20/10/2024
الزيادة اللي حصلت في أسعار الوقود في مصر بقت عبء كبير علينا كلنا، لكن اللي مزعج أكتر هو إن بعض الإعلاميين بيحاولوا يضللوا الناس بمقارنات غير عادلة!
بيقولوا إن الوقود في مصر لسه أرخص من أوروبا، لكن فين مقارنة مستوى الدخل؟
خلينا نتكلم بالأرقام: الحد الأدنى للأجور في مصر دلوقتي حوالي 6000 جنيه، ومع سعر الدولار اللي وصل لحوالي 49 جنيه، ده يعني تقريبًا 120 دولار شهريًا. في المقابل، الحد الأدنى للأجور في دول زي ألمانيا أو فرنسا حوالي 1700 يورو (يعني حوالي 83,000 جنيه مصري)! الفرق هنا مرعب. المواطن الأوروبي بيدفع سعر أعلى على الوقود، لكن دخله يسمح له يتحمل التكلفة دي بدون ما يشعر بالضغط اللي إحنا بنحس بيه.
أما المواطن المصري اللي دخله محدود جدًا مقارنةً بالمواطن الأوروبي، فزيادة أسعار الوقود بتشكل عبء رهيب على حياته اليومية.
والإعلام وعلاميين السامسونج بدل ما يقول الحقيقة ويعرض الصورة كاملة، بيحاول يلمع الوضع ويبرر القرارات بشكل مضلل وللاسف التضليل ده بيضر البلد كلها، لأن إخفاء الواقع أو تزييفه مش هيحل أي مشكلة.
الإعلام المفروض يكون صوت المواطن، مش مجرد أداة لتبرير القرارات أو تغطية على الأزمات اللي بتزيد يوم بعد يوم.
التلاعب بالمعلومات ومحاولة التخفيف من حدة المشكلة بإنكار الواقع بيخلي الأمور أسوأ.
لازم نطالب بسياسات اقتصادية تحقق توازن حقيقي بين الأسعار ومستوى دخل المواطن، علشان نقدر نعيش بكرامة بدل ما نعيش في وهم مقارنات مضللة بيحاول الإعلام يفرضها علينا.
