25/05/2026
فيه فرق بين نائب بيستنى الطلب يوصله…
ونائب تانى أول ما يشوف المشكلة يبدأ يتحرك بنفسه 👌
من حوالي ٣ أسابيع كنا عرضنا هنا على الصفحة مشكلة الطرق والمداخل في قرية صا الحجر
واتكلمنا عن معاناة الأهالي مع:
• استكمال رصف المدخل الرئيسي للبلد
• مدخل صالحجر التاني «طريق الكوبري الجديد»
• خطورة طريق جسر النيل واحتياجه للتوسعة ورفع الكفاءة
وقتها كنا بنوجّه الكلام أساسًا للنائبة هبة فسيخ بحكم لقاءها المرتقب مع السيد وزير النقل…
بصراحة أنا معرفش إذا كانت النائبة هبه فسيخ اتحركت على المشكلة ولا لا .
لكن اللي يستحق التقدير فعلًا :
النائبة أمال عبدالحميد Amal Abdelhamid وفريق عملها ما استنوش حد يقدملهم طلب رسمي
ولا قالوا “لما حد يكلّمنا”…
بالعكس
بمجرد ما المشكلة اتعرضت على الصفحة
تم التحرك مباشرة وتقديم ٣ طلبات للسيد محافظ الغربية بخصوص:
🔸 استكمال الرصف المتوقف للمدخل الرئيسي لصا الحجر + استكمال رصف باقي المدخل بإجمالى ١ كيلومتر
🔸 رصف مدخل صالحجر الثاني «طريق الكوبري الجديد» بطول ١ كيلومتر
🔸 رفع كفاءة وتوسيع طريق جسر النيل من ورشة الطوب للقضابة بطول ٥ كيلومتر
👈الطلبات اتأشر عليها بالفعل من السيد المحافظ بتكليف رئيس مركز ومدينة بسيون والجهات المختصة بسرعة المعاينة واتخاذ الإجراءات اللازمه طبقاً للقانون وعند توفر الاعتماد المالى والعرض
التأشيرة دى تعتبر إيجابية في حد ذاتها لكنها مش قرار تنفيذ مباشر
معناها بإختصار
“شوفوا الموضوع ولو ينفع فنيًا وفيه فلوس أو إمكانية إدراجه ارفعوا لنا الموقف لاستكمال القرار.”
النائبة كمان وعدت بمتابعة الطلبات دى حتى الانتهاء من المشكلة تماماً
🖐️ أنا مش واقف عند التأشيرة قد ما واقف عند الموقف نفسه
لأنه الحقيقة بيوضح قد إيه فيه متابعة حقيقية
وفريق شغال - بذكاء- وبعين مفتوحة على مشاكل الناس حتى بدون طلب مباشر.
كل الشكر والتقدير للنائبة/ آمال عبد الحميد
ولفريق عملها على سرعة الاستجابة والتحرك الإيجابي المحترم
مع خالص الأمنيات بحل المشكلة فى أسرع وقت
