12/10/2026
የጤና፣ ልማትና ፀረ-ወባ ማኅበር 28ኛ መደበኛ ጠቅላላ ጉባዔ በባህር ዳር ተካሄደ ።
ባህር ዳር — መስከረም 30 ቀን 2019 ዓ.ም.
የጤና፣ ልማትና ፀረ ወባ ማኅበር 28ኛ መደበኛ ጠቅላላ ጉባዔውን በአማራ ብሔራዊ ክልላዊ መንግሥት (አብክመ) ጤና ቢሮ የስብሰባ አዳራሽ በድምቀት አካሄደ።
በጉባዔው የመክፈቻ ሥነ-ሥርዓት ላይ የተገኙት የአማራ ክልል ጤና ቢሮ ምክትል ኃላፊ አቶ መልካሙ ጌትነት፣ ማኅበሩ በክልሉ የጤና፣ የልማትና የበጎ አድራጎት ሥራዎች ላይ እያበረከተ ያለው አስተዋጽኦ ከፍተኛ መሆኑን ገልጸዋል።
የማኅበሩ ዋና ዳይሬክተር ክቡር ዶክተር አበረ ምሕረቴ የ2018 በጀት ዓመት የሥራ አፈጻጸም ሪፖርት አቅርበዋል። በሪፖርቱ ተቋማዊ አቅም ግንባታን፣ አጋርነትን፣ አባላት ማበራከትን እና የገቢ ማጠናከር ሥራዎች በሰፊው ተዳሰዋል። በወባ መከላከልና ቁጥጥር፣ በስነ-ተዋልዶና ጾታዊ ጥቃት መከላከል፣ እንዲሁም በትንባሆ ቁጥጥር ላይ የተሠሩ ሥራዎች ተነስተዋል። በተለይም በክልሉ በነበረው የጸጥታ ችግር ምክንያት መድኃኒት ወደ ጤና ተቋማት ለማድረስ የተፈጠረውን እንቅፋት ለመቅረፍ ከክልሉ ጤና ቢሮ ጋር በመተባበር ለወረዳ ጤና ተቋማት የተደረገው የመድኃኒት አቅርቦት ድጋፍ እንደ ዋና ስኬት ተጠቅሷል።
የቀረቡት የ2018 በጀት ዓመት የክንውን ሪፖርት እና የሒሣብ ምርመራ (ኦዲት) ሪፖርት በጉባዔው አባላት በሙሉ ድምፅ ጸድቀዋል። በተጨማሪም የማኅበሩ መተዳደሪያ ደንብ ማሻሻያ እና የ2019 በጀት ዓመት ዕቅድ በሰፊው ተወያይተውበት በሙሉ ድምፅ ጸድቀዋል። በመጨረሻም የማኅበሩ የጋራ መዝሙር ለታዳሚው ቀርቦ ጸድቋል።
በስብሰባው ማጠናቀቂያ ላይ ለማኅበሩ ሥራዎች መቃናት ከፍተኛ አስተዋጽኦ ላበረከቱ አጋር አካላት፣ ለወረዳ እና ለክላስተር አስተባባሪዎች የምስክር ወረቀትና እውቅና ተሰጧል። ከክላስተሮች መካከል ከፍተኛ አፈጻጸም በማሳየት ከ1ኛ እስከ 3ኛ የወጡት፡-
አቶ ግዛቸው ባይሌ — ደቡብ ጎንደር ክላስተር
አቶ አብጠው ከበደ — እነማይ ክላስተር
አቶ አገኘሁ ሙሉነህ — አዊ ክላስተር
እንዲሁም የክልል አስተባባሪ አቶ ጋሻው ድሌ የምስክር ወረቀትና የገንዘብ ሽልማት ተበርክቷል።
በተጨማሪም የማኅበሩ ዋና ዳይሬክተር ላለፉት ዓመታት ላሳዩት ከፍተኛ ትጋት እና ድጋፍ ለማኅበሩ ሠራተኞች፣ ለአጋር አካላት እንዲሁም ለመላው የማኅበሩ አባላት የላቀ ምስጋናቸውን አቅርበዋል።
ይህንን 28ኛ መደበኛ ጠቅላላ ጉባዔ በአማራ ክልል ቦርድ ሰብሳቢ አቶ ሙሉጌታ አለማየሁ እና በጸሐፊ ወ/ሮ አስካለ አድማሱ መሪነት የተካሔደ ሲሆን፤ በወረዳና በማስተባበሪያ ጽሕፈት ቤቶች በኩል 456,000 የማኅበሩን አባላት ወክለው የተገኙ በርካታ ተሳታፊዎች ታድመውበታል። ጉባዔው የማኅበሩን መዋቅራዊ አቅም ማጠናከር፣ ገጽታ ግንባታ እና ገቢን ማሳደግ ላይ ያተኮሩ ማጠቃለያዎችን በማስቀመጥ በስኬት ተጠናቋል።
