Dogs world

09/12/2025

كان فى فيلم زمان اسمه ٣٠ يوم فى السجن
الفنان محمد رضا كان بيمثل دور حرامى غسيل و كان اسمه جنجل ابو شفطوره .
انا عندى جنجل ابو شفطوره فى البيت ، بس اللى عندى حرامى شرابات

09/12/2025

هاى يا ناس

20/09/2025

13/05/2025

المشكله اننا عندنا موروث ثقافى بيقول ان قتلهم هو الخير ، فإحنا عاوزين نصحح نظام التشغيل بتاع ادمغه البشر علشان يقدرو يستخدموه و يميزو الخير من الشر

13/05/2025

كلاب الشارع عندنا كتير اوى وبيخوفو الأطفال نعمل ايه؟
الموضوع ده بنتكلم فيه بقالنا فتره ودى الحلقات السابقه
https://m.facebook.com/story.php?story_fbid=189599082859476&id=100354081783977
كده إحنا وصلنا لأهم جزء وهو كيفيه إستئاناس كلاب الشارع.
زمان قالو مثل جميل اوى (إطعم الفم تستحى العين)،يبقى علشان نستآنسهم لازم نآكلهم وعلشان نقدر نآكلهم لازم نفهم لغتهم و ده كان موضوع الحلقات السابقه.
- دى تجربتى الشخصيه الممكن تكون إسترشاديه فى الموضوع ده.

كان فيه فى المنطقه ٥ كلاب بيجرو ورا الأطفال فى الشارع و بيهوهو على أى حد .

فى يوم حر كنت راجع من مشوار لقيت كلب منهم عطشان وعمال يلهث والجو نار طلعت البيت جبت علبه جبنه مليتها ميه ونزلتها،فى الأول كان خايف منى وخايف يقرب من الميه قمت نزلت قرفصاء (علشان اديله إحساس بالأمان،لغه جسد) وندهتله لحد لما بدا يقرب، رجعت لورا خطوتين وهو بداء يشرب ويبصلى و يهز ديله وهو رافعه ورافع ودانه (لغه الجسد عند الكلاب)سبته وطلعت.

نزلتله بليل ببواقى من اكلنا أول لما شافنى إنتبه ، لما ندهت عليه جرى عليا و هو برضو رافع ديله وودانه حطيت ليه الأكل ، قعد يأكل بس المره دى مرجعتش لورا أنا نزلت قرفصاء و قعدت أطبطب على أخر رقبته و إستنيت لحد لما يخلص أكل كررت الموضوع ده تانى يوم بس المره دى كان بالنهار،

طبعا وسط زهول من الأطفال فى الشارع و قعدو يسالونى هو مش بيعض هو مش هيخليك تعيا (تمرض)،

فهمتهم إنه حيوان اليف و مش مؤذى و إن انا كده هاخد حسنات علشان بأكله فى خلال ٣ أيام كنت بأكل أنا والأطفال القطيع كله المكون من ٥ كلاب لدرجه إن الأطفال بيشترو من مصروفهم بسكوت للكلاب ودلوقتى الأطفال دى فى الشارع بيلعبو مع الكلاب دى و الكلاب دى بتحمى الأطفال من الخطف و السرقه و بتحمى المنطقه من الحراميه و مسكو بالفعل حرامى كان بيحاول يسرق عربيه دلوقتى الكلاب دى بتجرى عليا برضو بس بيهزو ديلهم و هما منزلينه تحت و منزلين ودنهم (لغه الجسد عند الكلاب).

بعد شهر تقريبا جبت تطعيم سعار للـ٥ كلاب و طعمتهم.
خلاصه التجربه:
-الموضوع مش إنك تسيبه فى حاله ، الموضوع انك تديله الأمان وتحسسه إنك مش مصدر تهديد ليه بالعكس إنت مصدر أمان وحيآه ليه ولأسرته،
-ده واجبنا لاننا الكائنات العاقله على الوحيده على الكوكب.
-نستأنسهم و نعلم أطفالنا الرحمه وإن الكائنات دى مصدر حسنات ومن أسباب دخول الجنه.

13/05/2025

ليه إحنا معتقدين أن الإنسان أولى من الحيوانات عموما فى الحياه على أى مكان على ارض الله؟
طبعا ده اعتقاد خاطئ و هشرح الأسباب:

-ربنا سبحانه و تعالى خلق الكون فى توازن مبدع و خلق الأرض و من و ما عليها لعبادته و خلق الإنسان للعباده و ليكون خليفه له فى الارض،
(وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً ۖ قَالُوا أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ ۖ قَالَ إِنِّي أَعْلَمُ مَا لَا تَعْلَمُونَ (30))،
وحذرنا من الأمانه و من حملها (إِنَّا عَرَضْنَا الْأَمَانَةَ عَلَى السَّمَاوَاتِ وَالْأَرْضِ وَالْجِبَالِ فَأَبَيْنَ أَن يَحْمِلْنَهَا وَأَشْفَقْنَ مِنْهَا وَحَمَلَهَا الْإِنسَانُ ۖ إِنَّهُ كَانَ ظَلُومًا جَهُولًا (72))
الأمانه هى أننا نعمر الأرض و ندير الحياه عليها كوننا خلفاء لله فيها لكن بقوانينه التى سنها و خد بالك من موضوع قوانينه لان ربنا وضع لكل شئ قانون حتى المعجزات وضع ليها قانون لكن احنا لسه موصلنالهوش و هو ده الإعجاز.

-ربنا خلق كل الخلق لخدمتنا فى مهمتنا على الأرض و هى إعمارها و خلق الكائنات دى كلاً بمواصفاته التى تساعدنا فى المهمه دى فمثلا من مواصفات الحصان إنه عضلاته قويه و سريع و ظهره قوى يتحمل إن الإنسان يركب عليه، عمرك شوفت حصان ظهره إتكسر من وزن إنسان ركب عليه؟ عمرك شوفت جمل مات من العطش؟
ربنا خلق الكلب كائن إجتماعى بيحب الإنسان و بيرتبط بيه و بيفضل يعيش وسط البشر عن العيش فى أماكن منعزله.
يبقى حتى لو قتلت كل الكلاب فى المدينه هييجى غيرهم لأن دى طبيعتهم.
ربنا خلق الكلب بمواصفات خاصه كلها لخدمه الإنسان زى ( مجالسه زوى الاحتياجات الخاصة ، مجالسه كبار السن و الاطفال ، الاكتشاف المبكر للأمراض المزمنه ، البحث عن الأشخاص تحت الأنقاض ، تحسين الصحه النفسيه للأشخاض المصابين بأمراض نفسيه....) و مواصفات كتير جدا كلها موجوده فى الكلب ، كلها ربنا وضعها فيه ، كلها لخدمه الإنسان.

إذا إحنا مكلفين برعايتهم لأننا خلفاء لله فى الارض و لأننا وافقنا حمل الأمانه.

طب إيه الحل علشان نقلل من الأذى الناتج عنهم
الحل صعب و هياخد وقت و محتاج مجهود مننا كبشر و لان أى سلوك غير سوى من خلق الله و يتعارض مع فطرتها بنكون إحنا البشر السبب فيه و ده الهنتكلم عنه فى البوست القادم.

04/03/2025

ولعل ما ينجيك دائماً هى تلك الحيوانات التى اطعمتها يوما .
رمضان كريم 😍

20/01/2025

1- الكلاب مبتتعلمش التويلت من ٥٠ يوم علشان الي بيقعدو يندبو استحملمو او متجبوش كلاب🤷🏾‍♂️

2- الكلاب مش مكانها السطح🤬 حتقولي عامله جناح مكيف بفطار ٧ نجوم برضو مش مكانه والله متقنعنيش 😏

3- الكلب لما يجيله قراد وتقولي فجاء🤬 ، لا يا فندم فجاءه دي مش في القاموس انت راميه في مكان سايبه ياكل ويشرب ويعمل تويلت فيه 😥او حضرتك مش مهتم بتحصينات الحشرات ولا بتديله حاجه طارده للقراد ، اتقوا الله

4- متجيش تقولي الكلب قطع أكل وشرب واسألك سنه قد ايه شهرين او تلاته طب طعمته إيه 🤬 ؟ تقول مطعمتهوش ، طب ما انت كده حتدفع تمن التطعيم مرتين في العلاج يخرب بيت الذكاء😏 أو غالبا هتطلعه تبني أو ترميه فى الشارع😥

5- الكلب بيعض بنتي ولا ابني😲 انا اسأل سنه قد ايه ٣ شهور او شهرين🥴 ، يا سيدى ده طبيعي بيسنن مهو مقرمكمش من ودانكم يعني وشالهلكم ايه الأوفر ده 😏

6- الكلب بيعرج 🐾 مهو طبعا لازم يعرج ويبقي مشيته مش مظبوطه اصل انت من وهو جرو بتسيبوه نايم علي السيراميك والبلاط فبيجيله رطوبه وبعد كده بتتفجاؤ 😏

اخر حاجه بقي والخلاصه عمركم ابدا محتقصرو في حق كلابكم لو انتم بتحبوهم لانك لو بتحبه هتقدمله الرعايه الصح و هتقراء و تثقف نفسك عن كيفيه الاعتناء بيه و لو تعب هتجرى على دكتور و هتجيب العلاج المطلوب حتى لو هتجوع أو حتى تستلف ، أما الناس الي تقولك بيتي وعيالي أولي وهو كلب ياكل اي حاجه او ينام في اي حته احب اقولكم انكم عندكم نقص والله العظيم وربنا يعنكم علي دماغكم ويعوض الكلاب بحد حنين يتقي ربنا فيه افتكر أنه فرد من العيله اه والله بكلمك بجد هو مش لعبه ولا صنم ده روح من عند ربنا بيحس زينا اتقو الله .