Հանուն իրավահավասարության իրավապաշտպան ՀԿ/ For equality Human Rights NGO

17/08/2026

Հարգելի՛ հետևորդներ,
Նախորդիվ անդրադարձել էինք քննիչի կողմից տուժողի միակ բջջային հեռախոսի առգրավման խնդրին և այդ առնչությամբ համապատասխան լիազոր մարմիններին ներկայացրել էինք գրավոր դիմում՝ բարձրաձայնելով տուժողի իրավունքների իրացման հնարավոր սահմանափակումների վերաբերյալ մեր մտահոգությունները։
✅️Ստացել ենք պաշտոնական պատասխան, համաձայն որի՝ մեր կողմից բարձրացված հարցն ընդունվել է ի գիտություն և հաշվի կառնվի ոլորտային բարեփոխումների իրականացման ընթացքում։
🤝Ողջունում ենք ստացված արձագանքը և ակնկալում, որ բարձրացված խնդիրը պատշաճ կարտացոլվի նաև համապատասխան իրավակարգավորումներում և իրավակիրառ պրակտիկայում՝ նպաստելով տուժողների իրավունքների առավել արդյունավետ պաշտպանությանը։
⬇️Ստորև՝ պաշտոնական պատասխանը։

🔴Ակնկալում ենք դրա պատշաճ արտացոլումը ոլորտային բարեփոխումների գործընթացում։
ՀՀ արդարադատության նախարարություն/Ministry of Justice of Armenia
ՀՀ Դատախազություն
ՀՀ քննչական կոմիտե

15/08/2026

Գենդերազգայուն մոտեցումը կարևոր է ընտանեկան բռնության դեպքերում։
_____________________________________________
Ընտանեկան բռնության դեպքի շրջանակում համագործակցեցի Դիլիջանի բաժնի ՀԿԳ ավագ համայնքային ոստիկան, ոստիկանության մայոր Մանթաշյանի հետ։
Դեպքի առանձնահատկություններից ելնելով՝ անհրաժեշտություն առաջացավ ոստիկանության բաժնում կնոջ հետ առանձին զրույց ունենալու։
👮‍♂️Ոստիկանության մայոր Մանթաշյանը ստեղծեց այդ հնարավորությունը և կազմակերպեց զրույցը՝ ապահովելով անհրաժեշտ պայմաններն ու միջավայրը։
✅️Առանձնահատուկ ցանկանում եմ ընդգծել նրա գենդերազգայուն, տուժողակենտրոն և հարգալից մոտեցումը։
✅️Ընտանեկան բռնության դեպքերում նման հաղորդակցությունը կարևոր է, քանի որ տուժողի նկատմամբ հարգալից, անվտանգ և վստահություն ձևավորող վերաբերմունքը մասնագիտական արդյունավետ արձագանքի կարևոր բաղադրիչ է և կարող է նպաստել նաև կրկնակի տրավմատիզացիայի կանխարգելմանը։
🟥Օրենքով նախատեսված պաշտպանական միջոցառումը պարտականություն է, իսկ այն մարդու արժանապատվությունը, անվտանգությունն ու կարիքները հաշվի առնելով իրականացնելը՝ մասնագիտական մշակույթի կարևոր դրսևորում։

03/08/2026

Երբ տուժողի հեռախոսը դառնում է «իրեղեն ապացույց», ո՞վ է մտածում նրա անվտանգության մասին։
֊֊֊֊֊֊֊֊֊֊֊֊֊֊-֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊
Մեր կազմակերպության գործունեության ընթացքում առաջին անգամ բախվել ենք մի իրավիճակի, որը լուրջ մտահոգության տեղիք է տալիս։
🔴Ընտանեկան բռնության ենթարկված անձի բջջային հեռախոսը քննիչի կողմից վերցվել է որպես իրեղեն ապացույց։ Խոսքը ոչ թե հեռախոսում առկա տվյալների պատճենահանման կամ զննության, այլ հենց սարքի առգրավման մասին է։ Միաժամանակ տուժողին չի տեղեկացվել, թե երբ և ինչ պայմաններում այն կվերադարձվի։
✅️Չենք վիճարկում, որ քրեական վարույթի ընթացքում օրենքը կարող է նախատեսել իրեղեն ապացույցների առգրավման հնարավորություն։ Սակայն իրավական ցանկացած միջամտություն պետք է համապատասխանի ոչ միայն օրինականության, այլև անհրաժեշտության և համաչափության սկզբունքներին՝ հատկապես այն դեպքերում, երբ խոսքը վերաբերում է ընտանեկան բռնությունից տուժած անձին։

🔴Այս դեպքը մի շարք կարևոր հարցեր է առաջացնում։

✅️Արդյո՞ք այս կարգավորումները մշակելիս կամ կիրառման մեթոդաբանությունը սահմանելիս հաշվի են առնվել ընտանեկան բռնության գործերի առանձնահատկությունները։
✅️Արդյո՞ք խորհրդակցություններ են իրականացվել շահագրգիռ լիազոր մարմինների, ոլորտում գործող մասնագիտացված կազմակերպությունների, Մարդու իրավունքների պաշտպանի գրասենյակի և տուժած անձանց իրավունքների պաշտպանությամբ զբաղվող մասնագետների հետ։ Եթե այո, ապա ինչպե՞ս են գնահատվել այն ռիսկերը, որոնք առաջանում են, երբ տուժողը փաստացի զրկվում է իր հիմնական կապի միջոցից։

☀️Բջջային հեռախոսն այսօր պարզապես տեխնիկական սարք չէ։ Այն անվտանգության, պաշտպանության և օգնություն ստանալու կարևորագույն միջոց է։

Առանց հեռախոսի՝

➡️ մենք չենք կարողանում կապ պահպանել շահառուի հետ և ապահովել իրավական ու սոցիալական աջակցությունը,
➡️ նախաքննություն իրականացնող մարմինն ինքն էլ չի կարողանում անհրաժեշտության դեպքում արագ կապ հաստատել տուժողի հետ կամ հրավիրել նրան քննչական գործողությունների,
➡️գործատուն չի կարող կապ հաստատել աշխատանքի ընդունման կամ աշխատանքի հետ կապված հարցերով,
➡️բժիշկը կամ բուժհաստատությունը չի կարող անհրաժեշտության դեպքում կապ հաստատել,
➡️վտանգի դեպքում տուժողը զրկվում է ոստիկանություն, շտապ օգնություն կամ իրեն աջակցող անձանց անմիջապես դիմելու հնարավորությունից,
➡️իսկ եթե բռնարարն անտեսում է պաշտպանության միջոցները, խախտում է սահմանված արգելքները, փորձում է մոտենալ տուժողին կամ երեխային, ապա հեռախոսի բացակայությունը կարող է իրական և լրացուցիչ վտանգ ստեղծել։
🔴Այս իրավիճակը նաև մեկ այլ կարևոր հարց է առաջացնում.
🟥Արդյո՞ք նախաքննություն իրականացնող մարմինների աշխատակիցները բավարար մասնագիտական պատրաստվածություն և զգայունություն ունեն ընտանեկան բռնության գործերի առանձնահատկությունների վերաբերյալ։
✅️Մենք որևէ կերպ կասկածի տակ չենք դնում արդյունավետ նախաքննության անհրաժեշտությունը։ Սակայն քրեական արդարադատության նպատակները չեն կարող իրականացվել տուժողի անվտանգության և հիմնարար իրավունքների հաշվին։
Հնարավո՞ր չէ նման դեպքերում կիրառել ավելի համաչափ լուծումներ՝ օրինակ օրենքով սահմանված կարգով ամրագրել հեռախոսում առկա տվյալները, կատարել դրանց պատճենահանում կամ թվային զննություն՝ առանց տուժողին երկար ժամանակով զրկելու իր հիմնական կապի միջոցից։
🗣Վերջում ցանկանում ենք բարձրաձայնել մի հարց, որի պատասխանը, մեր համոզմամբ կարևոր է բոլորիս համար.
🔴Եթե վտանգի պահին ընտանեկան բռնությունից տուժած անձը հեռախոս չունենա, որովհետև այն ճանաչվել է իրեղեն ապացույց և գտնվում է նախաքննության մարմնում, ո՞վ է կրելու այդ որոշման հնարավոր հետևանքների պատասխանատվությունը։
ՀՀ Մարդու իրավունքների պաշտպան - Human Rights Defender of Armenia
ՀՀ քննչական կոմիտե
ՀՀ աշխատանքի և սոցիալական հարցերի նախարարություն

27/07/2026

Հարգելինե՜ր,
Վերջին շրջանում շատ են քննարկվում ընտանեկան բռնության դեպքերը, և բոլորս կոչ ենք անում պայքարել դրա դեմ։ Սակայն կարևոր է հիշել, որ պայքարը չպետք է միայն կոչերով սահմանափակվի. անհրաժեշտ է նաև տեղեկացնել, թե որտեղ և ինչպես կարելի է օգնություն ստանալ։
ՀՀ աշխատանքի և սոցիալական հարցերի նախարարության պատվիրակված դրամաշնորհի շրջանակում ՀՀ բոլոր մարզերում գործում են աջակցման կենտրոններ, որտեղ ընտանեկան և կենցաղային բռնության ենթարկված անձանց անվճար տրամադրվում են սոցիալական, հոգեբանական և իրավաբանական ծառայություններ և այլն։
✅️Աջակցման կենտրոններն աշխատում են գաղտնիության պահպանման, գենդերազգայունության և մասնագիտական էթիկայի սկզբունքներով։
🔴Կարևոր է իմանալ, որ նման իրավիճակում միայնակ պայքարելը հաճախ ոչ միայն դժվար է, այլև կարող է վտանգավոր լինել։

🥰մեր հորդորն ու խնդրանքն է՝ եթե դուք կամ ձեր ճանաչած որևէ անձ գտնվում է նման իրավիճակում, դիմեք աջակցման կենտրոն։ Որակավորված մասնագետները կօգնեն գնահատել իրավիճակը, գտնել անվտանգ լուծումներ և անհրաժեշտ աջակցություն ցուցաբերել։

🟥Աջակցման կենտրոնների մասին տեղեկատվությունը կարող եք գտնել այստեղ ⬇️https://hartak.am/pages/%D5%A1%D5%BB%D5%A1%D5%AF%D6%81%D5%B8%D6%82%D5%A9%D5%B5%D5%A1%D5%B6-%D5%AF%D5%A5%D5%B6%D5%BF%D6%80%D5%B8%D5%B6%D5%B6%D5%A5%D6%80/

Ստորև ներկայացված է ընտանիքում բռնության ենթարկված անձանց աջակցության կենտրոնների ցանկը։

23/07/2026

Հետևորդնե՜ր ջան😊

Եթե հիշում եք, 2025 թվականին մեր կազմակերպության կողմից Տավուշի մարզում անցկացվել էին աշխատանքային իրավունքների վերաբերյալ հարցազրույցներ։ հարցվածների կողմից բարձրացված խնդիրներից մեկը այն էր, որ գործատուները հաճախ թույլ չեն տալիս աշխատանքից բացակայել՝ երեխայի ծնողական ժողովին կամ դպրոցական այլ միջոցառումներին մասնակցելու, ինչպես նաև երեխայի խնամքի հետ կապված հարցերով զբաղվելու համար։
💥 Ուրախ ենք տեղեկացնել, որ այժմ օրենքով սահմանվել է «ծնողական ժամը», որը հնարավորություն է տալիս աշխատող ծնողներին աշխատանքային օրվա ընթացքում բացակայել աշխատանքից՝ երեխայի խնամքի, դաստիարակության, կրթական գործընթացներին (այդ թվում՝ ծնողական ժողովներին) մասնակցելու կամ երեխայի շահերից բխող այլ պարտականություններ իրականացնելու նպատակով։
✅ Ծնողական ժամը տրամադրվում է աշխատողի գրավոր դիմումի հիման վրա։
✅ Այդ ժամանակահատվածը ներառվում է աշխատաժամանակում, և աշխատավարձը պահպանվում է։
🔴ձեր աշխատանքային իրավունքների կամ «ծնողական ժամի» կիրառման վերաբերյալ հարցերի դեպքում գրեք մեզ անձնական հաղորդագրությամբ կամ զանգահարեք մեր կազմակերպություն՝ անվճար խորհրդատվություն ստանալու համար։
Օրենքին կարող եք ծանոթանալ այստեղ՝
https://www.arlis.am/hy/acts/227647?utm_source=chatgpt.com

ՀՀ ՕՐԵՆՔԸ ՀՀ ԱՇԽԱՏԱՆՔԱՅԻՆ ՕՐԵՆՍԳՐՔՈՒՄ ՓՈՓՈԽՈՒԹՅՈՒՆ ԵՎ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

17/07/2026

Մասնակցում ենք աշխատաժողովին։

15/07/2026

ԲՌՆԱՐԱՐ ՀԱՐԱԲԵՐՈՒԹՅՈՒՆՆԵՐԻ ՄԱՍԻՆ ԻՐԱԶԵԿՈՒՄ։
ՄԱՍ🔟
-֊֊-֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊֊
Սիրելինե՛ր,
Հոգեբանական և տնտեսական բռնության դեպքում նույնպես կարող եք դիմել ոստիկանություն և/կամ կանանց աջակցման կենտրոն։
_________________________________________________
Շատերը կարծում են, որ ընտանեկան բռնություն է միայն ծեծը կամ մարմնական վնասվածք պատճառելը։ Սակայն օրենքով ընտանեկան բռնություն են համարվում նաև՝
✅️Հոգեբանական բռնությունը՝ վիրավորելը, նվաստացնելը, մշտապես մեղադրելը, սպառնալը, վախի մթնոլորտ ստեղծելը, հարազատներից ու ընկերներից մեկուսացնելը, ազատ շփումները սահմանափակելը կամ անձի արժանապատվությունը պարբերաբար խաթարելը։
✅️Տնտեսական բռնությունը՝ ֆինանսական միջոցներից զրկելը կամ դրանք վերահսկելը, աշխատելու կամ սովորելու հնարավորությունից զրկելը, եկամուտը կամ գույքը տնօրինելու իրավունքը սահմանափակելը, անհրաժեշտ ծախսերի համար գումար չտրամադրելը կամ տնտեսական կախվածության մեջ պահելը։
🔴Եթե նման վարքագծի եք բախվում, դուք նույնպես իրավունք ունեք դիմելու ոստիկանություն և/ կամ կանանց աջակցման կենտրոն.ստանալու օրենքով նախատեսված պաշտպանություն։
⏺️Շարունակելի…
❗️Եթե Դուք աջակցության, խորհրդատվության կարիք ունեք, գրեք մեզ կամ զանգահարեք հետևյալ հեռախոսահամարով՝ 📞 094 788770։
#Ճանաչենքբռնարարհարաբերությունները
։

12/06/2026

Վերջերս ընտանեկան բռնության ենթարկված կնոջ իրավունքների պաշտպանության գործընթացում կարևոր և արդյունավետ համագործակցություն իրականացվեց Տավուշի մարզի Այգեհովիտ համայնքի մանկապարտեզի տնօրեն Ալվարդ Բադամյանի հետ, որի արդյունքում հնարավոր եղավ արձանագրել դրական փոփոխություն😊
Փոքր համայնքներում նման իրավիճակներում ներգրավվելը հաճախ հեշտ չէ․ մարդիկ հաճախ խուսափում են հնարավոր լարվածություններից, կոնֆլիկտներից և անձնական կամ համայնքային հարաբերությունների վատթարացումից։ Հենց այդ պատճառով նման պատասխանատու, սկզբունքային և մարդակենտրոն մոտեցումները հատկապես կարևոր են և արժանի գնահատանքի։
Տիկին Բադամյանը չմնաց անտարբեր, աջակցեց տուժած կնոջը և անհրաժեշտության դեպքում համագործակցեց նաև իրավապահ մարմինների հետ՝ նպաստելով նրա և երեխաների իրավունքների ու անվտանգության պաշտպանությանը։
Շնորհակալություն՝ անտարբեր չմնալու, պատասխանատվություն ստանձնելու և երեխաների լավագույն շահը առաջնահերթ դիտարկելու համար։
✅️Կարծում ենք, որ նման համագործակցության և մասնագիտական պատասխանատվության օրինակները պետք է տեսանելի դարձվեն և խրախուսվեն, քանի որ դրանք նպաստում են բռնությունից տուժած անձանց իրավունքների պաշտպանությանը և երեխաների լավագույն շահերի ապահովմանը:
ՀՀ աշխատանքի և սոցիալական հարցերի նախարարություն

01/06/2026

Սիրելի՛ երեխաներ,
Շնորհավորում ենք ձեզ Երեխաների պաշտպանության միջազգային օրվա կապակցությամբ☀️
Մաղթում ենք, որ միշտ լինեք սիրված, պաշտպանված, ապահով և երջանիկ։ Թող ձեր մանկությունն անցնի խաղաղ ու հոգատար միջավայրում, որտեղ հարգվում են ձեր իրավունքները և լսելի է ձեր ձայնը։
✅️Այս օրը հատկապես ցանկանում ենք խոսել այն երեխաների հետ, ովքեր ապրում են ընտանեկան բռնության կամ բռնարար միջավայրում։ Եթե ձեր ընտանիքում կան վիրավորանքներ, նվաստացումներ, սպառնալիքներ, ծեծ կամ ցանկացած այլ բռնություն, հիշե՛ք՝ դուք իրավունք ունեք ապրելու անվտանգ և արժանապատիվ պայմաններում։
🫂Եթե ենթարկվում եք բռնության կամ ականատես եք լինում դրա դրսևորումներին, մի՛ լռեք։ Խոսեք այն մեծահասակի հետ, ում վստահում եք՝ ուսուցչի, դասղեկի, հոգեբանի, սոցիալական աշխատողի, հարազատի կամ այլ վստահելի անձի հետ։ Կարող եք նաև դիմել ոստիկանություն, երեխաների պաշտպանության ծառայություններին կամ աջակցող կազմակերպություններին։
🔴Հիշե՛ք՝ օգնություն խնդրելը քաջության նշան է, ոչ թե թուլության։ Դուք միայնակ չեք, և կան մարդիկ ու կազմակերպություններ, որոնք պատրաստ են աջակցել և պաշտպանել ձեզ։

01/05/2026

Սիրելի՛ թիմ,
Շնորհավորում եմ ձեզ Աշխատավորի օրվա կապակցությամբ ❤️
Ձեր աշխատանքը պարզապես մասնագիտություն չէ, այլ մարդասիրության, հոգատարության և մեծ պատասխանատվության լավագույն դրսևորում։ Ամեն օր դուք ուժ ու հույս եք տալիս նրանց, ովքեր դրա ամենաշատն ունեն կարիքը, կանգնում եք նրանց կողքին դժվար պահերին և պաշտպանում նրանց իրավունքներն ու արժանապատվությունը 🫂
Թող ձեր նվիրումն ու բարի գործերը միշտ արժևորվեն, իսկ ձեր աշխատանքը՝ գնահատվի և տեսանելի լինի բոլորի համար։ Մաղթում եմ ձեզ ուժ, համբերություն և խաղաղ աշխատանքային օրեր։
Շնորհակալություն ձեր կարևոր և մարդկային առաքելության համար 🤝