18/10/2026
نصائح العمر الأربعين
علمتني الدنيا في الحبة دول
١- محدش بيفضل على حاله ، الناس بتتغير ، والمشاعر بتتغير وبتتحول . واللي معاك النهاردة مش هيبقى معاك طول العمر ومش هي dedicate حياته علشانك.. فمتستعيلش وتقبل ده لإنك زيك زيهم .. هما مش غلطانين هما egocentrice زيك بالظبط ..
٢- محدش بيفلت بفعلته وكل حاجة ليها شهود.. لو فاكر إن محدش شافك ومحدش هياخد باله ، فجهازك العصبي هيبقى شاهد عليك مستحيل تقدر تهرب منه .. وهياخد حق الآخر منك ومن اخفاقك ومن تعبك ومن تغييرك .. اتباعك للقواعد والقيم ده مش علشان تكون متوافق اجتماعيا ده علشان يقويك وجدانيا .. زي مانت بتلعب رياضة علشان تقوي جسمك ، وزي مانت بتروح للايف كوتش علشان تقوي عقلك ، فانت رياضتك الوجدانية هو انك تتأكد ان جهازك العصبي مش لاوي دراعك ..
٣- محدش بيعرف يسامح حد لما يقرر "يسامحه" المسامحة بتحصل لو انت فعلا عندك قدرة على مسامحة "نفسك" .. فسامح نفسك ، هتقدر تسامح العالم وغضبك من العالم هو في عمقه غضب عميق تجاه نفسك ولوم ذات انت متجنب تعترف بيه.
٤- احنا مولودين عارفين كل حاجة ونقدر نعملها ، عملية التدريب والتعلم اللي بنمشي فيهم طول حياتنا هما مجرد واجهة صورية علشان نرضي قوانين "الواقعية" .. خد السباحة على سبيل المثال .. انت مولود عندك قدرة استثنائية في انك تطفو وتتعامل مع المية .. ده جزء من تكوينك .. أي حاجة بعد كده هي عبارة عن معتقداتك .. في اللحظة اللي بتحس فيها وكإن المية بتبلعك ، هي لحظة انت فيها بتقرر لاشعوريا انك تغرق .. البحر صعب يغرقك مهما حاول بس يمكن تكون انت اللي بتعمل في نفسك كده وده شغل معتقدات.
٥- محدش عاجز عن طلب الرزق .. وكل نقص في أي شخص بيتخلق قصادة قوة توازنه .. زي الكفيف لما حاسة السمع عنده بتقوى ، كل إنسان حتى لو كان صحيح ومعافى ، نقطة قوته هي مراية بتعكس أهم نقاط ضعفه اللي هو يمكن ميكونش عارف عنها حاجة .. اللي مبيمشيش على رجله هتلاقيه شاطر في استخدام ايده في الشغل، العاجز كليا هتلاقي ادراكه قوي وذكاءه عالي . حتى الشخص اللي في ال vegetative state هتلاقي عنده حاجة تميزه تخليه يقدر يعيش .. هتعيش يعني هتعيش .
٦- متجريش .. اتنفس ، لن تبلغ الجبال طولا .. الفشخرة الحقيقية هي فشخرة التجارب ، مش شنطة Jane Birkin . فاعمل قايمة فيها كل وأهم التجارب اللي انت عايز تعملها في حياتك .. مش لازم تعملهم كلهم بس اكتب كتير .. اعمل اللي تقدر عليه ، ديه أفضل حاجة ممكن تديها لنفسك ..
٧- فيه ناس ممكن تموت وتتعذب بسبب كلمة انت قولتها وانت واخد بالك أو مش واخد بالك .. انا عارف انك تقدر تقول كلام يخلي اللي قدامك يتهته بس ده مش هيخليك أحسن منه ده هيخليك مجرم مش أكتر .. فتحسس مشاعر الناس ولو حد ضايقك بكلامه قوله انك اتضايقت وخليك حازم مش تردهاله . خليك أحسن منه. لإن رد فعلك ده هو اللي هتفتكره وهتعيش بيه .
إنت بقى الدنيا علمتك ايه ؟