Ararso Community Care Organization-ACCO

Website

Ararso Community Care Organization-ACCO � Together for a caring and empowered community.

Alxamdulilaah Maanta oo ay taariikhdu tahay 19/09/2026 G.C, Ararso Community Care Organization (ACCO) – Ururka Daryeelk...
19/09/2026

Alxamdulilaah Maanta oo ay taariikhdu tahay 19/09/2026 G.C, Ararso Community Care Organization (ACCO) – Ururka Daryeelka Bulshada Ararso, wuxuu si rasmi ah u qaybiyey agab waxbarasho oo dhammaystiran oo la gaadhsiiyey 35 arday, oo isugu jira wiilal iyo gabdho, kuwaas oo laga soo kala xulay labada dugsi ee Sheekh Nuux iyo Daryeel.

Agabka waxbarashada ee la gaarsiiyey ardayda ayaa ka koobnaa:
1. Dharka iskuulka (School Uniforms)
2. Buugaagta waxbarashada
3. Iyo Qalimaan.

Barnaamijkan waxaa loogu talagalay in lagu taageero ardayda ka soo jeeda qoysaska danyarta ah, si looga fududeeyo caqabadaha dhaqaale ee saameyn kara waxbarashadooda.

ACCO waxay aaminsan tahay in xaaladda dhaqaale aysan noqon sabab uu ilmuhu uga hadho waxbarashada, isla markaana carruur kasta ay mudan yihiin fursad ay ku bartaan kuna dhistaan mustaqbalkooda.

🤝 Munaasabadda wareejinta agabka waxbarashada waxaa goob-joog ahaa:
1.Cabdi Cabdullaahi Tashad – Madaxa Xafiiska Waxbarashada Degmada Ararso
2. Xuseen Cali Shide – Maamulaha Dugsiga Sheekh Nuux
3. Khadar Qawdhan Xasan – Maamulaha Dugsiga Daryeel.

Joogitaanka mas'uuliyiinta waxbarashada iyo maamulayaasha dugsiyadu waxay muujinaysaa muhiimadda ay leedahay iskaashiga bulshada, maamulka waxbarashada, dugsiyada iyo ururrada bulshada si loo taageero waxbarashada iyo mustaqbalka jiilka soo koraya.

ACCO waxay uga mahadcelinaysaa dhammaan qaadhaan-bixiyayaasha, xubnaha ururka, waalidiinta, macallimiinta iyo cid kasta oo gacan ka geysatay hirgelinta barnaamijkan.
Taageeradiinnu waxay suurtagelisay in maanta 35 arday ay helaan agab ka caawinaya inay waxbarashadooda si wanaagsan u sii wataan.
Waxaan rajaynaynaa in tallaabadani ay noqoto bilowga dadaallo dheeraad ah oo lagu gaadhsiinayo taageerada waxbarasho arday badan oo u baahan, maadaama ay jiraan carruur badan oo weli u baahan garab iyo fursad.

🤲 Alle ha barakeeyo dhammaan intii ka qayb qaadatay khayrkan, hana ka dhigo aqoonta ay carruurtani bartaan mid anfaca iyaga, qoysaskooda iyo bulshadooda.
📖 “Markaad taageerto waxbarashada caruurta danyarta ah , waxaad maalgelinaysaa mustaqbalka bulshada.”
💙🧡 ACCO – Where Compassion Meets Action

10/09/2026

WAXBARASHADU WAA FURHAHA MUSTAQBALKA CARRUURTEENNA

Bulshada Ararso, waalidiinta, aqoonyahanka, ganacsatada, dhalinyarada iyo dhammaan dadka daneeya mustaqbalka carruurteenna — waxaa inoo yaalla mas’uuliyad weyn.

Carruurtu waa hantida ugu qiimaha badan ee bulsho leedahay.

Haddii aan maanta siinno waxbarasho, tarbiyad iyo fursad ay ku horumaraan, berri waxay noqon karaan dhakhaatiir, kalkaaliyayaal, macallimiin, injineerro, ganacsato, hoggaamiyeyaal iyo xirfadlayaal bulshada wax weyn u qabta.

Laakiin haddii ilmaha uu gaaro da'dii waxbarashada oo aan iskuulka loo dirin, waxaa laga yaabaa inuu waayo fursad muhiim ah oo noloshiisa wax ka beddeli lahayd.

WAALIDOW, ILMAHAAGA ISKUULKA GEE

Waalid kasta waxaa saaran masuuliyad ah inuu hubiyo in carruurtiisu helaan fursadda waxbarasho.

Haddii ilmahaagu gaaray da'dii iskuulka:
✅ Iskuulka gee.
✅ Ku dhiirrigeli waxbarashada.
✅ La soco waxbarashadiisa iyo joogitaankiisa.
✅ La xiriir macallimiintiisa.
✅ U samee jawi uu wax ku barto.
✅ Bar inuu qiimeeyo aqoonta iyo macallinka.
Waxbarashada ilmaha ma aha masuuliyadda
iskuulka oo keliya; waa masuuliyad ay wadaagaan waalidka, macallinka iyo bulshada oo dhan

BULSHADA ARARSO — AAN WADAJIR U SHAQAYNO

Waxaa jira carruur badan oo jecel inay wax bartaan, laakiin qoysaskoodu aysan awoodin dhammaan kharashaadka waxbarashada.
Ilmaha danyar ah ma dooran inuu ku dhasho qoys danyar ah, mana habboona in duruuf dhaqaale ay ka hor istaagto inuu helo fursad waxbarasho.

Sidaas darteed, waxaan ugu baaqaynaa bulshada Ararso:

Aan garab istaagno ardayda danyarta ah.
Qof kasta wuxuu ka qayb qaadan karaa inta uu awoodo:
✅️ Buugaag iyo qalimaan
✅️Boorsooyin iyo agabka iskuulka
✅️ Dharka iskuulka
✅️Iyo wixii kale ee ardaygu u baahan yahay.
Taageerada aad maanta siiso hal arday waxay noqon kartaa aqoonta iyo xirfadda qof berri bulshada wax weyn u qabta.

BAAQ KU SOCDA BULSHADA ARARSO

Aan ka gudubno fikirka ah:
“Qof kale ayaa wax qaban doona.”
Aan ku beddelno:
“Aniga maxaan maanta ka qaban karaa mustaqbalka ilmahan?”

Haddii qof walba uu qaybtiisa qaato, waxaan awoodnaa inaan yareyno tirada carruurta waxbarashada ka maqnaanaysa, isla markaana aan taageerno kuwa danyarta ah.

FARIINTA UGU MUHIIMSAN
Waalidow, ilmahaaga ha u arkin waxbarashada kharash oo keliya; u arag maalgashi mustaqbal.

Bulshada Ararso, aan carruurteenna u abuurno fursad ay ku riyoodaan, ku bartaan, kuna gaaraan mustaqbalkooda.

Aan wadajir uga shaqayno sidii carruur kasta oo gaartay da'da waxbarashada loogu diri lahaa iskuulka, iyo sidii ardayda danyarta ah loo garab istaagi lahaa

W/Q Ahmed Mohamed dayib

Galabta oo ah Axad 26/7/26, Ururka Daryeelka Bulshada Araarso /Ararso Community Care Organization (ACCO), iyadoo kaashan...
26/07/2026

Galabta oo ah Axad 26/7/26, Ururka Daryeelka Bulshada Araarso /Ararso Community Care Organization (ACCO), iyadoo kaashanaysa Xafiiska Waxbarashada Degmada Ararso, waxay si rasmi ah u daahfurtay isla markaana dib-u-habayn ku samaysay Maktabadda Dadweynaha Ararso (Ararso Public Library). Tallaabadan waxay qayb ka tahay qorshaha istaraatiijiga ah ee ACCO ee lagu horumarinayo waxbarashada, kobcinta aqoonta, iyo dhiirrigelinta dhaqanka akhriska ee bulshada.

Waxaan aaminsanahay in waxbarashadu ay tahay tiirka ugu muhiimsan ee horumarka bulshada, halka maktabadduna ay tahay goob lagu kobciyo aqoonta, hal-abuurka, iyo fikirka jiilka soo koraya. Sidaa darteed, dib-u-habaynta maktabaddan waxaa looga gol leeyahay in la abuuro jawi ku habboon akhriska, cilmi-barashada , iyo waxbarashada guud ahaan.

Laga bilaabo maanta, Maktabadda Dadweynaha Ararso waxay si rasmi ah ugu furan tahay dhammaan bulshada. Ardayda, dhalinyarada, macallimiinta, iyo qof kasta oo jecel aqoonta waxaa lagu dhiirrigelinayaa inay si joogto ah uga faa’iidaystaan buugaagta iyo agabka waxbarasho ee yaalla maktabadda.

Sidoo kale, ACCO iyo Xafiiska Waxbarashada Degmada Ararso waxay ugu baaqayaan dhammaan bulshada reer Ararso—gudaha iyo dibaddaba—inay door muuqda ka qaataan horumarinta maktabadda.

Waxaan si xushmad leh uga codsanaynaa qof kasta oo awood u leh inuu ku deeqo:

* 📚 Buugaag cusub oo tayo leh.
* 💻 Qalab casri ah oo fududeeya akhriska iyo waxbarashada, sida kombiyuutarro, tablets, projector-ro, ama agab kale oo waxbarasho.
* 🪑 Qalab iyo agab lagu horumarin karo deegaanka maktabadda.

Waxaan rumaysanahay in maktabaddu ay tahay hanti ay wada leedahay bulshada oo dhan, horumarkeeduna uu ku xirnaan doono iskaashiga iyo taageerada shacabka. Deeq kasta, ha yaraato ama ha weynaato, waxay noqon kartaa maalgashi lagu dhisayo jiil aqoon leh oo mustaqbal ifaya leh.

Ugu dambayn, waxaan u mahadcelinaynaa Xafiiska Waxbarashada Degmada Ararso wada-shaqaynta iyo taageerada ay ka geysteen hirgelinta qorshahan. ACCO waxay sii wadi doontaa dadaallada lagu horumarinayo waxbarashada, awoodsiinta dhalinyarada, iyo dhismaha bulsho aqoon iyo karti ku gaadha horumar waara.

📖 “Maktabaddu waa guriga aqoonta, akhriskuna waa furaha horumarka. Bulshada wax akhrida waa bulsho horumar gaadha.”

💙🧡 ACCO – Where Compassion Meets Action

☘️🌾Warbixin Rasmi ah 💐Maanta oo ah Isniin, taariikhduna tahay 20 July 2026, Ururka Daryeelka Bulshada Araarso ama Commun...
20/07/2026

☘️🌾Warbixin Rasmi ah 💐

Maanta oo ah Isniin, taariikhduna tahay 20 July 2026, Ururka Daryeelka Bulshada Araarso ama Community Care Organization (ACCO) waxay mar kale si rasmi ah ugu wareejisay Xarunta Caafimaadka Degmada Ararso haamaha Oxygen-ta, taas oo noqonaysa wareejintii labaad ee ururku ku taageero xarunta caafimaadka.

Haamaha Oxygen-ta ee la wareejiyey waxay isugu jireen kuwa Reffer-ka ama gudbinta(Emergency/Referral Unit) iyo kuwa Bukaannada Jiifka (Inpatient Ward), si loo xoojiyo adeegyada degdegga ah iyo daryeelka bukaannada jiifka ah ee u baahan Oxygen joogto ah.

Tallaabadan waxay qayb ka tahay dadaallada joogtada ah ee ACCO ugu jirto xoojinta adeegyada caafimaadka iyo ka jawaabista baahiyaha degdegga ah ee bulshada, gaar ahaan dhinaca Oxygen-ka oo ah adeeg naf-badbaadin ah oo muhiim u ah bukaannada xaaladaha adag ku jira.
Waxaan aaminsanahay in helitaanka Oxygen ku filan uu door weyn ka ciyaaro badbaadinta nolosha bukaannada, yareynta khataraha caafimaad, iyo kor u qaadista tayada adeegyada caafimaad ee degmada.

Sidoo kale, waxaan si gaar ah oo kal iyo laab ah ugu mahadcelinaynaa Xafiiska Caafimaadka Degmada Ararso, oo naga caawiyey:
Soo qaadistii haamaha Oxygen-ta
Gaadiidka iyo fududeynta howlaha
Shidaalkii lagu fuliyey hawshan muhiimka ah
Taageerada iyo wada-shaqaynta ay muujiyeen waxay ahayd mid muhiim u ah hirgelinta hawshan, waxayna tusaale u tahay sida iskaashiga u dhexeeya hay'adaha bulshada iyo maamulka caafimaadku u horseedi karo adeeg bulsho oo wax ku ool ah.

ACCO waxay mar kale xaqiijinaysaa inay sii wadi doonto dadaallada samafalka iyo mashaariicda bulshada anfaca, iyadoo hiigsanaysa bulsho caafimaad qabta, isku duuban, oo hesha adeegyo aasaasi ah oo tayo leh.

🤲 Waxaan Alle ka baryeynaa inuu ka dhigo hawshan mid miisaanka xasanaadka ugu darsanta dhammaan intii ka qayb qaadatay, kana yeelo sabab lagu badbaadiyo naf badan.
“Marka naxariistu isu beddesho ficil, bulshada ayaa neefsata.”

💙🧡 ACCO – Where Compassion Meets Action

Asalaamu Calaykum Waraxmatullaahi Wabarakaatuh.Bulshada qiimaha badan ee Ararso,Ururka ACCO wuxuu aaminsan yahay in horu...
08/07/2026

Asalaamu Calaykum Waraxmatullaahi Wabarakaatuh.

Bulshada qiimaha badan ee Ararso,
Ururka ACCO wuxuu aaminsan yahay in horumarka dhabta ahi uu ka bilowdo wadajir, iscaawin iyo isu naxariisasho.
Bulsho kasta oo is garab istaagta waxay awood u leedahay inay ka gudubto caqabadaha, una horseeddo jiilasha soo socda mustaqbal wanaagsan.

Taageeradu ma aha oo keliya hanti la bixiyo; waa waqti, talo, dadaal iyo garab istaag. Qof kasta wuxuu bulshada ugu deeqi karaa wax uu awoodo.
Marka aynu isu naxariisanno oo aynu is taageerno:

Waxaa la caawiyaa qoysaska nugul iyo dadka danyarta ah.

Waxaa la dhiirrigeliyaa waxbarashada carruurta iyo dhallinyarada.

Waxaa la xoojiyaa nabadda, wada noolaanshaha iyo kalsoonida bulshada.

Waxaa abuurma bulsho isku duuban oo awood u leh inay xaliso dhibaatooyinkeeda.

Waxaan ugu baaqaynaa dhammaan bulshada Ararso inay qayb ka noqdaan hawlaha samafalka iyo horumarinta ee ACCO.

Taageero kasta, ha yaraato ama ha badnaato, waxay leedahay qiimo waxayna wax ka beddeli kartaa nolosha qof ama qoys u baahan gargaar.

Aan ka dhigno wadajirkeenna xooggeenna, iscaawinteennana jidka aynu ku gaarno horumar waara.
Hal-ku-dheg: "Bulsho is taageertaa waa bulsho horumarta."
Ilaahay ha barakeeyo bulshada Ararso, hana nagu guuleeyo adeegga dadka iyo horumarinta deegaanka.

By Ahmed Mohamed Dayib

📢 Warbixinta Hawlaha ACCOMaanta oo ay taariikhdu tahay 28/06/2026, Ararso Community Care Organization (ACCO) waxay si ra...
28/06/2026

📢 Warbixinta Hawlaha ACCO

Maanta oo ay taariikhdu tahay 28/06/2026, Ararso Community Care Organization (ACCO) waxay si rasmi ah u gaarsiisay qalabka loogu talagalay adeegga xabaalaha labada qabalee ee Dhigriiley iyo Magaalo-Cad, si loo xoojiyo adeegga bulshada loona fududeeyo gudashada waajibaadka aaska.

Qalabka la wareejiyey wuxuu isugu jiray:

* 14 Majarafadood (Shovels) iyo
* 10 Dongorayaal (Pickaxes)

Qabalee kastana waxaa lagu wareejiyey:

* 7 Majarafadood
* 5 Dongore

Dadaalkan wuxuu ka tarjumayaa sida ACCO uga go’an tahay inay ka jawaabto baahiyaha dhabta ah ee bulshada, iyadoo aan adeeggeedu ku koobnayn caafimaadka, waxbarashada iyo samafalka oo keliya, balse sidoo kale ay mudnaan siinayso adeegyada bulshada ee lagama maarmaanka u ah nolosha iyo waqtiyada adag.

Waxaan aaminsanahay in bulsho xooggan lagu dhiso iskaashi, isku duubni, iyo ka jawaabidda baahiyaha jira, ha yaraadaan ama ha weynaadeene. Bixinta qalabkan waxay gacan ka geysan doontaa in bulshada labada qabalee ay helaan adeeg hufan oo fududeynaya hawlaha xabaalaha marka loo baahdo.

Waxaan si kal iyo laab ah ugu mahadcelinaynaa dhammaan xubnaha, qaadhaan-bixiyeyaasha, iyo taageerayaasha ACCO ee suurageliyey hirgelinta mashruucan. Taageeradiinnu waa tiirka ay ku taagan yihiin dhammaan hawlaha samafalka ee ururku fulinayo.

ACCO waxay sii wadi doontaa hirgelinta mashaariic bulshada anfaca, iyadoo hiigsanaysa bulsho isku duuban, is-caawisa, oo horumar waara gaadha.

🤲 “Qofka dadka u adeega waa qofka bulshada ugu khayrka badan.”

Today, 28 June 2026, Ararso Community Care Organization (ACCO) successfully delivered graveyard maintenance tools to the communities of Dhigriiley and Magaalo-Cad to strengthen community services and support dignified burial practices.

The donated equipment included:

* 14 shovels
* 10 pickaxes

Each community received:(Kebele)

* 7 shovels
* 5 pickaxes

This initiative reflects ACCO’s commitment to responding to the real needs of the community. Our work extends beyond health, education, and humanitarian assistance to include essential community services that promote dignity, solidarity, and preparedness during difficult times.

We believe that strong communities are built through unity, compassion, and collective responsibility. By providing these tools, we hope to make burial services more accessible and efficient for the residents of Dhigriiley and Magaalo-Cad whenever they are needed.

We sincerely thank all ACCO members, donors, and supporters whose generosity made this initiative possible. Your contributions continue to make a meaningful difference in the lives of our communities.

ACCO remains committed to implementing impactful community-based initiatives and working towards a more united, resilient, and self-reliant society.

🤲 “The best among people are those who are most beneficial to others.”

💙🧡 ACCO – Where Compassion Meets Action

📢 OGAYSIIS OGAYSIIS Ururka Horumarinta Bulshada Degmada Ararso wuxuu bulshada la wadaagayaa bishaaro muhiim ah oo ku saa...
20/04/2026

📢 OGAYSIIS OGAYSIIS

Ururka Horumarinta Bulshada Degmada Ararso wuxuu bulshada la wadaagayaa bishaaro muhiim ah oo ku saabsan adeeg Caafimaadka Indhaha 👁️
🟢 Mustaqbal Speciality Eye Clinic ayaa magaalada Jigjiga iyo nawaaxigeeda bulshada ku nool ugu ugu bishaaraynaya inay jirto fursad qaali ah oo Ah
Qaliinka indhaha (Cataract Surgery)
Waliba lacag la’aan ah
📅 Taariikhda Diwaan galinta: 20/04/2026 ilaa 26/04/2026
Dhamaan bulshada, gaar ahaan dadka qaba dhibaatooyinka araga waxaa si gaar ah loogu baaqayaa inay ka faa’iidaystaan fursadan dahabiga ah.
📍 Goobta: Agagaarka dugsiga darawalnimada Jigjiga Ama Faarax magool school
📞 Wixii faahfaahin ah kala xiriir:
0907679268 / 0975766661

Ka faa’iidayso fursadan, una gudbi dadka kale si ay uga faa’iidaystaan Mahad sanidiin

W/Q AKM

Maanta oo ay taariikhdu tahay 12/04/2026, ururka ACCO (Ararso Community Care Organization) waxa uu si habsami leh u qabt...
12/04/2026

Maanta oo ay taariikhdu tahay 12/04/2026, ururka ACCO (Ararso Community Care Organization) waxa uu si habsami leh u qabtay olole nadaafadeed oo laga hirgeliyay qaybo kamid ah magaalada Araarso.

Ololahan ayaa ujeeddadiisu ahayd kor u qaadista bilicda iyo nadaafadda magaalada, iyada oo si gaar ah diiradda loo saaray goobaha ka qashinka si looga horttago cudurrada ka dhasha qashinka iyo wasakhda deegaanka, gaar ahaan xilli roobaadka oo ay sii kordhaan halista cudurrada la xiriira biyo wasakhaysan iyo deegaan aan nadiif ahayn.

Xubnaha ururka ACCO, oo kaashanaya dhalinyarada magaalada ayaa si wadajir ah uga qeyb qaatay fulinta hawshan muhiimka ah, iyagoo ka shaqeeyay nadiifinta goobaha dadweynaha,gubista qashinka urursan, iyo wacyigelinta bulshada oo lagu baraarujiyey muhiimadda nadaafaddu u leedahay caafimaadka iyo horumarka nolosha.

Ololahan nadaafadeed waxa uu tusaale u yahay iskaashi bulsho oo miro dhal ah, kaas oo muujinaya dareenka masuuliyadeed ee ay dhalinyada Araarso ka leedahay ilaalinta deegaanka ay ku nool yihiin.

Ururka ACCO waxa uu mar walba u taagan yahay hirgelinta iyo taageeridda hawlaha danta guud ee bulshada Araarso, isaga oo si joogto ah uga shaqeeya horumarinta adeegyada khayriga ah ee bulshada, ilaalinta deegaanka, iyo kor u qaadista wacyiga bulshada.

Ugu dambayn, ACCO waxa uu ugu baaqayaa dhammaan bulshada Araarso in ay sii xoojiyaan dadaallada nadaafadeed, isla markaana ay door firfircoon ka qaataan ilaalinta bilicda magaalada iyo badbaadinta caafimaadka guud ee bulshada qashinka geeyaan goobaha loogu talo galay.


🌧️Xilliga Roobku Waa Fursad Dahabi ah oo Lagu Gaari Karo Isku-filnaansho Cunto 🌧️Alxamdulillaah, roobku waa nimco Eebbe ...
11/04/2026

🌧️Xilliga Roobku Waa Fursad Dahabi ah oo Lagu Gaari Karo Isku-filnaansho Cunto 🌧️

Alxamdulillaah, roobku waa nimco Eebbe bixiyey—waa nolol, waa barako, waana fursad aan mar walba soo laaban. Xili roobaadku waa waqtigii ugu habboonaa ee aynu ku jeedsan lahayn beerashada iyo wax-soo-saarka dhulka, si aynu u dhisno bulsho isku filan oo ka madax bannaan baahida joogtada ah ee dibada.

Dunidu maanta waxay wajahaysaa caqabado waaweyn dagaallo, sicir-barar, iyo yaraanta sahayda cuntada, kuwaas oo si toos ah u saameynaya nolosha dad badan.

Xaaladdan waxay inoo caddeynaysaa hal xaqiiqo oo ah
👉 Bulsho aan wax soo saarin, mar walba waxay ku jirtaa halis dhaqaale iyo cunto la’aan.

🌱 Sidaas darteed, waa waajib in aynu ka faa’iidaysanno roobkan, una beddelno fursad ah
• In la qodo beeraha oo la diyaariyo dhulka
• In la beero dalagyo kala duwan sida galley, masaggo, khudaar iyo digir
• In la dhiirrigeliyo dhalinyarada inay noqdaan wax-soo-saarayaal dhulkooda ku foorarsada si ay wax ula soo baxaan.

🌾 Beerashada ma aha oo kaliya in cunto laga helo balse waa shaqo abuur, waa dhaqaale, waa sharaf iyo madax-bannaani.

Dhul kasta—even hadduu yar yahay—wuxuu noqon karaa il nololeed. Qof walba wuxuu ka bilaabi karaa meel uu awoodi karo. Waxa muhiimka ahi waa in la bilaabo maanta, oo aan la sugin berri.

🤝 Aynu mideyno dadaalkeenna, aynu iska kaashanno aqoonta iyo khibradda, si aynu u gaadhno bulsho xooggan oo isku filan.

✨ Qodo maanta, beero maanta—si aad berri u goosato barwaaqo. ✨



🌙 Ramadan Mubarak 🌙Waxaan hambalyo iyo tahniyad kal iyo laab ah u diraynaa dhammaan Muslimiinta ku nool daafaha caalamka...
17/02/2026

🌙 Ramadan Mubarak 🌙

Waxaan hambalyo iyo tahniyad kal iyo laab ah u diraynaa dhammaan Muslimiinta ku nool daafaha caalamka, gaar ahaan Ummadda Soomaaliyeed, munaasabadda bilashada bisha barakaysan ee Ramadaan.

Ramadaan waa bil naxariis, dembi dhaaf iyo barako. Waa bil qalbiyadu nadiif noqdaan, gacmuhuna isku furmaan,laguna xoojiyo cibaadada, samafalka iyo walaaltinimada.

Waxaan Alle ka baryaynaa inuu inaga dhigo kuwii ka faa’iidaysta fadliga bisha, inoona aqbalo soonka iyo salaadaha, kana dhigo Ramadaan nabad, barwaaqo iyo iscafis ku waabariisata.

🤲 Ilaahay ha inagu gaadhsiiyo dhammaadka bisha annagoo caafimaad qabna,nabad ku soonay, khayr badanna ku camal falnay.

✨ Ramadaan Kariim – Alle ha inoo barakeeyo. ✨

Address

Jijiga

Website

Alerts

Be the first to know and let us send you an email when Ararso Community Care Organization-ACCO posts news and promotions. Your email address will not be used for any other purpose, and you can unsubscribe at any time.

Shortcuts

Share

Category