Village's Charity Foundation د کلي خیریه بنسټ

08/18/2026

د خیر لاس، د هیلو څراغ!

یو بااحساسه ورور، چې تل د بې وزلو او اړمنو لاسنیوی کوي، زموږ بنسټ ته ۲۰،۰۰۰ افغانۍ مرسته وسپارله؛ له دې جملې څخه ۵،۰۰۰ افغانۍ د یوه یتیم د زده کړو او ۱۵،۰۰۰ افغانۍ د ګوډه عالي لېسې د ودانۍ جوړولو لپاره ځانګړې شوې.
د دې ورور دا نېک اقدام د نورو لپاره هم د خیر او همکارۍ ښکلی مثال دی.
راځئ، هر یو د خپلې وسې مطابق د یوه یتیم لاس ونیسو، د زده کړو لار ورته هواره کړو او د خیر په دې کاروان کې برخه واخلو.
ستاسې لږ مرسته هم د یوه انسان راتلونکی بدلولای شي!

08/16/2026

یوه ۳۷ کلنه مور د بډوډو له ناروغۍ کړېږي او د اقتصادي ستونزو له امله د درملنې توان نه لري.
د کورنۍ له غړو څخه یې یو کس خپل بډوډی ورکوي، خو د عملیات د لګښت سترګې یې زموږ او تاسو په لور دي. له شتمنو هېوادوالو غواړو چې ناهیلې یې پرېنږدي؛ څو وړوکي ماشومان یې د خپلې مور له شفقت څخه بې برخې نه شي.

08/16/2026

دا (۵۰۰۰؋) د یوه یتیم لپاره هغه بهرمیشتي ورور را استولې چې هره میاشت د یتیمانو لپاره مرسته رالېږي
الله دې د ده په مال او ژوند کې برکت واچوي.

08/15/2026

د بریا ویاړ؛ د هڅو ښکلی ثمر

د کلي خیریه بنسټ د فعال او با احساسه غړي شهید انجنیر محمد نافع همت زوی، ابوبکر همت، د ابو عبیده بن جراح عالي خصوصي لېسې د څلور نیم میاشتنیو ازموینو په بهیر کې په دویمه درجه بریالی شو.
د نوموړي دا ښکلې علمي لاسته‌راوړنه د هڅې، زیار او د زده‌کړې له لارې د روښانه راتلونکي د جوړولو یوه غوره بېلګه ده.
د نوموړي د دې بریا د لا زیاتې هڅونې او درناوي په موخه، د ښوونځي ادارې له لوري په ستاینلیک او ارزښتناکو ډالیو ونازول شو.
ابوبکر جانه! ستا دا بریا د ویاړ پیل دی؛ هیله ده د علم او پوهې په ډګر کې لا لوړې څوکې فتح کړې او د خپل درانه پلار نوم تل په ویاړ ژوندی وساتې.

بریا دې مبارک شه!

08/12/2026

08/10/2026

عَنْ أَنَسِ بْنِ مَالِكٍ رضي الله عنه قَالَ: قَالَ رَسُولُ اللَّهِ ﷺ:

«إِنَّ مِنَ النَّاسِ مَفَاتِيحَ لِلْخَيْرِ، مَغَالِيقَ لِلشَّرِّ، وَإِنَّ مِنَ النَّاسِ مَفَاتِيحَ لِلشَّرِّ، مَغَالِيقَ لِلْخَيْرِ، فَطُوبَى لِمَنْ جَعَلَ اللَّهُ مَفَاتِيحَ الْخَيْرِ عَلَى يَدَيْهِ، وَوَيْلٌ لِمَنْ جَعَلَ اللَّهُ مَفَاتِيحَ الشَّرِّ عَلَى يَدَيْهِ»

ژباړه:
له خلکو څخه ځینې داسې دي چې د خیر کیلي او د شر د دروازو بندوونکي وي او ځینې داسې دي چې د شر کیلي او د خیر د دروازو بندوونکي وي. نو نېکمرغي ده د هغه چا لپاره چې الله تعالی د هغه په لاسونو د خیر کیلي ګرځولې وي او هلاکت دی د هغه چا لپاره چې الله تعالی د هغه په لاسونو د شر کیلي ګرځولې وي

08/08/2026

بلاخره دې بې وزله خو با استعداده یتیم په تش لاس او خالي جیب پوهنتون پیل کړ، اما ستاسو له مالي ملاتړ پرته د پوهنتون څلور کلن مزل ناشونی دی، هیله ده تر خپله وسه یې لاسنیوی وکړئ

08/07/2026

د غره پر سر د هیلو ډېوه: د بې وروره یتیمې وحیدې د زیار او بریا کیسه

د کابل د خواجه جمع د غره په لوړه برخه کې، چېرته چې بادونه د بېوزلۍ سندرې وايي او یوازېتوب د کورونو پر دېوالونو سیوری غوړولی، یوه کوچنۍ او نړېدلې کوډلخه د یوې لویې هیلې کوربه ده.
دا د بې وروره یتیمې وحیدې کور دی؛ هغه نجلۍ چې ژوند ورته په ډېر کم عمر کې د یتیمتوب د تریخوالي خوند ور وښود.
وحیده له خپلو درېیو خویندو او مور سره په داسې یو چاپېریال کې ساه اخلي چې هره ورځ یې له لوږې او محرومیت سره مبارزه ده. د دوی د ژوند لاره د غره په هغو سختو او پېچومو کوڅو کې تېرېږي چې هر ګام پکې د صبر او استقامت ازموینه ده. کله چې د دوی پر دسترخوان د ډوډۍ څرک نه وي او د سر سیوری یې یوازې یو زوړ سوری سوری ټیکری وي، بیا هم د وحیدې په سترګو کې د ناهیلۍ پر ځای د یو روښانه سباوون خوبونه ځلېږي.
خو د وحیدې کیسه یوازې د بېوزلۍ داستان نه دی، دا د یوې پټې ځلا او نه ماتېدونکي هوډ کیسه ده.
سږ پسرلی کله چې د کلي خیریه بنسټ د یوه با احساسه غړي په مالي مرسته د هغې او دوه خویندو لپاره د یوه خصوصي ښوونځي دروازې پرانیستل شوې، د ښوونځی له یونیفورم نیولې تر کتابونو او درسي توکو پورې ورته تیار شول، هېچا ګومان نه کاوه چې دا نجلۍ به دومره ژر د بریا اسمان ته پورته شي.
نن چې د څلور میاشتنیو ازموینو پایلې اعلان شوې، د وحیدې نوم د ټولګي په سر کې و؛ هغې ثابته کړه چې استعداد د شتمنۍ په ماڼیو کې نه، بلکې د زیار او اخلاص په تنګو کوڅو کې روزل کېږي.
دا لومړۍ درجه یوازې یوه نمره نه ده، دا د هغې د مور د نیمې شپې د دعاوو ثمره، د یو خیرخواه انسان د نېکۍ او مالي ملاتړ بدله او د هغې د خپلو تڼاکو پښو د ستړیا او هڅو ځواب دی.
د وحیدې ګوتې یوازې قلم نه پېژني، بلکې د هنر په ژبه هم خبرې کوي. هغه په خپلو وړوکو او ستړو ګوتو د ښځینه جامو او ټوکر پر مخ د رنګونو، مریو او آینو یوه داسې نړۍ جوړوي چې هر لیدونکی حیرانوي. د هغې په لاس ګنډل شوې آینې او مرۍ یوازې د جامو ښکلا نه ده، بلکې دا د وحیدې د هغو خوبونو انعکاس دی چې غواړي خپله تیاره راتلونکې پرې روښانه کړي او ستړې مورکۍ ته دمه ورکړي. هغه د مریو په هر پېیل شوي تار کې د خپلې کورنۍ د عزت او ځان‌بسیاینې نقشه باسي. دا هنر د هغې لپاره یوازې مصروفیت نه دی، بلکې د بېوزلۍ پر وړاندې د یوې وړوکې یتیمې نجلۍ خاموشه خو پیاوړې مبارزه ده. که نن د وحیدې له دې لاسي صنایعو او هنر سره مرسته وشي، هغه به سبا نه یوازې خپله ډوډۍ په خپلو لاسونو وګټي، بلکې د لسګونو نورو یتیمو نجونو لپاره به د هنر او کار یوه لویه مناره شي.
د وحیدې په څېر په زرګونو یتیم او بېوزله ماشومان نن زموږ لاسنیوي ته سترګې په لار دي. د یوه یتیم ماشوم سپانسر کول یوازې د ښوونځي د فیس ورکول نه دي، بلکې د یو داسې نسل ژغورل دي چې سبا به د هېوادوالو د زړونو ملهم او هېواد د ابادۍ معماران وي.
راځئ د وحیدې په څېر د نورو ماشومانو له مخونو د اوښکو نښې پاکې کړو او د هغوی په لاسونو کې د کباړ ټولولو بوجیو، بوټ رنګولو برسونو، د سپېلنیو دودولو ډبي او سوال پر ځای د قلم او هنر وسیلې ورکړو؛ ترڅو هغوی خپل عزتمن ژوند په خپله جوړ کړي. د وحیدې نننۍ بریا یوازې یو پیل دی، که موږ ورسره ودرېږو، سبا به هغه د ټولنې د رڼا یوه لویه مناره وي.
د بې وروره یتیمې وحیدې په څېر ډېرې خویندې لا هم خپلو هیلو ته د رسېدو او خوبونو د رښتیا کېدو په تمه دي، که دوی ته د زده کړو زمینه برابره شي، خامخا به په ډېر ویاړ په سپینو چپنو کې د هېواد د دردمنو خویندو میندو ټپونو او دردونو ته د عزت او وقار ملهم شي.

08/06/2026

د خیر او ښېګڼې خدمتګاران هغه کسان دي، چې د خلکو د خوشالۍ لپاره خپله آرامي قربانوي او د نورو د اړتیاوو پوره کولو ته تر خپلې هوساینې لومړیتوب ورکوي.