14/06/2026
يا ترى إيه اللي يخلي بنت، أبوها هو السير مجدي يعقوب أشهر جراح قلب في العالم، ترفض تشتغل معاه في نفس مجاله وتختار سكة تانية خالص؟
النهارده في مبادرة لافندر، بنشارككم قصة بنت بـ ١٠٠ راجل.. البنت اللي بتعالج نص مليار إنسان:
الدكتور مجدي يعقوب عنده ٣ ولاد..
الأول أندرو، شغال طيار في كاليفورنيا.
والتانية ليزا، سكرتيرة باباها وماسكة مؤسسته الخيرية في لندن.
وآخر العنقود "صوفي".. وهي الوحيدة في ولاده اللي اختارت تدرس الطب.
لما كبرت وقررت ده، باباها ومامتها "ماريان" الألمانية رفضوا في الأول وقالولها "دي مهنة صعبة".
لكن "صوفي" صممت ومحدش قدر يغير رأيها.. والسير مجدي سابها تختار طريقها وقال: "أنا بتدخل أحياناً بالنصيحة.. لكن عمري ما فرضت رأيي على حد فيهم".
دخلت صوفي كلية الطب في لندن، وباباها كان منبهر بشغفها، لدرجة إنها كانت بتتناقش معاه بالساعات في أبحاث أكبر من سنها.
ولما جت تتخصص، اتعرض عليها جراحة القلب لكنها رفضت!
وقالتله: "حضرتك مَثَلي الأعلي وأكتر إنسان ملهم شفته في حياتي.. بس أنا مش حابة أمراض القلب.. وعايزة مسار أنجح فيه لوحدي بعيد عنك".
كان مثلها الأعلى.. بس قررت تبني أسطورتها بنفسها.
ناس كتير متعرفش إن الدكتور مجدي يعقوب عاش ظروف صعبة في بدايته، واشترى شبكة لمراته بـ ٥ دولار بس.. واستلف عشان يجيب شقة صغيرة.
و"صوفي" زي باباها، قررت تبني نفسها بنفسها وتتخصص في "الأمراض المعدية".
ليه؟ عشان دي الأمراض اللي بتضرب الفئات الضعيفة والمهمشة.
سابت لندن وراحت تساعد الناس في كينيا وتنزانيا، وحالياً مستقرة في فيتنام.
ولما زادت "حمى الضنك" وبقت كارثة، وهبت حياتها لمواجهة الفيروس ده لأنه بيهدد ٥٠٠ مليون إنسان على وجه الأرض.
وعشان كده دايماً تضحك مع باباها وتقوله: "إيه اللي بتعمله ده.. دول بس اللي بتعالجهم.. دي بنتك شغالة على نص مليار إنسان!".
صوفي متجوزة وعندها بنات، وبينزلوا مصر كل فترة.
ولما بناتها زاروا أسوان اتجننوا بالجمال اللي شافوه.. ولما لقوا الناس كل شوية ييجوا يتصوروا مع جدهم، سألوا مامتهم عن السبب.
ووقتها بس عرفوا عظمة المركز اللي جدهم عامله للغلابة، وبقوا فخورين بيه ونفسهم يكونوا جنبه.
ولما صوفي اتكلمت عن سر نجاحها قالت:
"أنا محظوظة بوجود شخص ملهم في حياتي زي مجدي يعقوب.. وماما الله يرحمها علمتني كل حاجة حلوة في الحياة".
صوفي مجدي يعقوب.. نموذج بنقدمه لكل بنت في مبادرة لا فندر.. عشان نقولها إن النجاح الحقيقي هو إنك تلاقي شغفك، وتصنعي طريقك بنفسك.
