Federata Shqiptare e Atletikes

18/10/2026

Sot u zhvillua Gjysmëmaratona e Apatinit, në Serbi, ku atletet shqiptare shkëlqyen me rezultatet e tyre!

🥇 Pa diskutim, kampionia jonë Luiza Gega zuri vendin e parë, duke fituar medaljen e artë me rezultatin 1:12:55.

🏃‍♀️ Atletja tjetër shqiptare, Kristina Pura, u rendit në vendin e 6-të me rezultatin 1:24:33.

Por lajmet e mira nuk përfundojnë këtu …

Ekipi Kombëtar Shqiptar u shpall Kampion i Ballkanit në gjysmëmaratonë, falë rezultateve të arritura nga atletet tona në këtë garë 🏆

Urime vajzave tona për këtë sukses dhe përfaqësimin dinjitoz të Shqipërisë! 🇦🇱

16/10/2026

✨ BALKAN ATHLETICS GALA | TIRANË 2026 🇦🇱

Një mbrëmje e veçantë, e mbushur me vlerësime dhe mirënjohje, që kurorëzoi sukseset e atletikës ballkanike për vitin 2026.

Gjatë mbrëmjes Gala, u nderuan atletët më të mirë të sezonit dhe federatat që spikatën gjatë këtij viti, duke vlerësuar përkushtimin, rezultatet dhe kontributin e tyre në zhvillimin e atletikës në rajon. 🏆

Federata Shqiptare e Atletikës shpreh mirënjohjen e saj për Mr. Slobodan Branković, President i Balkan Athletics, Mr. Dobromir Karamarinov, President i European Athletics, si dhe për të gjitha federatat anëtare, delegacionet dhe të ftuarit nga Federata Botërore që na nderuan me praninë e tyre në Tiranë.

Një falënderim i veçantë për Bashkinë e Tiranës, partnerin që bëri të mundur organizimin e kësaj mbrëmjeje të rëndësishme.

Mirënjohje gjithashtu për Tirana International Hotel, MTKS , Olympic Albania, Kompania DoTaxi, Dekor Tirana, Dj Saraci, Hygerta Sako, e tjerë për kontributin, bashkëpunimin dhe mbështetjen e tyre në realizimin e këtij eventi.

Ishte kënaqësi dhe nder për ne të mirëprisnim familjen e atletikës ballkanike në Tiranë, duke ndarë së bashku jo vetëm sukseset e këtij viti, por edhe vizionin për një të ardhme me më shumë bashkëpunim, miqësi dhe arritje sportive.

Balkan Congress & Gala 2026 🇦🇱🤝🏆

15/10/2026

15/10/2026

Momente nga Kongresi Ballkanik i Atletikës 🤝

15/10/2026

KONGRESI BALLKANIK I ATLETIKËS 2026 MBAHET NË TIRANË

14 tetor 2026 | Tiranë, Shqipëri

Më 14 tetor 2026, Tirana u bë qendra e atletikës ballkanike, duke mirëpritur Kongresin e Balkan Athletics, një takim i rëndësishëm që bashkoi përfaqësues të 22 vendeve anëtare për të diskutuar zhvillimin e atletikës, bashkëpunimin rajonal dhe prioritetet e së ardhmes.

Kongresi u organizua nga Federata Shqiptare e Atletikës, e cila mirëpriti delegacionet pjesëmarrëse në kryeqytetin shqiptar, duke krijuar një hapësirë për dialog, shkëmbim përvojash dhe forcimin e marrëdhënieve ndërmjet federatave kombëtare.

Punimet e kongresit nisën me fjalën hapëse të Presidentit të Balkan Athletics, z. Slobodan Branković, dhe vijuan me miratimin e procesverbalit të mbledhjes së mëparshme dhe të axhendës së vitit 2026.

Një nga pikat kryesore të diskutimeve ishte raporti vjetor i Sekretarit të Përgjithshëm, z. Predrag Momirović, i cili paraqiti një pasqyrë të veprimtarisë dhe zhvillimeve të organizatës. Gjithashtu, delegatët diskutuan kalendarin e garave për vitin 2027, duke vlerësuar rëndësinë e koordinimit të aktiviteteve sportive dhe krijimit të mundësive të reja për atletët e rajonit.

Në fokus të kongresit ishte edhe e ardhmja e drejtimit të atletikës ndërkombëtare dhe evropiane, përmes diskutimeve mbi kandidaturat për Presidencën e World Athletics dhe Këshillin e European Athletics, në prag të zgjedhjeve të vitit 2027. Diskutimet për zhvillimin e mëtejshëm të atletikës ballkanike dhe forcimin e bashkëpunimit ndërmjet federatave përmbyllën një axhendë me rëndësi për të ardhmen e sportit në rajon.

Për Federatën Shqiptare të Atletikës, organizimi i këtij kongresi për herë të parë në historinë sportive shqiptare, përfaqëson një moment të rëndësishëm dhe një mundësi për të promovuar Shqipërinë si një partnere aktive në zhvillimin e atletikës ballkanike dhe europiane.

Përmes këtij organizimi, Tirana konfirmoi edhe një herë rolin e saj si një pikë takimi për bashkëpunimin sportiv, duke përcjellë mesazhin e unitetit, solidaritetit dhe angazhimit të përbashkët për një të ardhme më të mirë të atletikës.

Federata Shqiptare e Atletikës falënderon Balkan Athletics , Bashkinë e Tiranës dhe të gjitha delegacionet pjesëmarrëse për bashkëpunimin dhe kontributin në realizimin me sukses të këtij aktiviteti.

03/10/2026

🎀 TETORI ROZË

Federata Shqiptare e Atletikës i bashkohet fushatës së Tetorit Rozë, muajit të ndërgjegjësimit për luftën kundër kancerit të gjirit.

Sporti na mëson çdo ditë se forca, kurajoja dhe këmbëngulja janë çelësi për të përballuar çdo sfidë. Në këtë muaj të veçantë, duam të përcjellim një mesazh të rëndësishëm për çdo grua: kujdesu për veten, dëgjo trupin tënd dhe mos e neglizho kontrollin.

Zbulimi i hershëm mund të shpëtojë jetë.
Le të jemi të gjithë pjesë e ndërgjegjësimit, mbështetjes dhe solidaritetit.

🎀 Së bashku për shëndetin, forcën dhe jetën.

Federata Shqiptare e Atletikës

29/09/2026

🇦🇱 Tirana bëhet qendra e atletikës ballkanike!

Shqipërisë i është besuar për herë të parë organizimi i “Kongresit të Balkan Athletics”, një prej ngjarjeve më të rëndësishme sportive të atletikës rajonale, që do të zhvillohet në Tiranë më 13–15 tetor 2026.

Për tri ditë, Tirana do të mirëpresë drejtues dhe përfaqësues të federatave të atletikës nga Ballkani, në takime ku do të diskutohen zhvillimi i sportit, kalendari ndërkombëtar dhe bashkëpunimet e ardhshme. Fakti që organizimi i këtij eventi madhor i është besuar Federatës Shqiptare të Atletikës përbën një vlerësim të rëndësishëm për punën e bërë dhe progresin e atletikës shqiptare gjatë këtij viti.

Kongresi gjithashtu, do të ketë një peshë të veçantë ndërkombëtare, pasi do të jenë të pranishëm Presidenti dhe Sekretari i Përgjithshëm i Federatës Europiane të Atletikës, si dhe kandidatë për President të “World Athletics” dhe për “Bordin Ekzekutiv”, në kuadër të zgjedhjeve të vitit 2027.

🇦🇱 Për Shqipërinë, ky është më shumë se një event sportiv: është një mundësi për të vendosur atletikën shqiptare në qendër të vëmendjes rajonale, europiane dhe botërore dhe për të forcuar rolin e vendit tonë në atletikën ndërkombëtare !

Ky event organizohet me mbështetjen e Bashkisë së Tiranës .

14/09/2026

🇦🇱 Tirana bëhet qendra e atletikës ballkanike!

Shqipërisë i është besuar për herë të parë organizimi i “Kongresit të Balkan Athletics”, një prej ngjarjeve më të rëndësishme sportive të atletikës rajonale, që do të zhvillohet në Tiranë më 13–15 tetor 2026.

Për tri ditë, Tirana do të mirëpresë drejtues dhe përfaqësues të federatave të atletikës nga Ballkani, në takime ku do të diskutohen zhvillimi i sportit, kalendari ndërkombëtar dhe bashkëpunimet e ardhshme. Fakti që organizimi i këtij eventi madhor i është besuar Federatës Shqiptare të Atletikës përbën një vlerësim të rëndësishëm për punën e bërë dhe progresin e atletikës shqiptare gjatë këtij viti.

Kongresi gjithashtu, do të ketë një peshë të veçantë ndërkombëtare, pasi do të jenë të pranishëm Presidenti dhe Sekretari i Përgjithshëm i Federatës Europiane të Atletikës, si dhe kandidatë për President të “World Athletics” dhe për “Bordin Ekzekutiv”, në kuadër të zgjedhjeve të vitit 2027.

🇦🇱 Për Shqipërinë, ky është më shumë se një event sportiv: është një mundësi për të vendosur atletikën shqiptare në qendër të vëmendjes rajonale, europiane dhe botërore dhe për të forcuar rolin e vendit tonë në atletikën ndërkombëtare !

10/09/2026

Pas përfundimit të eventeve të rëndësishme ndërkombëtare të këtij sezoni, Federata Shqiptare e Atletikës falënderon sportistët kuqezi, trajnerët, stafin, bashkëpunëtorët dhe të gjithë ata që kontribuojnë çdo ditë për zhvillimin e atletikës shqiptare.

📅 Kalendari i garave të ardhshme në Shqipëri :

🏃 20 Shtator 2026 – Gjysmë Maratona e Korçës
Në bashkëpunim me Maraton Albania dhe Bashkinë Korçë.

🏃 4 Tetor 2026 – Mini Maratona e Shkodrës
Edicioni i dytë, në bashkëpunim me Vllaznia Atletike dhe Bashkinë Shkodër.

🏃 25 Tetor 2026 – Tirana Marathon
Maratona më e madhe e Shqipërisë, që mbledh çdo vit vrapues nga Shqipëria dhe më gjerë.

🇦🇱 Tre qytete, tre sfida dhe shumë emocione për atletikën dhe sportin shqiptar!

Të gjithë të apasionuarit pas vrapimit mund të marrin pjesë. Regjistrimet bëhen përmes linkeve përkatëse në faqet zyrtare apo rrjete sociale të çdo maratone-je.

Suksese të gjithë pjesëmarrësve 🏃‍♀️🏃

03/09/2026

Përfundojnë Lojërat Mesdhetare 2026

Në Taranto, Itali, u zhvilluan Lojërat Mesdhetare 2026, ku atletika shqiptare u përfaqësua nga Markelo Mema, Yipsi Moreno dhe Franko Burraj. Të tre sportistët, të kualifikuar me pikë olimpike, patën mundësinë të garonin në një prej kompeticioneve më të rëndësishme të rajonit.

Markelo Mema, në debutimin e tij në Lojërat Mesdhetare, zhvilloi një paraqitje të mirë duke u renditur në vendin e 4-t, vetëm një hap larg podiumit.

Franko Burraj debutoi në garën e tij, duke konkurruar mes atletëve më të mirë të Mesdheut. Edhe pse nuk arriti të sigurojë një vend në finale, pjesëmarrja në këtë nivel është një eksperiencë e rëndësishme për vazhdimësinë e tij sportive.

Yipsi Moreno e mbylli garën në vendin e 6-të, duke kompletuar paraqitjen e atletikës shqiptare në këtë edicion.

Dhe ky kompeticion, shënon përfundimin e eventeve të rëndësishme ndërkombëtare të sezonit 2026.

FSHA falënderon të gjithë atletët kuqezi, trajnerët, stafin dhe bashkëpunëtorët për punën e palodhur, përkushtimin dhe përmirësimin e përfaqësimit atletik të Shqipërisë në këto evente.

Suksese në sfidat e ardhshme dhe sa më shumë arritje ! 🇦🇱