05/06/2025
Tajmaɛt n Taddart - Ḥalit Mhenna
by AMMARI in Iḍrisen, imsegzi
Texte explicatif : Tajmaât
Aḍris imsegzi - Tajmaɛt n taddart.

Deg umaḍal, yal timetti tesɛa tuddsa tamettant, yis-s i tetteddu tudert n yimdanen, ula d timetti taqbaylit tamensayt (taqburt) tesɛa tuddsa-ines, acu kan temgarad ɣef tuddsa n tmettiyin niḍen, ama deg talaɣa ama deg usefrek.
Yal taddart tesɛa agraw amatu, win i wumi qqaren tajmaɛt, yis-s i teddunt tlufa n taddart. Yal ddurt, yettili-d ugraw n tejmaɛt akken ad sqerdcen tilufa n taddart, argaz ur d-yusin ara ɣer ugraw ad yefk lexṭiyya.
Agraw n taddart yettili-d deg tejmaɛt, deg tazwara, ameqqran n taddart neɣ lamin ad yebdu awal, ad yessefhem iswi n ugraw, syin ad yefk awal i wid yebɣan ad meslayen. Acu kan, dima d wid yennumen ttmeslayen kan ara d-yemmeslayen, wiyaḍ ssusumen, sellen d acu i d-ttmeslayen yirgazen mucaɛen deg taddart.
Agraw n taddart dima yettɛeṭṭil, yettaṭṭaf aṭas n wakud imi llan wid yettɛeṭṭilen deg wawal, neɣ ma yella-d ubeddel n wawal gar leṣfuf n taddart. Deg ugraw, taddart mi ara teṭṭef taɣtast, awal n umɣar yettɛeddi sdat n wawal n umeẓẓyan, awal n win yesɛan cci yettɛedday sdat n wawal n yigellil. Llan diɣen wid ur nesɛi ara akk awal deg ugraw am: yixarazen, igezzaren, wid yettektilin irden, wid yekkaten ṭṭbel, acu kan, ayen yesewhamen d acu yemgaraden gar win yettektilin zzit yesɛa awal-is, d win yettektilin irden ur yesɛi ara awal-is, akken diɣen timetti ṭhemmel iḍeballen, taddart tzehhu yis-sen acu kan ur sɛin awal deg ugraw, akken diɣen ameddaḥ yesɛa awal, yesɛa azal d leqdder …. Ma d aḍebbal ur yesɛi ara.
Mi ara d-tawweḍ taggara n ugraw, ameqqran n taddart ad yefk urag i yirgazen akken ad ffɣen, win ara yeffɣen uqbel lawan ad ifekk lexṭiyya.
Deg kra n tegnatin, ma yella-d imenɣi gar twaculin neɣ teɣli temgerḍt, agraw n taddart ur yessaweḍ ara akken ad yefru tamsalt, ad iger tiɣri i yimɣaren n leɛrec akken ad d-asen ad kecmen gar twaculin yettnaɣen.
Tajmaɛt n taddart, ulac d acu i as-ittruḥun, terra lewhi i tlufa n taddart, txeddem islaganen, ajmaɛ n tebzert, lexṭiyyat, aheyyi n tcemliyin, timecreḍt… Ula deg lawan n ṭṭrad d umennuɣ, d tajmaɛt i tt-igezzmen deg ṛṛay ma taddart ad tikki neɣ ala deg umennuɣ.
Mehenna Halit
