08/04/2026
Aanaa Diiduutti namoota balaa roobaatiin miidhamaniif deeggarsi gosa garaagaraa qarshii kuma 500 olitti tilmaamamu taasifame.
===
Bitootessa 29/2018 (KGIAB)Godina Iluu Abbaa Booritti Waldaan Qaxxaamura Diimaa damee godinichaa Aanaa Diiduutti namoota balaa roobaa fi qilleensaan miidhamaniif deeggarsa gosa garaagaraa qarshii kuma 500fi kuma 47 olitti tilmaamamu taasise.
Aanichatti rooba cimaa bubbee makatee roobeen hawaasa miidhaan irra qaqqabeef waldaan qaxxaamura diimaa damee godina Iluu Abbaa Boor bulchiinsa godinichaa waliin magaalaa Laalootti argamuun deeggarsa kana qaamolee miidhamaniif kenneera.
Itti gaafatamtuun ijaarsa Paartii Badhaadhinaa damee godina Iluu Abbaa Boor Aadde Mitikkee Leggesee deeggarsa kennamee ilaalchisuun yaada kennaniin, deeggarsi taasifame galateffatanii; aadaafi duudhaa gaarii hawaasni keenya ittiin waldeeggaruu qabun qaamolee miidhaman bira dhaabbachuun murteessaadha jedhan.
Itti gaafatamaan Waldaa Qaxxaamura Diimaa godina Iluu Abbaa Boor Obbo Fayyisaa Abduu gama isaaniin deeggarsi kun hawaasa balaa uumamaan miidhaman kana dandamachiisuu fi namoota balaa cimaan irra gahee baraaruuf kan kaayyeffatee ta'uu himanii deeggarsi taasifame meeshaalee Qorqorroo, Jibbaa fi Uffata halkanii tilmaama qarshii kuma 500fi kuma 47 ol taasifamu himaniiru.
Namoonni deeggarsi taasifameef tokko tokkos deeggarsa waldaan qaxxaamura diimaa godina Iluu Abbaa Boor taasiseef galateeffachuun ammayyuu qaamoleen biroo deeggarsi barbaachisuun waan jiraniif isaan biras qaamoleen kaan akka dhaabbatan gaafataniiru.
