29/10/2025
🌊 MESDHE – Kthime, Kujtesa, Rezistenca
Më 1 dhe 2 nëntor bashkohemi në Shqipëri, dy vite pas marrëveshjes Rama–Meloni, për të ndërtuar komunitet, për të krijuar hapësira reflektimi dhe për të forcuar narrativat dekoloniale. Këtë herë, përpara se të dalim në rrugë, zgjedhim të mblidhemi në një hapësirë kujdesi e solidariteti, sepse besojmë se vetëm nga ngrohtësia e takimit me njëri-tjetrin lind forca për të ndërtuar veprime të përbashkëta dhe për t’i qëndruar përballë, së bashku, padrejtësive.
📢 Nga kjo hapësirë, me energjinë e solidaritetit, do t’i bëjmë zërat tanë të dëgjohen në Tiranë dhe më pas, bashkë me shoket e kolektivit H.A.N.A. në Lezhë, do të çojmë mesazhin tonë përpara CPR-ve: për të thënë jo qendrave të ndalimit, jo eksportimit të dhunës evropiane dhe jo kolonialitetit që riprodhohet çdo ditë në kufijtë tanë.
🌍 A është Europa ende ëndrra jonë?
Kjo është pyetja që do të udhëheqë dy ditët tona së bashku: një pikënisje për të rimenduar solidaritetin dhe përkatësinë përtej kufijve dhe hierarkive që vetë Europa ka ndërtuar.
Do ta shqyrtojmë këtë pyetje përmes diskutimeve të ndërlidhura mbi migracionin, kujtesën dhe varësinë, duke parë se si identitetet dhe marrëdhëniet e nënshtrimit janë formuar nga qendra evropiane. Do të analizojmë marrëveshjen Rama–Meloni si një formë të re vasaliteti politik dhe humbjeje të sovranitetit, rolin e Ballkanit si zonë që "amortizon" dhunën europiane, si dhe lidhjet koloniale mes Italisë dhe Shqipërisë.
🔎Do të ndalemi gjithashtu te Palestina, si një tokë e pushtuar dhe e kolonizuar, dhe te Flotilla, si një frymë rezistence dhe solidariteti që lidh luftërat për drejtësi nëpër kontinente. Po ashtu, do të reflektojmë mbi ekologjinë dekoloniale, të drejtat e punëtorëve dhe lirinë e lëvizjes, duke nxjerrë në pah lidhjet e thella mes luftërave, kolonializmit dhe shkatërrimit mjedisor.
✊🏾✊🏼Së bashku, synojmë ta rimendojmë Mesdheun si një hapësirë politike rezistence dhe solidariteti: për të çmontuar dhunën e së tashmes dhe për të imagjinuar një Europë ndryshe: nga poshtë, të drejtë dhe vërtet dekoloniale.
