ao amin'ny Zakaria toko faha-3 dia nitsangana teo anatrehan'ny anjelin'ny Tompo i Josoa mpisoronabe, nitafy fitafiana maloto, ary nitsangana teo koa Satana "hiampanga azy". Izao no navalin'i Jehovah ao amin'ny Zakaria 3:2 "Hananatra anao anie Jehovah, ry Satana ; eny, Jehovah izay nifidy an'i Jerosalema anie hananatra anao ; tsy forohana nosarihana tamin'ny afo va ity ?"

Avy eo dia nandidy Andriamanitra hoe : "Esory aminy ny fitafiana maloto". Hoy Izy tamin'i Josoa "Indro efa nesoriko ny helokao, ary hampiakanjoiko akanjo fihaingoana hianao". Dia nampian'i Zakaria izany avy eo ao amin'ny andininy faha-5 hoe "Aoka hasiany hamama madio eo an-dohany".

Tahaka izany ny fon'ny Ray amin'ilay zanaka adala : raha vantany vao nisy mariky ny fibebahana fotsiny dia nihazakazaka Izy, nanoroka an-janany, nampiakanjo azy, namerina azy tamin'ny toerany sady nifaly. Ny asetrintsika an'izany (tsy atao mitovy amin'ny an'ilay zokiny lahy ao amin'ny tantara) dia tsy maintsy hoe mampiseho izany fitiavana sy fankalazana ary fanamarinana izany raha vao misy famantarana amin'ny fibebahana marina. Tsy manao hoe "Eny e, fiantombohana izany, ho hitantsika eo ny tena fahavononanao". Fa aleo miteny hoe "Efa nesorin'ny Tompo ny helokao ary efa nambarany hoe marina ianao rehefa avy nibebaka. Faly aho mamerina sy mankalaza ny didim-pitsarany hoe marina ianao".

Antso ho an'ny tokantranontsika sy ny fiangonantsika

Eritrereto hoe ao amin'ny fianakaviana anankiray, ny lahy sy ny vavy dia samy mpitondra ny fiadiana ho an'ny vadiny, ny ray aman-dreny dia mandà tsy hanameloka fa miambina sy mivavaka ho an'ireo zanany. Eritereto hoe ao amin'ny fiangonana anankiray, ny rahalahy sy ny anabavy dia samy mitolona mangina ho an'ny fahamasinan'ny namany. Eritererto hoe ao amin'ny fianakaviana sy ny fiangonana maro dia

mitondra ny adin'ny hafa tahaka ny hoe adiny ny tsirairay
miresaka kelikely kokoa ny olona ary mivavaka bebe kokoa
raha vao misy mariky ny fibebahana dia samy maika hanonona ny fahamarinana nampanantenain'Andriamanitra amin'ny namany avy

Enga anie ny Tompo hanangana antsika ho mpiambina sy mpitondra ny fiadiana. Izany hoe olon'ny fitiavana manao fifonana, ao anatin'ny fanambadiana, ao anatin'ny fianakaviana ary ao anatin'ny fiangonantsika.

https://malagasy.cfcindia.com/the-church

18/05/2026

TENY HO AN’NY HERINANDRO

Vonjena amin'ny fanahin'ny fiampangàna

Zac Poonen_17-5-2026

Vakiantsika ao amin'ny Apokalipsy 12:10 fa Satana ilay mpiampanga ny mpino rehetra izay miampanga azy eo anatrehan'Andriamanitra isan'andro isan'andro, andro aman'alina. Asa matihanina no iandraiketan'i Satana. Ary manana mpiara-miasa marobe izy ao amin'izany asany izany, mampalahelo fa na dia ao amin'ireo mpino aza. Betsaka ny mpino no mifanome tanana amin'i Satana amin'io asa fiampangàna olona io.

Raha vao nanota i Adama tao amin'ny saha Edena dia nampitain'i Satana tany amin'i Adama io "toetrany mpiampanga olona" io. Koa rehefa nanatona an'i Adama Andriamanitra ary nanontany azy raha nihinana tamin'ny voankazo voarara izy dia izao ny zavatra voalohany indrindra nataon'i Adama, raha tokony ho niaiky ny fahotany izy, dia niampanga ny vadiny no nataony : "Ny vadiko no nanome ahy ny voankazo hohaniko" (Genesisy 3:12).

Hatramin'ny fahazazantsika dia efa nianatra nitady ny lesoky ny hafa sy niampanga azy ireny isika. Rehefa nihalehibe isika dia niha nitombo ny fahaizantsika nanafina sy nandranitra izany toe-panahy mpitsikera sy mpiampanga izany. Ny zavatra tena mampalahelo dia hita ao amin'ny mpino maro izany fanahin'ny fiampangana olona izany na dia efa taona marobe aty aorian'ny nahaterehany indray aza.

Hoy ny 2Korintiana 5:17 "Koa raha misy olona ao amin'i Kristy, dia olom-baovao izy ; efa lasa ny zavatra taloha, indreo, efa tonga vaovao ireo".

Rehefa nateraka indray isika dia tokony ho tonga vaovao ny toe-panahintsika, tokony hitovy amin'ny toe-panahin'i Jesosy : mifona ho an'ireo olona nanota tamintsika fa tsy miampanga azy ireny. Izany fiovana izany anefa dia tsy hiseho ao anatintsika raha tsy miara-miasa amin'Andriamanitra isika. Ny Filipiana 2:12 dia mampianatra antsika "hiasa hahatanteraka ny famonjena" antsika amin'ny toe-panahy ratsy rehetra nolovaintsika tamin'i Adama. Ary satria ataon'ny olona tsirambina io didy io hoe "miasà hahatanteraka ny famonjena ho an'ny tena", dia mbola mitondra tena tahaka ny zanak'i Adama ny olona, miampanga ny hafa izy. Noho izany fitondran-tena ratsin'ny zanak'Andriamanitra izany dia ratsy laza eo anatrehan'ny olona ny Tompo sy ny Fiangonany.

Ao amin'ny Jaona 8:4 dia vakiantsika ny fomba niampangan'ireo Fariseo ny vehivavy mampalahelo anankiray tratra nijangajanga. Tsy nisy nieritreritra ny hamonjena an-dravehivavy ho afaka tamin'izany fiainam-pahotana izany izy ireo. Fa ny zavatra notadiaviny dia ny hampiharihary ny "fahamarinan'ny tenany" sy ny hampiseho fa mpanota tsy mifaditrovana io vehivavy io. Nijoro izy ireo ary natondrony an'ilay vehivavy ireo fanondrony mpiampanga olona, tahaka an'i Adama razambeny nitoroka sy nanondro an'i Eva. Nahariharin'izy ireo tamin'izany fa tao anatiny tao dia nisy firaisam-panahy tamin'i Satana, ilay Mpiampanga. Izany no nilazan'i Jesosy manokana tamin'ireo Fariseo fa Satana no rain'izy ireo (Jaona 8:44).

Tonga Jesosy mba hamonjy ireny vehivavy ireny amin'ny fahotany, fa tsy tonga hanameloka azy. Ao amin'ny Jaona 3:17 dia vakiantsika "fa Andriamanitra tsy naniraka ny Zanaka ho amin'izao tontolo izao hanameloka izao tontolo izao, fa mba hamonjeny izao tontolo izao".

Samy hafa tanteraka mihitsy ny hoe fanamelohana sy ny hoe fananarana omen'Andriamanitra. Ao amin'ny Apokalipsy toko faha-2 sy faha-3 dia nomen'ny Tompo toromarika i Jaona mba hananatra ireo loholona tsy nahomby tao amin'ireo fiangonana dimy. Toy izany koa, nomen'ny Fanahy Masina toromarika i Paoly mba hananatra ireo fiangonana tao Korinto sy Galatia ary Tesalonika. Izany fananarana avy amin'Andriamanitra izany dia zavatra ara-panahy, izany hoe misy ny fotoana izay iantsoan'Andriamanitra ireo mpanompony voahosotra hananatra ny olony. Kanefa ireny fananarana ireny dia tsy maintsy omena am-pitiavana foana.

Mora fantarina ny fanahin'ny fiampangàna. Miaraka amin'ny toe-tsaina manambany ny olona tsy tiany foana izany. Tsy misy olona hanameloka ny olona tiany amin'izany fomba izany mihitsy. Ohatra, tsy hanameloka ny zanakao eny imason'olona eny mihitsy ianao. Koa hitanao amin'izany fa ny tsy fisiam-pitiavana no mampisy ny fanahin'ny fanamelohana ao anatintsika.

Ny asa fanompoana fananarana olona dia ankinin'ny Tompo amin'ireo mpanompony mahatoky irery, tahaka ny apostoly Jaona sy ny apostoly Paoly. Tsy nantsoin'ny Tompo ho amin'izany asa fanompoana izany ny olona rehetra. Koa samia mitandrina tsara. Raha mandray anjara amin'ny "asa fanamelohana" ianao dia mety hamita-tena sy hihevitra fa manao ny asan'ny fananarana avy amin'Andriamanitra.

Raha hazoninao io toe-panahy mpanameloka olona io dia azo antoka fa hotoherin'ny Tompo ianao tahaka ny nanoherany ny Fariseo. Ny asa fiampangana dia asan'i Satana ary isika mpino dia tsy mahazo mandray anjara amin'izany velively mihitsy.

Voalohany indrindra dia tsy maintsy manaiky isika fa Satana sy ny demoniany dia hamporisika antsika foana hiampanga ireo mpiara-mivavaka amintsika amin'ny zavatra azo kianina hitantsika ao aminy. Hasehon'ireo demonia ireo anao ny tsinin'ireo mpiara-mivavaka aminao mba hanosehany anao hiampanga azy. Raha resin'izany fakam-panahy izany ianao dia handairan'ny hery sy ny fahefan'i Satana. Mety ho antony anankiray mahatonga ny mpino maro hijaly amin'ny aretina isan-karazany izany.

Tsy maintsy hentitra tokoa isika manongotra hatramin'ny fakany ny toe-panahy mpiampanga eo amin'ny fiainantsika, tahaka ny ataon'ny dokotera mpandidy rehefa manala hatramin'ny fakany ny fivontosan'ny homamiadana ao amin'ny marary. Aoka ho fantatsika tsara fa ny "fanahin'ny fiampangàna" dia ratsy lavitra noho izay mety ho homamiadana.

Vao teraka isika dia efa nahazo izany fahazaran-dratsy mitady ny tsinin'ny hafa izany. Nandany toana maro isika nifosana ny hafa sy nitadiavana ny tsiny sy ny fahadisoan'ny olona mba hanamelohantsika azy.

Farany, aoka hotadidiantsika izay nolazain'i Jesosy tamin'ny Fariseo hoe, izay tsy nanota taminareo ihany no manana zo hitora-bato ny hafa. Koa tsy misy amintsika na iza na iza afaka miampanga ny hafa.

Ny Tompo anie hamonjy antsika rehetra ho afaka tanteraka amin'izany fanahin'i Satana izany.

Amena.

https://malagasy.cfcindia.com/the-church

11/05/2026

TENY HO AN’NY HERINANDRO

Aza tiavina ny vola

Zac Poonen_10-5-2026

Hoy Jesosy "Aza mihary harena ho anareo ety an-tany, izay misy kalalao sy harafesina manimba, sady misy mpangalatra manamitrano sy mangalatra. Fa miharia harena ho anareo any an-danitra, izay tsy misy kalalao na harafesina manimba, sady tsy misy mpangalatra manamitrano na mangalatra - izao no antony - satria izay itoeran'ny harenao dia any koa ny fonao" (Matio 6:19-21). Ny ankamaroan'ny olona dia tsy mino fa ratsy ny fitiavam-bola. Tsy fahotana ny fananana vola fa ny fitiavam-bola no fahotana.

Mora fotsiny ny ahafantarana na mankato an'io didy io ianao na tsia. Raha toa ny sainao mitodika kokoa any amin'ny zavatry ny tany noho ny any amin'ny zavatry ny lanitra, izany hoe, raha ny harena amam-pananana ety an-tany no saintsaininao mihoatra noho ny zavatry ny lanitra dia azo antoka fa ety an-tany ny fonao ary ety koa ny harenao. Ny hahafantarana na nankato an'io didy io isika na tsia dia izao, aoka samy hanontany tena hoe aiza no misy ny foko mandritra ny andro. Eo am-panaovana ny asa eo (na raharaha hafa) raha toa ka mitebiteby fatratra isika rehefa misy fatiantoka na koa hoe mientan-kafaliana isika rehefa mahazo tombony dia manambara izany fa eto amin'ity tany ity ny tena harentsika.

Taona maro lasa izay dia tsaroako fa nisy olona nanome ahy fanomezana kely ary izao no fanontaniana napetraky ny Tompo tamiko : "Nitombo ve ny fifalianao ?" Avy hatrany aho dia niaiky fa marina izany ary nibebaka tamin'ny Tompo aho fa nitombo tokoa ny fifaliako noho io vola kely azoko io. Tamin'io andro io no nianarako fa tsy maintsy ao amin'ny Tompo irery ny fifaliako fa tsy ao amin'ny vola. Nianarako ihany koa fa ny fitombon'ny vola dia tsy tokony hampitombo ny fifaliako mihitsy. Raha mampitombo ny fifaliako izany dia midika fa ao amin'ny vola ny fifaliako.

Mamporisika antsika ny Baiboly hifaly ao amin'ny Tompo, ary ny Tompo dia tsy miova. Koa na mahazo vola ianao na very vola dia tsy tokony hitombo na hihena ny fifalianao ao amin'ny Tompo. Tokony tsy hiova mihitsy izany. Raha nihena ny fifalianao satria nisy vola very dia azo antoka fa tao amin'iny ny fonao. Raha nitombo ny fifalianao satria nahazo tombony tombony dia azo antoka fa tao amin'iny ny fonao. Tsy maintsy matoky an'Andriamanitra isika. Homeny antsika izay rehetra ilaintsika eo amin'ny fiainana ety an-tany kanefa tsy tokony hahita ny fifaliantsika ao amin'ireny zavatry ny tany ireny isika. Azontsika ampiasaina ireny kanefa tsy azontsika atao hahazoana fifaliana.

Mpanompo mahafatrapo ny vola saingy tompo tsy mifaditrovana koa izy, mitovy amin'ny afo. Tsy velona isika raha tsy misy afo ao an-trano ohatra hoe handrahoina hanina. Kanefa raha iny afo ao am-patana iny no lasa tompo ka mandidy ny ao an-trano dia ho may ny trano. Tompo tsy mifaditrovana ny afo, mahavita mandoro ny tranonao iray manontolo izy, kanefa raha ianao no mandidy azy (rehefa ahenanao ny afo ary miteny ianao hoe "Izaho no mandidy na ampirehetiko ianao na vonoiko. Izaho no mandidy fa tsy ianao". Amin'izay fotoana izay dia ianao no tompo ao an-trano). Ary amin'izay fotoana izay koa dia tonga mpanompo mahafatrapo ny afo. Tsy maintsy atao tahaka izany koa ny vola. Tahaka ny ilantsika ny afo no ilantsika ny vola koa ivelomantsika eto an-tany kanefa tsy maintsy atao mpanompo izy. Tsy maintsy miteny ianao hoe "O ry vola, nanapa-kevitra aho fa tsy handidy ahy intsony ianao. Izaho no handidy anao. Tsy ianao no handidy ny saiko ka hahatonga ahy hisaintsaina anao isan'andro. Ny Tompo sy ny zavatry ny lanitra no hosaintsainiko fa ianao kosa hampiasaiko". Izany no fanapahan-kevitry ny olona ara-panahy.

Tena tsara ny volamena raha atao mpanompo. Lazain'ny Baiboly aza fa misy volamena any an-danitra any ! Kanefa ny vakiantsika ao dia hoe lalambe tena volamena. Ny dikany dia eo amboniny no andehanana, hitsahin'ny tongotsika izy izany. Izany no mahasamy hafa ny kristiana misaina ny any an-danitra sy ny kristiana misaina ny ety an-tany. Ny kristiana misaina ny any an-danitra dia manao ny volamena ho ao ambanin'ny tongony, izany hoe tsy manapaka azy. Fa ny an'ny kristiana ara-nofo dia ataony eo ambony lohany ny volamena ary saintsaininy isan'andro.

Koa raha vola foana no ao an-tsainao ao dia tia vola ianao, na tianao na tsy tianao. Tahaka ny tovolahy tia tovovavy anankiray izay tsy afaka an-tsainy mihitsy. Raha tsy afaka an-tsainao ny vola dia tia vola ianao, ary ny fitiavam-bola no fototry ny ratsy rehetra. Tsy voatery ho mpanankarena ianao vao ho tia vola. Tsy mbola nahita mpangataka tsy tia vola aho. Tia vola avokoa ny mpangataka rehetra. Raha omenao dimampolo izy dia ataony tsinontsinona iny. Tia vola izy ary te hahazo vola bebe kokoa. Noho izany dia tsy ny harena no mahatonga ny olona ho tia vola. Mitovy ihany ny fitiavam-bolan'ny olona na mahantra izy na manankarena.

Dia toy izany koa, azon'ny olona atao tsara ny miala amin'ny fatiavam-bola na miavosa be aza ny harenany. Ny toe-tsainao manoloana ny vola no zava-dehibe. Raha ny mpiasa no mandidy ny ao an-tokantranonao dia ho zavadoza. Mety hoe kely ny vola anananao (tahaka ny manana mpanampy anankiray) kanefa mety iny no handidy ny ao an-tranonao sy hanapaka ny saina aman'eritreritrao. Etsy an-daniny kosa, afaka manana mpiasa miisa 318 tahaka an'i Abrahama ianao kanefa mpanompon'i Abrahama avokoa izy rehetra ary nankato azy. Tahaka an'i Abrahama dia azo atao ny manam-bola be ary raha vitanao ny manapaka an'ireny dia azonao ampiasaina ho voninahitr'Andriamanitra izy.

Ny fitiavam-bola no fototry ny ratsy rehetra (tsy voatery hoe ny fananana vola be). Zava-dehibe mihitsy ny hahaizantsika manavaka an'ireo. Efa nahita mahantra maro tia vola be aho ary efa nahita mpanankarena tsy tia vola. Hitako fa tsy miankina amin'ny habetsahan'ny fananana izany ilay izy fa miankina amin'ny fitiavana azy. Izany no tian'i Jesosy nambara. Tsy maintsy mifantoka amin'ny zavatra any ambony ny sainao. Miharia harena any an-danitra. Fantaro tsara ny eritreritrao, aiza no misy ny fonao, mba hahitanao ny zavatra ankafizinao.

Dia tohizan'i Jesosy ihany ny teniny ka nampifandraisiny ny maso sy ny vola ao amin'ny Matio 6:22 "Ny maso no jiron'ny tena, koa amin'izany, raha tsara ny masonao, dia hazava avokoa ny tenanao rehetra". Ny dikan'izany dia hoe ny fomba fahitanao ny vola no zava-dehibe. Raha ratsy ny masonao, izany hoe raha jerenao tahaka ny zavatra manan-danja tokoa ny vola, jerenao tahaka ny zava-dehibe indrindra eo amin'ny fiainanao, dia ho maizina ny tenanao rehetra. "Koa raha maizina ny fahazavana ao anatinao, manao ahoana ny halehiben'izany fahamaizinana izany !". Mahagaga fa maro ny olona mivoy fotopampianarana marina, kristiana tsara eo imason'ny olona sady mandeha tsy tapaka any am-piangonana nefa tia vola loatra. Mety hanambany ny antokom-pivavahana hafa mihitsy aza izy. Kanefa tsy fantany fa ny mpiangona ao amin'ireny antokom-pivavahana maty ireny dia afaka amin'ny fitiavam-bola kokoa noho izy, izay milaza ny tenany fa efa ao amin'ny fiangonan'ny Testamenta Vaovao.

Apetraho aminao ireto fanontaniana fototra ireto : faly ery ve ianao rehefa mahazo vola misimisy kokoa ? Mifendrofendro ve ianao rehefa very vola ? Raha izany dia tia vola ianao. Tsy ho voakitik'izany ny fifaliantsika raha ao amin'ny Tompo irery. Raha miankina amin'ny zavatry ny tany ny fifaliantsika dia hiaka-midina hanaraka ny fiovaovan'ny fidiram-bolantsika.

Tsy misy olona mahay manompo tompo roa. "Fa ny anankiray ho halany ary ny anankiray ho tiany". Toa zavatra tafahoatra no lazain'i Jesosy eto, tahaka ny tamin'ny niresahan'i Jesosy ny fankahalana ny ray, ny reny, ny vady, ny zanaka, ny rahalahy ary ny anabavy ao amin'ny Lioka 14:26. Henjana loatra ny tenin'i Jesosy. Milaza Izy fa raha te hitia an'Andriamanitra ianao dia tsy maintsy mankahala vola (Matio 6:24). Ny mamôna dia ilazana ny vola, ny trano, ny tahiry sy ny petrabola. Lazain'i Jesosy fa raha te hitia an'Andriamanitra ianao dia tsy maintsy ankahalainao izany rehetra izany. Azonao ampiasaina ny vola kanefa ny fitiavanao an'Andriamanitra no tsy maintsy ambony indrindra toy ny famirapiratry ny masoandro, ka hanjavona tahaka ny fanjavon'ny kintana amin'ny antoandro ny fankafizanao vola. Raha tsy izany no izy dia tsy afaka manompo an'Andriamanitra ianao.

Hoy Jesosy "ny anankiray hombany ary ny anankiray hohamavoiny". Ampidiro ao amin'io fehezan-teny io ny teny hoe "Andriamanitra" sy ny hoe "mamôna" dia toy izao ny fivakiny : "Tsy misy olona mahay manompo an'Andriamanitra sy ny zavatra ara-nofo (vola aman-karena). Fa na izy hankahala vola ary ho tia an'Andriamanitra na izy hankahala an'Andriamanitra ary ho tia vola". Ny dikan'io tenin'i Jesosy io dia hoe na iza na iza no tia vola dia mankahala an'Andriamanitra. Mety tsy fantatrao izany taloha fa fantatrao izy izao. Milaza i Jesosy fa raha tia vola ianao dia mankahala an'Andriamanitra. Ianao mety mbola mihevitra fa tia an'Andriamanitra satria manao hira fihirana marobe ho Azy kanefa tsy izany no nolazain'i Jesosy.

Ny nolazain'i Jesosy dia izao raha mifikitra amin'Andriamanitra ianao dia hanamavo ny vola ary raha mifikitra amin'ny vola ianao dia hanamavo an'Andriamanitra. Azonao atao ny manam-bola sy mitady vola kanefa raha vao manomboka tiavinao ny vola dia manomboka ankahalainao Andriamanitra. Mety nanome asa tsara ho anao Andriamanitra na nampandova anao vola be, eny tsara izany. Kanefa raha tiavinao sy fikirinao ny vola dia amavoinao sy ankahalainao Andriamanitra. Tena zava-dehibe ho antsika ny mahatakatra an'izany sy misafidy hanana toe-tsaina mendrika raha te hanompo ny Tompo amin'ny fahamarinana isika.

https://malagasy.cfcindia.com/the-church

04/05/2026

TENY HO AN’NY HERINANDRO

Aza mitsara

Zac Poonen_3-5-2026

"Aza mitsara ary aza manameloka ny hafa mba tsy hotsaraina sy hohelohina koa hianareo. Fa araka ny fitsarana ataonareo no hitsarana anareo ; ary araka ny ohatra ataonareo no hanoharana ho anareo. Ary nahoana hianao no mijery ny sombin-kazo eo amin'ny mason'ny rahalahinao, fa ny andry eo amin'ny masonao dia tsy mba tsaroanao ? Ary ahoana no hilazanao amin'ny rahalahinao hoe : Aoka aho hanaisotra ny sombin-kazo eo amin'ny masonao ; nefa, indro, ny andry eo amin'ny masonao ? Ry mpihatsaravelatsihy, esory aloha ny andry eo amin'ny masonao, ary amin'izay vao ho hitanao tsara ny hanesoranao ny sombin-kazo eo amin'ny mason'ny rahalahinao" (Matio 7:1-5).

Eny, tena mampalahelo tokoa fa mahazatra ny kristiana ny mitsara, mamingavinga ary manao tsinontsinona olona. Fahita eo amin'ny tontolo kristiana ny fiheveran-tena ho ambony noho ny hafa nefa matetika tsy fantatsika akory ny momba ilay olona. Izao no voalaza ao amin'ny Hebreo 9:27 "Ary tahaka ny nanendrena ny olona ho faty indray mandeha, ary rehefa afaka izany, dia hisy fitsarana". Rehefa inona moa no mitsara ny olona ilay Andriamanitra Tsitoha Mpamorona izao rehetra izao ? Araka ny voalazan'io andininy io dia "maty indray mandeha aloha ny olona ary aorian'izany vao hisy fitsarana". Koa rehefa maty ilay olona vao tsarain'Andriamanitra.

Ary ianao, rehefa inona ianao no mitsara olona ? Tsarainao elabe mialoha ny fahafatesany ilay olona. Fa nahoana moa Andriamanitra no miandry ny fahafatesan'ny olona anankiray vao mitsara azy ? Mety olona ratsy fanahy iny, kanefa hoy Andriamanitra "Mbola manana fanantenana Aho. Mety mbola hiova izy" noho izany dia miandry Andriamanitra. Eritrereto ange raha tonga dia notsarain'Andriamanitra talohan'ny nahafatesany ilay jiolahy anankiray teo ambony hazofijaliana, ilay nankany amin'ny paradisa. Eritrereto raha notsarain'Andriamanitra minitra vitsy na ora vitsy talohan'ny nahafatesany izy. Ho zava-doza loatra izany. Hay olona mendrika ho any amin'ny Paradisa izy tamin'ny farany, kanefa saika notsaraina sy nohelohina tany amin'ny helo. Nandrasan'Andriamanitra ho faty izy aloha ary avy eo dia nentiny tany amin'ny paradisa. Mampiseho izany fa miandry ny fahafatesan'ny olona anankiray Andriamanitra vao mitsara azy. Ny olombelona no tsy manam-paharetana sady mitsara alohan'ny ahafatesan'ny olona. Izany ny hadalan'ny olombelona. Tsy fantany akory ny zava-marina rehetra. Tsy fantany akory ny 99 isan-jaton'ny fiainana manokan'ilay olona, ny fiainany anaty. Tsy fantany akory izay fitolomana am-bavaka ataon'ilay olona kanefa tsarainy. Tsy hisy mpitsara mahay ny asany hanaiky hitsara raharaha miaraka amin'izany porofo kely dia kely izany. Raha tsy mahafantatra afa tsy 1 isan-jaton'ny raharaha anankiray ny mpitsara dia hiteny hoe "Henoinareo aho, mila porofo bebe kokoa aho vao afaka mamoaka didim-pitsarana. Eo am-piandrasana izany dia mihantona ny fitsarana". Izany no tokony holazain'ny kristiana rehetra koa.

Rehefa mitsara olona isika dia mampiseho ny taratry ny toe-pontsika izany. Araka ny voalaza ao amin'ny Ohabolana 27:19 hoe "Toy ny tandindona eny anaty rano mifanahaka amin'ny tarehy, dia toy izany no ifanahafan'ny fon'ny olona amin'ny an'olona". Toy ny mijery fitaratra ka ny tarehin'ilay olona ihany no hitany eo. Ny dikan'izany dia izao, ny toetra ratsy eritreretinao fa ao anatin'ny fon'ny olona anankiray dia manondro fotsiny ny toetra ratsy ao anatin'ny fonao. Mieritreritra ianao fa tsy amin'ny fahatsorana mihitsy no anaovan'io olona io zavatra. Izao no ao an-tsainao "Tsy maintsy misy zavatra tetehany ao matoa izy manao an'io satria raha tahaka ahy, tsy manao an'io aho raha tsy misy zavatra tetehako". Mampiharihary ny ao am-ponao izany. Tena hadalana tokoa ny mitsara ny hafa.

Diniho ny fanoharana mikasika ilay zanaka adala. Ao amin'io fanoharana io no amakiantsika ny tantaran'ilay zanaka lahimatoa. Tena tezitra be mihitsy izy rehefa nahita ny hafalian'ny rainy noho ny fiverenan'ilay zanaka adala. Rehefa nivoaka nanontany io zanany lahimatoa io ny Rainy hoe nahoana ianao no tsy miditra ao an-trano dia izao no navaliny ao amin'ny Lioka 15:30 "Io zanakao io". Tsy mba nataony akory hoe "io zandriko io". Jereo ange izany famingavingana. "Izay efa nandany ny fanananao tamin'ny vehivavy janga". Ahoana moa no nahafantarany an'izany ? Ahoana moa no nieritreretany fa nandeha tany amin'ny vehivavy janga ny zandriny ? Nisy olona nitatitra an'izany taminy ve ? Tsy nisy akory. Tonga dia nihevitra fotsiny izy fa tsy maintsy nandany ny volany tamin'ny vehivavy janga ny rahalahiny. Mety tsy izany akory no marina. Mety nisotrosotro sy nandanilany ny volany tamin'ny hadalana hafa izy fa angamba tsy tamin'ny vehivavy janga. Kanefa rehefa manana sain-diso mikasika ny rahalahiny tahaka ny an'ity lahimatoa ity ny olona anankiray dia hanana sain-diso foana izy mikasika ny hafa. Ary isak'izay manana sain-diso mikasika ny olona anankiray ianao dia fantaro fa ianao no tena fototry ny olana fa tsy ilay olona. Amin'ny farany iny olona iny mety miray latabatra amin'ny Rainy mihinana zanak'omby matavy ary mety ianao no any ivelan'ny trano.

Ny tantaran'ny zanaka adala dia ahitantsika fa eo am-piandohan'ny tantara dia ilay zandriny no any ivelan'ny trano ary ilay zokiny ao an-trano. Amin'ny faran'ny tantara dia ilay zandriny no ao antrano fa ilay zokiny any ivelany satria nitsara ny hafa izy. Ataovy mihitsy izay tsy hahatonga anao ho any ivelan'ny tranon'ny Ray noho ny fitsaranao olona nefa tsy nisy zavatra fantatrao. Ny fomba azo antoka indrindra dia tsy mitsara fotsiny.

Aza mitsara ny hafa. Lazain'i Jesosy hoe raha mitsara ianao dia inona no tsarainao ? Ny sombin-kazo eo amin'ny mason'ny rahalahinao ve no tsarainao kanefa misy andry eo amin'ny masonao ? Izany no nolazain'i Jesosy. Inona moa ny andry eo amin'ny mason'ny olona anankiray ? Tsy misy olona manana vatankazo ao anatin'ny masony izany. Kanefa fanahy inian'i Jesosy nitarina tahaka izany mihitsy mba hanehoana fa ratsy lavitra noho ny an'ilay olona ny fahotanao. Eny, mety nisy ratsy nataon'ilay olona. Kanefa ny tsi-fitiavanao an'iny olona iny dia vatan-kazo raha oharina amin'ny fahotany izay tahaka ny sombin-kazo.

Mety hoe nankany amin'ny vehivavy janga izy. Marina fa fahotana izany. Kanefa na izany aza dia sombin-kazo kely izany raha oharina amin'ny toetra tsy manam-pitiavana izay mitovy amin'ny vatan-kazo be. Asain'ny Tompo manala izany tsi-fitiavana ny hafa izany isika. Lazain'i Jesosy fa izany toetra tsy misy fitiavana asehontsika ny olona izany no mahatonga antsika hahita tsininy foana eo amin'ilay olona. Na inona na inona ataon'io olona io dia lazainao fa misy ambadika foana manosika azy hanao an'izany. Tsy afaka manao zavatra tsara io olona io. Ratsy ny fahitanao an'ilay olona kanefa tsy hitanao ny faharatsianao amin'izany toetra tsy misy fitiavana azy izany. Noho izany dia inona no ambaran'ny Tompo ? Eritrereto hoe misy olona anankiray izay zara raha mahita ny masony. Handeha hanatona an'iny olona iny ve ianao hanala zavatra ao anatin'ny masonao ? Handeha hijery dokotera maso izay efa mila ho jamban'ny katarakta sy areti-maso hafa ve ianao ? Ahoana tokoa moa no ahafahany mitsabo ny masonao sy manaisotra sombinkazo kely ao ? Tsy hanatona an'izany olona izany akory aho.

Izao no ambaran'ny Tompo. Ahoana moa no hahafahanao milaza amin'ny rahalahinao hoe "Avelao esoriko ny sombin-kazo eo amin'ny masonao" kanefa misy vatankazo be tsy ahafahanao mahita tsara ao amin'ny masonao ? Mety hanimba ny mason'ilay olona ianao amin'izany. Hoy ny Tompo "Ry mpihatsaravelatsihy ! Jereo ny toetranareo tsy misy fitiavana". Ny olona rehetra tsy manam-pitiavana sy mitsara ny hafa dia mpihatsaravelatsihy araka ny voalazan'ny Matio 7:5. Voalohany indrindra dia esory aloha io toetra tsy misy fitiavana io dia hahita mazava kokoa ianao. Amin'izay fotoana izay dia mety hanatona anao an-tsitrapo io rahalahy io hiteny hoe "Rahalahy ô, mba azonao esorina ve ny sombinkazo eo amin'ny masoko". Tsy mahafinaritra be ve raha tonga aminao izany ?

https://malagasy.cfcindia.com/the-church

Adresse

17 Rue Bayard
Paris
75008

Site Web

https://malagasy.cfcindia.com/

Notifications

Soyez le premier à savoir et laissez-nous vous envoyer un courriel lorsque Cfc Madagascar publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Cfc Madagascar