22/07/2025
Mooraa Siyaasaa Oromoo ijaaruu dhiisuun dhuunfaanis ta'ee murna murnaan humnoota siyaasaa kaabaa waliin qofaatti hidhata tolfachuuf yaaliin taasifamu uummata Oromootti balaa guddaa fidaa jedhan rogeeyyiin miidiyaa hawaasaa.
Rogeeyyiin miidiyaa hawaasaa yaada isaanii kennan, ofii otoo humna gitaa hin ijaarratin adeemsi humnoota kaabaa waliin gamtaa tolfachuu uummata Oromoo cunqursaa irraa cunqursaatti dabarsuun ala bilisummaa kan gonfachiisu akka hin taane himan.
Humna makaanaayzidii ijaarratee fi waraana Armii garaagaraan gurmeeffate, ajajoota waraanaa olaanoo biyyattii warra turaniin hoogganamuun socho'u akkasumas humna jaarraa tokkoo oliif Oromoo cunqursee ammas uummata Oromoo cunqursaa bulchiinsa Abiy Ahmad jala jiruun “Baala Gizee” jedhu waliin harka duwwaa yookii immoo humna sanaan gitu otoo hin qabaatin gamtaa tolchuun tarkaanfii tarsimaawaa miti jedhu.
Maliif jennaan jedhu, otuma bulchiinsi Abiy Ahmad aangoo irraa bu'eeyyuu warra kana waliin aangoo bifa haqa qabeessaan qooddachuun waan yaadamuu miti jedhu.
Waan humnoonni Kaabaa jaarraa tokkoo oliif uummata Oromoo godhan dagachuun gatii guddaa uummata kan kafalchiisu ta'uu rogeeyyiin miidiyaa hawaasaa himan.
Mooraan siyaasaa Oromoo haalli itti jiru yaaddessaadha kan jedhan warri yaada isaanii kennan, kaan mootummaa deeggara, kan mootummaa deeggaru gartuulee siyaasaa Oromoo biraa akka diinaatti ilaala, kaan mootummaa morma garuu qabsoo hidhannoos ni morma, kaan qabsoo hidhannootti amana, kan qabsoo hidhannoo deeggaru qabsoo karaa nagaa hadheeffatee morma, akka kanaan humni Oromoo bittinnaa'ee uummata balaaf saaxilee jedhu.
Faallaa kanaa mootummaan Eertiraa humnoota kaabaa tumsa, kaayyoon humnoota kaabaa immoo mootummaa federaalaa deebisanii qabachuu dha kan jedhan warri yaada kennan, Oromoon tumsaa fi sochii siyaasaa taaktikaa qofa qabachuu akka hin qabne himu.
Mooraan qabsoo Oromoo sochii siyaasaa tarsimaawaa qabaachuu qaba, kun mooraa qabsoo Oromoo itichuu irraa jalqabuu qabaa jedhu.
Mooraa siyaasaa Oromoo tokkomsanii itichuu fi humna gitaa dantaa uummata Oromoo haaluma kam keessattuu tiksu ijaaruu akka feesisu himu.
Kana gochuuf immoo gartuuleen siyaasaa Oromoo marti kan mootummaa keessa jirus ta'ee mootummaa mormaa jiru saffisaan marii haqaa fi dhugaatti gadi taa'uun uummata kana baraaruu akka qaban hubachiisaniiru.
Walmorkii, xiiqii fi waldiineffachuu humnoota siyaasaa Oromootiin balaan kan ammaa caalu uummata Oromootti akka hin dhufne jechuun akeekkachiisu.
Mootummaan qabsoo ilmaan Oromootiin aangoo qabate humnoota siyaasaa Oromoo ofirraa dhiibuu caalaa firoomfachuu, marii haqa qabeessaa fi hunda mo'ataa godhu waliin taasisuu akka qabu kan hubachiisan warri yaada kennan, balaa dhufu malu qolachuun kan danda'amuyyuu humna Oromoo yoo tokkoomfatee dha jedhu.
Marii fi waliigalteen humna Oromoo mootummaa keessa jiruu fi mootummaa mormu giddutti taasifamu kan yeroo muddama mootummaa taasifamee yeroo muddamni qabbanaa'u diigamu ta'uu akka hin qabnes hubachiisan.
Kun walamantaa guutuutti dhabamsiisuu akka danda'u rogeeyyiin miidiyaa hawaasaa akeekkachiisan.
