Vatra Tampa Bay

09/06/2026

📢Përgjigje Zyrtare nga Vatra Tampa Bay📢

Të nderuar anëtarë dhe miq të komunitetit,

Falenderojmë të gjithë ata që na kanë drejtuar kërkesën për një qëndrim zyrtar të Vatrës Tampa Bay lidhur me protestat që po zhvillohen në Shqipëri.

Vatra Tampa Bay është dhe do të mbetet një organizatë plotësisht jopolitike. Statuti ynë na ndalon në mënyrë të qartë dhe strikte të marrim pjesë në çdo çështje që ka natyrë politike ose që mund të perceptohet si e tillë. Prandaj, ne nuk mund dhe nuk do të marrim pjesë, të mbështesim, apo të kundërshtojmë asnjë protestë, lëvizje apo pozicion politik.

Ne besojmë se protestat paqësore janë shprehje e demokracisë dhe një element jetik për ekzistencën e një qeverisjeje demokratike. Në këtë kuadër, ne respektojmë plotësisht të drejtën e çdo individi për të ushtruar lirinë e fjalës dhe për të protestuar në mënyrë paqësore, civile dhe në përputhje të plotë me ligjin.

Vatra Tampa Bay do të vazhdojë të përqendrohet në misionin e saj kryesor: ruajtjen e gjuhës, kulturës dhe identitetit shqiptar, forcimin e unitetit të komunitetit, dhe organizimin e aktiviteteve shoqërore, arsimore e kulturore në shërbim të anëtarëve tanë.

Faleminderit për mirëkuptimin tuaj.
Me respekt,
Vatra Tampa Bay
🇦🇱🦅

09/06/2026

🎊Vatra Tampa Bay i uron Z. Ndue Gjekaj një 70 vjetor të gëzuar! Zoti i dhëntë edhe plot dekada të tjera me shëndet, mbarësi, mirësi e lumturi!🇦🇱💯🎂🍾🥂🎁🎉🎉🎊🎊🎇🎇🇦🇱

Ndue është një ndër mbështetësit më të mëdhenj të Vatra Tampa Bay dhe i mbarë komunitetit tonë. Recitimet e tij patriotike na mbushin me atdhedashuri, krenari, dhe motivim.

Jemi krenarë që e kemi Nduen në mesin tonë. Zoti e bekofte, e lumtëroftë dhe i dhëntë jetë të gjatë plot suksese e gëzime!🙏🙏

Me respekte te larta,
Vatra Tampa Bay♥️🇦🇱🦅

31/05/2026

NJOFTIM I FAMILJES KALANA

Me hidhërim të thellë njoftojmë se është ndarë nga jeta i dashuri ynë:LUAN KALANA --Njëri i fjalës së mirë, shkrimtar dhe publicist i njohur, prind e gjysh shembullor, mik i çmuar dhe njeri me vlera të rralla.

Vizitimi (Viewing):
E Hënë (Monday)
11:00 – 13:00

Vendndodhja:
Curlew Hills Memory Gardens
1750 Curlew Rd.
Palm Harbor, FL 34683

Do ta kujtojmë përherë me dashuri, me buzëqeshjen e tij të ngrohtë, fjalët e mençura dhe pozitivitetin që përcillte tek të gjithë.

U prehtë në paqe!🕊🕊

Vatra Tampa Bay

29/05/2026

Luan Kalana (1948–2026)

Me dhimbje të thellë dhe pikëllim të madh, ju njofojmë ndarjen nga jeta të poetit, publicistit dhe intelektualit të shquar shqiptar Luan Kalana, i cili ndërroi jetë sot më 29 maj 2026. Ai ishte një nga zërat më të dalluar të letërsisë shqiptare në diasporë, një ambasador i pasionuar i kulturës e gjuhës shqipe në Shtetet e Bashkuara të Amerikës.

Luan Kalana lindi më 22 nëntor 1948 në qytetin e Korçës. U rrit dhe u shkollua në Tiranë, ku kreu shkollën pedagogjike “Ndrec Ndue Gjoka” për mësues. Më vonë përfundoi studimet e larta për Gjuhë e Letërsi si dhe për Filozofi. Për më shumë se 30 vjet punoi si mësues në malësinë e Mokrës (Pogradec) dhe në fshatrat e Devollit, duke lënë gjurmë të thella te brezat e rinj. Ai kreu edhe shërbimin ushtarak në Marinë, në Kepin e Rodonit, dhe ishte aktivist i dalluar i rinisë në Devoll, duke marrë pjesë në aksione kombëtare vullnetare si ndërtimi i hekurudhave dhe punimet në Ksamil.

Në vitin 1997 emigroi me familjen e tij (bashkëshorten Zhuljeta Bejleri nga Vishocica e Devollit) fillimisht në Connecticut, pastaj në Florida të SHBA-së. Edhe në diasporë ai vazhdoi me pasion aktivitetin shoqëror e kulturor: mbështeti shoqatat patriotike shqiptare, punoi në shkollat shqipe dhe shpërndau libra falas për ruajtjen e gjuhës e identitetit kombëtar.

Aktiviteti i tij letrar filloi që herët në rini, si korrespondent në shtypin lokal dhe në gazetën “Bashkimi”. Ai botoi studime gjuhësore mbi toponimet dhe fjalët e rralla të shqipes në trevën e Devollit. Pas emigrimit, krijimtaria e tij u pasurua me libra të rëndësishëm si: “Devoll-Albania” (sprovë, 2013), “Devoll-Shqipëri, përjetime 2” (2014), “Prelud krenarie – mozaik letrar” (2016), “Atelie e Shpirtit – jetëshkrime” (2017).

Ai ishte bashkautor i antologjive poetike kombëtare kushtuar figurave si Gjergj Kastrioti Skënderbeu, Ismail Qemali dhe Dritëro Agolli, si dhe përkthyes i veprave si “Nënë Tereza” dhe “Albania – Land of Eagles”. Librat e tij gjenden në Bibliotekën e Kongresit në Washington DC. Njihej edhe me pseudonimin “Shkronjësi modest” dhe fitoi çmime letrare në diasporë. Poezia e tij, plot dashuri për atdheun, natyrën, gjuhën dhe njeriun, është recituar e ndarë gjerësisht në YouTube dhe rrjete sociale.

Luan Kalana mbetet një figurë e nderuar e letërsisë shqiptare, një patriot i vërtetë që e shndërroi emigracionin në një urë lidhëse midis Shqipërisë dhe diasporës. Ai jetoi me krenari identitetin e tij shqiptar dhe e shërbeu atë me penë e zemër deri në ditët e fundit.

Vatra Tampa Bay i shpreh ngushëllimet më të sinqerta familjes së të ndjerit, të afërmve, miqve dhe gjithë komunitetit shqiptar në Florida e më gjerë. Qoftë i lehtë dheu mbi të, e qoftë i përjetshëm kujtimi i tij si një patriot i devotshëm dhe një zë i kulturës sonë kombëtare!

Qoftë i përjetshëm kujtimi i tij! Pushofsh në paqe, o Shkronjës modest i Devollit dhe i Shqipërisë!🙏🙏

Me nderime dhe respekte të larta,
Vatra Tampa Bay

27/05/2026

🕌Kurban Bajram Mubarak! 🕌

Vatra Tampa Bay i uron të gjithë komunitetit shqiptar-musliman në Tampa Bay dhe më gjërë një Bajram të begatë, plot shëndet, paqe, gëzim, dhe bashkim!🕌🇦🇱

Gëzuar festën mbarë! Qofshi të lumtur dhe të bashkuar!

Vatra Tampa Bay🇦🇱♥️

26/05/2026

💯Gëzuar Ditëlindjen, z. Endri Filipi!💯

Vatra Tampa Bay me gjithë zemër i uron anëtarit të bordit, Z. Endri Filipi, edhe 100 vite të tjera plot shëndet të plotë, mbarësi në çdo hap, mirësi, dhe lumturi familjarisht!💯🎂🍾🥂🎁🎊🎊🎉🎉

Falenderojmë me respekt e mirënjohje të veçantë kontributin tënd të çmuar, përkushtimin tënd të vazhdueshëm dhe dashurinë që i ke dhënë komunitetit tonë shqiptar në Tampa Bay.

Urojme që vitet që vijnë të të sjellin vetëm suksese, momente të bukura me familjen dhe plot arritje të reja. Qofsh gjithmonë i lumtur, i shëndetshëm dhe i rrethuar nga njerëz që të duan e të vlerësojnë!

Me respekt dhe falenderime,
Vatra Tampa Bay🇦🇱🦅

25/05/2026

25/05/2026

Vatra Tampa Bay falënderon znj. Nertila Bregu për gjithë ndihmën e saj të vazhdueshme me Shkollën Shqipe Vatra.Znj. Ajo ka qenë një mbështetëse e vazhdueshme dhe e çmuar e shkollës, duke kontribuar me kohë, energji dhe dashuri të madhe për fëmijët dhe komunitetin shqiptar.

Këtu është një kolazh i vajzës së saj, Kasey Bregu.

Faleminderit nga zemra!
Vatra Tampa Bay

24/05/2026

Vatra Tampa Bay falënderon me gjithë zemër znj. Migena Canhasi për reel-in e mrekullueshëm dhe plot emocion që krijoi me rastin e mbylljes së vitit shkollor të Shkollës Shqipe Vatra.

Me talent dhe dashuri të madhe, arritët të përjetësoni momentet më të bukura të këtij viti. Reel-i juaj është bërë një kujtim i paharrueshëm për të gjithë.

Ju falënderojmë për kohën dhe kreativitetin tuaj të çmuar!
Me respekt dhe mirënjohje, Vatra Tampa Bay🇦🇱🦅

24/05/2026

Pikniku i Vatrës Tampa Bay me Rastin e Mbarimit të Vitit Shkollor

Vatra Tampa Bay organizoi sot piknikun e mbylljes së vitit shkollor 2025-2026 të Shkollës Shqipe “Vatra”. Ky aktivitet u zhvillua në prani të prindërve, nxënësve, mësuesve dhe anëtarëve të komunitetit shqiptar.

Presidenti i Vatrës Tampa Bay, z. Isuf Spahiaj, mbajti fjalën e mirëseardhjes, duke falënderuar të gjithë pjesëmarrësit për angazhimin e tyre në ruajtjen e gjuhës dhe identitetit shqiptar.

Më pas, Administratori i Shkollës, z. Tasim Ruko, në fjalimin e tij theksoi rëndësinë e Shkollës Shqipe për brezin e ri në diasporë. Ai vuri në dukje punën e palodhur të stafit pedagogjik gjatë gjithë vitit, si dhe mbështetjen e fortë e të vazhdueshme nga prindërit dhe anëtarët e komunitetit.

Gjatë ceremonisë u ndanë certifikatat e suksesit për të gjithë nxënësit që përfunduan vitin shkollor, si dhe certifikata falënderimi për prindërit mbështetës, sponsorët dhe mësuesit.

Pjesëmarrësit shijuan ushqime tradicionale shqiptare të përgatitura me kujdes dhe kaluan kohë duke u socializuar e duke forcuar lidhjet mes tyre.

Ky piknik ishte një demonstrim i qartë i forcës dhe unitetit të komunitetit shqiptar në Tampa Bay. Shkolla Shqipe Vatra mbetet një nga shtyllat kryesore për ruajtjen e identitetit kombëtar larg atdheut.

Vatra Tampa Bay falënderon ngrohtësisht të gjithë nxënësit, stafin pedagogjik, prindërit, anëtarët e komunitetit dhe sponsorët për kontributin e tyre të çmuar gjatë këtij viti shkollor.

Vatra është e vendosur të përgatitet për një vit të ri shkollor, edhe më të suksesshëm dhe më të fortë se ky që sapo mbyllëm.

Me përzëmësi dhe respekte të larta,
Vatra Tampa Bay 🇦🇱🦅