Karjera

Karjera كارجرا تمكين يصنع أثر مستدام
Social • Education • Health
📲 WhatsApp: +201144565452

مؤسسة كارجرا للتنمية المستدامة بالإسكندرية
مشهرة تحت رقم 4543 لسنة 2025

🍗 ٥ إطعامات عملناهم اليومين الي فاتو .. والحكاية أكبر من مجرد وجبة! 🧡الحلو والجميل في الإطعامات المرة دي إن الفراخ كانت ...
28/08/2026

🍗 ٥ إطعامات عملناهم اليومين الي فاتو .. والحكاية أكبر من مجرد وجبة! 🧡

الحلو والجميل في الإطعامات المرة دي إن الفراخ كانت بيتي وبلدي، ودي مش مجرد كلمة بنقولها، لأن فعلًا فيه فرق كبير في الجودة والطعم، والأجمل من كده إن مصدرها كان من الستات اللي إحنا بنشتغل معاهم وبنساعدهم يبدأوا مشاريعهم وينتجوا بإيديهم. 🌱

يعني النهارده وإحنا بنقدّم وجبات لأسر محتاجة، إحنا في نفس الوقت بنشتري من ست بدأت مشروعها، وبتنتج، وبتكسب من تعب إيديها، وحاسة إن تعبها بدأ يجيب نتيجة🧡

وده بالضبط اللي بنحاول نعمله في كارجرا:
مش بس نساعد الناس وقت احتياجهم، لكن نحاول نخلق فرص حقيقية تخليهم منتجين وقادرين يعتمدوا على نفسهم.

من مشروع صغير يبدأ في بيت ست...
لفراخ بلدي تتربى بإيديها...
لوجبة توصل لأسرة محتاجة...
لدائرة كاملة من الخير والإنتاج والتنمية. 🌱🧡

إحنا مبسوطين إن كارجرا مش بتقدّم مساعدة وخلاص، لكن بتحاول تحقق تنمية مستدامة بجد.

وكل مرة بنشوف فيها واحدة من الستات اللي اشتغلنا معاهم بتنتج وتبيع وتفرح بدخلها، بنحس إننا ماشيين في الطريق الصح. 🧡
كارجرا للتنمية المستدامة
بنساعدك تبدأ... عشان تقدر تكمل بإيدك. 🧡
#كارجرا

حقك علينا🧡الأحد الجاي،مش هنجتمع بس علشان نقضي يوم حلو…إحنا بنجمع جيلين في مكان واحد، علشان كل واحد فيهم يدي للتاني حاجة ...
21/08/2026

حقك علينا🧡

الأحد الجاي،مش هنجتمع بس علشان نقضي يوم حلو…
إحنا بنجمع جيلين في مكان واحد، علشان كل واحد فيهم يدي للتاني حاجة يمكن مفيش كتاب يقدر يعلمها📚

أطفال من القرى هيقضوا يوم مع أهلنا وأجدادنا في دار المسنين، نلعب، نحكي، نضحك، نرسم، ونسمع حكايات من زمن مختلف… ونخلق بينهم مساحة فيها مودة واهتمام وونس.

"حقك علينا" مش مجرد اسم اليوم.
دي كلمة بنقولها لكل كبير عاش سنين، وادّى من عمره وحياته، ومن حقه علينا إننا نفتكره، نزوره، نسمع له، ونخليه يحس إن وجوده لسه فارق👨‍👩‍👧‍👦

وفي نفس الوقت، إحنا بنعلّم أطفالنا إن العطاء مش دايمًا فلوس، وإن الزيارة نفسها ممكن تكون صدقة، وإن دقيقة اهتمام ممكن تفضل في قلب إنسان وقت طويل🧡🧡

يمكن الأطفال يروحوا وهم فاكرين إنهم هيعملوا حاجة للجدود…
لكن الحقيقة إن كل واحد فيهم هيرجع بحاجة من عندهم.

📍 الأحد | يوم "حقك علينا"
يوم للأطفال وأهلنا من دار المسنين، تنظمه كارِجرا للتنمية المستدامة🧡🧡

لأن في حاجات بسيطة جدًا بنعملها، لكنها بتقول للإنسان:
"إنت لسه مهم… وحقك علينا."
لو تقدروا تشاركوا اليوم ده بتمن وجبه ب 120 جنيه اوحتي فاكهه او عصير يكون فريش او حاجه مش مضره هنكون ممتنين جدا لو متقدرش اعملنا شير وادعمنا
#كارجرا

17/08/2026

يوم مختلف.. وبحر ولعب كره في المياه🧡🌊

عملنا يوم للأطفال على البحر، وتواصلنا مع فريق غواصين الخير المتطوعين، واللي مشكورين بعتولنا ٣ غواصين يكونوا مع الأطفال ويأمنوا اليوم، بالإضافة لـ٣ متطوعين شباب من فريقنا، وفريق البنات، وأمهات الأطفال اللي كانوا معانا طول اليوم.

اليوم كان تحت السيطرة والتنظيم، والأجمل إن الأطفال اتبسطوا جدًا. 🥹🧡

خصوصًا إن الأيتام، وأطفال الأسر المنفصلة، والأطفال اللي ظروف أهلهم صعبة، بقوا ظروفهم كلهم زي بعض كلهم محرومين من الخروجات والفسح اللي غيرهم بيعيشها بشكل طبيعي فبقا اليوم عندنا ديما متنوع مش فئه معينه بس.

إحنا مش عايزين الطفل يحس إن ظروفه حرمتْه من طفولته.

اليوم كلفنا 150 جنيه للفرد فقط، وعايزين اليوم الجاي يكون فيه أطفال أكتر. 🧡

ولو عندكم يوم للأطفال على البحر، تواصلوا مع غواصين الخير، فريق متطوع وبيقدم المساعدة بدون مقابل.

[لينك فريق غواصين الخير
https://www.facebook.com/share/g/1D7xFa3aZq/]

مين حابب يشارك معانا في اليوم الجاي واللي معانا فيه مفاجأه ؟ 🌊🧡

11/08/2026

هبة فاروق.. مش مجرد كاتبه، دي واحدة من الناس اللي سابت أثر في كل مكان راحت له معانا. 🧡

هبة كانت معانا في قرية فلسطين مرتين، وقدمت للأطفال ورش حكي مرتين، وشاركت معانا في فرع الـ 36، وكمان سافرت معانا أسوان وشاركت في 4 إيفنتات.

وفي كل مرة كانت بتاخد معاها حاجة أكبر من مجرد ورشة أو نشاط… كانت بتاخد وقتها، حضورها، وحبها للأطفال، وترجعلنا بحكايات وذكريات جديدة.

الجميل في التطوع إنك ممكن تبدأ بمشاركة بسيطة، وبعدها تلاقي نفسك بقيت جزء من أماكن وناس وحكايات كتير.
وهبة من الناس اللي اختارت تفضل موجودة، وتشارك، وتجرب، وتسافر، وتدي من وقتها ومجهودها في كل مرة نحتاجها. 🌿

الفيديو ده جزء صغير من حاجات كتير عملتها هبة معانا، لكنه كفاية يفكرنا إن الأثر مش دايمًا بيتقاس بحجم اللي عملناه، أحيانًا بيتقاس بعدد المرات اللي اخترنا فيها نكون موجودين.

شكرًا يا هبة على كل مرة كنتِ فيها جزء من الحكاية.
وإن شاء الله لسه في حكايات كتير جاية🧡
#كارجرا

🌴 هل تتخيل إن نخلة واحدة ممكن تكون صدقة جارية لسنين طويلة توصل ل 100 سنه ؟إحنا بدأنا حلم جديد... مشروع لزراعة 58 نخلة، ت...
07/08/2026

🌴 هل تتخيل إن نخلة واحدة ممكن تكون صدقة جارية لسنين طويلة توصل ل 100 سنه ؟

إحنا بدأنا حلم جديد... مشروع لزراعة 58 نخلة، تكلفة النخلة الواحدة 8150 جنيه ولوتعرفوا ناس بتعمل نخل بفلوس اقل مننا ابعتولنا نفهمكم الفرق 💚

محتاجه اقولكم الفكرة مش إننا نزرع شجر وبس...

الفكرة إن كل سنة، مع موسم الحصاد، هنجمع ثمار النخيل ونوزعها على الأسر الأولى بالرعاية في القرى اللي بنشتغل فيها، وعلى رأسها:
📍 قرية فلسطين
📍 قرية الجزائر
📍فرع ال36
📍العجمي
📍الناصريه
📍عبدالقادر
📍اليمن
📍العراق
يعني تبرعك النهارده مش هيطعم أسرة مرة واحدة، لكنه بإذن الله هيكون سبب في خير يتجدد كل عام 💚

يمكن متبقاش موجود بعد عشرات السنين، لكن النخلة اللي ساهمت فيها تفضل تثمر، وأسر كاملة تستفيد من خيرها، ويستمر أجرها بإذن الله.

مش لازم تتحمل تكلفة نخلة كاملة، تقدر تساهم بأي مبلغ، وكل مساهمة بتقربنا من زراعة الـ 58 نخلة.

🌴 هدفنا: 58 نخلة
💰 تكلفة النخلة: 8150 جنيه
🤲 والهدف الأكبر... صدقة جارية وخير مستمر يصل لأهالينا في القرى عامًا بعد عام🙏🏽
متنسوش الشير ولكم الاجر
لو حابب تكون جزءًا من الأثر، راسلنا، وساهم في أن تزرع خيرًا يبقى بعدك🌿
#كارجرا

كل مرة بنجهز 25 شنطة، لكن الحقيقة إحنا مش بنحط أكل وخلاص... إحنا بنفكر في كل تفصيلة.علبة جبنة، لتر زيت، 2 كيلو رز، مكرون...
06/08/2026

كل مرة بنجهز 25 شنطة، لكن الحقيقة إحنا مش بنحط أكل وخلاص... إحنا بنفكر في كل تفصيلة.

علبة جبنة، لتر زيت، 2 كيلو رز، مكرونة، شعيرية، ملح، بطاطس، بصل، طماطم، فلفل... ومعاهم فاكهة يمكن أسر كتير نفسها فيها ومش بتعرف تشتريها بسهولة، زي المانجا أو العنب.

والأهم إننا بنحاول نخلي الخير يلف دورة كاملة🧡

بدل ما نشتري أي بروتين، بقينا بنشتري السمك من مشروع ست من قرية فلسطين بتبيع سمك شخورة مجمد. كده الأسرة المستفيدة تاخد احتياجها، وفي نفس الوقت مشروع سيدة مجتهدة يكبر ويستمر.

دي ثالث مرة نوزع فيها 25 شنطة، وإن شاء الله ما تكونش الأخيرة وإن شاء الله ما تكونش الأخيرة وعندنا مره تانيه الاسبوع ده فاللي حابب يشارك حتي لو ب كيلو من اي نوع اكل هيفرق معانا جدا

إحنا مؤمنين إن أفضل خير هو اللي يطعم أسرة... ويسند أسرة تانية في نفس الوقت. 🧡
#كارجرا

قال رسول الله ﷺ:"أحبُّ الأعمالِ إلى اللهِ سرورٌ تُدخِلُه على مسلمٍ، أو تكشفُ عنه كربةً، أو تطردُ عنه جوعًا." 🧡كل يوم في ...
01/08/2026

قال رسول الله ﷺ:

"أحبُّ الأعمالِ إلى اللهِ سرورٌ تُدخِلُه على مسلمٍ، أو تكشفُ عنه كربةً، أو تطردُ عنه جوعًا." 🧡

كل يوم في مطبخ Karjera بنفتكر إن الوجبة مش مجرد أكل…

هي دعوة أم استريحت لأنها عرفت إن النهارده فيه غدا لأولادها.

وابتسامة أسرة لقت على سفرتها وجبة اتعملت بإتقان ومحبة.

الإطعام عندنا مش رقم وجبات،ولا صور تتنشر حرفيا كل حاجه بتتعمل بحب
الإطعام رسالة إن الخير لسه بيوصل، وإن في ناس بتشارك غيرها رزق ربنا بكل حب وان اصلا وسط الظروف والتعب ده لسه بيحاولوا🧡

نسأل الله أن يتقبل من كل من كان سببًا في وجبة، أو ساعد، أو تطوع، أو دعا لنا🧡

Karjera
دايمًا مع الناس 🧡


#دايمًا_مع_الناس

🧡

عملنا اطعام لطيف ف اسوان مع مؤسسه سواعد اي جهه او مؤسسه محتاجه تتعاون مع حد ف اسوان سواعد من الكوادر هناك ف الاطعام والش...
27/07/2026

عملنا اطعام لطيف ف اسوان مع مؤسسه سواعد اي جهه او مؤسسه محتاجه تتعاون مع حد ف اسوان سواعد من الكوادر هناك ف الاطعام والشغل 🧡🙏🏽
#كارجرا

أحيانًا تغيير بسيط في البيئة بيكون بداية لتغيير كبير في شخصية طفل. 🌍الجمعة القادمة نلتقي في يوم جديد مليان بالتعلم والفر...
25/07/2026

أحيانًا تغيير بسيط في البيئة بيكون بداية لتغيير كبير في شخصية طفل. 🌍

الجمعة القادمة نلتقي في يوم جديد مليان بالتعلم والفرحة، بمشاركة فريق Volunteer Hub جايلنا من القاهره مخصوص علشان نرسم مع بعض يوم مختلف لأطفالنا وأمهاتهم🧡
إحنا مؤمنين إن الطفل لما يخرج من بيئته ويشوف عالم أوسع، ويجرب حاجات جديدة، ويتعامل مع ناس مختلفة، ده بيوسع مداركه، ويزرع فيه الثقة، ويخليه يحلم أكتر. علشان كده اليوم بتاعنا مش مجرد ألعاب أو ترفيه، لكنه رحلة مليانة قيم وخبرات.

🌱 خلال اليوم هيشارك الأطفال في أنشطة متنوعة بتساعدهم يتعلموا:
• التعاون والعمل الجماعي.
• احترام الآخرين وتقبل الاختلاف.
• تحمل المسؤولية.
• الثقة بالنفس والتعبير عن الرأي.
• التفكير والإبداع وحل المشكلات.
• المحافظة على البيئة وأهمية المناخ ودور كل طفل في حماية المكان اللي عايش فيه.

💻 ولأول مرة هنقدم للأطفال نشاط خاص بالكمبيوتر، يتعرفوا من خلاله بشكل بسيط وممتع على عالم التكنولوجيا، وياخدوا أول خطوة في فهم البرمجة عن طريق الألعاب والأنشطة التفاعلية، علشان نفتح قدامهم باب جديد للمستقبل.

🎨 وطبعًا هيكون فيه ألعاب، ومسابقات، وأنشطة حركية، وفقرات ترفيهية تخلي اليوم مليان ضحك وطاقة وفرحة.

🌸 ومش ناسيين الأمهات... لأنهم يستحقوا الاهتمام هم كمان.

على مدار اليوم هيكون فيه جلسات توعية ونقاشات هادفة عن التربية الإيجابية، وفهم احتياجات الأطفال، والتعامل مع المواقف اليومية، بالإضافة لوقت ترفيهي بسيط يخرجهم من ضغوط الحياة ويخليهم يحسوا إن في حد مهتم بيهم.

أطفالنا اللي هيشاركوا في اليوم منهم أيتام، ومنهم أطفال من أسر بسيطة، ومنهم أطفال بيمروا بظروف أسرية صعبة أو محتاجين حد يحتويهم ويمنحهم فرصة يفرحوا ويتعلموا ويكتشفوا نفسهم.

💛 تكلفة مشاركة الطفل الواحد 180 جنيه، وتشمل:
🍽️ الوجبات.
🎟️ تذاكر الدخول.
🚌 المواصلات.
🎒 والأنشطة التعليمية والترفيهية طوال اليوم.

لو حابب تكون سبب في يوم يفضل في ذاكرة طفل، وتساعده يكتسب قيمة أو مهارة أو ابتسامة يمكن تفرق معاه سنين، تقدر تساهم بتبني تكلفة طفل أو أكثر.
كل مساهمة، مهما كانت، بتصنع أثر حقيقي... لأن الاستثمار في الطفل هو الاستثمار في مستقبل مجتمع كامل. 🌿🧡
#كارجرا

فيه فرحة مختلفة بتحصل لما تشوف أطفال بيتعبوا ويجتهدوا في حفظ القرآن بالتجويد، وكان أقل حاجة نقدر نقدمها إننا نعملهم يوم ...
21/07/2026

فيه فرحة مختلفة بتحصل لما تشوف أطفال بيتعبوا ويجتهدوا في حفظ القرآن بالتجويد، وكان أقل حاجة نقدر نقدمها إننا نعملهم يوم بسيط نفرحهم بيه. 💚🌿

يوم جميل مع أطفال قرية فلسطين، أكل وحلويات وفاكهة وضحك وفرحة من القلب، احتفالًا باجتهادهم وتشجيعًا ليهم يكملوا الطريق.

واحترامًا لخصوصية البنات، مش هننزل صورهم، لكن حبينا نشارككم جزء من تفاصيل اليوم، لأن الفرحة دي تستحق تتشاف. ✨

ربنا يثبتهم، ويبارك فيهم، ويجعل القرآن شفيعًا ليهم ولوالديهم، ويكتب الأجر لكل حد كان سبب في اليوم الجميل ده. 🤲💚

﴿ يَرْفَعِ اللَّهُ الَّذِينَ آمَنُوا مِنْكُمْ وَالَّذِينَ أُوتُوا الْعِلْمَ دَرَجَاتٍ ﴾ [المجادلة: 11]
﴿ إِنَّ هَذَا الْقُرْآنَ يَهْدِي لِلَّتِي هِيَ أَقْوَمُ ﴾ [الإسراء: 9]

#الإسكندرية #معًا_نصنع_الأثر

Address

شارع شركة الكهرباء الهانوفيل العجمي الاسكندرية
Alexandria

Website

Alerts

Be the first to know and let us send you an email when Karjera posts news and promotions. Your email address will not be used for any other purpose, and you can unsubscribe at any time.

Shortcuts

Share

Category