06/08/2025
إنت متخيل إن البلاستيك اللي رميته في البحر تخلصت منه للابد؟
الحقيقة إنه بدأ حياة جديدة.. حياة بتعكنن على اللي جاي بعدنا بتبدأ من
1. موت الكائنات البحرية:
الأسماك، السلاحف، الدلافين، والطيور البحرية ممكن تبلع أكياس بلاستيك أو قطع مخلفات ظنا إنها أكل... وده بيخنقهم أو يسد جهازهم الهضمي
2. تلويث السلسلة الغذائية:
الميكروبلاستيك (جزيئات صغيرة ناتجة عن تفكك البلاستيك في البحر) بيتاكل من كائنات صغيرة جدًا، اللي بعد كده بيأكلها السمك، والسمك بنأكله إحنا. يعني البلاستيك بيدخل جسمك من غير ما تحس.
3. تدمير الشعب المرجانية:
الزبالة، خصوصًا البلاستيك، بتتعلق بالشعاب المرجانية وبتخنقها أو بتمنع عنها الشمس، وده بيؤدي لموتها — والشعب المرجانية مش ديكور، دي الأساس لنظام بيئي بحري ضخم، وهنتكلم عنها بشكل مفصّل أكتر في بوست قريب.
4. خسائر اقتصادية:
الصيادين بيخسروا شغلهم لما يقل عدد الأسماك أو تتلوث.
السياحة بتنهار في المناطق اللي شواطئها ملوثة.
تكاليف التنظيف بيدفعها الدولة = من فلوسك!
5. الأمراض:
المياه الملوثة ممكن تنقل أمراض للبشر، خصوصًا اللي بيعوموا فيها أو بيشربوا منها، أو حتى بيأكلوا أكل طالع منها.
6. فقدان جمال الطبيعة:
إنت بتحب تنزل البحر تلاقيه مليان أكياس ومخلفات؟ طبعًا لا... الطبيعة بتتحول لمقلب زبالة.
لو بتحب البحر... حافظ عليه.
لو شُفت حد بيرمي زبالة فيه، قوله: "انت برتكتب جريمة بيئية".
الاستدامة مش رفاهية، دي نجاة.
وأي تصرف بسيط ليك، بيخلق موجة كبيرة حوالين العالم. 🌍
شارك البوست، وابدأ بنفسك ومتسيبش وراك حاجة في البحر✊🌱
![(قُلْ بِفَضْلِ اللَّهِ وَبِرَحْمَتِهِ فَبِذَلِكَ فَلْيَفْرَحُوا هُوَ خَيْرٌ مِّمَّا يَجْمَعُونَ).[٢]عيد أضحى مبارك ينعاد...](https://img5.ngos1.com/251/424/122159422412514248.jpg)
