23/03/2026
CONFERENCIA: "A xeoloxía mariña: unha exploración dos fondos oceánicos de Galicia"
Nesta conferencia imos descubrir o océano fronte á costa de Galicia, un territorio pouco coñecido pero extraordinariamente complexo e diverso. O seu relevo e materiais xeolóxicos non son uniformes; atopamos plataformas continentais ata canóns profundos, montes submarinos e acantilados. Esta diversidade non é accidental: cada unha destas formas é o resultado de procesos xeolóxicos que actuaron durante millóns de anos. A interacción da tectónica, da erosión e da sedimentación modelou esta paisaxe submarina, deixando un rexistro natural da historia xeolóxica.
A xeoloxía mariña é a disciplina que nos permite estudar estas estruturas submarinas e comprender tanto a súa orixe como a súa evolución. A través de técnicas avanzadas, como a batimetría multifeixe, o sonar de barrido lateral, a sísmica de reflexión ou a toma de testemuñas sedimentarias, pódese “ler” o fondo do océano case como un libro de historia.
Explorar o fondo oceánico galego non é só un exercicio académico. O seu estudo ten importantes implicacións científicas, ambientais e sociais. Desde o punto de vista científico, axúdanos a comprender procesos xeolóxicos fundamentais na evolución da marxe continental de Galicia. Ambientalmente permite identificar hábitats mariños sensibles e ecosistemas que requiren protección, así como estudar cambios climáticos do pasado. Ademais, coñecer o relevo e os sedimentos do fondo oceánico é crucial para unha adecuada ordenación do espazo marítimo.
Nesta charla abordarase que é a xeoloxía mariña, como se leva a cabo a exploración do fondo oceánico galego mediante diversas tecnoloxías e cales son os achados máis relevantes ata a data. Tamén discutirase por que este coñecemento non só enriquece á comprensión científica, senón que tamén ten un impacto directo na conservación do medio mariño. Ao final, evidenciarase que o fondo do océano é un arquivo dinámico que reflicte a historia do noso planeta e cuxa protección e estudo son fundamentais para o futuro.
Convidámoste á conferencia “A xeoloxía mariña: unha exploración dos fondos oceánicos de Galicia” para descubrir, da man do doutor en xeoloxía mariña, Ángel Enrique López Pérez, un territorio submarino de cantís, canóns e montes, e aprender como a súa historia xeolóxica é clave para a súa conservación.
Será o vindeiro 27 de marzo ás 19:30, baixo o patrocinio da Deputación da Coruña, no Auditorio do Museo de Historia Natural de Ferrol.
