28/08/2023
Message from Rajika Harshani an actress from the play:
"සද් ගුණවත් හොරු" අඳුරට එළිය ගෙන ආ වගයි.
================================
මේ වනවිට "සත් ගුණවත් හොරු" වේදිකා නාට්ටිය මෙල්බර්න් පුරවරයේ සහ ඇඩිලේඩ් නුවර සාර්ථකව අට වතාවක් වේදිකාගත කෙරිලා තියෙනවා. එතෙක් මෙතෙක් කාලයක් පුරාවට මෙල්බර්න් නුවර ලාංකිකයන්ට රසවිඳින්න ලැබුනෙ ලංකාවෙන් ඕස්ට්‍රේලියාවට ගෙන්වූ වේදිකා නාට්‍යයන් වුනත්, මෙල්බර්න්හි පදිංචි ලාංකිකයන් සම්බන්ධවුනු මේ නුවරින්ම නිෂ්පාදනය වූ නාට්‍යයක් දර්ශන වාර 8 ක් සම්පූර්ණ කළේ ප්‍රථම වතාවටයි. මුල්ම දර්ශන වාරය ඇරුණුකොට, අනෙකුත් දර්ශන වාර 7දි සියලුම ටිකට්පත් විකිණී තිබීමත් විශේෂයක් කියල අපි කල්පනා කරනවා.
මෙහි අවසාන දර්ශන වාර කිහිපය වේදිකාගත කෙරුණෙ "අඳුරෙන් එළියට" කියන ඕස්ට්‍රේලියාවේ ජීවත්වන ලාංකිකයන් පිරිසක් විසින් ක්‍රියාත්මක කරන fundraiser වැඩසටහන වෙනුවෙනුයි. මේ වැඩසටහනෙ අරමුණ වෙන්නෙ, ලංකාවෙ විදුලිබලය නැති පලාත්වල දරුවන්ගෙ අධ්‍යාපන කටයුතු සඳහා කුප්පිලාම්පු භාවිතය අවම කිරීම සඳහා, ඒ වෙනුවට සූර්ය බලයෙන් ක්‍රියාත්මකවෙන විදුලි බල්බ ලබාදීමයි. කුප්පිලාම්පු භාවිතය නිසා සිදුවන හදිසි අනතුරුවලින් දරුවන්ට සිදුවෙන හානියෙ බරපතලබව දැකල තමයි වැඩසටහනේ නිර්මාතෘවරයා මේ වැඩපිළිවෙළ ආරම්භකරල තියෙන්නෙ. වසර කිහිපයක් පුරා ක්‍රියාත්මක වෙන මේ වැඩපිළිවෙළ හරහා දැනටමත් ලංකාවේ දරුවන් 3000 ක් පමණ දෙනාට කුප්පිලාම්පු අනතුරෙන් ඉවත්වෙලා අධ්‍යාපන කටයුතු සාර්ථකව කරගෙන යන්න අවස්ථාව සහ වාසනාව ලැබිලා තියෙනවා.
අපේ නාට්ටිය මේ fundraiser project එක වෙනුවෙන් ඉදිරිපත් කරන්න කැමැතිද කියල zoom meeting එකක් තියල සාකච්ඡා කළ වෙලාවෙ කණ්ඩායමේ හැමදෙනාම එක පයින්ම මේ යෝජනාවට කැමැති වුනු හැටි මට අද වගේ මතකයි. එහෙම කැමැතිවුනා වගෙම බොහොම මහන්සියෙන් කැපවෙලා පුහුණුවීම් කරල හොඳ නිර්මාණයක් ප්‍රේක්ෂකයන් අතරට ගෙනියන්නත් අපට පුලුවන් වුනා කියල අපි විශ්වාස කරනවා.
ඒ දර්ශන වාර සියල්ලම සාර්ථක වුන නිසා, fundraiser එක සඳහා අවශ්‍ය මූල්‍ය ප්‍රතිපාදන ඉක්මනින්ම එක්‍ රැස් කරගන්න ඒ කණ්ඩායමට පුලුවන් වුනා. මේ සද් කාර්‍යය සඳහා නාට්‍යයෙ අපි හැමදෙනාම කිසිදු මූල්‍ය ප්‍රතිලාභයක බලාපොරොත්තුවක් නැතුව සහයෝගය ලබාදුන් නිසාම, මේ ව්‍යාපෘතිය සඳහා ලංකාවෙ අපට කැමැති ප්‍රදේශයක් තෝරාගැනීමේ වරණය අපට ලැබුණා.
මොණරාගල රාජකීය විද්‍යාලයේ ප්‍රාථමික අධ්‍යාපනය හදාරණ කාලෙදි, දෙමාපියන්ට තියෙන ආර්ථික අපහසුතා නිසාම අධ්‍යාපනය අතහරින දූදරුවන් මං දැකලා තිබුණා. විදුලිබල අවශ්‍යතාවය සඳහා සුදුසුම දරුවන් ඒ පලාතෙ ඉන්න බව මං තදින්ම විශ්වාස කළ නිසා හැකියාවක් තියෙනවානම්, මේ සඳහා මොණරාගල දිස්ත්‍රික්කයටත් අවස්ථාවක් දෙන ලෙස මං ඉල්ලීමක් කළා. ඒ ඉල්ලීම බොහොම කැමැත්තෙන් පිලිගත්ත "අඳුරෙන් එළියට" කණ්ඩායම මේ කාර්‍යය සම්බන්ධීකරණය කරන්න මොණරාගලින් සුදුසු අයෙක් සොයාදෙන ලෙස මගෙන් ඉල්ලාසිටියා. ඒ අනුව මං මොණරාගල කලාප අධ්‍යාපන අධ්‍යක්ෂිකා හර්ෂණී මීගස්දෙනිය සහෝදරීව සම්බන්ධ කරගත්තා. අවශ්‍ය සියලුම දේ සම්පාදනය කරගත්තට පස්සෙ, පහුගිය සිකුරාදා දවසෙදි මොණරාගල අධ්‍යාපන කලාපයේ විදුලිබලය නොමැතිවීම නිසා අධ්‍යාපන කටයුතු කරගන්න අපහසු දරුවන් 103 දෙනෙකුට සූර්‍යබලයෙන් ක්‍රියාත්මක වන විදුලිබල කට්ටලය බැගින් ලැබුණා.
හර්ෂණී නංගි වගේම, මාව නියෝජනය කරමින් මේ වැඩසටහනට සහභාගි වුණු ප්‍රගීත් අයියාත් එවපු පින්තූර දැක්කම මගෙ ඇස් දෙකට කඳුළු ආවා.
අපේ නාට්ටිය මේ fundraiser එක සඳහා තෝරාගැනීම වෙනුවෙන් "අඳුරෙන් එළියට" කණ්ඩායමටත්, මේ සඳහා නොමසුරුව දායකත්වය දැක්වූ කුසුම්සිරි අයියා, යශෝ අක්කා ඇතුළු "සද් ගුණවත් හොරු" කණ්ඩායමටත්, නාට්‍ය රසවිඳින්න පැමිණි ප්‍රේක්ෂක පිරිසටත්, මේ කටයුතු සම්බන්ධීකරණය කළ මොණරාගල කලාප අධ්‍යාපන අධ්‍යක්ෂිකා Harshani Meegasdeniya නංගීටත්, අවසාන මොහොතෙ කල කෙටි දැනුම්දීමකින් වුනත් මේ වැඩසටහනට මාව නියෝජනය කරමින් සම්බන්ධ වුනු Prageeth Kumara අයියාටත්, ඒ අයියාව සම්බන්ධ කරදුන් මගේ අයියා Erandha Harshapriya ටත්, නමක් ගමක් නොදන්නා නමුත් මේ වෙනුවෙන් සහයෝගය දුන් හැමදෙනාටමත් අප්‍රමාණ පින්.
හර්ෂණී නංගි කියන විදියට මේ උදව් උපකාර ලැබිය යුතුම දරු පිරිසක් එදා වැඩසටහනට සම්බන්ධ වෙලා ඉඳලා තියෙනවා. ඒනිසාම එයාලගෙ විදුලිබල අවශ්‍යතාවලට අමතරව තවත් අත්‍යාවශ්‍ය කටයුතු කිහිපයකටම අනුග්‍රහයත් ලැබිලා තියෙනවා. එදා ඒ වෙලාවෙම ස්තුතිය ප්‍රකාශ කරන්න අවශ්‍යබව දන්වපු දරුවෙකු විසින් ඉදිරිපත් කරන ලද කතාව මං මේ එක්ක අමුණලා තියෙනවා. නිකමට වගෙ අහලා බලන්නකො.
මට රඟපෑමට මුලින්ම ආසාවක් ආවෙ මං මොණරාගල රාජකීයෙ කුඩා දැරියකව ඉගෙනගනිද්දි ජේෂ්ඨ අයියලා, අක්කලා කරන නාට්‍ය පුහුණුවීම් දැකලයි. ඒවගෙම ඒ රාජකීය විද්‍යාලයෙදිම "කුඩාමිතුරිය"ක් විදියට මගෙ මුල්ම වේදිකා රංඟනය ඉදිරිපත් කරන්නත් මට පුලුවන් වුණා. වැඩිහිටියෙක් වුනාමත් වේදිකා නාට්‍යවලට දායකවෙන්න මට ලොකු ආසාවක් තිබුනට, ලංකාවෙ නාට්‍ය කලාවටම ආවේනික නමක් වුනු "සරත්චන්ද්ර" කියන නම ගෑවිලා තියෙන කෙනෙක් එක්කවත් නාට්ටියක් කරන්න අවස්ථාවක් ලැබෙයි කියල මගෙ හීනෙකවත් බලාපොරොත්තුවක් තිබුණෙ නෑ. ඒ වගෙම තමයි, එහෙම වේදිකාවක රඟපාල මං ඉගෙනගත්‍ත පලාතෙ දරුවන්ගෙ හීන හැබෑකරන්න අවස්ථාවක් ඒවි කියල හීන මාත්‍රයක්වත් මගෙ හිතේ තිබුනෙ නෑ. ඒත් එදා රාජකීය විද්‍යාලයෙන් වේදිකාවට ගොඩවුණු මට අද මෙල්බර්න්වලදි සරත්චන්ද්ර ගුරුතුමාගේ දියණියකගේ ආභාෂය රැඳුණු නාට්ටියකට සම්බන්ධවෙලා, අපේ කලාපයේ, අපේ දරුවන්ට ආලෝකයක් ලබාදෙන්න අවස්ථාවත්, වාසනාවත් ලැබුණා. 😊
මේ අතීත සිදුවීම් ජාල ගැටගහනකොට මං නිතර කල්පනා කරන දෙයක් තමයි, "ජීවිතේ විවිධ සිදුවීම් ගැලපෙන හැටි හරිම පුදුමයි. සමහර සිදුවීම් බොහොම සංවේදී වගෙම ආදරණීයයි. වෙලාවකට විශ්වාස කරන්න බැරිතරම් විශ්මයජනකයි"
PS. ආයෙමත් මේ විදියටම ලංකාවෙ දරුවන් "අඳුරෙන් එළියට" එක්කගෙන එන්න සද්ගුණවත් හොරු කැලේ අපට බලාපොරොත්තුවක් තියෙනවා. ඒ වෙනුවෙන් දැනටමත් සිඩ්නි නුවර සංචාරයක් සූදානම් වෙමින් පවතිනවා. ඒ සඳහා සිඩ්නි නුවර ඉන්න අපේ හිතවතුන්ගේ අනුග්‍රහය අපට නොඅඩුව ලැබෙයි කියල අපි විශ්වාස වෙනවා. My Sydney friends, Stay tuned for further information. 😉
