Ahmed Gadoo

16/12/2025

25/09/2025

عمرك سألت نفسك ايه هي أكتر الاماكن رعب وغموض حوالين العالم ، في المقال ده والمقالات الجايا هنعمل سلسله عن الأماكن المرعبه حوالين العالم ، وصدقني وانت بتقرأ هتكتشف فعلا أن الاماكن دي فعلا غريبه ومرعبه جدآ.

كوباية القهوه باللبن اللذيذه بتاعتك وتعالي ياصديقي سوا نكتشف رعب وغموض أكثر الأماكن المرعبه في العالم..

متنساش لو خلصت المقال ده وعرفت معلومه جديده او حتي مكانتش جديده بالنسبه ليك ، ياريت تعمل شير ولايك وكومنت لأنهم فعلا بيساعدو علي انتشار القصص والمقالات ، دمتم سند وعيله 💛🙏

24/09/2025

النزهه الجديده.. شارع محمد رفعت
الثلاثاء 9/23
07:45مساء

جتلي الرساله دي علي الواتس اب من رقم معرفهوش .. طلب مني ابعتله البرنامج الي بيعدل الصور .

الفتره الاخيره انتشر ترند تعديل الصورة ودمجها بطريقه سهله .. وانا بحكم شغلي وكده فكرت في طريقه ابلكيشن بيعدل الصور ويمسح ويضيف بدون مايبان علي الصورة انها ملعوب فيها . وده طبعا بحكم شغلي ودراستي
أنا احمد حسان طالب في نظم ومعلومات ودايما الاول علي دفعتي ، عايش في شقة اهلي في النزهه الجديده لوحدي ، حياتي روتينية معظمها دراسه وتجارب ومليش أصحاب كتير يمكن اتنين تلاته بالعدد ، السنه دي اخر سنه ليا وكان مطلوب مشروع تخرج جديد بفكره جديده ، والحمد لله قدرت اوصل للفكره وكان الفضل في اني اوصل الفكره بعد ربنا هو الترند الجديد ، بدأت اشتغل علي اكواد الابلكيشن وواحده واحده وصلت للفكره كامله وبدأت تتنفذ وملامحها تبان ، من فرحتي بالنتيجه نزلت الموضوع عندي علي الفيس بوك ، لاقيت رد فعل كبير اووي وناس كتير بتكلمني وناس كتير طالبه يقابلوني عشان نتكلم عن الابلكيشن بتاعي ، خاصة أنه ابلكيشن مميز وفكرته جديده وفي مميزات مش موجوده في برامج كتير اووي ، بس في يوم لقيت رساله مبعوتالي علي الواتس اب مضمونها أن في حد عايز مني الابلكيشن ، وطبعا ده صعب جدا لانه في فترة اختبار ولسه مبقاش جاهز بصورة كامله ، وكمان حتي لو جاهز لازم اتعاقد مع شركه الاول هي الي تقوم بكافة الإجراءات ، وكان ده حديثي معاه

- أنا اسف ممكن تبعتلي برنامج تعديل الصور
ـ ازيك اخبارك ايه .. بص هو ده صعب جدا ومينفعش لأن لسه الابلكيشن في فترة اختبار وكمان ده ريسك عليا اني ابعته لحد .. بس هتفق معاك اتفاق هبعتلك نسخه بتشتغل يوم واحد بس ، ممكن تجربها وتقولي ايه رايك ويبقي فايده ليك وفايده ليا اني شفت رد فعل الابلكيشن
وفعلا بعتله نسخه مؤقته تنتهي بعد 24ساعه وقفلت الواتس اب ورجعت كملت شغلي ، وعدي يوم ورا يوم ونسيت اتواصل معاه ، فا بعتله عشان اعرف عمل ايه وايه رأيه في الابلكيشن ، ردت عليا والدته وقالتلي أنه بقاله فتره مش موجود وبيدورو عليه ومش لاقينه ، أنا استغربت يعني ايه بيدورو عليه ومش لاقينه حسيت أن شكله هو الي بيرد عليا وبيحور فا قفلت معاه وكده كده الابلكيشن اصلا كان مدته يوم ومش هيعرف يفتحه تاني ، مسكت اللاب توب وبدأت اكمل شغلي علي الابلكيشن وكان من ضمن مميزاته أنه ممكن يعدل الصوره ويشيل منها أشخاص بدون مايبان أو يسيب أثر ، جبت صورة جودتها قليله أنا ومازن صاحبي وبدأت اعدل فيها وضيفت شوية حاجات كده والصورة طلعت في الاخر شكلها حلو اووي ، فرحت اوي بنتيجة الابلكيشن وحسيت بنجاح أن الموضوع هيكمل علي خير ، فضلت شغال علي الابلكيشن اكتر من خمس ساعات ومن التعب سقطت ونمت علي نفسي ، صحيت تاني يوم علي تليفوني بيرن

-الو .. ايوه مين
_ ازيك ياهندسه اخبارك ايه
-الحمد لله ياحاج وحشتني جدا والله والحاجه عامله ايه ومازن ومياده عاملين ايه ؟!
_مش بخير يابني الحقني في كارثه
-ايه بس لا اله الا الله في ايه ياحاج
_ مازن مش لاقينه .. اتعشا معانا امبارح ودخل ينام علي سريره أمه دخلت عليه الصبح تصحيه للشغل ملقتهوش يابني .. والغريب أن مخرجش قدامنا .. لفينا عليه الشقه ومش لاقيه معرفش ايه الي حصل ده
-انا استغربت من الي هو بيقوله يعني ايه اختفي فجاءه كده ، لبست هدومي ورحتلهم الشقه وفضلنا قاعدين كلنا مش فاهمين حاجه ، مازن كمان سايب تليفونه وسجايره ومفاتيح عربيته وكل حاجه وكلمنا أصحابه في الشغل وقالولنا انه مجاش ، موضوع غريب فعلا ، قمت لفيت في اوضة مازن شويه بحكم اني متربي معاه وكنت ليل نهار في بيته ، بس ملقتش اي دليل يعرفني هو راح فين ، مكنش في حل قدامي غير اني اشوف كاميرات العماره وفعلا نزلت اشوفه بس مازن من ساعة مارجع بليل منزلش تاني ، موضوع غريب ومعقد جدا ، كلمنا واحد صاحبنا في القسم بس قال إنه شخص بالغ ووارد يكون في أي مشوار أو مشي بمزاجه وعملنا محضر اختفاء ، جه في بالي الرساله الي كانت مبعوتالي عالواتس اب بتاعت الرقم الي طلب الابلكيشن مني وبعدها حد بعتلي قالي أنه اختفي ، طلعت تليفوني وطلعت الرقم و كلمته في التليفون ، ردت عليا ست كبيره وشرحتلي الموضوع وطلبت منها العنوان

عين شمس .. شارع ابو الفتوح عبد الله
الاربعاء 9/24
05:20 مساء
وصلت علي اللوكيشن وركنت عربيتي لحد لما وصلت للعمارة ، في البدايه كنت قلقان وخايف اووي ، بس واحده واحده الشعور ده بدأ يقل ، طلعت السلم لحد الدور التالت وطول الوقت حاسس ان في حد طالع ورايا وكل ماابص فجاءه ملاقيش حد ، قلبي اتسحب مني وحسيت جسمي كله منمل وأطراف رجلي مبقتش حاسس بيها ، كل ما اقرب اكتر للشقه احس بتعب اكتر ودوخه ، لحد لما وصلت الشقه وخبطت ، فضلت اخبط واخبط محدش بيرد ، فين وفين لقيت الباب بيفتح
ظهرتلي ست كبيرة في السن شعرها قصير وابيض اووي لابسه جلابيه وماسكه في أيدها عكاز عينيها متحكله وجسمها ضعيف وهزلان قالتلي اتفضل ادخل بصوت هادي وواطي اووي ، دخلت الشقه وانا مرعوب وحاسس أن قلبي في حد ماسكه وبيعصره ، دخلت قعدت وفضلت باصص عليها لحد ماجت قعدت ، ولسه هبدأ اتكلم معاها لقيت حد خارج من اوضه من ضمن الأوض ، قمت من مكاني من الخضه بس اكتشفت ، انها والدة الشاب الي كانت بتكلمني عالواتس اب والست الي فتحتلي الباب تبقي والدتها ، دخلت والدتها اوضتها وقعدت والدة الولد نتكلم عن الي حصل ، وعن اختفاء ابنها الي ملوش اي تفسير لحد دلوقتي ، وطلبت منها اخش اوضته يمكن اشوف اي حاجه ، واقدر الاقي خيط للموضوع ده ، بس للاسف بردو ملقتش اي دليل ، بس فجاءه سمعت زي صوت خفيف اوي بيتحرك ورايا ، صوت بينده علي بس مش واضح صوت مشوش مكتوم ومتقيد ، الغريب أن الصوت ملازمني لحد ماا طلعت من الاوضه فضلت قاعد شويه وقلتها لو وصلت لاي حاجه هبلغها ونزلت ، طول ما انا قاعد في الشقه جسمي مشدود وقلبي مقبوض اووي ، عيني مبطلتش تلف علي كل مكان في الشقه يمين وشمال ، ايدي ورجلي حاسس أنهم مش موجودين من كتر الخوف ، وحمدت ربنا اني نزلت من البيت ده
بس وانا نازل علي السلم حصلت حاجه غريبه اوي

يتبع 🤌

20/03/2025

الإستغناء من أشجع القرارت إللي الواحد ممكن ياخذها ،إن يبقى عندك القدره تستغنى عن أي حاجة تأذيك ؛ تعتزل ناس بتضغط عليك ،و تبطل تروح أماكن مش مريحه ليك ،تمنع نفسك تدخل نقاشات توجع دماغك ،حقيقةً مفيش أحسن من إن الواحد يقدر يبعد عن وجع الدماغ و يختار سلامه النفسي و راحته أول حاجه . . "

08/03/2025

ركبت سيارتي برفقة عمتي وابنتها ذات الثلاثة أعوام وبمجرد أن جلسنا داخل السيارة بدأت ابنة عمتي في الصراخ وكان هذا أمر غريب بالنسبة لطفلة هادئة مثلها .. ترجّلت عمتي من السيارة وابنتها وأنا أيضاً وحاولنا أن نعرف سبب بكاء الطفلة وعندما سألتها إقتربت من أذني وهمست لي قائلة :
" لا تضع الحزام لأنه سيتسبب في قتـ.لك كما فعل بي وبشقيقتي في السابق عندما اشتعلت سيارتنا ولم نستطع الخروج منها بسرعة بسبب هذا الحزام ..! "

07/03/2025

كان عندي تشطيب مبني كبير جدا في العين السخنه من اسبوع ، وللاسف أحد أفراد النقاشين الي شغال في المبني وقع من الدور التالت وتوفاه الله ، رحنا وقفنا في العزا بتاعه واتكلمنا مع والدته وصبرناها بكلمتين ومشينا ، بعد يومين جالي تليفون أن الموقع في تسريب في المواسير ولازم ابص عليها واجيب معايا فني سباكه يشوفها ، وصلت عند المبني لقيت في سقاله وعليها عامل شغال استغربت وطلعت فوق السطح لقيت العامل الي مات واقف شغال ، شعر جسمي كله وقف وعينيا برقت وصوتي اتكتم ومش عارف اتحرك من مكاني ، حاولت اعافر لحد لما اخير بدأت اتحرك ، بس فجاءه بصيت عليه ملقتوش وملقتش حد خالص في السطح ، نزلت علي السلم بسرعه من الخوف بس الغريب أن المبني كله مضلم وشكله فجاءه بقي مهجور ومافيهوش حد ، جريت بسرعه وانا سامع اصوات صريخ وبكا وأصوات مزعجه لحد لما وصلت عند باب الخروج شفت مرايا ولما بصيت فيها لقيت صورة العامل الي مات من اسبوع

07/03/2025

(ما لا تراه عينك)ج١

صحيت من النوم جسمي مكسر ،ودماغي مصدعه زي مايكون حد ضربني بشومه..
قمت من عالسرير وبحرك رجلي في الأرض عشان البس الشبب بس مش لاقيه..ودي حاجه غريبه جدا لاني متعود اسيبه هنا ومعتقدش أن حد دخل الأوضه عليا ولبسو
لا والاغرب أن نور الأوضه مقفول،وانا مش بحب انام في الضلمه..قمت من عالسرير اتمشيت ناحية زورار النور ودوست عليه عشان افتحه بس مافتحش،فضلت افتح واقفل فيه وبردو النور مش راضي يفتح ،لفيت ضهري وقررت أخرج من الأوضه بس لقيت حاجه غريبه اووي
طفل ملامحه غريبه ولون بشرته وجسمه اغرب وعينه واسعه بطريقه تخوف،كان واقف قودام الدولاب وفجاءه دخل جواه
انا من الرعب طلعت جري بره وفضلت ازعق وانادي بصوت عالي اوووي
لحد ما امي ردت عليا

_ايه ياحبيبي بتزعق كده ليه؟!
_الحقيني ياماما، انا..انا حاسس اني مخنوق مش قادر اتكلم وكمان بشوف حاجات غريبه
_حاجات . . .!! حاجات ايه
_مردتش علي ماما ودخلت وقفت في البلكونه..وهي دخلت ورايا وعمال تنده علي ابويا..

_ياحاج ياااسر..ياحاج ياااسر تعالي الحقني
_ايه يا ام محمد في ايه ؟!
_الحق ابنك مش عارفه ماله

ابويا مسكني من دراعي وانا واقف جمب سور البلكونه وسألني مالك مردتش عليه،في الوقت ده انا كنت شايف شئ ملامحه غريبه طاير في الهوا قودام البلكونه،بيبصلي ويضحك،وشعره طويل طااير وراه وملوش رجلين ونصه الي فوق عرريض اووي ورسمة عيونه مختلفه خالص عن عيونا ك بشر..فجاءه لقيته طار ناحيتي ودخل جوايا وعدي مني ودخل الشقه،دخلت وراه وابويا وامي عمالين ينادو عليا ،وانا مش مركز مع أي حاجه غير الشئ ده وبس ،لما دخل الشقه لقيته نزل عالارض وبيكلمني

_خايف؟!
_انت مين؟!
(ضحك ضحكة صوتها مرعب ورج المكان كله)

انا صاحبك.. متخافش
هتلاقيني ليل نهار معاك..تسمع كلامي وتطيعني
_انت عفريت صح ؟!..
اعووذ بال..(لساني اتلجم ومقدرتش استعيذ بالله وحسيت اني متكتف وقعدت اعيط واصووت)
وقعت عالارض وجسمي متكتف وشايف ابويا جمبي عالارض هو وأمي بيعيطو ومش قادر انطق ولا قادر اتكلم خالص،
فجاءه لقيته ماشي من جمبي ورايح ناحية الحمام
ابويا شالني ودخلني اوضتي وسامعه بيقول لامي الواد هيروح مننا يا أم محمد لازم نتصرف،انا في الوقت ده شايف في اوضتي كائن غريب واقف في ركن الاوضه وشايف حد تاني واقف جوا الدولاب ومطلع من عيونه نار غير كذا شئ رايح جاي في اوضتي وكلهم بيبصولي ومبتسمين ابتسامه مرعبه جدااا،معظمهم أيديهم طويله اووي ومجروره وراهم وعيونهم بتطلع نار ،وفي منهم الي شعره طووويل اووي وبيطير وفي منهم الي معندوش شعر خالص غير شكل ودنهم غريب جدا عامل زي ودن الحصان تقريبا،وكلهم رايحين جايين حواليا..
بس واحد بس الي كل شويه يتكلم معايا ،ويبصلي ويضحك

ندهت علي امي بصوت عالي عشان اقولها أن في حاجه وراها،

_ماما ..في خيال اهوو ماشي في الاوضه لالا طاير ، عمال يضحكلي وفي حاجات كتير بتطير هنا الحقوني والنبي الحقوني

ولقيت الخيال ده جاي ناحيتي بسرعه اووي وكله مطلع نار وملامحه بقت مرعبه,غمضت عيني من الخوف وبعدها بشوية صغيرين فتحتها ملقتش حاجه،انا هتجنن مش عارف ايه الي بيحصلي بالظبط،طب انا ميت مثلا ولا بحلم ،قمت من عالسرير وابويا عمال يشدني ،انا بيتهيالي شفت حاجه بره غريبه..ولما طلعت عينيا برقت وجسمي حسيت أنه متخدر..انا شايف نفسي قودامي
انا بالظبط نفس ملامحي نفس كل حاجه ،وبيشاورلي بايده ناحية أوضتي،جسمي اتنفض واترعشت،
شميت ريحه غريبه خلتني مش قادر وفضلت اكح..
اكتشفت بعد كده أن دي ريحة بخور امي بتلف بيه في الشقه ،وسمعت صوت قران امي كانت مشغلاه..
بصيت حواليا ملقتش حد..شفت ابويا قاعد جمبي،حضنته وفضلت اعيط

_الحقني يابابا..في حاجات غريبه بتحصلي والنبي الحقني انا خايف منهم جدا
_متخافش يابني متخافش كل مايظهرو اذكر الله واقرأ قرآن..
_مش بقدر..لساني بيتلجم بحس اني متكتف..انا مش عارف هما راحو فين بس اكيد راجعين تاني والنبي خليكم جمبي

وفعلا لسه بتكلم مع ابويا..حسيت أني في عالم تاني الأوضه فجاءه بقت ضلمه كلها..وبعدها بثواني لقتها كلها مولعه نار وفي كائنات كتير شكلها مرعب اووي واقفين جمبي وحواليا منهم الطويل اوووي ومنهم القصير جدا ومنهم الي طاير،من كتر الخوف مقدرتش استحمل واغمي عليا..
انا متأكد اني مش في وعي..وبالرغم من كده سامع اصوات كتير حواليا،اصوات غريبه ومش طبيعيه وفي زحمة الاصوات دي كلها سمعت صوت مختلف..
صوت فيه حنيه..فيه امان
ده صوت ابويا..ايوه صوت ابويا بيقرأ قرآن
كل الكائنات فجاءه اختفو..زي مايكون اتبخرو وانا فقت
فقت لقيت نفسي في حضني امي وبتعيط بطريقة هيستيريا
وابويا ماسك المصحف وبيقرالي قرآن..
رفعت عيني لقيته..لقيته واقف جمب باب اوضتي وقالي
انا مهما حصل مش همشي..
يتبع🤌

07/03/2025

في اخبار بتقول
الطـ.ــفلة بتاعت حـاد..ثة حمام مسجد في العاشر من رمضان، توفت من شوية!

لو ماتعرفش إللي حصل، فإمبارح انتشر فيديو لسيدة بتجري على لقمة عيشها وبتبيع في احد أسواق العاشر، وهي جالسة عالأرض وماسكه كائن (استحي أقول عليه إنسان) تحت رجلها، والشرطة جايه تستلمه.

إللي حصل، إنه السيدة دي قاعدة على فرشتها في السوق بتبيع، وبنـ.. تها ذات ال8 سنوات دي، راجعة من المدرسة ومستنية معاها، فحبت تروح الحمام، وبالفعل شاورتلها على حمام المسجد اللي قدامهم.

دخلت، وللأسف شافها ودخل وراها وحصل اللي حصل! وفوجئت السيدة بطـ. فلتها جايه عليها بـ. 🩸ها وبتبكى.. شافتها من هنا، صوتت والناس اتلمت، وعالفور مسكوه وعملوا معاه الصح، وهي قعدت عالأرض مسكاه لغاية ما الشرطة جات!

الطفلة اتحجزت في الرعاية في وضع حرج جدًا، وللأسف من شوية راحت لخالقها! بدون أدنى سبب ولا ذنب!

أتمنى الموضوع يتحول لقضية رأي عام والكل يتكلم عنها، عشان العقوبة تتضاعف.. وحقيقي من كل قلبي، أتمنى يرجعوا يذيعوا جلسات التنفيذ عشان الفرجة بتخوف! حقيقي لما بيشوف المصير، بيخاف لو في دماغه فكره مشابهة! لازم!

07/03/2025

قرأت نص يقول"كلما كتم المرء أحزانه وراكمها ، كلما تحولت تدريجياً إلى ألم جسدي، تخيلوا مدى هشاشة المرء حين يظن أن الكتمان إنتصار بينما هو بالحقيقة أكبر هزيمة قد يرتكبها بحق نفسه"

06/03/2025

عمرك سالت نفسك وفكرت في تفاصيل آخر يوم في حياة سيدنا محمد ﷺ

هات كوباية الشاي بتاعتك وطبق الحلويات الجميل وتعالي معايا في رحله صغيره ياصديقي نتكلم عن آخر يوم في حياة حبيبنا ونبينا وشفيعنا محمد ﷺ

في سنة سبعه هجريا وتقريبا قبل وفاة الرسول ﷺ ب اربع سنين دخل المسلمين معركه مع اليه**ود وسميت المعركه دي بغزوة خيبر كان فيها عدد المسلمين تقريبا الف وستمية مقاتل وعدد اليه**ود تقريبا تعدي العشر تلاف
انتصر المسلمين في الغزوة دي وفتحو خيبر..ولما المسلمين فتحو خيبر جت واحده اسمها (زينب بنت الحارس)للرسول ﷺ ومعاها معزة مطبوخه وقالتله أن دي هديه بسبب فتح المسلمين لخيبر وفعلا قبل الرسولﷺ الهديه منها وكان قاعد معاه عدد من الصحابه ولما بدأ الرسولﷺ ياكل هو والي معاه فجاءه قالهم سيبو الاكل لانه مسموم وده طبعا بعد مالرسولﷺ اكل منها حته صغيره ورجعها وبعت جاب الست الي قدمتله الهديه دي وسألها ليه عملتي كده فقالتله اول حاجه لانك قتلت قرايبي واهلي وتاني حاجه عشان اتأكد هل انت فعلا نبي ولا لا.

أمر الرسولﷺ بالعفو عن الست دي وطلب من كل الي اكل الاكل ده أنهم يعملو حجامه وفي كذا تفسير بيقول أن الرسولﷺ أقام القصاص علي الست دي بعد كده لان في كذا حد من الصحابه توفو ومنهم الي ذكر اسمه في كذا تفسير وهو (بشر بن البراء)

الرسول ﷺ كان كل سنه بيتعب من أثر السم الي دخل جسمه وكان المرض بيشتد عليه وفي السنه العاشره من الهجره حج الرسولﷺ اول واخر حجه ليه وهي حجة الوداع وخطب في الناس وقالهم خطبه طويله اووي وبعد ماخلصت خطبته نزل عليه قول الله تعالي:

ٱلْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِى وَرَضِيتُ لَكُمُ ٱلأسْلاَمَ دِيناً [المائدة:٣]

وقبل ايام قليله من وفاة الرسول ﷺ نزلت عليه اخر آيه في القرآن الكريم:
وَاتَّقُوا يَوْمًا تُرْجَعُونَ فِيهِ إِلَى اللَّهِ ۖ ثُمَّ تُوَفَّىٰ كُلُّ نَفْسٍ مَّا كَسَبَتْ وَهُمْ لَا يُظْلَمُون
سورة البقره (281)

وفي الوقت ده طلب الرسول ﷺ أنه يزور قبور شهداء أحد ولما راح علي قبور شهداء أحد قالهم السلام عليكم يا شهداء أحد انتم السابقون وإني أن شاء الله بكم لاحق وهو راجع من هناك الصحابه سمعوه بيبكي بكاء بصوت واطي وخفيف فسألوه بتبكي ليه يارسول الله قالهم.

‏أشتقت لأخواني.. فقالوله وهو احنا مش اخوانك يارسول الله رد عليهم الرسول ﷺ وقلهم لا انتو اصحابي يعني عايشين معايا وشايفني وشايفكم لكن اخواني هما الناس الي هيجو بعدي ومؤمنين بيا من غير مايشوفوني وهنا الرسول ﷺ يقصدنا احنا ويقصد اي قوم آمنو بيه من غير مايشوفوه
وقبل وفاة الرسول ﷺ بتلات ايام اشتد عليه المرض جدا ومكنش عنده القدره أنه يتحرك بين حجرات امهات المؤمنين فجمعهم كلهم واستأذنهم أنه يمرض في بيت السيدة عائشة رضي الله عنه وكلهم وافقو علي الطلب ده بس وهو جاي يقوم مقدرش يقاوم التعب ويقف ف جه سيدنا علي بن ابي طالب وسيدنا الفضل بن العباس رضي الله عنهما وسندوه مابينهم وراحو بيه علي غرفة السيده عائشه رضي الله عنها وهما خارجين الناس كلها اتجمعت في المسجد وبيسألو هو الرسول ﷺ ماله وليه شايلينه كده وبدأ المسجد يتزحم بالناس اكتر واكتر
دخل الرسول ﷺ اوضة السيده عائشه رضي الله عنها وبدأ ينزل عرق كتير اووي من كل حته لدرجة أن السيدة عائشة رضي الله عنها قالت انها اول مره تشوف حد بيعرق بالشكل ده وكانت بتمسك ايد الرسول ﷺ وتمسح بيها وشه لأن ايده ﷺ اكرم واطيب وكانت بتسمع الرسولﷺ بيقول
(لا إله إلا الله,إن للموت لسكرات)
لحد ماسمع الرسولﷺ صوت دوشه كبيره جايا من ناحية المسجد فسأل السيده عائشه رضي الله عنها وقالتله الناس بره كتير جدا وخايفين عليك فقالها الرسول ﷺ أنه عاوز اطلعلهم بس مقدرش من شدة المرض فصبو عليه سبع قرب من المايا عشان يقدر يطلعلهم وفعلا طلع الرسول ﷺ وصعد عالمنبر وقالهم انتو خايفين عليا فردو عليه وقالوله طبعا يارسول الله فقالهم الرسول ﷺ معادكم معايا مش في الدنيا معادكم معايا في الاخره عند الحوض ووالله كأني أنظر إليه من مقامي هذا وقالهم انا مش خايف عليكم من الفقر انا خايف عليكم من الدنيا تهلككم زي مااهلكت الي قبلكم وطلب منهم أنهم يهتمو بالصلاة وأنهم يستوصو بالنساء خير وقلهم أن في عبد ربنا خيرو بين الدنيا وبين ماعند الله فاختار ماعند الله ومحدش فهم قصده الا سيدنا ابو بكر الصديق رضي الله عنه ف بكي وقاله فديناك بآبائنا، فديناك بأمهاتنا، فديناك بأولادنا، وبأزواجنا، فديناك بأموالنا يارسول الله الناس في المسجد استغربت ازاي ابو بكر يقاطع الرسولﷺ وقالوله اجلس يا أبا بكر ولكن ﷺ قالهم سيبوه مافيش حد له فضل علينا الا وكافأناه به في الدنيا الا أبا بكر لم استطع مكافأته فتركت مكافأته عند الله وكل الابواب الي المسجد تسد الا باب ابو بكر لايسد أبدآ وقبل ما ينزل ﷺ من المنبر دعا للمسلمين
«أواكم الله، حفظكم الله، نصركم الله، ثبتكم الله، أيدكم الله». وكانت آخر كلمة قالها كلمة موجهة إلى الأمة من على منبره قبل نزوله قال: «أيها الناس، أقرئوا منى السلام كل من تبعنى من أمتى إلى يوم القيامة»

وبعد ماخلص ﷺ خطبته فيهم رجع علي حجرة السيدة عائشة رضي الله عنها ودخل عليه عبد الرحمن بن أبي بكر ومعاه سواك في ايده فالرسول ﷺ بص للسواك ف عرفت السيده عائشه رضي الله عنها أنه عاوزه ومش قادر يطلبه فاخدته منه ووضعته في فم الرسول ﷺولكنه ماعرفش يستخدمه من كتر التعب فخدته السيده عائشه رضي الله عنها لينته بريقها وحطتهوله في فمه تاني عشان يكون لين عليه ويعرف يستخدمه وقالت إن من فضل ربنا عليها أن اخر حاجه تدخل جوفه ﷺ هو ريقها وبعد شويه دخلت السيده فاطمه بنته ولما شافت الرسول ﷺ بالحاله دي بكت لانه كان متعود دايما لما تدخل عليه يبوسها بين عينيها فطلب منها أنها تيجي تقعد جمبه وقالها في ودنها أنه هيموت النهارده ف عيطت السيده فاطمه اكتر وبعدين ضمها ليه وقالها في ودنها تاني أنها هتكون اول الناس من ال بيته هتحصله بعد وفاته وابتسمت السيده فاطمه من الخبر ده وبعدها ﷺ طلب من كل الي في الحجره أنهم يطلعو بره وطلب من سيدنا ابي بكر الصديق رضي الله عنه أنه يقف إمام بالناس لانه مش هيقدر يكون إمام ووقت الصلاه وفعلا قام سيدنا ابو بكر الصديق إمام بالناس ووقت الصلاه قدرﷺ أنه يقوم من مكانه ويفتح باب الأوضه ويبص عليهم وهما بيصلو وكان مبسوط جداا وهو شايفهم بيصلو لانه حس بنصر وفرحه أنه وصل الرساله لأمته وكانت دي النظره الاخيره لامتهﷺ وفي وسط الصلاه لما شافوه واقف كانو هيخرجو من الصلاه من كتر فرحتهم بيه فشاورلهم بايده وقالهم خليكم مكانكم واتمو صلاتكم وبعدين دخل الأوضه تاني وطلب من السيدة عائشه تقرب منه ونام علي صدرها وبعد شوية لقيته رفع صوباعه لفوق وقال بل الرفيق الأعلى بل الرفيق الأعلى هنا قالت السيدة عائشة رضي الله عنها أن ايده ﷺ سقطت ورأسه تقلت وعرفت أنه ﷺ توفي ومكنتش عارفه تعمل ايه ففتحت باب اوضتها الي كانت بتفتح عالمسجد وقالت مات رسول الله وانفجر المسجد كله بالبكاء سيدنا علي بن ابي طالب قعد عالارض وفضل يبكي وسيدنا عثمان بن عفان الناس بقت تشيله من الأرض وتاخد بايده وسيدنا عمر بن الخطاب رفع سيفه وقال الي هيقول ان الرسول ﷺ مات هقطع رقبته وده طبعا مش قلة ايمان منه ولكن من صعوبة وقوة الصدمه ودخل سيدنا ابو بكر الصديق رضي الله عنه الأوضه وحضن الرسول ﷺ وقال واخليلاه واصفياه واحبيباه وانبياه وباسو في راسه وخرج وكلم الناس وقالهم

مَنْ كان يعبد محمداً فإن محمداً قد مات، ومن كان يعبد الله فإن الله حي لا يموت..

ماتﷺ وهو عنده ثلاثة وستون عام يوم الاتنين١٢من شهر ربيع الاول في السنه ال١١من الهجرة دُفِن في حُجرة السيّدة عائشة في المسجد النبوي الشريف

وبكدة يبق مقال الجمعه دي خلص واستنو مقال تاني لو مهتمين الجمعه الجايا باذن الله
ولو عجبك المحتوي القصصي الي بكتبه والمقالات الي هتنزل في رمضان تدعمني ب لايك و شير 🙏💛

المصادر:
تفسير ابن كثير
تفسير الطبري
تفسير القرطبي
صحيح البخاري
صحيح مسلم