05/07/2026
2026 թվականի հուլիսի 4-ին ՀՊՄՀ վարչակառավարչական անձնակազմի աշխատողների համար կազմակերպվեց ճանաչողական և մշակութային այց դեպի գեղատեսիլ Տավուշի մարզ։
Օրը մեկնարկեց Մակարավանքի այցելությամբ՝ հայկական միջնադարյան ճարտարապետության բացառիկ կոթողներից մեկում։ Վանական համալիրում մասնակիցներին սիրով դիմավորեց Տեր Արշավիր քահանա հայր սուրբը, ով ներկայացրեց վանքի հիմնադրման պատմությունը, նրա ճարտարապետական ինքնատիպ լուծումները, դարերի ընթացքում ունեցած հոգևոր և մշակութային նշանակությունը։ Հայր սուրբի հետաքրքիր ու բովանդակալից խոսքը բոլորին հնարավորություն տվեց նորովի բացահայտելու մեր հոգևոր ժառանգության անգնահատելի արժեքը։
Այնուհետև մասնակիցներն այցելեցին Իջևանի գինու-կոնյակի գործարան, որտեղ ծանոթացան հայկական գինեգործության բազմադարյա ավանդույթներին և ժամանակակից արտադրական գործընթացներին։ Գործարանի մասնագետների ուղեկցությամբ շրջայցը հնարավորություն տվեց բացահայտելու հայկական գինու և կոնյակի ստեղծման ճանապարհը՝ խաղողի մշակումից մինչև պատրաստի արտադրանք, ինչպես նաև ևս մեկ անգամ արժևորելու հայրենական արտադրանքի բարձր որակն ու համբավը։
Ճանաչողական այցի եզրափակիչ կանգառը Գոշավանքն էր՝ հայ ժողովրդի հոգևոր, կրթական և մշակութային կարևորագույն կենտրոններից մեկը։ Գոշավանքի խաղաղ ու խորհրդավոր մթնոլորտը յուրաքանչյուր այցելուի համար դարձավ հոգևոր լիցքավորման և ներքին խաղաղության յուրահատուկ պահ։
Այս գեղեցիկ օրը համախմբեց գործընկերներին՝ պարգևելով նոր գիտելիքներ, հաճելի շփումներ, բնության հիասքանչ տեսարաններ և անմոռանալի տպավորություններ։ Նման նախաձեռնությունները նպաստում են ոչ միայն մեր պատմամշակութային արժեքների ճանաչմանը, այլև աշխատանքային կոլեկտիվի համախմբմանը, փոխադարձ ջերմ հարաբերությունների ամրապնդմանն ու միասնականության ոգու ձևավորմանը։
Շնորհակալություն ՀՊՄՀ -ի ռեկտորատին փոխադրամիջոց տրամադրելու համար։ Բուհի արհեստակցական կազմակերպությունը շարունակելու է նախաձեռնել նման բովանդակալից և հիշարժան միջոցառումներ՝ ստեղծելով նոր հնարավորություններ հայրենիքի պատմամշակութային ժառանգությունը ճանաչելու և միասին գեղեցիկ հիշողություններ կերտելու համար։
