Évangile quotidien en Ewondo

08/10/2022

Lukas 11,27-28
Ndò labò na, abog akòbògò e mam ma, ndò mininga ziṅan gavë kiṅa bod ete ha, nyè ai nyè na: Mvòm ai abum angabëgë wa, ai e mëbè onganyaṅ. 28 Nyè na: Mvòm abui ai e ba bawog ebug Zamba, bëbaala dzò.

05/10/2022

Lukas11,1-4

1 Ndò hm lazu bò na, mbol angabë hom ziṅ, akogëlan, eyòṅ angamana kogëlan, ndò mbòg ya bëyègè boe adzo ai nyè na: A Nti, yëgëlë bia mbol bakogëlan, akyaè ya Yohannes angayëgëlë bëyègè boe. 2 Nyè ai bò na: Eyòṅ miakogëlan, midzoo na: A tara, dzoe doe afubugan. Edzoe dzoe ezaag. 3 Vaa bia e bidi biayaṅan ai biè amos osë. 4 Dzu bia minsëm mian, amu bia fë biadzu e mod osë abèan bia. Të walëdë bia a mëbobëla.

04/10/2022

Lukas 10,38-42

38 Eyòṅ bëkëlë ha, ndò anganyian a dzal ziṅ. Mininga ziṅ, dzoe na Marta angasoan ai nyè. 39 Angabë abëlë manyaṅ dzoe na Maria, Maria te atoa Nti a mëkol a si, avogolo ebug dzie. 40 Marta nyè angabë andëṅë ai bisye bi nda na abëlan ai bod. Ndò asò, nyè na: A Nti, dze yë landëgëlë ki wa na madzaṅ alig ma etam mëndëṅë ai bisye? Kada nyè na avòli ma. 41 Nti nyè ai nyè na: A Marta, a Marta, wawu ndzug, ondëgëlë wamen asu abui mam, 42 Dzidzia endzò enë ai mfi. Amu Maria atòb mbëmbë ngab ya bëngâdali ki nyè.

03/10/2022

Lukas 10,25-37@

03/10/2022

Lukas 10,25-37

Ndò mod mvende ziṅan gakodo a si na abobolo nyè, nyè na: A ṅyëgëlë, mëbò dze asu yë na mëbi enyiṅ kòm? 26 Nyè ai nyè na: Dze enë ntilan a mvende? Walaṅ ya we? 27 Ndò ayalan na: Odiṅi Nti Zamba woe ai nnëm woe osë, ai nsisim osë, ai ngul dzoe esë, ai fëg dzoe esë, odiṅi fë manyòṅ anë wamen. 28 Nyè ai nyè na: oyalan mbëṅ. Bò nala, wayi bi enyiṅ. 29 Mbol e mod nyò ayii na alëdë emen, nyè ai Yesus na: Za hm anë madzaṅ? 30 Yesus nyè na: Mod ziṅan gakodo a Yerusalem, angasigi a Yeriko, ndò angaku a mò bizilngan, ndò bëngasòdi nyè biyie, bëmana nyè yit, ndò balig nyè hala, awu ai enyiṅ ntye mbòg. Bò bëkëlëg. 31 Ndò latoban ha na fada ziṅan gabë asigi zen te, ndò ayen e mod nyò, ayëmë zen fë. 32 Dzam dëda fë, man levit asò hom te, ayënë nyè, asaala nyè. 33 Ndò man Samaritan ziṅ ya angabë a dulu azu kui abë e mod nyò; ayen angayen nyè, ayënë fò nyè ngòl, 34 Ndò asubu babi, amana nyè faṅ mëvëṅ, asoege mbòn ai wayn, ndò atoa nyè a ekabëli dzie, akëlë ai nyè a nda-bëyëṅ, angatuṅulu nyè. 35 E kidi lende ya hala, ndò akuli mòni, minsaṅ mibè, avëë e mod angabë ai nda-bëyëṅ, nyè ai nyè na: Tuṅulu nyè; e dzi esë wayi dzèè a nyòl dzie, mayi wa vë eyòṅ mayi dugan. 36 Za ya e bod bëbè ba, a ṅyënan woe, za angabò anë anë manyaṅ e mod angaku a mò bizilngan? 37 Nyè na: E nyò angayen nyè ngòl. Yesus nyè ai nyè na: Këlëg hm, wa fë obò nala.

02/10/2022

Ndò apostel bëngadzo ai Nti na: Bulugu bia ṅyëbë. 6 Nti nyè na: ngë mibëlë ṅyëbë otoa anen anë fes ndoṅ, mikòbò ai mod ele na: Fumiṅi, okë bèban a maṅ; ngë adzo te lëmbòban nala ana. 7 Za ya abë mina abëlë olò osye nyè a afub, ngë ki na okalëga nyè biyëm; eyòṅ olò te onkë sòṅ a afub ana, nyè ai wò na: Vologo sòṅ tòbò ha? 8 Nga ayi dzo ai nyè na: Bò ma e dzom madi, tsendëge biyie, osye ma ntye madi, mënyaag, a mvus hala, wa ozu di, onyu fë? 9 Yë ayi kaṅ mbò-esye mbol abò e mam babende nyè na abò? 10 Nala hm fë ai mina, eyòṅ mimana ya bò e mam babende mina, dzoan na: Binë fò hë zëzë bëbò bisye; Bibò hë e dzi bihë bë na biabò.

13/09/2022

Lukas 7,11-17

Ndò hm labò na, a mvus ya hala, ndò akë e tisòn enë dzoe na Nain, bëyègè boe batoṅ nyè ha ai abui nkunda.
12 A akui babi ai mbè tisòn, ondzi na bëngabëgë mbim mbaṅ mòn a abum nyia, mininga te atoa nkus, mod nkunda ya tisòn te atoa ai nyè esamba.
13 Ayen angayen nyè, ndò Nti angawog nyè engongòl, nyè ai nyè na: Të wabad yon.
14 Ndò asubu osu, anamba ewòli mbim, e bod bëmbë bëgë dzò bëtëbë, nyè na: A ndoman, wa madzo ai nyè, kodogo a si.
15 Ndò mbim ongatòbò, akèè ai nkòbò, ndò avë nyè nyia woe.
16 Wòṅ oku fò bod bësë a nyòl, bëngalugu Zamba, bò na: Profèt nen akui abë bia, ai na: Nti asò yen ayòṅ die.
17 Foe etsaman fò nala etyan ai nyè a Yudea osë ai a mvus nnam osë.

12/09/2022

Lukas 7,1-7

Eyòṅ bibug bie bingaman dzie bod a mëlò, ndò akë a Kafarnao.
2 Ndzoe ntèd bëzimbi mbòg angabë abëlë olò angabë adiṅi, olò te okònò ha abui, bëkon bëlindigi, bëyëmë bëlindigi;
3 Awog angawog na Yesus anë hala, ndò angalom bënyia-bodo-mvia bë Yuden na bësili nyè ngë anë dzam sò, abò olò woe mvoè.
4 Ndò bëngakui abë Yesus, bëngakogëlan ai nyè abui, bò na: Akyëbë ai na obò nyè dò.
5 Amu adiṅ ayòṅ dan, ndò fë angaloṅ bia nda bikoan.
6 Ndò hm Yesus akë nsamba ai bò. Hala akui ya man ntye ai nda, ndò ndzoe ntèd bëzimbi nyò alom bëmvoe na bëkad nyè na: A Nti, obë wu ndzug, amu makyëbë ki ai dò na onyian a ebëm dzama.
7 Asu te ben ndò mamen mëmbara sòṅ a bë wa. Dzam da, kòbògò hë ebug, mbò-bisye wama abò mvoè.
8 Amu mamen mënë e kan mod mëbëlë edzoe ya abëlan ai e bëzimbi madzoe; mëdzo ai e nyò na: këlëg, akëë; mëdzo ki ai mfë na: zaag, asò fë. Mëdzo ai mbò-bisye wama na: Bò anë osi, anë oka, abò fë.
9 Awog Yesus angawog nala, ndò akam, avëṅan mfa e bod bëngabë bëtoṅo nyè, nyè na: Makad mina na, mabë ya ki yen e kan ṅyëbë nyi hom mfë a Israel.
10 Ndò e bod angalom badugan a nda, bëkòbò na olò omboo ya mvoè.

09/09/2022

09/09/2022

Seigneur Jésus, donne nous la foi.