14/06/2026
Հ.Օ.Մ.-ի Օրուան Տօնակատարութիւն
Հովանաւորութեամբ Հ.Օ.Մ.-ի Աւստրալիոյ Շրջանային Վարչութեան եւ կազմակերպութեամբ Հ.Օ.Մ.-ի Օրուան Յանձնախումբին, Կիրակի, 31 Մայիս 2026-ին, յետմիջօրէի ժամը 5:00-ին, North Ryde School of Arts Community Centre-ի սրահին մէջ տեղի ունեցաւ «Հ.Օ.Մ.-ի Օր»ուան հանդիսաւոր տօնակատարութիւնը։
Ձեռնարկին ներկայ էին Աւստրալիոյ եւ Նոր Զելանտայի Հայոց Թեմի Առաջնորդ Գերշ. Տ. Վարդան Եպս. Նաւասարդեան, Արժ. Տ. Աւետիս Քհն. Համբարձումեան, Հ.Օ.Մ.-ի Կեդրոնական Վարչութեան անդամ եւ Աւստրալիոյ ու Հարաւային Ամերիկայի ներկայացուցիչ Ընկհ. Նորա Սեւակեան, Վերապատուելի Տօքթ. Գրիգոր Յումուշաճըքեան, Արցախի մշտական ներկայացուցիչ Պրն. Գայլար Միքայէլեան, ինչպէս նաեւ պատկան մարմիններու ու ուղեկից միութիւններու ներկայացուցիչներ եւ մեծաթիւ հայրենակիցներ։
Հանդիսութիւնը սկսաւ Աւստրալիոյ, Հայաստանի, Արցախի եւ Հ.Օ.Մ.-ի քայլերգներով։ Հանդիսավար Ընկհ. Մարալ Աբրիկեան ողջունեց ներկաները եւ կատարեց օրուան բացումը։
Գեղարուեստական յայտագիրը հարստացուցին՝ Յակոբ Զարմինեան «Իմ Անուշ Մայրիկ» երգով, Նանոր Աշըգեան Չուրուքեան «Այս քոյրերը» ասմունքով, Համազգայինի «Նայիրի» երգչախումբը՝ գեղեցիկ երգեցողութեամբ, եւ Համազգայինի ASDC պարախումբը՝ իր տպաւորիչ պարային ներկայացումով։
Օրուան հիւր բանախօսն էր Ընկհ. Սիւզի Սարաֆեան, որ իր խօսքին մէջ անդրադարձաւ Հ.Օ.Մ.-ի պատմական հիմնադրութեան, ծառայական առաքելութեան եւ միասնական ու հաւաքական աշխատանքի կարեւորութեան։ Ան ընդգծեց, թէ Հ.Օ.Մ.-ի յաջողութիւններն ու աշխարհասփիւռ գործունէութիւնը հիմնուած են նուիրեալ անդամներու կամաւոր ծառայութեան, համախմբուած ուժին եւ ազգային արժէքներուն նկատմամբ անսակարկ հաւատարմութեան վրայ։
Խօսք առին նաեւ Շրջանային Վարչութեան ատենապետուհի Ընկհ. Նինա Գաբրիէլեան եւ Կեդրոնական Վարչութեան ներկայացուցիչ Ընկհ. Նորա Սեւակեան, որոնք անդրադարձան կազմակերպութեան անցեալին, ներկային եւ ապագայի տեսլականին։
Ձեռնարկի ամէնէն յուզիչ պահը նուիրուած էր Հ.Օ.Մ.-ի այն վաստակաւոր անդամուհիներուն ու բարերարներուն, որոնք յիսուն տարիներ իրենց կեանքը ձօնած են կազմակերպութեան ծառայութեան։ Անոնց տասնամեակներու անսակարկ նուիրումն ու հաւատարմութիւնը արժանացան յատուկ գնահատանքի եւ պարգեւատրումի՝ ի խորոց սրտի երախտագիտութեան մթնոլորտի մը մէջ։
Իր եզրափակիչ խօսքին մէջ Սրբազան Հայրը բարձր գնահատեց Հ.Օ.Մ.-ի ազգանուէր եւ բարեսիրական առաքելութիւնը՝ ընդգծելով կազմակերպութեան անփոխարինելի դերը համայնքային, մշակութային եւ մարդասիրական կեանքին մէջ։ Ան շնորհաւորեց պարգեւատրուած Հ.Օ.Մ.-ուհիները եւ մաղթեց անոնց առողջութիւն ու երկար տարիներու ծառայութիւն, ապա օրհնական աղօթքով փակեց ձեռնարկը։
Յայտագրի աւարտին ներկաները վայելեցին համեղ հիւրասիրութիւն եւ հաճելի մթնոլորտի մէջ շարունակեցին իրենց զրոյցները։
Շրջանային Վարչութիւնը երախտագիտութեամբ կ՚արձանագրէ բոլոր կամաւորներուն նուիրումը, որոնց աշխատանքը կարելի դարձուց այս յաջող ձեռնարկը։
