23/08/2023
عندنا مفاهيم كتير غلط عن المرض النفسي و عن العاملين بالمجال .. تعالو نصححها ✅
المرض النفسي مش وصمة عار و مرض زيه زي اي مرض جسدي و ف اغلب الأحيان اسبابه بتكون وراثية و مع ضغوط الحياة الشخص مش بيستحمل و بيتعرض لمرض نفسي
المرض النفسي ملوش علاقة بالدين و مش معني ان حد بقي عنده مرض نفسي انه كافر و بعيد عن ربنا
المريض النفسي مش ملبوس او ملازمه عفاريت
ممكن يكون عنده ذهان او مرض نفسي بيسببله هلاوس او اضطراب تعدد الشخصية ف بيتهيألك انه ملبوس و محتاج شيخ
المريض النفسي مش مجنون و لازم نبعد عنه المريض النفسي محتاج دعم كل اللي حواليه لان ده من اساسيات علاجه و ده اللي هيسرع من علاجه
المريض النفسي مينفعش نحبسه نعنفه منصدقهوش لو قالك انا محتاج دكتور نفسي يبقي هو محتاج دكتور و ده أفضل لانه واعي بمشكلته و نسبة شفائه اسرع و اعلي
لما تلاحظ تصرفات غريبة من شخص عندك ف البيت او يقول انه بيشوف حاجات او بيسمع أصوات او ناس بتكلمه بشكل مستمر
متاخدهوش لشيوخ و تلففه علي دجالين يخلو حالته من سئ لاسوء ، وديه لدكتور
المريض النفسي كل ما اتشخص اسرع كل ما نسبة شفائه كانت اعلي
الدكتور النفسي او الأخصائي النفسي مش مجنون ولا مطرقع دول ناس قضوا حياتهم ف العلم عشان يساعدو غيرهم
المرض النفسي بيأثر ع صحة الجسد و ده شئ مؤكد
مش لازم أكون مريض نفسي او واصل لمرحلة متدهورة عشان اروح لمختص .
انا ممكن اروح لو عندي مشكلة بسيطة او اضطراب بسيط او حتي بداية اضطراب المختص بيساعدك ازاي تتغلب علي اي مشاكل و يلحق اي اضطراب و يعلمك ازاي تعيش حياة نفسية سليمة
المريض النفسي مش بيتدلع مش ملبوس مش وصمة عار عشان نخبيه او نبعد عنه
المريض النفسي ممكن يكون انا او انت او حد من اخواتنا او صحابنا او كلنا و مش عيب أبدا نطلب المساعده من متخصصين و ندعم الشخص المصاب..
copy
