31/08/2026
Ibsa Gaddaa
Hagayya 30, 2026; Shaggar- Oromiyaa.
Manguddoon Oromoo Walloo Obboo Hasan Alii Adamee, kan maqaa Abbaa Galmaa jedhamuun beekaman du’aan boqotaniiru.
======================================
Manguddoon Oromoo Walloo, hundeessaafi miseensa Galma Amantii Waaqeffannaa Odaa Jaarraa Gadaa dhalatanii umrii isaanii waggaa torbaatamii-ja’atti (76), dhukkubsatanii wal’aanamaa erga turan booda, Gaaf Guyyaa Sambataa Hagayya 24, Bara 2018 A.L.I. mana jireenya isaanii Aanaa Jiillee Dhummuugaa, Ganda Makkannaa Jaarraa Waataatti argamu keessatti du’aan boqotan.
Obboo Hasan Alii Adamee/ Abbaan Galmaa abbaa isaanii Obboo Alii Adamee fi haadha isaanii Aaddee Haalimaa Sayid Aliyyee irraa Godina Addaa Saba Oromoo/Walloo, Aanaa Jiillee Dhummuugaa, Ganda Luugoo Gubbaa Waaccuutti Bara 1942 A.L.I. dhalatan.
Abbaan Galmaa hawaasa isaa keessatti gootummaa, arjummaa, fayyaalummaafi gara-laafessa lammii isaa jaalatuun beekamu. Abbaan Galmaa nama seenaa Oromummaa abboota dura darbanirraa barachaa guddate, kan sagantaa ofta’uutiin ijaaramuuf dheebuu guddaadhaan jiraachaa osoo jiranii Bara 2006 A.L.I. akkuma hundeeffamuu Dhaabbata Hordoftoota Amantii Waaqeffannaa dhaga’aniin dhaloota walitti fiduun mariisisanii, ijaaruudhaan baruma kana Giddugala Kaabaatti Galma Amantii Waaqeffannaa Odaa Jaarraa Gadaa saaquudhaan sochii deebi’ee ijaarramuu Sagantaa Warra Abbaa Oromoo, Amantii Waaqeffannaa lafa qabsiisuu keessatti ga’ee olaanaa seenaan yaadattu hojjataniiru. Erga sanii Ayyaana Yaadannoo Warra Abbaa Oromoorratti, Yaa’ii Waliigalaa Galmootaarratti Walloo irraa ka’uudhaan dadhabe, umriin jaaree, manguddoome osoo hin jedhin akkuma dardaraatti hamilee cimtuudhaan, walakkeessa Oromiyaa Galma Boosatirraa hanga Baha Oromiyaa Galma Agamtiitti, Salaalee hanga Finfinneefi Shaggaritti hirmaannaa cimaa guddinaafi babal’ina Amantii Waaqeffannaa taasisanii jiru.
Abbaan Galmaa waggoota kudha-lamaa oliif carraaqqii Galma Warra Abbaa Oromoo deebisanii ijaaruu, waliin gahiinsa barnoota Amantii Waaqeffannaa milkeessuufi dhaloota waan isaa dhabee, waldhabuun gargar hafee ture walitti fiduun ijaaruu keessatti gammachuu guddaan sosso’aa turanii jiru.
Abbaan Galmaa abbaa maatiiti. Ilmaan dhiiraa lamaa (2) fi dubartoota kudha-tokko (11) horatanii jiru.
Haala kanaan hojjachaa osoo jiranuu fayyaa dhabanii wal’aanamaa turan. Haa ta’u malee, deeggarsi wal’aansa yaalaa taasifamaa turuufis fayyuu hin dandeenye. Sirni awwaalchaa isaas Aanaa Jiillee Dhummuugaa, Ganda Luugoo Gubbaa Waaccuu, Araddaa Mudhii Waaccuutti Gaaf Guyyaa Sambataa, Hagayya 24, Bara 2018 A.L.I. raawwatameera.
Maatii, firaafi aanaa isaaniitiif “hormaataa-bultuma isinitti haa dhiifatan!” Waaqeffattoota guutuu addunyaarra jiran, kanneen biyya keessaafi biyyaan ala jiran hundumaafuu jajjabina hawwaa, ayyaantummaan isaanii nu waliin haa waaru jenna.
